Matthew 16
နိမိတ်လက္ခဏာ ကြည့်ဖို့တောင်းခြင်း
(မာကု ၈:၁၁-၁၃၊ လုကာ ၁၂:၅၄-၅၆)
1ယင်းနောက် ဖာရိရှဲအဖွဲ့သားရို့န ဇဒ္ဒုကဲအဖွဲ့သား လိုင်းကေယောက်စာ ယေရှုကို စုံစမ်းဖို့အတွက် လာကတ်လီရေ။ အရာ သူရို့စာ ယေရှုကို ဂေါင်းခင်ဘုံက နိမိတ်လက္ခဏာတစ်ခု ကြည့်ဖို့ တောင်းကတ်လီရေ။ 2ယင်းခါ ယေရှုစာ သူရို့ကို ပြောလီရေ၊ “နီဝင်လာရေခါ ကိုယ်ဘင်ရို့ ဂေါင်းခင်ကို ကြည့်ရို့ ပြောနီကတ်တေ၊ ‘နှက်ဖြန်ခါ မိုးလီဝါသ ကောင်းဖို့၊ အကြောင်းကား ဂေါင်းခင် ရဲရို့ ဖြစ်လားခဗျာ။’ 3အရာ မိုးသောက်တိုင်ကေ ကိုယ်ဘင်ရို့ ပြောနီကတ်တေ၊ ‘ဒေနိခါ မိုးကျဖို့၊ အကြောင်းကား ဂေါင်းခင် ရဲရို့ ဖြစ်လားခဗျာ အရာ တတိန်မမှိုင်း ဖြစ်လားခဗျာ။’ ကိုယ်ဘင်ရို့ ဂေါင်းခင်ကို ကြည့်ရို့ မိုးလီဝါသ အကြောင်းကို ပြောနိုင်ကတ်တေ၊ ယေကေလည်း ကိုယ်ဘင်ရို့ ခိုက်ကာလ အခြေအနေကို နားမလည်ကတ်။ 4ဒေခိုက်မာ လူဆိုးရို့န သစ္စာမတည်သူရို့စာ နိမိတ်လက္ခဏာကို လိုက်ရို့ ရှာနီကတ်တေ၊ ယေကေလည်း သူရို့ကို ဘုရားသတင်းပို့သူ ယောန နိမိတ်လက္ခဏာကို ပယ်ရို့ အခြားနိမိတ်လက္ခဏာ တစ်ခုကိုလည်း ပြလိမည် မဟုတ်။” ထိုစကားတိကို ပြောပြီးရေနောက် သူစာ လူရို့အထဲက ထွက်ရို့ ကြွလီရေ။တပည့်ရို့ကို သတိပီးခြင်း
(မာကု ၈:၁၄-၂၁)
5ယေရှုန သူ့တပည့်ရို့ မြစ်ကမ်းတစ်ဖက်တို့ ကူးကတ်တေခါ တပည့်ရို့မာ ပေါင်မုန့် ယူဖို့ မိလားခကတ်လီရေ။ 6ယေရှုစာ သူရို့ကို ပြောလီရေ၊ “နင်ရို့ သတိထားကတ်! ဖာရိရှဲအဖွဲ့သားရို့န ဇဒ္ဒုကဲအဖွဲ့သားရို့ တဆီးကို ရှောင်ကတ်။” 7ယင်းခါ တပည့်ရို့စာ ကိုယ်ရို့အချင်းချင်း ပြောကတ်လီရေ၊ “ငါရို့မာ ပေါင်မုန့် မပါလတ်တေအတွက်န ဆရာ ငါရို့ကို ပြောစာလော မသိ။” 8သူရို့ ပြောစာစကားကို သိရေခါ ယေရှုစာ ပြောလီရေ၊ “ကျုံခြင်းတရား အားနည်းသူရို့! နင်ရို့မာ ပေါင်မုန့် မပါလတ် ဟို့ ကိုယ်ရို့အချင်းချင်း ဇာဖို့ ပြောနီကတ်စာလည်း? 9နင်ရို့ ဒေဂုလည်း နားမလည်ကတ်သိလော? ငါ လူငါးထောင်အတွက် ပေါင်မုန့် ငါးသျှက်ကို ဖဲ့ရို့ ဝီပီးလီစာ အကြောင်းကို အရာ အပဲ့အခြမ်း ကျရို့ဟိစာက နင်ရို့ ဇာမျှတောင်း ကောက်လီကတ်တေလည်းဆိုစာကို နင်ရို့ မိလားခကတ်ပျာလော? 10မဟုတ်ကေ ငါ လူလေးထောင်အတွက် ပေါင်မုန့် ခုနစ်သျှက်ကို ဖဲ့ရို့ ဝီပီးလီစာ အကြောင်းကို အရာ အပဲ့အခြမ်း ကျရို့ဟိစာက နင်ရို့ ဇာမျှတောင်း ကောက်လီကတ်တေလည်းဆိုစာကို နင်ရို့ မိလားခကတ်ပျာလော? 