Mark 9
1ယင်းနောက် ယေရှုစာ တပည့်ရို့ကို ပြောလီရေ၊ “ငါ နင်ရို့ကို အမှန် ပြောရေ၊ ထာဝရဘုရား၏ နိုင်ငံတော် မဟာတန်ခိုးန တည်စာကို မမြင်ရသကြား တစ်ခုပိုင်လည်း သီရဖို့ မဟုတ်စာ လူလိုင်းကေယောက် ဒေ နေရာမာ ဟိကတ်တေ။”ယေရှု မျက်နှာက ဘုန်းရောင်ခြေတော် ထွက်ခြင်း
(မဿဲ ၁၇:၁-၁၃၊ လုကာ ၉:၂၈-၃၆)
2ခြောက်ရက် ရွန်ရေခါ ယေရှုစာ သက်သက် ပေတရု၊ ယာကုပ် အရာ ယောဟန်ကို ခေါ်ရို့ တောင်အမြင့်ကြီး တစ်တောင်တို့ တက်လီရေ။ ယေရှုမာ မျက်နှာစာ သူရို့ ရှိက ပြောင်းလှဲလားခလီရေ။ 3သူ့မာ အဝတ်တိစာ ဖဖွီးဆဆွ ဖြစ်လားခလီရေ။ ဒေ ကမ္ဘာမာ ကဝါသေရို့ပင် အဝတ်အစားတိကို ဒေပိုင် ဖဖွီးဆဆွ ဖြစ်အောင် ဖွတ်နိုင်ကတ်ဖို့ မဟုတ်။ 4တပည့်ရို့စာ ထိုနေရာမာ ဧလိယန မောရှေကို ယေရှုနအတူ စကားပြောရို့ မြင်ရကတ်လီရေ။ 5ပေတရုစာ ယေရှုကို ပြောလီရေ၊ “ဆရာ၊ အကျွန်ရို့ ဒေ နေရာမာ ဟိကတ်စာ ကောင်းပါရေ။ အကျွန်ရို့ ဒေ နေရာမာ တဲသုံးဆောင် ဆောက်ကတ်ပါမည်။ ကိုယ်ဘင်အတွက် တစ်ဆောင်၊ မောရှေအတွက် တစ်ဆောင် အရာ ဧလိယအတွက် တစ်ဆောင် ဆောက်ကတ်ပါမည်။” 6ကောင်းကောင်း ကြောက်လီရေအတွက်န ဇာ ပြောရဖို့လည်းဆိုစာကို သူစာ စဉ်းစားရို့ မရလီ။ 7ယင်းအချိန်ခါ မိုးရိပ်တစ်ခဲ လာရို့ သူရို့ကို ချုပ်ဘိုက်လီရေ။ အရာ ယင်းမိုးရိပ်အထဲက ဒေပိုင် စကားပြောသံကို ကြားရလီရေ၊ “ဒေသူ ငါ့အချစ်သား ဖြစ်တေ။ နင်ရို့ သူ့စကားကို နားထောင်ကတ်။” 8ထိုစကားကို ကြားရို့ တပည့်ရို့စာ ချက်ချင်း လေးဖက်လက်စိတို့ ဝန်းရို့ယာရို့ ကြည့်ကတ်လီရေ၊ ယေကေလည်း သူရို့စာ ယေရှုကို ပယ်ရို့ အရာတစ်ယောက်ကိုလည်း မမြင်ရကတ်လီဗျာ။ 9တောင်က ဆင်းလာကတ်တေခါ ယေရှုစာ တပည့်သုံးယောက်ကို အာဏာပီးလီရေ၊ “နင်ရို့ တောင်ထက်မာ မြင်ခကတ်စာ အကြောင်းတိကို မနုသသားတော် သီရာက ပြန်ရှင်မထမြောင့် သကြား တစ်ယောက်ဘားမာလည်း မပြောလီကတ်ကေ့။” 10ယေရှု အာဏာပီးရေအတိုင်း တပည့်ရို့စာ ထိုအကြောင်းအရာတိကို ကိုယ်ရို့ စိတ်မာ မှတ်ထားကတ်လီရေ။ ယေကေလည်း သူရို့စာ သီရာက ပြန်ရှင်ထမြောင့်ဖို့စာ စကား အဓိပ္ပါယ် ဇာလည်းဆိုစာကို ကိုယ်ရို့အထဲမာ တိုင်ဘင်ကတ်လီရေ။ 11ယင်းနောက် သူရို့စာ ယေရှုကို မီးကတ်လီရေ၊ “ခရစ်တော် ကြွမလာခင်အယင်က ဧလိယ ကြွလာရဖို့ ဆိုပြီးကေ ကျမ်းဆရာရို့ ဇာဖို့ ပြောနီကတ်ပါစာလည်း?” 