Matthew 11

ယောဟန် တပည့်ရို့ ယေရှုန အတွိခံခြင်း

(လုကာ ၇:၁၈-၂၃)

1ယေရှုစာ ကိုယ့်တပည့် တစ်ဆယ့်နှစ်ယောက်ကို အမှာစကား ပြောပြီးရေနောက် ထိုအရပ်မာဟိစာ မြို့ရွာတိမာ သွန်သင်ပီးဖို့အတွက်န တရားဟောပြောဖို့အတွက် ယင်းနေရာက ထွက်ကြွလီရေ။

2ယင်းနောက် ရီနှစ်မင်္ဂလာပီးသူ ယောဟန်စာ ထောင်ထဲကနီရို့ ယေရှု လုပ်ကိုင်ခြင်း အကြောင်းတိကို ကြားရလီရေ။ ယင်းခါ သူစာ ကိုယ့်တပည့်ရို့ကို ယေရှုတို့ ဒေပိုင် မီးကြည့်ဖို့ ရွှတ်လိုက်လီရေ၊ 3“ကိုယ်တော် ကြွလာဖို့ စကားဟိစာ ခရစ်တော်ပါလော? မဟုတ်ကေ အခြားတစ်ပါးအတွက် အကျွန်ရို့ စောင့်နီရပါဖို့သိလော?” 4ယင်းခါ ယေရှုစာ သူရို့ကို အဖြေပီးလီရေ၊ “နင်ရို့ ကြားရစာတိန မြင်ရစာတိကို ယောဟန်တို့ လားရို့ ပြောပြခီကတ်၊ 5မျက်စိကန်းသူရို့ မြင်ရကတ်ပျာ၊ အခြီသောင်သူရို့ လားနိုင်ကတ်ပျာ၊ အနူရောဂါသေရို့ သန့်စင်ကတ်ပျာ၊ နားပင်းသူရို့ ကြားရကတ်ပျာ၊ သီသူရို့ ပြန်ရှင်ကတ်ပျာ အရာ ဆင်းရဲသားရို့ သတင်းကောင်းကို ကြားရကတ်ပျာ။ 6မယုံသင်္ခါစိတ် မဟိဘိုင်းန ငါ့ကို လက်ခံသူစာ မင်္ဂလာ ဟိရေ။”

ယောဟန် အကြောင်းကို ယေရှု ပြောပြခြင်း

(လုကာ ၇:၂၄-၃၅)

7ယောဟန် တပည့်ရို့ ပြန်လားကတ်တေခါ ယေရှုစာ ယောဟန် အကြောင်းကို လူရို့ဘားမာ ပြောဖို့ စလီရေ၊ “ကိုယ်ဘင်ရို့ ဇာကို ကြည့်ဖို့အတွက် သဲကန္တာရတောပြင်တို့ လားခီကတ်စာလည်း? လီထရို့ လုတ်စာ ပန်းဇင်ဂြည်အရုံကိုလော? 8မဟုတ်ကေ ဇာကို ကြည့်ဖို့ လားခီကတ်စာလည်း? လှပတင့်တယ်စာ အဝတ် ဝတ်သူကိုလော? လှပတင့်တယ်စာ အဝတ်ကို ဝတ်သူရို့ကား မင်းနန်းမာရာ နီကတ်တေ။ 9မဟုတ်ကေ ဇာကို ကြည့်ဖို့ လားခီကတ်စာလည်း? ဘုရားသတင်းပို့သူကိုလော? ဟုတ်တေ၊ ငါ ကိုယ်ဘင်ရို့ကို ပြောရေ၊ ကိုယ်ဘင်ရို့ လားရို့ ကြည့်ခီသူစာ ဘုရားသတင်းပို့သူထက်လည်း ကြီးမြတ်တေ! 10ယောဟန် အကြောင်းကို ကျမ်းစာမာ ရွီးရို့ ဟိရေ၊
‘နားထောင်၊ ငါ နင့် ရှိက ငါ့မာ သတင်းပို့သူတစ်ယောက်ကို ရွှတ်လိုက်ဖို့။
သူစာ နင် လားဖို့စာလမ်းကို အဆင်သင့် လုပ်လိမည်။’

