Matthew 19

လင်မယား ခွါဖို့စာ အကြောင်းကို သွန်သင်ခြင်း

(မာကု ၁၀:၁-၁၂၊ လုကာ ၁၆:၁၈)

1ထိုစကားတိကို ပြောပြီးရေနောက် ယေရှုစာ ဂါလိလဲပြည်နယ်က ထွက်ရို့ ယော်ဒန်ချောင်းကမ်းတစ်ဖက်က ယုဒပြည်နယ်တို့ ကြွလီရေ။ 2ယင်းခါ လူအများကြီး သူ့နောက်က လိုက်ကတ်လီရေ အရာ သူစာ ယင်းနေရာမာ ရောဂါသေရို့ကို ကောင်းအောင် လုပ်လီရေ။

3ယင်းခါ ဖာရိရှဲအဖွဲ့သား လိုင်းကေယောက် ယေရှုကို စုံစမ်းဖို့အတွက် လာကတ်လီရေ။ အရာ သူရို့စာ ယေရှုကို မီးကတ်လီရေ၊ “ဆရာ၊ မောရှေ၏ ပညှတ်တရားမာ ဇာမဆိုတစ်ခု အကြောင်းန အသူ့ကိုမဆို မယားကို ခွါဖို့ အခွင့် ပီးပါရေလော?” 4ယေရှုစာ အဖြေပီးလီရေ၊ “ပထမဆုံးခါ ဖန်ဆင်းသျှင် ထာဝရဘုရားစာ ယောက်ျားန မိန်းမကို ဖန်ဆင်းလီရေ ဆိုပြီးကေ ကျမ်းစာမာ ရွီးရို့ဟိစာကို ကိုယ်ဘင်ရို့ မဖတ်ဖူးကတ်လော? 5အရာ ထာဝရဘုရားစာ ပြောလီရေ၊ ‘ယင်းအတွက်န ယောက်ျားစာ ကိုယ့်အမိအဖကို စွန့်ရို့ ကိုယ့်မယားန ပေါင်းရို့ နီလိမည် အရာ သူရို့နှစ်ယောက် တစ်ကိုယ်တည်း ဖြစ်ကတ်လိမည်။’ 6ယင်းအတွက်န သူရို့စာ နှစ်ယောက် မဟုတ်ပျာ၊ တစ်ကိုယ်တည်း ဖြစ်ကတ်ပျာ။ ယင်းအတွက်န ထာဝရဘုရား တစ်ကိုယ်တည်း ပေါင်းပီးစာကို လူရို့ မခွါရ။” 7ယင်းခါ ဖာရိရှဲအဖွဲ့သားရို့စာ သူ့ကို မီးကတ်လီရေ၊ “ယင်းပိုင်ဆိုကေ မောရှေ ဇာဖို့ ခွါစာ ပီးရို့ မယားကို ခွါဖို့ အာဏာ ပီးလီပါစာလည်း?” 8ယေရှုစာ သူရို့ကို အဖြေပီးလီရေ၊ “ကိုယ်ဘင်ရို့မာ စိတ်နှလုံး ကျန်းရေအတွက်န မောရှေ ကိုယ်ဘင်ရို့ကို ဒေပိုင် အခွင့်ပီးလီစာ ဖြစ်တေ၊ ယေကေလည်း ကမ္ဘာအစကပင် ယင်းပိုင် မဟိလီ။ 9ငါ ကိုယ်ဘင်ရို့ကို ပြောရေ၊ အသူမဆို ကာမဂုဏ်အပြစ်ကို ပယ်ရို့ အခြားတစ်ခုတစ်ခု အကြောင်းန ကိုယ့်မယားကို ခွါရို့ အခြားတစ်ယောက်ကို နစပ်တေဆိုကေ သူစာ ကာမဂုဏ် ပြစ်မှားရေ။”

