Mark 8

လူလေးထောင်ကို ကျွေးခြင်း

(မဿဲ ၁၅:၃၂-၃၉)

1တစ်ရက်နိ အရာတစ်ပြန် လူအများကြီး လာရို့ စုကတ်လီရေ။ သူရို့မာ စားစရာ တစ်ခုလည်း မဟိကတ်လီ။ ယင်းအတွက်န ယေရှုစာ ကိုယ့်တပည့်ရို့ကို ခေါ်ရို့ ပြောလီရေ၊ 2“ဒေ လူရို့ ငါနအတူ ပါကတ်စာ သုံးရက် ဟိကတ်ပျာ အရာ သူရို့မာ စားစရာ တစ်ခုလည်း မဟိဗျာ။ ယင်းအတွက်န ငါ သူရို့ကို ကောင်းကောင်း သနားဖို့ စိတ်ရောက်တေ။ 3ငါ ဒေ လူရို့ကို စားစရာ တစ်ခုလည်း မပီးဘိုင်းန အိမ်တို့ ပြန်ရွှတ်လိုက်တေဆိုကေ သူရို့စာ လမ်းတစ်ပိုင်းမာ အဝမ်းဆာရို့ မောနိုင်စရာ ဟိရေ၊ အကြောင်းကား သူရို့အထဲမာ အဝီးက လာကတ်စာ လူအများကြီး ဟိကတ်တေ။” 4ယင်းခါ တပည့်ရို့စာ ပြောကတ်လီရေ၊ “ဒေ တတိန်းဆဆိတ်နေရာမာ ဒေလှောက် လူကို ကျွေးဖို့အတွက် အကျွန်ရို့ ပေါင်မုန့် ဇာက ရပါဖို့စာလည်း?” 5ယေရှုစာ သူရို့ကို မီးလီရေ၊ “နင်ရို့မာ ပေါင်မုန့် ဇာမျှသျှက် ဟိရေလည်း?” သူရို့စာ ပြောကတ်လီရေ၊ “ခုနစ်သျှက် ဟိပါရေ။”

6သူစာ လူရို့ကို မြေပြင်မာ ထိုင်ဖို့ ခိုင်းလီရေ။ ယင်းနောက် သူစာ ထိုပေါင်မုန့် ခုနစ်သျှက်ကို ယူရို့ ထာဝရဘုရားကို ကျေးဇူးတင်လီရေ။ ယင်းနောက် သူစာ ပေါင်မုန့်တိကို ဖဲ့ရို့ တပည့်ရို့အလက်မာ အပ်လီရေ အရာ တပည့်ရို့စာ လူရို့ကို ဝီပီးကတ်လီရေ။ 7တပည့်ရို့မာ ငါးသျှေလည်းသောက် သုံးလေးကောင် ဟိလီရေ။ ထိုငါးသျှေတိအတွက်လည်း ယေရှုစာ ကျေးဇူးတင်လီရေ အရာ ထိုငါးသျှေတိကို လူရို့ကို ဝီရို့ ပီးဖို့အတွက် တပည့်ရို့အလက်မာ အပ်လီရေ။ 8ယင်းခါ လူရို့ ဝအောင် စားပြီးရေခါ တပည့်ရို့စာ ကျရို့ဟိစာ အပဲ့အခြမ်းတိကို ကောက်ကတ်လီရေ။ ယင်းခါ ခုနစ်တောင်းအပြည့် ရကတ်လီရေ။ 9ယင်းနေရာမာ ယောက်ျား သက်သက် လေးထောင်လှောက် ဟိကတ်လီရေ။ ယင်းနောက် သူစာ လူရို့ကို အိမ်တို့ ပြန်ရွှတ်လိုက်လီရေ၊ 10အရာ သူစာ တပည့်ရို့နအတူ လောင်းတစ်စင်းမာ တက်ရို့ ဒါလမနုသအရပ်တို့ ကြွလီရေ။

နိမိတ်လက္ခဏာ ကြည့်ဖို့တောင်းခြင်း

(မဿဲ ၁၆:၁-၄)