11“ငါ ကိုယ်ဘင်ရို့ကို အမှန် ပြောရေ၊ လူ့သားရို့အထဲမာ ရီနှစ်မင်္ဂလာပီးသူ ယောဟန်ထက် ကြီးမြတ်သူ တစ်ယောက်လည်း မဟိ။ ယေကေလည်း ဂေါင်းခင်နိုင်ငံတော်မာ အားကုံးသူထက် အသျှေဆုံး ဖြစ်သူလည်း ယောဟန်ထက် ကြီးမြတ်တေ။ 12ရီနှစ်မင်္ဂလာပီးသူ ယောဟန် တရားဟောပြောဖို့ စရေလှောက်ကပင် ဒေနိတိုင်အောင် တစ်ချိုးလူရို့ ဂေါင်းခင်နိုင်ငံတော်ကို ညှဉ်းဆဲနီကတ်တေ၊ အရာ တစ်ချိုးလူရို့ ဂေါင်းခင်နိုင်ငံတော်ကို အားဒမ အပိုင်သိမ်းဖို့ ကြိုးစားနီကတ်တေ။ 13အကြောင်းကား ယောဟန်လက်ထက် တိုင်အောင် ဘုရားသတင်းပို့သူရို့န မောရှေ၏ ပညှတ်တရားစာ နောက်အနာဂါတ် အကြောင်းကို ဟောပြောရို့ လာလီရေ။ 14ကိုယ်ဘင်ရို့ ငါ့စကားတိကို လက်ခံဖို့ သဖေါဟိရေဆိုကေ နားထောင်ကတ်။ ယောဟန်စာ ကြွလာဖို့ စကားဟိလီစာ ဘုရားသတင်းပို့သူ ဧလိယ ဖြစ်တေ။ 15ငါ့စကားကို နားထောင်ချင်သူရို့ နားထောင်ကတ်။”

16“ဒေခိုက်မာ လူရို့ကို ငါ အသူ့န နှိုင်းယှဉ်ရဖို့လည်း? သူရို့စာ ဈီးတလင်းမာ ထိုင်နီကတ်စာ အသျှေရို့နတူကတ်တေ။ သူရို့စာ အခြား အသျှေတစ်တိုင်ကို ခေါ်ရို့ ပြောကတ်တေ၊
17‘ငါရို့ နင်ရို့အတွက် နှဲမှုတ်လီကတ်တေ၊
ယေကေလည်း နင်ရို့ မကလီကတ်။
အရာ ငါရို့ ဝမ်းနည်းစာ တေးခြင်းကို ဆိုလီကတ်တေ၊
ယေကေလည်း နင်ရို့ ဝမ်းနည်းခြင်း ပြန်ရို့ မငိုလီကတ်။’

18“အကြောင်းကား ယောဟန် ရောက်လာရေခါ အခြားလူရို့ပိုင် မစားမသောက်လီ။ ယင်းအတွက်န လူရို့၊ ‘သူ့ကို နတ်ဆိုး ကိုင်နီဗျာ’ ဟို့ ပြောကတ်တေ။ 19အရာ မနုသသားတော် ကြွလာရေခါ အခြားလူရို့ပိုင် စားသောက်လီရေ။ ယင်းအတွက်န လူရို့ ပြောကတ်တေ၊ ‘ထိုမာ စားကြူး-သောက်ကြူးသူတစ်ယောက်ကို ကြည့်လိုက်ကတ်! သူစာ ဖန်ဒါကောက်သမားရို့န လူဆိုးရို့မာ မိတ်ဆွေ ဖြစ်တေ။’ ယေကေလည်း အသူ့မာမဆို ညာဏ်ပညာ ကောင်းရေ မကောင်းဆိုစာကို သူ့အလုပ်ကနီရို့ သိရရေ။”

အပြစ်က စိတ်လှည့်ရို့ မလာစာမြို့သားရို့

(လုကာ ၁၀:၁၃-၁၅)