10ယင်းခါ တပည့်ရို့စာ ယေရှုကို ပြောကတ်လီရေ၊ “လင်န မယားအထဲမာ ယင်းပိုင် ဖြစ်တေဆိုကေ အိမ်ထောင်မပြုဘိုင်း နီစာ ပိုရို့ ကောင်းပါဖို့သိ။” 11ယေရှုစာ သူရို့ကို ပြောလီရေ၊ “အိမ်ထောင်ရေးနဆိုင်စာ သွန်သင်ချက်ကို အားကုံးသူ လက်မခံနိုင်ကတ်၊ ယေကေလည်း ဒေ သွန်သင်ချက်ကို လက်ခံဖို့အတွက် ထာဝရဘုရားက တန်ခိုးကို ရသူရို့ရာ လက်ခံနိုင်ကတ်တေ။ 12တစ်ယောက်တစ်ရီ အမိဝမ်းထဲကပင် ကာမဂုဏ် အားမဟိဘိုင်းန မွီးဖွားလာရေ၊ တစ်ယောက်တစ်ရီကို လူရို့ ကာမဂုဏ် အားမဟိရအောင် လုပ်ဘိုက်လိုက်ကတ်တေ၊ အရာ တစ်ယောက်တစ်ရီ ဂေါင်းခင်နိုင်ငံတော်အတွက် အိမ်ထောင်မပြုဘိုင်းန နီဖို့ ဆိုပြီးကေ ဆုံးဖြတ်ကတ်တေ။ ယင်းပိုင် ဆုံးဖြတ်ချက်ကို လက်ခံနိုင်သူရို့ လက်ခံကတ်။”

အသျှေရို့ကို ယေရှု ပဿိပီးခြင်း

(မာကု ၁၀:၁၃-၁၆၊ လုကာ ၁၈:၁၅-၁၇)

13ယင်းနောက် အသျှေရို့ အဂေါင်းမာ အလက်တင်ရို့ ပဿိ ပီးပတ်စီအတွက် လူရို့စာ အသျှေရို့ကို ယေရှုတို့ ယူလာကတ်လီရေ။ ယေကေလည်း တပည့်ရို့စာ လူရို့ကို ဟောက်ကတ်လီရေ။ 14ယင်းခါ ယေရှုစာ ပြောလီရေ၊ “အသျှေရို့ကို ငါ့တို့ လာဖို့ ပီးကတ်၊ အကြောင်းကား ဂေါင်းခင်နိုင်ငံတော်စာ ဒေ အသျှေရို့ပိုင် လူရို့အတွက်ရာ ဖြစ်တေ။” 15အရာ အသျှေရို့ အဂေါင်းမာ အလက်တင်ရို့ ပဿိ ပီးပြီးရေနောက် သူစာ ယင်းနေရာက ထွက်ရို့ ကြွလီရေ။

သူဌေးတစ်ယောက် အကြောင်း

(မာကု ၁၀:၁၇-၃၁၊ လုကာ ၁၈:၁၈-၃၀)

16တစ်ရက်နိ လူပျိုတစ်ယောက်စာ ယေရှုတို့ လာရို့ မီးလီရေ၊ “ဆရာ၊ ထာဝရအသက်ကို ရဖို့အတွက် အကျွန် ဇာ ကောင်းမှုကို လုပ်ရပါဖို့လည်း?” 17ယေရှုစာ သူ့ကို အဖြေပီးလီရေ၊ “ကောင်းမှု အကြောင်းကို ယူရို့ ငါ့ကို ဇာဖို့ မီးစာလည်း? ကောင်းမြတ်သူတစ်ပါးတည်းရာ ဟိရေ။ နင် ထာဝရအသက်ကို ရချင်ရေဆိုကေ သူ၏ ဟိသမျ ပညှတ်ချက်ကို လိုက်နာ။” 18ယင်းလူပျိုစာ မီးလီရေ၊ “ဇာ ဇာ ပညှတ်ချက်ကို လိုက်နာရပါဖို့စာလည်း?” ယေရှုစာ အဖြေပီးလီရေ၊ “လူအသက်ကို မသတ်ရ၊ ကာမဂုဏ် မလိုက်စားရ၊ မခိုးရ၊ မုတ်သား သက်သီ မပီးရ၊ 19အမိအဖကို ရိုသေလေးစားရဖို့ အရာ နင့် အိမ်နားပါးသားကို ကိုယ့်ကိုပိုင် ချစ်ရဖို့။” 20ယင်းခါ သူစာ ပြောလီရေ၊ “အကျွန် ယင်းသျှင့်တိကို လိုက်နာရို့ လာပါဗျာ။ ယင်းသျှင့်တိကို ပယ်ရို့ အကျွန် အရာ ဇာ လုပ်ရပါဖို့သိလည်း?” 21ယေရှုစာ သူ့ကို ပြောလီရေ၊ “နင် အပြည့်အစုံ စင်ကြယ်ချင်ရေဆိုကေ အိမ်တို့ လားရို့ နင့်မာ ဟိသမျ အမွီဥစ္စာကို ရောင်းရို့ ဆင်းရဲသားရို့ကို လှူဘိုက်ခီ။ ယင်းပိုင်ဆိုကေ နင် ဂေါင်းခင်ဘုံမာ ဥစ္စာဘဏ္ဍာကို ရလိမည်။ ယင်းနောက် ပြန်လာရို့ ငါ့တပည့် ဖြစ်ခလိုက်။” 22ယေကေလည်း ယင်းလူပျိုစာ ယေရှု စကားကို ကြားရို့ စိတ်ဒုက္ခ ရပြီးကေ ပြန်လားခလီရေ၊ အကြောင်းကား သူ့မာ အမွီဥစ္စာ အများကြီး ဟိလီရေ။