12ယေရှုစာ သူရို့ကို အဖြေပီးလီရေ၊ “ဧလိယ အမှန် ကြွလာရို့ ဟိသမျ အားကုံးကို အဆင်သင့် လုပ်ဖို့။ ယေကေလည်း မနုသသားတော်စာ အများကြီး ဒုက္ခ-ဝေဒနာကို ခံရဖို့ အရာ လူရို့စာ သူ့ကို ငြင်းပယ်ကတ်ဖို့ ဆိုပြီးကေ ကျမ်းစာမာ ဇာဖို့ ဒေပိုင် ရွီးရို့ ဟိစာလည်း? 13ယေကေလည်း ငါ နင်ရို့ကို ပြောရေ၊ ကျမ်းစာမာ ရွီးရို့ ဟိရေအတိုင်း ဧလိယ ကြွလာလီရေ။ အရာ လူရို့စာ သူ့ကို ကိုယ်ရို့ စိတ်တချင် ညှဉ်းဆဲလီကတ်တေ။”နတ်ဆိုးကိုင်စာ ယောက်ျားသျှေ အကောင်းဖြစ်ခြင်း
(မဿဲ ၁၇:၁၄-၂၁၊ လုကာ ၉:၃၇-၄၃)
14ယင်းနောက် ယေရှုန တပည့်သုံးယောက်စာ ကျန်ခစာ တပည့်ရို့တို့ ပြန်လာကတ်လီရေ။ ယင်းခါ သူရို့ လေးဖက်လက်စိမာ လူအများကြီး စုရို့ ဟိကတ်စာန ကျမ်းဆရာ လိုင်းကေယောက် ထိုတပည့်ရို့န အငြင်းအခုံ ဖြစ်နီကတ်စာကို မြင်ရကတ်လီရေ။ 15ထိုလူရို့စာ ယေရှုကို မြင်ရေခါ ကောင်းကောင်း အံ့ဩကတ်လီရေ အရာ ယေရှုတို့ ဗြီးလားရို့ သူ့ကို ကြိုဆိုကတ်လီရေ။ 16ယေရှုစာ ကျမ်းဆရာရို့ကို မီးလီရေ၊ “ကိုယ်ဘင်ရို့ ငါ့တပည့်ရို့န ဇာ အကြောင်းကို ယူရို့ အငြင်းအခုံ လုပ်နီကတ်စာလည်း?” 17ယင်းခါ လူကျိုင်ထဲက တစ်ယောက်စာ အဖြေပီးလီရေ၊ “ဆရာ၊ အကျွန့် သားကို ကိုယ်ဘင် တပည့်ရို့တို့ ယူခလီပါရေ။ သူ့ကို ပပွါးနတ် ကိုင်ထားရေအတွက်န စကားပြောဖို့ မနိုင်ပါ။ 18ယင်းနတ်ဆိုးစာ အကျွန့် သားကို ကိုင်ရေချက်ချင်း မြေပြင်မာ လှဲချပါရေ။ သူ့ပစက အမြှုပ်ထွက်ပါရေ၊ သူစာ သွားချင်းသွား ကြိတ်ပါရေ အရာ သူ့ခန္ဓာစာ ကျကျန်းတတက် ဖြစ်လားခပါရေ။ အကျွန် သူ့ကို ကိုယ်ဘင် တပည့်ရို့တို့ ယူခရို့ နတ်ဆိုး နှင်ထုတ်ဖို့ ခိုင်းလီပါရေ၊ ယေကေလည်း သူရို့ နှင်ထုတ်ဖို့ မနိုင်လီကတ်ပါ။” 19ယင်းခါ ယေရှုစာ ပြောလီရေ၊ “အိုး မကျုံသူရို့! ငါ နင်ရို့နအတူ ဇာမျှရက် နီဖို့သိလည်း? အရာ နင်ရို့ကို ဇာမျှရက် သည်းခံရို့ နီဖို့သိလည်း? နင့် သားကို ငါ့တို့ ယူခ။” 20ယင်းခါ လူရို့စာ ထိုသူကို ယေရှုတို့ ယူလာကတ်လီရေ။ နတ်ဆိုးစာ ယေရှုကို မြင်ရေခါ ထိုသူကို ကောင်းကောင်း ပပြန်းတုန်အောင် လုပ်လီရေ။ အရာ သူ့ပစက အမြှုပ်ထွက်ရို့ သူစာ မြေပြင်မာ လူးနီလီရေ။ 21ယေရှုစာ သူ့အဖကို မီးလီရေ၊ “ဒေသူ ဒေပိုင် ဖြစ်နီစာ ဇာမျှရက် ဟိဗျာလည်း?” အဖစာ အဖြေပီးလီရေ၊ “အသျှေကပင် ဖြစ်ရို့ လာပါစာ။ 22ဒေ နတ်ဆိုးစာ အကျွန့်သားကို သတ်ဖို့အတွက် အမြဲတိုင်း ရီမာ မဟုတ်ကေ မီးမာ ချလီပါရေ။ ယေကေလည်း ကိုယ်ဘင် တတ်နိုင်ရေဆိုကေ အကျွန့်ရို့ကို ကျေးဇူးပြုပါ။” 23ယေရှုစာ သူ့ကို ပြောလီရေ၊ “တတ်နိုင်ရေဆိုကေ စကား အဓိပ္ပါယ် ဇာလည်း? ကျုံသူအတွက် အားကုံးစာ ဖြစ်နိုင်ရေ။” 24ချက်ချင်း ထိုသူမာ အဖစာ အားန အော်ရို့ ပြောလီရေ၊ “အကျွန် ကျုံပါရေ၊ ယေကေလည်း အကျွန့်မာ မယုံသင်္ခါစိတ်ကို ပျောက်ကင်းစီပါ။” 25လူအများကြီး ကိုယ့်တို့ ဗြီးလာကတ်စာကို မြင်ရို့ ယေရှုစာ နတ်ဆိုးကို ဟောက်ရို့ ပြောလီရေ၊ “အဝေး နားပင်း-ပပွါးနတ်၊ ငါ နင့်ကို အာဏာချရေ၊ နင် ဒေသူခန္ဓာက ထွက်လားလီ။ နင် အရာတစ်ခါလည်း ဒေသူ ခန္ဓာမာ မဝင်ကေ့။” 26ယင်းခါ နတ်ဆိုးစာ အားန အော်ရို့ ထိုသူကို ပပြန်းတုန်တက်အောင် လုပ်ရို့ ထွက်လားခလီရေ။ ယင်းအတွက်န ထိုသူစာ အသီပိုင် မြေပြင်မာ လဲရို့ ကျန်ဟိလိုက်လီရေ။ ယင်းသျှင့်ကို မြင်ရို့ လူရို့စာ ပြောကတ်လီရေ၊ “ယင်းသူ သီလားခဗျာ။” 27ယေကေလည်း ယေရှုစာ သူ့အလက်ကို ကိုင်ရို့ ထူလီရေခါ သူစာ ထရို့ ရပ်လီရေ။ 28ယင်းနောက် ယေရှုစာ အိမ်ထဲတို့ ဝင်လီရေ။ ယင်းခါ တပည့်ရို့စာ သူ့ကို မီးကတ်လီရေ၊ “အကျွန်ရို့ ဇာဖို့ နတ်ဆိုးကို နှင်ထုတ်ဖို့ မနိုင်လီပါစာလည်း?” 29ယင်းခါ ယေရှုစာ အဖြေပီးလီရေ၊ “ထာဝရဘုရားဘားမာ ဆုမတောင်းဘိုင်းန ဒေပိုင် နတ်ဆိုးတိကို တစ်ခုပိုင်လည်း နှင်ထုတ်ဖို့ နိုင်မည် မဟုတ်။”ကိုယ်သီဖို့စာ အကြောင်းကို ဒုတိယခေါက် ပြောပြခြင်း
(မဿဲ ၁၇:၂၂-၂၃၊ လုကာ ၉:၄၃-၄၅)
30ယင်းနောက် ယေရှုန သူ့တပည့်ရို့စာ ထိုနေရာက ထွက်ရို့ ဂါလိလဲပြည်နယ်ထဲက ဝင်ရို့ ကြွလားခကတ်လီရေ။ သူစာ ကိုယ်ဇာတို့ ကြွရေလည်းဆိုစာကို တစ်ယောက်ကိုလည်း မသိစီချင်လီ၊ 31အကြောင်းကား ယင်းခါ သူစာ ကိုယ့်တပည့်ရို့ကို သွန်သင်ပီးရို့ ဟိလီရေ။ သူစာ တပည့်ရို့ကို ပြောလီရေ၊ “မနုသသားတော်စာ လူရို့အလက်မာ အဖမ်းခံရလိမည်။ လူရို့စာ သူ့ကို အသီသတ်ဘိုက်ကတ်လိမည် အရာ သူစာ သုံးရက်နိမာ သီရာက ပြန်ရှင်ထမြောင့်လိမည်။” 32ယေကေလည်း တပည့်ရို့စာ ယေရှု ပြောစာစကား အဓိပ္ပါယ်ကို နားမလည်ကတ်လီ။ အရာ သူရို့စာ စကား အဓိပ္ပါယ် ဇာလည်းဆိုစာကို ယေရှုကို မီးဖို့လည်း မဝံ့ကတ်လီ။တပည့်ရို့အထဲမာ အကြီးဆုံး အသူလည်း?
