Matthew 12

သတင်းနိကို ပိုင်ဆိုင်စာအသျှင်

(မာကု ၂:၂၃-၂၈၊ လုကာ ၆:၁-၅)

1လိုင်းကေရက် ရွန်ရေခါ သတင်းနိမာ ယေရှုန သူ့တပည့်ရို့စာ ဂျုံခင်းအထဲက ဝင်ရို့ ကြွကတ်လီရေ။ ယင်းခါ ယေရှု တပည့်ရို့စာ အဝမ်းဆာရေအတွက်န ဂျုံအနှံတိကို ဆွတ်ရို့ စားကတ်လီရေ။ 2ယင်းသျှင့်ကို မြင်ရို့ ဖာရိရှဲအဖွဲ့သားရို့စာ ယေရှုကို ပြောကတ်လီရေ၊ “ကြည့်ပါ၊ ဘာသာရေး ထုံးစဉ်အတိုင်း သတင်းနိမာ မလုပ်သင့်စာတိကို ကိုယ်ဘင်မာ တပည့်ရို့ လုပ်နီကတ်ပါရေ။” 3ယင်းခါ ယေရှုစာ သူရို့ကို ပြောလီရေ၊ “ဒါဝိဒ်မင်းန သူ့အဖက်သားရို့ အဝမ်းဆာလီရေခါ ဇာ လုပ်လီကတ်တေလည်းဆိုစာကို ကိုယ်ဘင်ရို့ မဖတ်ဖူးကတ်လော? 4သူရို့စာ ထာဝရဘုရား၏ ကျောင်းထဲမာ ဝင်ရို့ ကိုယ်ရို့ မစားအပ်စာ သန့်ရှင်းစာ ပေါင်မုန့်ကို စားကတ်လီရေ၊ ယေကေလည်း ထိုသန့်ရှင်းစာ ပေါင်မုန့်ကို သက်သက် ယဇ်ပုရောဟိတ်ရို့ရာ စားနိုင်ကတ်တေ။ 5ယင်းသျှင့်ကိုအပယ် ဝိပဿနာကျောင်းထဲမာဟိစာ ယဇ်ပုရောဟိတ်ရို့စာ သတင်းနိထုံးစဉ်ကို ဖျက်ကေလည်းသောက် အပြစ်မကျဆိုစာကို ကိုယ်ဘင်ရို့ မောရှေ၏ ပညှတ်တရားမာ မဖတ်ဖူးကတ်လော? 6ငါ ကိုယ်ဘင်ရို့ကို အမှန် ပြောရေ၊ ဝိပဿနာကျောင်းထက်လည်း ကြီးမြတ်သူတစ်ပါး ဒေမာ ဟိရေ။ 7‘ယဇ်ပူဇော်ခြင်းကိုထက် သနားကြင်နာခြင်းကို ငါ နှစ်သက်တေ’ ဟို့ ကျမ်းစာမာ ရွီးရို့ဟိစာ စကား အဓိပ္ပါယ်ကို ကိုယ်ဘင်ရို့ အလှပ နားလည်ကတ်ဖို့ဆိုကေ အပြစ်မဟိသူရို့ကို တရားစစ်ဆေးကတ်ဖို့ မဟုတ်။ 8ကိုယ်ဘင်ရို့ မှတ်ထားကတ်၊ မနုသသားတော်စာ သတင်းနိကို ပိုင်ဆိုင်စာ အသျှင် ဖြစ်တေ။”

အလက်သောင်သူတစ်ယောက် အကောင်းဖြစ်ခြင်း

(မာကု ၃:၁-၆၊ လုကာ ၆:၆-၁၁)

9ယင်းနောက် ယေရှုစာ ယင်းနေရာက ထွက်ရို့ တရားဇရပ်တစ်ခုတို့ ကြွလီရေ။ 10ယင်းတရားဇရပ်မာ အလက်တစ်ဖက် သောင်သူတစ်ယောက် ဟိလီရေ။ ယင်းခါ ဖာရိရှဲအဖွဲ့သား လိုင်းကေယောက်စာ ယေရှုကို အပြစ်တင်ဖို့ လိုရို့ မီးကတ်လီရေ၊ “ဆရာ၊ မောရှေ၏ ပညှတ်တရားအတိုင်း သတင်းနိမာ မကျန်းမာသူတစ်ယောက်ကို ကျန်းမာအောင် လုပ်ဖို့ သင့်ပါရေလော?” 11ယင်းခါ ယေရှုစာ သူရို့ကို ပြောလီရေ၊ “ကိုင်လိုက်ဖိ၊ ကိုယ်ဘင်ရို့အထဲက လူတစ်ယောက်မာ သိုးဆိတ်တစ်ကောင် ဟိရေ။ ယင်းသိုးဆိတ်စာ သတင်းနိမာ တွင်းထဲတို့ ကျလားခရေဆိုကေ သူစာ ယင်းသိုးဆိတ်ကို ကောက်ရို့ တင်ရေ မဟုတ်လော? 12ယေကေလည်း လူကား သိုးဆိတ်ထက် ပိုရို့ တန်ဖိုး ဟိရေ။ ယင်းပိုင်ဆိုကေ ပညှတ်တရားအတိုင်း သတင်းနိမာ ကောင်းစာ အလုပ်ကို လုပ်ဖို့ သင့်ရေ။”