11ယင်းနောက် ထိုနေရာမာ ဖာရိရှဲအဖွဲ့သားရို့စာ လာရို့ ယေရှုန အငြင်းအခုံ လုပ်ကတ်လီရေ၊ အရာ သူရို့စာ ယေရှုကို စုံစမ်းဖို့အတွက် ဂေါင်းခင်ဘုံက နိမိတ်လက္ခဏာတစ်ခု ကြည့်ဖို့ တောင်းကတ်လီရေ။ 12ယင်းအတွက်န သူစာ အသက်ကြီးချရို့ ပြောလီရေ၊ “ဒေခိုက်မာ လူရို့ ဇာဖို့ နိမိတ်လက္ခဏာကို လိုက်ရို့ ရှာနီကတ်စာလည်း? ငါ ကိုယ်ဘင်ရို့ကို အမှန် ပြောရေ၊ ဒေ လူရို့ကို နိမိတ်လက္ခဏာ တစ်ခုလည်း ပြလိမည် မဟုတ်။” 13ယင်းနောက် သူစာ ထိုလူရို့ကို ထားရို့ အရာတစ်ပြန် လောင်းမာ တက်ရို့ မြစ်ကမ်းတစ်ဖက်တို့ ကူးလီရေ။

တပည့်ရို့ကို သတိပီးခြင်း

(မဿဲ ၁၆:၅-၁၂)

14တပည့်ရို့မာ ပေါင်မုန့် ယူဖို့ မိလားခကတ်လီရေ။ လောင်းမာ တက်တေခါ သူရို့ဘားမာ ပေါင်မုန့် တစ်သျှက်တောက်ရာ ပါလီရေ။ 15ယင်းခါ ယေရှုစာ သူရို့ကို ပြောလီရေ၊ “နင်ရို့ သတိထားကတ်၊ ဖာရိရှဲအဖွဲ့သားရို့န ဟေရုဒ်မင်း တဆီးကို ရှောင်ကတ်။” 16ယေရှု ပြောစာစကား ကြားရို့ တပည့်ရို့စာ ကိုယ်ရို့အချင်းချင်း ပြောကတ်လီရေ၊ “ငါရို့မာ ပေါင်မုန့် မပါလတ်တေအတွက်န ဆရာ ဒေပိုင် စကားကို ပြောစာလော မသိ။” 17တပည့်ရို့ ပြောစာစကားကို ယေရှု နားလည်ရို့ သူရို့ကို ပြောလီရေ၊ “နင်ရို့မာ ပေါင်မုန့် မပါလတ် ဟို့ ဇာဖို့ ပြောကတ်စာလည်း? နင်ရို့ဒေဂုလည်း မမြင်ကတ်သိလော အရာ နားမလည်ကတ်သိလော? နင်ရို့မာ စိတ်နှလုံး ကောင်းကောင်း ကျန်းလားခဗျာလော? 18နင်ရို့မာ မျက်စိဟိရို့လည်း မမြင်ရကတ်လော? နားဟိရို့လည်း မကြားရကတ်လော? စိတ်မာလည်း တွက်ရို့ မရကတ်လော? 19ငါ လူငါးထောင်အတွက် ပေါင်မုန့် ငါးသျှက်ကို ဖဲ့ရို့ ဝီပီးလီရေခါ အပဲ့အခြမ်း ကျရို့ဟိစာက နင်ရို့ ဇာမျှတောင်း ကောက်လီကတ်တေလည်း?” တပည့်ရို့စာ အဖြေပီးကတ်လီရေ၊ “တစ်ဆယ့်နှစ်တောင်းပါ။” 20ယေရှု အရာလည်း မီးလီရေ၊ “ငါ လူလေးထောင်အတွက် ပေါင်မုန့် ခုနစ်သျှက်ကို ဖဲ့ရို့ ဝီပီးလီရေခါ အပဲ့အခြမ်း ကျရို့ဟိစာက နင်ရို့ ဇာမျှတောင်း ကောက်လီကတ်တေလည်း?” တပည့်ရို့စာ အဖြေပီးကတ်လီရေ၊ “ခုနစ်တောင်းပါ။” 21ယင်းခါ ယေရှုစာ တပည့်ရို့ကို ပြောလီရေ၊ “နင်ရို့ အဂုလည်း နားမလည်ကတ်သိလော?”