(မဿဲ ၁၈:၁-၅၊ လုကာ ၉:၄၆-၄၈)
33ယင်းနောက် ယေရှုန သူ့တပည့်ရို့စာ ကပေရနောင်မြို့သျှေတို့ ကြွလားခကတ်လီရေ။ သူစာ အိမ်ထဲတို့ ဝင်ရို့ တပည့်ရို့ကို မီးလီရေ၊ “လမ်းမာ လားရေခါ နင်ရို့ ဇာ အကြောင်းကို ယူရို့ အငြင်းအခုံ ဖြစ်လီကတ်စာလည်း?” 34ယေကေလည်း သူရို့စာ တိန်းရို့ နီကတ်လီရေ၊ အကြောင်းကား သူရို့စာ လမ်းမာ လားရေခါ အကြီးဆုံး အသူလည်းဆိုစာ အကြောင်းကို ယူရို့ ကိုယ်ရို့အချင်းချင်း အငြင်းအခုံ ဖြစ်လီကတ်တေ။ 35ယင်းခါ ယေရှုစာ ထိုင်ရို့ တပည့်တစ်ဆယ့်နှစ်ယောက်ကို ကိုယ့်အနားတို့ ခေါ်ရို့ ပြောလီရေ၊ “နင်ရို့အထဲမာ အကြီးဆုံး ဖြစ်ချင်သူစာ အားကုံးသူထက် အသျှေဆုံး ဖြစ်ရဖို့ အရာ အားကုံးသူကို ပြုဇုသူ ဖြစ်ရဖို့။” 36ယင်းနောက် သူစာ အသျှေတစ်ယောက်ကို ခေါ်ရို့ တပည့်ရို့ ရှိက ရပ်စီလီရေ။ အရာ ယင်းအသျှေကို ရွက်ရို့ ပြောလီရေ၊ 37“အသူမဆို ငါ့နာမည်န ဒေ အသျှေပိုင် တစ်ယောက်ကို လက်ခံရေဆိုကေ သူစာ ငါ့ကို လက်ခံရေ အရာ ငါ့ကို လက်ခံသူစာ သက်သက် ငါ့ကို လက်ခံစာ မဟုတ်သိ။ ယင်းထက်ပင် ငါ့ကို ရွှတ်လိုက်သူကိုလည်း လက်ခံရေ။”ငါရို့ကို မဆန့်ကျင်သူစာ ငါရို့အဖွဲ့သား
(လုကာ ၉:၄၉-၅၀)
38ယောဟန်စာ ယေရှုကို ပြောလီရေ၊ “ဆရာ၊ ကိုယ်ဘင်နာမည်န လူတစ်ယောက် နတ်ဆိုး နှင်ထုတ်စာကို အကျွန်ရို့ မြင်ခပါရေ။ သူစာ အကျွန်ရို့အဖွဲ့သား မဟုတ်ပါ။ ယင်းအတွက်န အကျွန်ရို့ သူ့ကို ဟန့်ဘိုက်ခပါရေ။” 39ယေကေလည်း ယေရှုစာ ပြောလီရေ၊ “သူ့ကို မဟန့်ကတ်ကေ့၊ အကြောင်းကား ငါ့နာမည်န အံ့ဩဖွယ် အလုပ်လုပ်သူစာ ငါ့ကို ပုတ်ခတ်ရို့ စကား မပြောနိုင်။ 40အရာ ငါရို့ကို မဆန့်ကျင်သူစာ ငါရို့အဖွဲ့သား ဖြစ်တေ။ 41ငါ နင်ရို့ကို အမှန် ပြောရေ၊ အသူမဆို နင်ရို့ကို ခရစ်တော်၏ တပည့် ဟို့ မှတ်ရို့ ရီတစ်ခွက် သောက်ဖို့ ပီးရေဆိုကေ သူစာ ကိုယ့်ဆုမြတ်ကို ရလိမည်။အပြစ်လမ်းတို့ ဆောင်ယူလားခြင်း
(မဿဲ ၁၈:၆-၉၊ လုကာ ၁၇:၁-၂)