13ယင်းနောက် သူစာ ထိုအလက်သောင်သူကို ပြောလီရေ၊ “နင့်အလက်ကို ဆန့်။” ယင်းခါ သူစာ အလက် ဆန့်ရေချက်ချင်း သူ့မာ အလက်စာ ကောင်းလားခလီရေ အရာ အခြားအလက်ပိုင် ပကတိအကောင်း ဖြစ်လားခလီရေ။ 14ယင်းခါ ဖာရိရှဲအဖွဲ့သားရို့စာ ပြင်တို့ ထွက်လားခကတ်လီရေ အရာ ယေရှုကို အသီသတ်ဖို့အတွက် ကိုယ်ရို့အချင်းချင်း အကြံခံကတ်လီရေ။

ထာဝရဘုရား၏ ရွီးကောက်ယူစာကျွန်

15ယင်းပိုင် အကြံခံကတ်စာကို သိရေခါ ယေရှုစာ ထိုတရားဇရပ်က ထွက်ရို့ ကြွလီရေ။ ယင်းခါ လူအများကြီး သူ့နောက်က လိုက်ကတ်လီရေ။ အရာ သူစာ ထိုလူရို့အထဲက မကျန်းမာသူရို့ကို ကျန်းမာအောင် လုပ်လီရေ။ 16ယေကေလည်း သူစာ ကိုယ့်အကြောင်းကို တစ်ယောက်ဘားမာလည်း မပြောရအောင် လူရို့ကို တတင်းရရင်း ဟန့်လိုက်လီရေ။ 17ဘုရားသတင်းပို့သူ ဟေရှာယ ဟောပြောခစာ စကားတိ ပြည့်စုံဖို့အတွက် ဒေပိုင် ဖြစ်ပျက်လာလီရေ။ ဟေရှာယစာ ဒေပိုင် ဟောပြောခလီရေ၊
18“ကြည့်၊ ဒေသူစာ ငါ ရွီးကောက်ယူစာ ကျွန် ဖြစ်တေ၊
ငါ သူ့ကို ကောင်းကောင်း ချစ်တေ၊
အရာ ငါ သူ့ကို နှစ်သက်တေ။
ငါ ကိုယ့်ဝိညာဉ်ကို သူ့ဘားမာ သွင်းပီးဖို့၊
ယင်းအတွက်န သူစာ တရားသဖြင့် စစ်ဆေးဖို့စာအချိန်
ရောက်လာဗျာဆိုစာကို ယုဒမဟုတ်သူရို့ဘားမာ ဟောပြောလိမည်။
19သူစာ ရန်တွိလိမည် မဟုတ်၊
အသံအကြီးန အော်လိမည် မဟုတ်၊
အရာ လမ်းတိမာ သူ့အသံကို ကြားရလိမည် မဟုတ်။
20သူစာ တရားမျှတခြင်းကို အနိုင်မယူသကြား ညွန့်ကျနီစာ
ပန်းဇင်ဂြည်အရုံကို ချိုးလိမည် မဟုတ်၊
အရာ တရားမျှတခြင်းကို အနိုင်မယူသကြား ပပွိပပွိ တောက်နီစာ မီးစာကိုလည်း သတ်လိမည် မဟုတ်။
21ယုဒမဟုတ်သူရို့စာ သူ့ကို မျှော်လင်းနီကတ်လိမည်။”

သန့်ရှင်းသောဝိညာဉ်တော်ကို တရိုက်ခြင်း

(မာကု ၃:၂၀-၃၀၊ လုကာ ၁၁:၁၄-၂၃၊ ၁၂:၁၀)

