Mark 14:66-72
ယေရှုကို ပေတရု ငြင်းခြင်း
(မဿဲ ၂၆:၆၉-၇၅၊ လုကာ ၂၂:၅၄-၆၂၊ ယောဟန် ၁၈:၁၅-၁၈၊ ၁၈:၂၅-၂၇)
66ပေတရုစာ အောက်က အိမ်တတ်ဂွင်းမာ နီလီရေခါ မဟာယဇ်ပုရောဟိတ်မာ ကျွန်မသျှေတစ်ယောက်စာ ယင်းနေရာတို့ လာလီရေ။ 67သူစာ ပေတရုကို မီးနှူရို့ မြင်လီရေ အရာ သူ့ကို အလှပ ကြည့်ရို့ ပြောလီရေ၊ “ဒေ အမောင်လည်းသောက် ထိုနာဇရက်မြို့သျှေသား ယေရှုနအတူ ပါလီရေ။” 68ယေကေလည်း ပေတရုစာ ငြင်းလီရေ၊ “နင် ဇာ ပြောရေလည်းဆိုစာကို ငါ သိလည်း မသိ၊ နားလည်းမလည်။” သူစာ ထိုစကားကို ပြောရို့ ပြင်က လမ်းခဝနားတို့ လားလီရေ။ ယင်းခါ ချက်ချင်း ကြက်ဖတစ်ကောင် တွန်လီရေ။ 69ထိုကျွန်မသျှေစာ ပေတရုကို မြင်ရို့ သူ့အနားမာ ရပ်ရို့ ဟိလီသူရို့ကို ပြောလီရေ၊ “ဒေ အမောင် ထိုလူရို့အဖွဲ့သား တစ်ယောက် ဖြစ်ပါရေ။” 70ပေတရုစာ အရာတစ်ပြန် ငြင်းလီရေ။ တစ်နားနီရေခါ သူ့အနားမာ ရပ်ရို့ ဟိလီသူရို့လည်း ပြောကတ်လီရေ၊ “နင် အမှန် ထိုလူရို့အထဲက တစ်ယောက်ရာ၊ အကြောင်းကား နင်လည်းသောက် ဂါလိလဲပြည်နယ်သားရာ။” 71ယင်းခါ ပေတရုစာ အကျိန်ကိုင်ရို့ ပြောလီရေ၊ “ငါ မုတ်သားစကား ပြောရေဆိုကေ ထာဝရဘုရား ငါ့ကို ကျိန်ဆဲထည့်ပါစီ။ ငါ ယင်းသူကို မသိ။” 72အရာ ချက်ချင်း ဒုတိယခေါက် ကြက်တွန်လီရေ။ ယင်းအယင်က ယေရှုစာ ပြောလီရေ၊ “ကြက်နှစ်ချိန် မတွန်ခင်အယင်က နင် ငါ့ကို မသိ ဟို့ သုံးခေါက်တိုင်အောင် ငြင်းလိမည်။” ယင်းခါ ပေတရုစာ ယေရှု ပြောလီစာ စကားကို တွက်ရရို့ ငိုလီရေ။
Copyright information for
RmzSC