Mark 10:17-31
သူဌေးတစ်ယောက် အကြောင်း
(မဿဲ ၁၉:၁၆-၃၀၊ လုကာ ၁၈:၁၈-၃၀)
17ယေရှု အရာတစ်ပြန် လမ်းမာ ထွက်ရို့ ကြွရေခါ လူတစ်ယောက်စာ သူ့တို့ ဗြီးလာလီရေ အရာ သူ့ရှိက ဒူးထောက်ရို့ ပြောလီရေ၊ “ဆရာ၊ ကိုယ်ဘင်ကား လူကောင်းတစ်ယောက် ဖြစ်ပါရေ။ အကျွန့်ကို ပြောပါ၊ ထာဝရအသက်ကို ရဖို့အတွက် အကျွန် ဇာ လုပ်ရပါဖို့လည်း?” 18ယေရှုစာ သူ့ကို ပြောလီရေ၊ “ငါ့ကို ဇာဖို့ လူကောင်း ပြောစာလည်း? ထာဝရဘုရားကို ပယ်ရို့ တစ်ယောက်လည်း လူကောင်း မဟုတ်။ 19နင်ကား၊ ‘လူအသက်ကို မသတ်ရ၊ ကာမဂုဏ် မလိုက်စားရ၊ မခိုးရ၊ မုတ်သား သက်သီ မပီးရ၊ မလိမ်စားရ အရာ အမိအဖကို ရိုသေလေးစားရဖို့’ ဟို့ ပြောထားစာ ပညှတ်ချက်တိကို နားလည်ရေ။” 20သူစာ ယေရှုကို ပြောလီရေ၊ “ဆရာ၊ အကျွန် အသျှေကပင် ထိုပညှတ်ချက်တိကို လိုက်နာရို့ လာပါဗျာ။” 21ယင်းခါ ယေရှုစာ ချစ်ခြင်းမေတ္တာစိတ်န သူ့ဖက်တို့ ကြည့်ရို့ ပြောလီရေ၊ “နင့်မာ လုပ်ဖို့စာ တစ်ခု ကျန်သိရေ။ လားလီ၊ နင့်မာ ဟိသမျ အမွီဥစ္စာကို ရောင်းရို့ ဆင်းရဲသားရို့ကို လှူဘိုက်ခီ။ ယင်းပိုင်ဆိုကေ နင် ဂေါင်းခင်ဘုံမာ ဥစ္စာဘဏ္ဍာကို ရလိမည်။ ယင်းနောက် ပြန်လာရို့ ငါ့တပည့် ဖြစ်ခလိုက်။” 22ထိုစကားကို ကြားရို့ သူစာ မျက်နှာညှိုးလားခလီရေ အရာ စိတ်ဆိုးရို့ ပြန်လားခလီရေ၊ အကြောင်းကား သူ့မာ အမွီဥစ္စာ အများကြီး ဟိလီရေ။ 23ယင်းခါ ယေရှုစာ လေးဖက်လက်စိတို့ ကြည့်ရို့ တပည့်ရို့ကို ပြောလီရေ၊ “သူဌေးရို့အတွက် ထာဝရဘုရား၏ နိုင်ငံတော်တို့ ဝင်ဖို့ ကောင်းကောင်း ခက်ခဲရေ!” 24တပည့်ရို့စာ ယေရှု စကားကို ကြားရို့ အံ့ဩကတ်လီရေ။ ယေရှုစာ အရာတစ်ပြန် သူရို့ကို ပြောလီရေ၊ “ငါ့ သားသမီးရို့၊ အမွီဥစ္စာကို အားကိုးသူရို့အတွက် ထာဝရဘုရား၏ နိုင်ငံတော်တို့ ဝင်ဖို့ ကောင်းကောင်း ခက်ခဲရေ! 25သူဌေးရို့ ထာဝရဘုရား၏ နိုင်ငံတော်တို့ ဝင်ဖို့စာထက် ကုလားအုပ်တစ်ကောင် အပ်နဖားက ဝင်လားဖို့စာပင် ရွယ်သိရေ။” 26ယင်းခါ တပည့်ရို့စာ အရာလည်း အံ့ဩပြီးကေ ကိုယ်ရို့အချင်းချင်း ပြောကတ်လီရေ၊ “ယင်းပိုင်ဆိုကေ အသူ ကယ်တင်ခြင်းကို ရနိုင်ဖို့လည်း?” 27ယေရှုစာ သူရို့တို့ ကြည့်ရို့ ပြောလီရေ၊ “ဒေ အလုပ်စာ လူအတွက် မဖြစ်နိုင်၊ ယေကေလည်း ထာဝရဘုရားအတွက် ဖြစ်နိုင်ရေ၊ အကြောင်းကား သူစာ ဟိသမျ အားကုံးကို လုပ်နိုင်ရေ။” 28ပေတရုစာ သူ့ကို ပြောလီရေ၊ “ကြည့်ပါ၊ အကျွန်ရို့ကား ဟိသမျ အားကုံးကို စွန့်ဘိုက်ခရို့ ကိုယ်တော်၏ တပည့် ဖြစ်ကတ်ပါဗျာ။” 29– 30ယေရှုစာ အဖြေပီးလီရေ၊ “ငါ နင်ရို့ကို အမှန် ပြောရေ၊ ငါ့အကြောင်းန အရာ ထာဝရဘုရား၏ သတင်းကောင်း ဟောပြောစာအကြောင်းန အိမ်-ယာ၊ ညီအစ်ကိုမောင်နမှ၊ အမိအဖ၊ သားသမီး အရာ လယ်မြေကို စွန့်ရို့ လာသူစာ ဒေ ဘဝမာ အဆတစ်ရာ ပြန်ရလိမည်။ သူစာ ညှဉ်းဆဲခြင်းကို ခံရလိမည်၊ ယေကေလည်း ဒေ ဘဝမာ အိမ်-ယာ၊ ညီအစ်ကိုမောင်နမှ၊ အမိအဖ၊ သားသမီး အရာ လယ်မြေလည်း အဆတစ်ရာ ရလိမည် အရာ သူစာ နောင်ဘဝမာ ထာဝရအသက်ကို ရလိမည်။” 31ယေကေလည်း ဒေ ဘဝမာ အမြင့်ဆုံးနေရာကို ရသူရို့စာ နောင်ဘဝမာ အနိမ့်ဆုံးနေရာကို ရကတ်လိမည်။ အရာ ဒေ ဘဝမာ အနိမ့်ဆုံးနေရာကို ရသူရို့စာ နောင်ဘဝမာ အမြင့်ဆုံးနေရာကို ရကတ်လိမည်။
Copyright information for
RmzSC