42“အသူမဆို ငါ့ကို ကျုံကတ်စာ အသျှေရို့အထဲက တစ်ယောက်ကို အပြစ်လမ်းတို့ ဆောင်ယူလားရေဆိုကေ ယင်းသူ လိုင်ဖင်းမာ ကျောက်လုံးကြီးတစ်လုံးကို ဆွဲရို့ ပင်လယ်ထဲတို့ ဘိုက်ချခြင်းကို ခံရစာပင် သူ့အတွက် ပိုရို့ ကောင်းဖို့သိ။ 43“အရာ နင့်အလက်စာ နင့်ကို အပြစ်လမ်းတို့ ဆောင်ယူလားရေဆိုကေ ယင်းအလက်ကို ပိုင်းရို့ ဝဲဘိုက်လိုက်။ နင် အလက်နှစ်ဖက်န ငရဲမီးအိုင်မာ ကျရဖို့စာထက် အလက်အပိုင်း ဖြစ်ရို့ အသက်ရှင်ခြင်းကို ခံရဖို့စာပင် နင့်အတွက် ပိုရို့ ကောင်းဖို့သိ။ ▼▼ပထမဆုံး ရွီးလီစာ ဂရိဘာသာ ကျမ်းစာအဟောင်းတိမာ အခန့်ငယ် ၄၄န ၄၆-မာ စကားတိ ရွီးရို့ မဟိပါ။
44– 45“နင့်အခြီစာ နင့်ကို အပြစ်လမ်းတို့ ဆောင်ယူလားရေဆိုကေ ယင်းအခြီကို ပိုင်းရို့ ဝဲဘိုက်လိုက်။ အခြီနှစ်ဖက်ကို ယူရို့ ငရဲမီးအိုင်မာ ကျရဖို့စာထက် အခြီအပိုင်း ဖြစ်ရို့ အသက်ရှင်ခြင်းကို ခံရဖို့စာပင် နင့်အတွက် ပိုရို့ ကောင်းဖို့သိ။ ထိုငရဲမီးစာ အမြဲတိုင်း တောက်နီရေ။ 46– 47“အရာ နင့် မျက်စိစာ နင့်ကို အပြစ်လမ်းတို့ ဆောင်ယူလားရေဆိုကေ ယင်းမျက်စိကို ထွတ်ရို့ ဝဲဘိုက်လိုက်။ မျက်စိနှစ်လုံးန ငရဲမီးအိုင်မာ ကျရဖို့စာထက် မျက်ကန်း ဖြစ်ရို့ ထာဝရဘုရား၏ နိုင်ငံတော်တို့ ဝင်ရဖို့စာပင် နင့်အတွက် ပိုရို့ ကောင်းဖို့သိ။ 48ထိုငရဲမီးအိုင်မာ လူအသားကို စားစာ လောက်တိစာ တစ်ခါလည်း မသီ အရာ ငရဲမီးလည်းသောက် တစ်ခါလည်း မသီ။ 49 ▼▼ဂရိဘာသာ ကျမ်းစာအဟောင်းမာ ဒေ အခန့်ငယ် ၄၉-မာ စကားအဓိပ္ပါယ်ကို ရှရှင်းလလင်း ရွီးရို့ မဟိပါ။
လူရို့ ယဇ်ကောင်မာ ဆားထည့်ရို့ သန့်စင်အောင် လုပ်စာပိုင် ထာဝရဘုရားလည်း ဟိသမျ လူရို့ကို မီးန သန့်စင်အောင် လုပ်လိမည်။ 50“ဆားစာ အကောင်း ဝန်တစ်ဦး ဖြစ်တေ၊ ယေကေလည်း ဆားမာ အငန်ဓါတ် ပျက်လားခရေဆိုကေ ယင်းအငန်ဓါတ်ကို အရာတစ်ပြန် ဇာပိုင်ပျင်ရို့ ရနိုင်ဖို့သိလည်း? ဆား အကျိုးပီးစာပိုင် နင်ရို့လည်း အခြားလူရို့ကို အကျိုးပီးကတ် အရာ တစ်ယောက်န တစ်ယောက် သသင့်တတင် နီထိုင်ကတ်။”
Copyright information for
RmzSC