22ယင်းနောက် လူလိုင်းကေယောက် နတ်ဆိုးကိုင်စာ ပပွါး-မျက်ကန်း တစ်ယောက်ကို ယေရှုတို့ ယူလာကတ်လီရေ။ အရာ ယေရှုစာ သူ့ကို ကောင်းအောင် လုပ်လီရေ။ ယင်းခါရာ သူစာ မျက်စိလည်း မြင်ရလီရေ၊ စကားပြောဖို့လည်း နိုင်လီရေ။ 23ယင်းခါ အားကုံးသူ အံ့ဩရို့ ပြောကတ်လီရေ၊ “ဒေလူ ဒါဝိဒ်မင်း၏ သားတော်လော မသိ!” 24ယေကေလည်း ဖာရိရှဲအဖွဲ့သားရို့စာ ထိုစကားကို ကြားရို့ ပြောကတ်လီရေ၊ “ယင်းသူကား နတ်ဆိုးရို့မာ မင်း ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်ဖို့ နိုင်စာရာ!”

25ဖာရိရှဲအဖွဲ့သားရို့ စိတ်နှလုံးမာ စဉ်းစားချက်ကို သိရို့ ယေရှုစာ သူရို့ကို ပြောလီရေ၊ “နိုင်ငံတစ်ခုမာ လူရို့စာ ကိုယ်ရို့အချင်းချင်း မသင့်မတင် ဖြစ်ရို့ ကွဲလားခရေဆိုကေ ယင်းနိုင်ငံစာ ပျက်စီးခြင်းတို့ ရောက်ရရေ။ အရာ မြို့တစ်မြို့ မဟုတ်ကေ အိမ်တစ်အိမ်မာ ကိုယ်ရို့အချင်းချင်း မသင့်မတင် ဖြစ်ရို့ ကွဲလားခရေဆိုကေ ယင်းမြို့ မဟုတ်ကေ ယင်းအိမ်သားစာ တစ်ခါလည်း မတည်မြဲနိုင်။ 26ယင်းအတွက်န မာရ်နတ်စာ မာရ်နတ်ကို နှင်ထုတ်တေဆိုကေ သူစာ ကိုယ့်ကိုကိုယ် ကွဲအောင် လုပ်တေ။ ယင်းပိုင်ဆိုကေ သူ့နိုင်ငံ ဇာပိုင်ပျင်ရို့ တည်မြဲနိုင်ဖို့သိလည်း? 27ငါ ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်တေဆိုကေ ကိုယ်ဘင်ရို့မာ တပည့်ရို့ အသူ့ တန်ခိုးကို အသုံးပြုရို့ နတ်ဆိုးတိကို နှင်ထုတ်ကတ်စာလည်း? ယင်းအတွက်န ကိုယ်ဘင်ရို့ ပြောစာစကား မှားရေဆိုစာကို ကိုယ်ဘင်ရို့မာ တပည့်ရို့ လုပ်ကတ်စာ အလုပ်တိကနီရို့ သက်သီပြရေ။ 28ယေကေလည်း ငါ အမှန် ထာဝရဘုရား၏ ဝိညာဉ်တော် တန်ခိုးကို အသုံးပြုရို့ နတ်ဆိုးတိကို နှင်ထုတ်တေဆိုကေ ထာဝရဘုရား၏ နိုင်ငံတော်စာ ကိုယ်ဘင်ရို့အထဲမာ ရောက်နီဗျာ။ 29အယင်ဆုံး အားသျှင်ကို မချိုင်ထားဘိုင်းန တစ်ယောက်လည်း သူ့အိမ်က ပစ္စည်း-ဥစ္စာတိကို ထုတ်ယူလားဖို့ မနိုင်။ အားသျှင်ကို ချိုင်ရို့ ထားပြီးခါရာ သူ့အိမ်က ပစ္စည်း-ဥစ္စာတိကို ထုတ်ယူလားဖို့ နိုင်ရေ။

30“ငါ့ဖက်က မနီသူစာ ငါ့ကို ဆန့်ကျင်သူ ဖြစ်တေ အရာ ငါနအတူ မစုမသိမ်းသူစာ ကြဲဖြန့်သူ ဖြစ်တေ။ 31ယင်းအတွက်န ငါ ကိုယ်ဘင်ရို့ကို ပြောရေ၊ လူရို့မာ ဟိသမျ အပြစ်န ထာဝရဘုရားကို တရိုက်ရို့ ပြောစာစကားတိ ခွင့်ရွှတ်ခြင်းကို ရလိမည်၊ ယေကေလည်း သန့်ရှင်းသောဝိညာဉ်တော်ကို တရိုက်ရို့ ပြောစာစကားတိ ခွင့်ရွှတ်ခြင်းကို ရလိမည် မဟုတ်။ 32အသူမဆို မနုသသားတော်ကို တရိုက်ရို့ စကား ပြောရေဆိုကေ သူစာ ခွင့်ရွှတ်ခြင်းကို ရလိမည်၊ ယေကေလည်း အသူမဆို သန့်ရှင်းသောဝိညာဉ်တော်ကို တရိုက်ရို့ စကား ပြောရေဆိုကေ သူစာ ခွင့်ရွှတ်ခြင်းကို ရလိမည် မဟုတ်။ ဒေ ဘဝမာလည်း မဟုတ် အရာ နောင်ဘဝမာလည်း မဟုတ်။

