Mark 9:2-13
ယေရှု မျက်နှာက ဘုန်းရောင်ခြေတော် ထွက်ခြင်း
(မဿဲ ၁၇:၁-၁၃၊ လုကာ ၉:၂၈-၃၆)
2ခြောက်ရက် ရွန်ရေခါ ယေရှုစာ သက်သက် ပေတရု၊ ယာကုပ် အရာ ယောဟန်ကို ခေါ်ရို့ တောင်အမြင့်ကြီး တစ်တောင်တို့ တက်လီရေ။ ယေရှုမာ မျက်နှာစာ သူရို့ ရှိက ပြောင်းလှဲလားခလီရေ။ 3သူ့မာ အဝတ်တိစာ ဖဖွီးဆဆွ ဖြစ်လားခလီရေ။ ဒေ ကမ္ဘာမာ ကဝါသေရို့ပင် အဝတ်အစားတိကို ဒေပိုင် ဖဖွီးဆဆွ ဖြစ်အောင် ဖွတ်နိုင်ကတ်ဖို့ မဟုတ်။ 4တပည့်ရို့စာ ထိုနေရာမာ ဧလိယန မောရှေကို ယေရှုနအတူ စကားပြောရို့ မြင်ရကတ်လီရေ။ 5ပေတရုစာ ယေရှုကို ပြောလီရေ၊ “ဆရာ၊ အကျွန်ရို့ ဒေ နေရာမာ ဟိကတ်စာ ကောင်းပါရေ။ အကျွန်ရို့ ဒေ နေရာမာ တဲသုံးဆောင် ဆောက်ကတ်ပါမည်။ ကိုယ်ဘင်အတွက် တစ်ဆောင်၊ မောရှေအတွက် တစ်ဆောင် အရာ ဧလိယအတွက် တစ်ဆောင် ဆောက်ကတ်ပါမည်။” 6ကောင်းကောင်း ကြောက်လီရေအတွက်န ဇာ ပြောရဖို့လည်းဆိုစာကို သူစာ စဉ်းစားရို့ မရလီ။ 7ယင်းအချိန်ခါ မိုးရိပ်တစ်ခဲ လာရို့ သူရို့ကို ချုပ်ဘိုက်လီရေ။ အရာ ယင်းမိုးရိပ်အထဲက ဒေပိုင် စကားပြောသံကို ကြားရလီရေ၊ “ဒေသူ ငါ့အချစ်သား ဖြစ်တေ။ နင်ရို့ သူ့စကားကို နားထောင်ကတ်။” 8ထိုစကားကို ကြားရို့ တပည့်ရို့စာ ချက်ချင်း လေးဖက်လက်စိတို့ ဝန်းရို့ယာရို့ ကြည့်ကတ်လီရေ၊ ယေကေလည်း သူရို့စာ ယေရှုကို ပယ်ရို့ အရာတစ်ယောက်ကိုလည်း မမြင်ရကတ်လီဗျာ။ 9တောင်က ဆင်းလာကတ်တေခါ ယေရှုစာ တပည့်သုံးယောက်ကို အာဏာပီးလီရေ၊ “နင်ရို့ တောင်ထက်မာ မြင်ခကတ်စာ အကြောင်းတိကို မနုသသားတော် သီရာက ပြန်ရှင်မထမြောင့် သကြား တစ်ယောက်ဘားမာလည်း မပြောလီကတ်ကေ့။” 10ယေရှု အာဏာပီးရေအတိုင်း တပည့်ရို့စာ ထိုအကြောင်းအရာတိကို ကိုယ်ရို့ စိတ်မာ မှတ်ထားကတ်လီရေ။ ယေကေလည်း သူရို့စာ သီရာက ပြန်ရှင်ထမြောင့်ဖို့စာ စကား အဓိပ္ပါယ် ဇာလည်းဆိုစာကို ကိုယ်ရို့အထဲမာ တိုင်ဘင်ကတ်လီရေ။ 11ယင်းနောက် သူရို့စာ ယေရှုကို မီးကတ်လီရေ၊ “ခရစ်တော် ကြွမလာခင်အယင်က ဧလိယ ကြွလာရဖို့ ဆိုပြီးကေ ကျမ်းဆရာရို့ ဇာဖို့ ပြောနီကတ်ပါစာလည်း?” 12ယေရှုစာ သူရို့ကို အဖြေပီးလီရေ၊ “ဧလိယ အမှန် ကြွလာရို့ ဟိသမျ အားကုံးကို အဆင်သင့် လုပ်ဖို့။ ယေကေလည်း မနုသသားတော်စာ အများကြီး ဒုက္ခ-ဝေဒနာကို ခံရဖို့ အရာ လူရို့စာ သူ့ကို ငြင်းပယ်ကတ်ဖို့ ဆိုပြီးကေ ကျမ်းစာမာ ဇာဖို့ ဒေပိုင် ရွီးရို့ ဟိစာလည်း? 13ယေကေလည်း ငါ နင်ရို့ကို ပြောရေ၊ ကျမ်းစာမာ ရွီးရို့ ဟိရေအတိုင်း ဧလိယ ကြွလာလီရေ။ အရာ လူရို့စာ သူ့ကို ကိုယ်ရို့ စိတ်တချင် ညှဉ်းဆဲလီကတ်တေ။”
Copyright information for
RmzSC