မျက်ကန်းတစ်ယောက် အကောင်းဖြစ်ခြင်း

22ယင်းနောက် ယေရှုန သူ့တပည့်ရို့စာ ဗက်ဇဲဒရွာတို့ ကြွကတ်လီရေ။ ယင်းခါ ရွာသားရို့စာ မျက်ကန်းတစ်ယောက်ကို ယေရှုတို့ ယူလာကတ်လီရေ အရာ မျက်ကန်းခန္ဓာမာ အလက်တင်ရို့ အကောင်း လုပ်ဖို့အတွက် ယေရှုကို တောင်းပန်ကတ်လီရေ။ 23ယင်းခါ ယေရှုစာ မျက်ကန်းအလက်ကို ကိုင်ရို့ ရွာပြင်တို့ ထုတ်ယူလားခလီရေ။ ယင်းနောက် သူစာ မျက်ကန်း မျက်စိမာ တန်းဆီးဖြန်းလီရေ အရာ သူ့ခန္ဓာမာ အလက်တင်ရို့ မီးလီရေ၊ “နင် တစ်ခုမသာ မြင်ရလော?”

24မျက်ကန်းစာ ကြည့်ရို့ ပြောလီရေ၊ “အကျွန် လူရို့ကို မြင်ရပါဗျာ။ သူရို့စာ အပင်နတူကတ်ပါရေ အရာ လားလည်း လားနီကတ်ပါရေ။” 25ယေရှုစာ အရာတစ်ပြန် သူ့မျက်စိမာ အလက်တင်လီရေ။ ယင်းခါရာ သူ့မာ မျက်စိစာ ပွင့်ရို့ ကြည့်ဖို့ အားရလီရေ။ သူစာ ဟိသမျ အားကုံးကို ကကြင်းလလင်း မြင်ရလီရေ။ 26ယင်းနောက် ယေရှုစာ သူ့ကို အိမ်တို့ မရွှတ်ခင် အယင်က ပြောလီရေ၊ “နင် အိမ်တို့ လားရေခါ ဗက်ဇဲဒရွာတို့ မဝင်လီကေ့။”

ယေရှုကို ခရစ်တော် ဟို့ ဝန်ခံခြင်း

(မဿဲ ၁၆:၁၃-၂၀၊ လုကာ ၉:၁၈-၂၀)

27ယင်းနောက် ယေရှုန သူ့တပည့်ရို့စာ ဖိလိပ္ပု-ကဲသရိမြို့ အပါးနီးဝန်းကျင်မာဟိစာ ရွာတိတို့ ကြွကတ်လီရေ။ ကြွရေလမ်းမာ ယေရှုစာ တပည့်ရို့ကို မီးလီရေ၊ “လူရို့ ငါ့ကို အသူ ဖြစ်တေ ဟို့ ပြောကတ်တေလည်း?” 28တပည့်ရို့စာ အဖြေပီးကတ်လီရေ၊ “တစ်ယောက်တစ်ရီ ပြောကတ်ပါရေ၊ ကိုယ်တော် ရီနှစ်မင်္ဂလာပီးသူ ယောဟန် ဖြစ်တေ။ တစ်ယောက်တစ်ရီ ပြောကတ်ပါရေ၊ ဧလိယ ဖြစ်တေ။ အရာ တစ်ယောက်တစ်ရီ ပြောကတ်ပါရေ၊ ကိုယ်တော် ဘုရားသတင်းပို့သူရို့အထဲက တစ်ပါး ဖြစ်တေ။” 29ယင်းခါ ယေရှုစာ သူရို့ကို မီးလီရေ၊ “ယေကေလည်း နင်ရို့ကား ငါ့ကို အသူဖြစ်တေ ဟို့ ပြောကတ်တေလည်း?” ပေတရုစာ အဖြေပီးလီရေ၊ “ကိုယ်တော် ခရစ်တော် ဖြစ်ပါရေ။” 30ကိုယ့်အကြောင်းကို တစ်ယောက်ဘားမာလည်း မပြောရအောင် ယေရှုစာ တပည့်ရို့ကို တတင်းရရင်း ဟန့်လိုက်လီရေ။