အသီးကနီရို့ အပင်ကို သိရခြင်း

(လုကာ ၆:၄၃-၄၅)

33“အပင် ကောင်းရေဆိုကေ အသီးလည်း အကောင်း သီးရေ၊ ယေကေလည်း အပင် မကောင်းဆိုကေ အသီးလည်း မကောင်း သီးရေ၊ အကြောင်းကား အသီးကနီရို့ အပင်ကို သိရရေ။ 34မြိန်အမျိုးရို့! ကိုယ်ဘင်ရို့ ကိုယ်တိုင် လူဆိုးဖြစ်ရို့အတိုင်း ဇာပိုင်ပျင်ရို့ ကောင်းမြတ်စာ စကားတိကို ပြောနိုင်ကတ်ဖို့စာလည်း? လူရို့စာ ကိုယ်ရို့ စိတ်နှလုံးထဲမာ ပြည့်ရို့ဟိစာတိကိုရာ ပစကနီရို့ ဖေါ်ပြရေ။ 35လူကောင်းစာ ကောင်းမြတ်စာတိကို ကိုယ့်စိတ်နှလုံးထဲမာ စုဆောင်းရို့ ထားရေ အရာ သူစာ ကိုယ့်စိတ်နှလုံးထဲက ကောင်းမြတ်စာ စကားတိကိုရာ ထုတ်ရို့ ပြောရေ။ ယေကေလည်း လူဆိုးစာ ဆိုးယုတ်စာတိကို ကိုယ့်စိတ်နှလုံးထဲမာ စုဆောင်းရို့ ထားရေ အရာ သူစာ ဆိုးယုတ်စာ စကားတိကိုရာ ပြောရေ။ 36ငါ ကိုယ်ဘင်ရို့ကို ပြောရေ၊ လူရို့စာ မစဉ်းစား-မဆင်ခြင်ဘိုင်းန ဆိုးယုတ်စာ စကားတိကို ပြောကတ်တေ။ သူရို့စာ တရားစစ်ဆေးရေနိမာ ကိုယ်ရို့ ပြောကတ်စာ ဟိသမျ စကားအကြောင်းန ထာဝရဘုရားဘားမာ စစ်ဆေးခြင်းကို ခံရကတ်လိမည်။ 37ကိုယ်ဘင် ကိုယ့်စကားန ကိုယ် အပြစ်ဒါဏ်က ရွတ်လိမည် အရာ ကိုယ့်စကားန ကိုယ် အပြစ်ဒါဏ်ကို ခံရလိမည်။”

ဒေခိုက်မာ လူရို့ အပြစ်အတင်ခံဖို့စာ အကြောင်း

(လုကာ ၁၁:၂၉-၃၂)