20ယေရှု အများအပြား အံ့ဩဖွယ်အလုပ် လုပ်လီစာ မြို့ရွာတိမာ နီထိုင်ကတ်စာ လူရို့စာ စိတ်လှည့်ရို့ မလာကတ်လီ။ ယင်းအတွက်န သူစာ ယင်းမြို့ရွာတိမာ နီထိုင်ကတ်စာ လူရို့ကို အပြစ်တင်ရို့စကား ပြောလီရေ၊ 21“အိုး ခေါရာဇိန်မြို့သားရို့န ဗက်ဇဲဒမြို့သားရို့ နင်ရို့အတွက် အမင်္ဂလာဟိရေ! နင်ရို့ ရှိထက်က လုပ်လီစာ အံ့ဩဖွယ်အလုပ်တိကို တုရုမြို့သားရို့န ဇိဒုန်မြို့သားရို့ ရှိထက်က လုပ်လီဖို့ဆိုကေ သူရို့စာ နှစ်ပေါင်းများစွာ အယင်ကပင် ခြယ်ဘောက်သာဝတ်ပြီးကေ အဂေါင်းမာ ပြာလူးရို့ အပြစ်က စိတ်လှည့်လီကတ်ဖို့။ 22ငါ နင်ရို့ကို အမှန် ပြောရေ၊ နင်ရို့စာ တရားစစ်ဆေးရေနိမာ တုရုမြို့သားရို့န ဇိဒုန်မြို့သားရို့ထက် ပိုရို့ ကြောက်လန့်ဖို့ကောင်းစာ အပြစ်ဒါဏ်ကို ခံရကတ်လိမည်။ 23အရာ အိုး ကပေရနောင်မြို့သျှေသားရို့! နင်ရို့ ဂေါင်းခင်ဘုံမာ ရိုသေခြင်းကို ခံရဖို့ ဟို့ မှတ်ကတ်စာလော? တစ်ခါလည်း ခံရမည် မဟုတ်! နင်ရို့စာ သီသူရို့နိုင်ငံတို့ ဘိုက်ချခြင်းကို ခံရကတ်လိမည်။ နင်ရို့ ရှိထက်က လုပ်လီစာ အံ့ဩဖွယ်အလုပ်တိကို သောဒုံမြို့သားရို့ ရှိထက်က လုပ်လီဖို့ဆိုကေ သောဒုံမြို့သားရို့စာ ဒေနိတိုင်အောင် အရှင် ဟိကတ်ဖို့သိ။ 24ငါ နင်ရို့ကို အမှန် ပြောရေ၊ နင်ရို့စာ တရားစစ်ဆေးရေနိမာ သောဒုံမြို့သားရို့ထက် ပိုရို့ ကြောက်လန့်ဖို့ကောင်းစာ အပြစ်ဒါဏ်ကို ခံရကတ်လိမည်။”

ယေရှု ဝမ်းသာရို့ အဖကို ချီမွမ်းခြင်း

(လုကာ ၁၀:၂၁-၂၂)

25ယင်းနောက် ယေရှုစာ ပြောလီရေ၊ “အိုး အဖ၊ ကိုယ်တော်စာ ဂေါင်းခင်ဘုံန ကမ္ဘာကို အုပ်စိုးစာ အသျှင် ဖြစ်ပါရေ။ အကျွန် ကိုယ်တော်ကို ချီမွမ်းပါရေ၊ အကြောင်းကား ဒေ ဟိသမျ အကြောင်းအရာတိကို ပညာသျှင်ရို့န ညာဏ်သျှင်ရို့က ဖုံးရွှက်ထားပါရေ၊ ယေကေလည်း အသျှေပိုင် နုညံ့ခြင်းစိတ် ဟိသူရို့ဘားမာ ဖေါ်ပြပါရေ။ 26ဟုတ်ပါရေ အဖ၊ ကိုယ်တော်၏ အလိုတော်အတိုင်း ဒေပိုင် ဖြစ်လာပါရေ။ 27ငါ့အဖစာ ဟိသမျ အားကုံးကို ငါ့အလက်မာ အပ်ပီးဗျာ။ အဖ တစ်ပါးတည်းရာ သားတော်ကို သိရေ။ အရာ သားတော်န သားတော် အသူရို့ဘားမာ အဖကို ဖေါ်ပြရေလည်း ယင်းသူရို့ရာ အဖကို သိကတ်တေ။

28“ဝန်လီး ရွက်ရို့ ပင်ပန်းသူရို့၊ နင်ရို့ အားကုံးသူ ငါ့တို့ လာလတ်ကတ်။ ငါ နင်ရို့ကို အနား ပီးမည်။ 29ငါ့ ထမ်းဖူးကို နင်ရို့ ပက်ခုံးမာ တင်ယူကတ် အရာ ငါ့က သင်ယူကတ်၊ အကြောင်းကား ငါ့မာ နုညံ့ခြင်းစိတ်န နှိမ့်ချခြင်းစိတ် ဟိရေ။ ယင်းပိုင်ဆိုကေ နင်ရို့မာ စိတ်နှလုံးစာ အနားရလိမည်၊ 30အကြောင်းကား ငါ့ ထမ်းဖူးစာ ရွက်ယူလားဖို့ ရွယ်ရေ အရာ ငါ့ ဝန်ထုပ်လည်း ပေါ့ရေ။”