11ပေါင်မုန့် အကြောင်းကို ယူရို့ ငါ ပြောစာ မဟုတ်ဆိုစာကို နင်ရို့ ဇာဖို့ နားမလည်ကတ်စာလည်း? ငါ နင်ရို့ကို ဖာရိရှဲအဖွဲ့သားရို့န ဇဒ္ဒုကဲအဖွဲ့သားရို့ တဆီးကို ရှောင်ကတ် ဟို့ ပြောစာ ဖြစ်တေ။” 12ယင်းခါ ပေါင်မုန့်မာ ထည့်စာတဆီးကို ရှောင်ဖို့အတွက် ယေရှု ပြောလီစာ မဟုတ်၊ ယေကေလည်း ဖာရိရှဲအဖွဲ့သားရို့န ဇဒ္ဒုကဲအဖွဲ့သားရို့ သွန်သင်ချက်ကို ရှောင်ဖို့အတွက် ပြောလီရေဆိုစာကို တပည့်ရို့စာ နားလည်ကတ်လီရေ။ယေရှုကို ခရစ်တော် ဟို့ ဝန်ခံခြင်း
(မာကု ၈:၂၇-၃၀၊ လုကာ ၉:၁၈-၂၀)
13ယင်းနောက် ဖိလိပ္ပု-ကဲသရိမြို့အရပ်တို့ ရောက်တေခါ ယေရှုစာ တပည့်ရို့ကို မီးလီရေ၊ “လူရို့ မနုသသားတော်ကို အသူ ဖြစ်တေ ဟို့ ပြောကတ်တေလည်း?” 14သူရို့စာ အဖြေပီးကတ်လီရေ၊ “တစ်ယောက်တစ်ရီ ပြောကတ်ပါရေ၊ ကိုယ်တော် ရီနှစ်မင်္ဂလာပီးသူ ယောဟန် ဖြစ်တေ။ တစ်ယောက်တစ်ရီ ပြောကတ်ပါရေ၊ ဧလိယ ဖြစ်တေ။ အရာ တစ်ယောက်တစ်ရီ ပြောကတ်ပါရေ၊ ယေရမိ မဟုတ်ကေ ဘုရားသတင်းပို့သူရို့အထဲက တစ်ပါး ဖြစ်တေ။” 15ယင်းခါ သူစာ တပည့်ရို့ကို မီးလီရေ၊ “ယေကေလည်း နင်ရို့ကား ငါ့ကို အသူဖြစ်တေ ဟို့ ပြောကတ်တေလည်း?” 16ရှိမုန်-ပေတရုစာ ပြောလီရေ၊ “ကိုယ်တော် ခရစ်တော် ဖြစ်ပါရေ အရာ အသက်သျှင် ထာဝရဘုရား၏ သားတော်လည်း ဖြစ်ပါရေ။” 17ယင်းခါ ယေရှုစာ သူ့ကို ပြောလီရေ၊ “ယောနသား ရှိမုန်၊ နင် မင်္ဂလာဟိရေ၊ အကြောင်းကား ဒေ အကြောင်းကို လူတစ်ယောက်လည်း နင့်ဘားမာ ဖေါ်ပြလီစာ မဟုတ်၊ ယေကေလည်း ငါ့ ဂေါင်းခင်ဘုံသျှင် အဖရာ နင့်ဘားမာ ဖေါ်ပြလီစာ ဖြစ်တေ။ 18အရာ ငါ နင့်ကို ပြောရေ၊ နင်စာ ပေတရု ▼▼ပေတရု ဂရိဘာသာစကားန ပေတရုနာမည် အဓိပ္ပါယ်ကား ကျောက်လုံး ဖြစ်ပါရေ။
ဖြစ်တေ။ ငါ ဒေ ကျောက်လုံးထက်မာ ကိုယ့်အသင်းတော်ကို တည်ဆောက်ဖို့။ သီသူရို့နိုင်ငံ၏ တန်ခိုးစာ ယင်းအသင်းတော်ကို နိုင်လိမည် မဟုတ်။ 19ငါ နင့်ကို ဂေါင်းခင်နိုင်ငံတော်၏ သွပွတ်ကို ပီးဖို့ အရာ နင် ဇာ အကြောင်းအရာကိုမဆို ဒေ ကမ္ဘာမာ ဟန့်ရေဆိုကေ ဂေါင်းခင်ဘုံမာလည်း ဟန့်လိမည်၊ အရာ နင် ဇာ အကြောင်းအရာကိုမဆို ဒေ ကမ္ဘာမာ အခွင့်ပီးရေဆိုကေ ဂေါင်းခင်ဘုံမာလည်း အခွင့်ပီးလိမည်။” 20ယင်းနောက် သူစာ ကိုယ် ခရစ်တော် ဖြစ်တေဆိုစာ အကြောင်းကို တစ်ယောက်ဘားမာလည်း မပြောရအောင် ကိုယ့်တပည့်ရို့ကို တတင်းရရင်း ဟန့်လိုက်လီရေ။ ကိုယ်သီဖို့စာ အကြောင်းကို ပထမခေါက် ပြောပြခြင်း