38ယင်းနောက် ကျမ်းဆရာရို့န ဖာရိရှဲအဖွဲ့သား လိုင်းကေယောက်စာ လာရို့ ယေရှုကို ပြောကတ်လီရေ၊ “ဆရာ၊ အကျွန်ရို့ ကိုယ်ဘင်က နိမိတ်လက္ခဏာတစ်ခု ကြည့်ချင်ပါရေ။” 39ယင်းခါ ယေရှုစာ သူရို့ကို ပြောလီရေ၊ “ဒေခိုက်မာ လူဆိုးရို့န သစ္စာမတည်သူရို့စာ နိမိတ်လက္ခဏာကို လိုက်ရို့ ရှာနီကတ်တေ။ ယေကေလည်း သူရို့ကို ဘုရားသတင်းပို့သူ ယောန၏ နိမိတ်လက္ခဏာကို ပယ်ရို့ အခြားနိမိတ်လက္ခဏာ တစ်ခုကိုလည်း ပြလိမည် မဟုတ်။ 40ဘုရားသတင်းပို့သူ ယောန သုံးညဉ့်န သုံးရက် ငါးကြီးဝမ်းခေါင်းထဲမာ ဟိလီရေပိုင် မနုသသားတော်လည်းသောက် သုံးညဉ့်န သုံးရက် မြေခေါင်းထဲမာ နီရလိမည်။ 41နိနေဝေမြို့သားရို့စာ တရားစစ်ဆေးရေနိမာ ရပ်ရို့ ဒေခိုက်မာ လူရို့ကို အပြစ်တင်ကတ်လိမည်၊ အကြောင်းကား နိနေဝေမြို့သားရို့စာ ဘုရားသတင်းပို့သူ ယောန ဟောပြောစာတရားကို ကြားရို့ အပြစ်က စိတ်လှည့်ရို့ လာလီကတ်တေ။ အရာ ကြည့်ကတ်၊ ယောနထက်လည်း ပိုရို့ ကြီးမြတ်သူတစ်ပါး ဒေမာ ဟိရေ။ 42တောင်ဖက်ပြည်က မင်းမစာ တရားစစ်ဆေးရေနိမာ ရပ်ရို့ ဒေခိုက်မာ လူရို့ကို အပြစ်တင်လိမည်၊ အကြောင်းကား သူစာ ရှောလမုန်မင်းကြီး ပြောစာ ညာဏ်ပညာစကားတိကို နားထောင်ဖို့အတွက် ကမ္ဘာအစွမ်းကနီရို့ လာလီရေ။ အရာ ကြည့်ကတ်၊ ရှောလမုန်မင်းကြီးထက်လည်း ပိုရို့ ကြီးမြတ်သူတစ်ပါး ဒေမာ ဟိရေ။

နတ်ဆိုး ပြန်လာခြင်း

(လုကာ ၁၁:၂၄-၂၆)

43“နတ်ဆိုးတစ်ကောင် လူတစ်ယောက် ခန္ဓာက ထွက်လားခရေခါ သူစာ မြေပြင်အသွိမာ တည်းခိုဖို့အတွက် ပတ်ရို့ ရှာနီရေ။ 44ယေကေလည်း တည်းခိုဖို့စာနေရာကို ရှာရို့ မရရေခါ သူစာ ပြောရေ၊ ‘အယင် နီခစာအိမ်တို့ ငါ ပြန်လားဖို့ဗျာ။’ သူစာ ယင်းအိမ်တို့ ပြန်လာရေခါ တစ်ခုလည်း မဟိဘိုင်းန သသန့်ရှရှင်း ဆင်ထားစာကို မြင်ရရေ။ 45ယင်းခါ ယင်းနတ်ဆိုးစာ လားပြီးကေ ကိုယ့်ထက် ပိုရို့ ဆိုးယုတ်စာ နတ်ဆိုးခုနစ်ကောင်ကို ခေါ်ယူခရေ အရာ ထိုလူခန္ဓာမာ ဝင်ရို့ နီကတ်တေ။ ယင်းအတွက်န ထိုလူအခြေအနေစာ အယင်ထက် ပိုရို့ ဆိုးလာရေ။ ဒေခိုက်မာ လူဆိုးရို့လည်း ယင်းလူပိုင်တထန် ဖြစ်ကတ်လိမည်။”

ကျုံသူရို့ရာ ယေရှု၏ မိသားစု အစစ်

(မာကု ၃:၃၁-၃၅၊ လုကာ ၈:၁၉-၂၁)

46လူရို့န ယေရှု စကားပြောနီတုံးမာ သူ့မာ အမိန ညီရို့စာ သူန စကားပြောဖို့အတွက် ပြင်က ရပ်ရို့ စောင့်နီကတ်လီရေ။ 47ယင်းခါ လူတစ်ယောက် လာရို့ ယေရှုကို ပြောလီရေ၊ “ဆရာ၊ ကိုယ်ဘင်မာ အမိန ညီရို့ ကိုယ်ဘင်န စကားပြောဖို့အတွက် ပြင်က ရပ်ရို့ စောင့်နီကတ်ပါရေ။” 48ယင်းခါ ယေရှုစာ သူ့ကို မီးလီရေ၊ “အသူရို့လည်း ငါ့အမိန ငါ့ညီရို့?” 49ယင်းနောက် သူစာ ကိုယ့်တပည့်ရို့တို့ အလက်ညွှန်ပြရို့ ပြောလီရေ၊ “ကြည့်ကတ်! ဒေသူရို့ရာ ငါ့အမိန ငါ့ညီရို့ ဖြစ်ကတ်တေ၊ 50အကြောင်းကား ငါ့ ဂေါင်းခင်ဘုံသျှင် အဖ၏ အလိုတော်ကို လိုက်နာသူရို့ရာ ငါ့အမိ၊ ငါ့ညီရို့ အရာ ငါ့နမှရို့ ဖြစ်ကတ်တေ။”