Mark 6:30-44
လူငါးထောင်ကို ကျွေးခြင်း
(မဿဲ ၁၄:၁၃-၂၁၊ လုကာ ၉:၁၀-၁၇၊ ယောဟန် ၆:၁-၁၅)
30ယေရှု ရွှတ်လိုက်လီစာ တမန်တော် တစ်ဆယ့်နှစ်ယောက် ပြန်လာကတ်လီရေ၊ အရာ သူရို့စာ ကိုယ်ရို့ လုပ်လီကတ်စာ အလုပ်အကြောင်းန သွန်သင်ပီးလီစာ ဟိသမျ အကြောင်းအရာကို ယေရှုဘားမာ ပြောပြကတ်လီရေ။ 31ယင်းခါ လူအများကြီး အလားအလာ ဟိလီရေအတွက်န တပည့်ရို့စာ တစ်ခုလည်း စားသောက်ဖို့ မရကတ်လီ။ ယင်းအတွက်န ယေရှုစာ သူရို့ကို ပြောလီရေ၊ “နင်ရို့ ငါနအတူ တတိန်းဆဆိတ်နေရာ တစ်ခုတို့ လားရို့ တစ်နားသျှေ နားနီကတ်။” 32ယင်းအတွက်န သူရို့စာ ယေရှု ပြောရေအတိုင်း လောင်းတစ်စင်းမာ တက်ရို့ တတိန်းဆဆိတ်နေရာ တစ်ခုတို့ လားခကတ်လီရေ။ 33ယေကေလည်း လူရို့စာ သူရို့ လားစာကို မြင်ရို့ အရိပ်ကျကတ်လီရေ။ ယင်းအတွက်န အပါးနီးဝန်းကျင်မာဟိစာ မြို့ရွာတိက လူရို့စာ ဗြီးလားရို့ သူရို့ထက် အယင် ထိုနေရာတို့ ရောက်လားခကတ်လီရေ။ 34ယေရှုစာ လောင်းက ဆင်းရေခါ လူပရိတ်သတ် အများကြီးကို မြင်ရလီရေ။ ထိုလူရို့စာ အကျောင်းသားမဟိစာ သိုးဆိတ်တိနတူကတ်လီရေ။ ယင်းအတွက်န ယေရှုစာ သူရို့ကို သနားလီရေ။ ယင်းခါ ယေရှုစာ သူရို့ဘားမာ အများကြီး အကြောင်းအရာကို သွန်သင်ပီးလီရေ။ 35ယင်းနိ နီဝင်ဖို့ ပါးလာရေခါ တပည့်ရို့စာ ယေရှုတို့ လာရို့ ပြောကတ်လီရေ၊ “ဒေ နေရာစာ တတိန်းဆဆိတ်နေရာ ဖြစ်ပါရေ အရာ နီလည်း ဝင်လာပါဗျာ။ 36ဒေ လူရို့စာ အပါးနီးဝန်းကျင်မာ ရွာတိတို့ လားရို့ ကိုယ်ရို့အတွက် အစားဝယ်ဖို့ ရလတ်အောင် သူရို့ကို ရွှတ်လိုက်ပါဖိ။” 37ယင်းခါ ယေရှုစာ သူရို့ကို ပြောလီရေ၊ “နင်ရို့ ကိုယ်တိုင် သူရို့ကို တစ်ခုမသာ စားဖို့ ပီးလိုက်ကတ်။” တပည့်ရို့စာ သူ့ကို ပြောကတ်လီရေ၊ “ဒေ လူရို့ကို အစားဝယ်ရို့ ပီးဖို့ဆိုကေပင် ငွေသားတန်းကား အချပ်နှစ်ရာလိုပါဖို့။” 38ယေရှုစာ သူရို့ကို ပြောလီရေ၊ “နင်ရို့မာ ပေါင်မုန့် ဇာမျှသျှက် ဟိရေလည်း ကြည့်လိုက်။” သူရို့စာ ကြည့်ရို့ ပြောကတ်လီရေ၊ “အကျွန်ရို့မာ ပေါင်မုန့် ငါးသျှက်န ငါးနှစ်ကောင် ဟိပါရေ။” 39ယင်းခါ ယေရှုစာ လူရို့ကို မြက်တောမာ အစုအစုပျင်ရို့ ထိုင်စီဖို့အတွက် တပည့်ရို့ကို ခိုင်းလီရေ။ 40အရာ လူရို့စာ တစ်စုစီမာ အယောက်တစ်ရာစီ၊ တစ်ရာစီ၊ အယောက်ငါးဆယ်စီ၊ ငါးဆယ်စီ ပျင်ရို့ ထိုင်ကတ်လီရေ။ 41ယင်းခါ ယေရှုစာ ပေါင်မုန့် ငါးသျှက်န ငါးနှစ်ကောင်ကို ယူပြီးကေ ဂေါင်းခင်တို့ မော်ကြည့်ရို့ ထာဝရဘုရားကို ကျေးဇူးတင်လီရေ။ ယင်းနောက် သူစာ ထိုပေါင်မုန့်တိကို ဖဲ့ရို့ လူရို့ကို ဝီပီးဖို့အတွက် တပည့်ရို့အလက်မာ အပ်လီရေ။ အရာ ငါးနှစ်ကောင်ကိုလည်း ယင်းပိုင်တထန် ဝီပီးလီရေ။ 42ယင်းခါ လူရို့ အားကုံးသူ ဝအောင် စားကတ်လီရေ။ 43ယင်းနောက် တပည့်ရို့စာ လူရို့ စားရို့ ကျန်စာ ပေါင်မုန့်န ငါးအပဲ့အခြမ်းတိကို ကောက်ကတ်တေခါ တစ်ဆယ့်နှစ်တောင်း အပြည့် ဖြစ်လီရေ။ 44ထိုစားကတ်သူရို့အထဲမာ ယောက်ျား သက်သက် ငါးထောင် ဟိလီရေ။
Copyright information for
RmzSC