Mar 14:3-9 | RmzSC | STEP | ယေရှုစာ ဗေသနိရွာမာ ရှိမုန်နာမည်န အနူရောဂါက ကောင်းသူ အိမ်မာ ဟိလီရေ။ ယေရှု စားပွဲမာ စားသောက်ဖို့ ထိုင်လီရေခါ မိန်းမတစ်ယောက် ကောင်းကောင်း တန်ဖိုးဟိစာ ရီမွှီးဆီအစင်ကို ကျောက်ဖြူဗူးတစ်လုံးမာ ထည့်ရို့ ယူလာလီရေ။ သူစာ ကျောက်ဖြူဗူးကို ခွဲရို့ ထို ရီမွှီးဆီကို ယေရှု အဂေါင်းမာ သွန်လီရေ။

Mark 14:3-9

ယေရှု အဂေါင်းမာ ရီမွှီးဆီသွန်ခြင်း

(မဿဲ ၂၆:၆-၁၃၊ ယောဟန် ၁၂:၁-၈)

3 ယေရှုစာ ဗေသနိရွာမာ ရှိမုန်နာမည်န အနူရောဂါက ကောင်းသူ အိမ်မာ ဟိလီရေ။ ယေရှု စားပွဲမာ စားသောက်ဖို့ ထိုင်လီရေခါ မိန်းမတစ်ယောက် ကောင်းကောင်း တန်ဖိုးဟိစာ ရီမွှီးဆီအစင်ကို ကျောက်ဖြူဗူးတစ်လုံးမာ ထည့်ရို့ ယူလာလီရေ။ သူစာ ကျောက်ဖြူဗူးကို ခွဲရို့ ထို ရီမွှီးဆီကို ယေရှု အဂေါင်းမာ သွန်လီရေ။ 4 ယင်းခါ ရှိမုန်အိမ်မာ ရောက်ရို့ ဟိသူရို့အထဲက တစ်ချိုးလူရို့စာ မန်ပါရို့ ကိုယ်ရို့အချင်းချင်း ပြောကတ်လီရေ၊ “ဒေ ရီမွှီးဆီကို ဇာဖို့ ဒေပိုင် ဖျက်ဘိုက်စာလည်း? 5 ဒေ ရီမွှီးဆီကို ရောင်းရေဆိုကေ ငွေသားတန်းကား အချပ်သုံးရာထက် ပိုရို့ ရလီဖို့ အရာ ထိုတန်းကားတိကို ဆင်းရဲသားရို့ကို လှူဖို့ ရလီဖို့။” ယင်းပိုင် သူရို့စာ ထိုမိန်းမကို အပြစ်တင်ကတ်လီရေ။

6 ယင်းခါ ယေရှုစာ သူရို့ကို ပြောလီရေ၊ “ဟုတ်ပျာ၊ နင်ရို့ ဒေ မိန်းမကို ဇာဖို့ စိတ်ဒုက္ခ ပီးကတ်စာလည်း? သူကား ငါ့အတွက် ကောင်းမြတ်စာ အလုပ်ကို လုပ်နီရေ။ 7 ဆင်းရဲသားရို့ကား အမြဲတိုင်း နင်ရို့နအတူ ဟိကတ်တေ အရာ နင်ရို့ လိုရေခါ သူရို့ကို ကူညီဖို့ ရကတ်တေ။ ယေကေလည်း ငါကား အမြဲတိုင်း နင်ရို့နအတူ ဟိဖို့ မဟုတ်။ 8 သူစာ ကိုယ်တတ်နိုင်စာကို လုပ်လီရေ။ သူစာ ငါ့ကို သင်္ဂြိုဟ်ဖို့အတွက် အယင်ကပင် ငါ့ခန္ဓာမာ ရီမွှီးဆီ သွန်ချလီရေ။ 9 ငါ နင်ရို့ကို အမှန် ပြောရေ၊ ကမ္ဘာတစ်လုံးမာ သတင်းကောင်းကို ဟောပြောရေခါ ဒေ မိန်းမကို အောက်မိဖို့အတွက် သူလုပ်စာ အလုပ်အကြောင်းကိုလည်း ဟောပြောရလိမည်။”