(မာကု ၈:၃၁-၃၃၊ လုကာ ၉:၂၁-၂၂)
21ယေရှုစာ ယင်းချိန်ကပင်စရို့ ကိုယ် ယေရုရှလင်မြို့တို့ ကြွရဖို့စာ အကြောင်း၊ ဂေါင်းဆောင်ဝါကြီးရို့အလက်မာ၊ ယဇ်ပုရောဟိတ်အကြီးရို့အလက်မာ အရာ ကျမ်းဆရာရို့အလက်မာ ဒုက္ခ-ဝေဒနာ ခံရဖို့စာ အကြောင်းကို ကိုယ့်တပည့်ရို့ဘားမာ ပြောပြလီရေ။ အရာ သူစာ ကိုယ်အသီခံရဖို့စာ အကြောင်းန သုံးရက်နိမာ သီရာက ပြန်ရှင်ထမြောင့်ဖို့စာ အကြောင်းကိုလည်း ပြောပြလီရေ။ 22ယင်းခါ ပေတရုစာ သူ့ကို တစ်ဖက်တို့ ခေါ်ယူပြီးကေ ဟောက်ရို့ ပြောလီရေ၊ “မဖြစ်နိုင်ပါ အသျှင်! ထိုဘေးအန္တရာယ်တိက ကိုယ်တော်ကို ထာဝရဘုရား ကယ်ဆယ်ပါစီ။ ထိုဘေးအန္တရာယ်တိ ကိုယ်တော်ဘားမာ တစ်ခါလည်း မကျရောက်ပါစီကေ့။” 23ယေရှုစာ နောက်တို့ လှည့်ကြည့်ရို့ ပေတရုကို ပြောလီရေ၊ “မာရ်နတ်၊ နင် ငါ့နိုင်ဗြင်းက ပျောက်လီ! နင် ငါ့လမ်းကို တားဆီးရေ။ နင် ထာဝရဘုရား၏ အလိုဆန္ဒကို မစဉ်းစားဘိုင်းန လူရို့ အလိုဆန္ဒကို စဉ်းစားနီရေ။”နင့်ကားတိုင်ကို ရွက်ရို့ ငါ့နောက်က လိုက်ရဖို့
(မာကု ၈:၃၄-၉:၁၊ လုကာ ၉:၂၃-၂၇)
24ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “အသူမဆို ငါ့နောက်က လိုက်ချင်ရေဆိုကေ သူစာ ကိုယ့်ကို ငြင်းပယ်ရဖို့ အရာ သူစာ ကိုယ့်ကားတိုင်ကို ရွက်ရို့ ငါ့နောက်က လိုက်ရဖို့။ 25အရာ အသူမဆို ကိုယ့်အသက်ကို ကယ်ဆယ်ချင်ရေဆိုကေ သူစာ ကိုယ့်မာ ထာဝရအသက်ကို ဆုံးရလိမည်၊ ယေကေလည်း အသူမဆို ငါ့အကြောင်းန ကိုယ့်အသက်ကို အဆုံးခံရေဆိုကေ သူစာ ကိုယ့်မာ ထာဝရအသက်ကို ကယ်ဆယ်လိမည်။ 26အသူမဆို တစ်လောကလုံးကို အနိုင်ရရို့ပင်လည်း ကိုယ့်မာ ထာဝရအသက်ကို ဆုံးရရေဆိုကေ ယင်းသူမာ ဇာအမြတ် ဟိရေလည်း? ထာဝရအသက်ကို ပြန်ရဖို့အတွက် ယင်းသူမာ ပီးစရာ ဇာ ဟိရေလည်း? 27မနုသသားတော်စာ ကိုယ့်ဂေါင်းခင်နတ်သားရို့နအတူ ကိုယ့်အဖ၏ ဘုန်းတန်ခိုးကို ဆောင်ရို့ ကြွလာလိမည်။ ယင်းခါ သူစာ လူတိုင်းကို အလုပ်န ထိုက်တန်စာ အကျိုးကို ပီးလိမည်။ 28ငါ နင်ရို့ကို အမှန် ပြောရေ၊ မနုသသားတော် မင်းအဖြစ် ကြွလာစာကို မမြင်ရသကြား တစ်ခုပိုင်လည်း သီရဖို့ မဟုတ်စာ လူလိုင်းကေယောက် ဒေ နေရာမာ ဟိကတ်တေ။”
Copyright information for
RmzSC