23ယင်းခါ ယေရှုစာ တပည့်ရို့ကို ပြောလီရေ၊ “ငါ နင်ရို့ကို အမှန် ပြောရေ၊ သူဌေးရို့အတွက် ဂေါင်းခင်နိုင်ငံတော်တို့ ဝင်ဖို့ ကောင်းကောင်း ခက်ခဲရေ။ 24ငါ နင်ရို့ကို အရာလည်း ပြောရေ၊ သူဌေးရို့ ထာဝရဘုရား၏ နိုင်ငံတော်တို့ ဝင်ဖို့စာထက် ကုလားအုပ်တစ်ကောင် အပ်နဖားက ဝင်လားဖို့စာပင် ရွယ်သိရေ။” 25ယေရှု စကားကို ကြားရို့ တပည့်ရို့စာ အံ့ဩပြီးကေ ပြောကတ်လီရေ၊ “ယင်းပိုင်ဆိုကေ အသူ ကယ်တင်ခြင်းကို ရနိုင်ပါဖို့လည်း?” 26သူစာ တပည့်ရို့ကို ကြည့်ရို့ ပြောလီရေ၊ “ဒေ အလုပ်စာ လူအတွက် မဖြစ်နိုင်၊ ယေကေလည်း ထာဝရဘုရားအတွက် အားကုံးစာ ဖြစ်နိုင်ရေ။” 27ယင်းခါ ပေတရုစာ သူ့ကို ပြောလီရေ၊ “ကြည့်ပါ၊ အကျွန်ရို့ကား ဟိသမျ အားကုံးကို စွန့်ဘိုက်ခရို့ ကိုယ်တော်၏ တပည့် ဖြစ်ကတ်ပါဗျာ။ ယင်းပိုင်ဆိုကေ အကျွန်ရို့ ဇာ ရကတ်ပါဖို့လည်း?” 28ယေရှုစာ သူရို့ကို ပြောလီရေ၊ “ငါ နင်ရို့ကို အမှန် ပြောရေ၊ မနုသသားတော်စာ ကမ္ဘာအသစ်တည်ရေခါ ကိုယ့်ဘုန်းတန်ခိုးန ပလ္လင်တော်မာ ထိုင်လိမည်။ ယင်းခါ နင်ရို့ ငါ့တပည့် ဖြစ်သူရို့လည်း ပလ္လင်တစ်ဆယ့်နှစ်ခုမာ ထိုင်ရကတ်လိမည် အရာ ဣသရေလလူမျိုး တစ်ဆယ့်နှစ်စိုင်ကို တရားစစ်ဆေးကတ်လိမည်။ 29အရာ ငါ့အတွက်န အိမ်၊ ညီအစ်ကိုမောင်နမှ၊ အမိအဖ၊ သားသမီး အရာ လယ်မြေကို စွန့်ရို့ လာသူစာ အဆတစ်ရာ ပိုရို့ ရလိမည် အရာ ထာဝရအသက်ကိုလည်း ရလိမည်။ 30ယေကေလည်း ဒေ ဘဝမာ အမြင့်ဆုံးနေရာကို ရသူရို့စာ နောင်ဘဝမာ အနိမ့်ဆုံးနေရာကို ရကတ်လိမည်။ အရာ ဒေ ဘဝမာ အနိမ့်ဆုံးနေရာကို ရသူရို့စာ နောင်ဘဝမာ အမြင့်ဆုံးနေရာကို ရကတ်လိမည်။