ကိုယ်သီဖို့စာ အကြောင်းကို ပထမခေါက် ပြောပြခြင်း

(မဿဲ ၁၆:၂၁-၂၃၊ လုကာ ၉:၂၁-၂၂)

31ယင်းနောက် ယေရှု ကိုယ့်တပည့်ရို့ကို ဒေပိုင် သွန်သင်ပီးဖို့ စလီစာကား၊ မနုသသားတော်စာ ဒုက္ခ-ဝေဒနာ အများကြီး ခံရလိမည်။ ဂေါင်းဆောင်ဝါကြီးရို့၊ ယဇ်ပုရောဟိတ်အကြီးရို့ အရာ ကျမ်းဆရာရို့စာ သူ့ကို ငြင်းပယ်ကတ်လိမည်၊ သူ့ကို အသီသတ်ကတ်လိမည် အရာ သူစာ သုံးရက်နိမာ သီရာက ပြန်ရှင်ထမြောင့်လိမည်။ 32ထိုစကားတိကို သူစာ ပပွင့်လလင်း ပြောပြလီရေ။ ယင်းခါ ပေတရုစာ ယေရှုကို တစ်ဖက်တို့ ခေါ်ယူပြီးကေ ဟောက်လီရေ။ 33ယေကေလည်း ယေရှုစာ တပည့်ရို့ဖက်တို့ လှည့်ကြည့်ရို့ ပေတရုကို ဟောက်ရို့ ပြောလီရေ၊ “မာရ်နတ်၊ နင် ငါ့နိုင်ဗြင်းက ပျောက်လီ! နင် ထာဝရဘုရား၏ အလိုဆန္ဒကို မစဉ်းစားဘိုင်းန လူရို့ အလိုဆန္ဒကို စဉ်းစားနီရေ။”

နင့်ကားတိုင်ကို ရွက်ရို့ ငါ့နောက်က လိုက်ရဖို့

(မဿဲ ၁၆:၂၄-၂၈၊ လုကာ ၉:၂၃-၂၇)

34ယင်းနောက် ယေရှုစာ တပည့်ရို့န အခြားလူရို့ကို ကိုယ့်အနားတို့ ခေါ်ရို့ ပြောလီရေ၊ “အသူမဆို ငါ့နောက်က လိုက်ချင်ရေဆိုကေ သူစာ ကိုယ့်ကို ငြင်းပယ်ရဖို့ အရာ သူစာ ကိုယ့်ကားတိုင်ကို ရွက်ရို့ ငါ့နောက်က လိုက်ရဖို့။ 35အကြောင်းကား အသူမဆို ကိုယ့်အသက်ကို ကယ်ဆယ်ချင်ရေဆိုကေ သူစာ ကိုယ့်မာ ထာဝရအသက်ကို ဆုံးရလိမည်၊ ယေကေလည်း အသူမဆို ငါ့အကြောင်းန အရာ ထာဝရဘုရား၏ သတင်းကောင်းအကြောင်းန ကိုယ့်အသက်ကို အဆုံးခံရေဆိုကေ သူစာ ကိုယ့်မာ ထာဝရအသက်ကို ကယ်ဆယ်လိမည်။ 36အသူမဆို တစ်လောကလုံးကို အနိုင်ရရို့ပင်လည်း ကိုယ့်မာ ထာဝရအသက်ကို ဆုံးရရေဆိုကေ ယင်းသူမာ ဇာအမြတ် ဟိရေလည်း? 37အကြောင်းကား ထာဝရအသက်ကို ပြန်ရဖို့အတွက် ယင်းသူမာ ပီးစရာ ဇာ ဟိရေလည်း? 38ဒေခိုက်မာ သစ္စာမဟိသူရို့န လူဆိုးရို့အထဲက အသူမဆို ငါန ငါ့စကားကို ယူရို့ ရှက်တေဆိုကေ မနုသသားတော်လည်း သန့်ရှင်းစာ ဂေါင်းခင်နတ်သားရို့နအတူ ကိုယ့်အဖ၏ ဘုန်းတန်ခိုးကို ဆောင်ရို့ ကြွလာရေခါ ယင်းသူကို ယူရို့ ရှက်လိမည်။”