Matthew 20

စပျစ်ခင်းမာ လုပ်ကတ်စာ အငှားသားရို့ ပုံဥပမာ

1“ဂေါင်းခင်နိုင်ငံတော်စာ ဒေပိုင် အိမ်သျှင်တစ်ယောက်နတူရေ။ သူစာ တစ်ရက်နိ မိုးသောက်စောစောက စပျစ်ခင်းမာ အလုပ်လုပ်ဖို့အတွက် အငှားသား ရှာဖို့ ထွက်လားခလီရေ။ 2သူစာ အငှားသားရို့ကို တစ်ရက်မာ ငွေသားတန်းကား တစ်ချပ်စီ ပီးမည် ဟို့ သူရို့န ဈီးဖြတ်ကတ်လီရေ။ ယင်းနောက် သူစာ အငှားသားရို့ကို အလုပ်လုပ်ဖို့အတွက် ကိုယ့်စပျစ်ခင်းတို့ ရွှတ်လိုက်လီရေ။ 3အရာ သူစာ ကိုးနာရီလှောက်မာ အရာတစ်ခေါက် ပြင်တို့ ထွက်လားခလီရေ။ ယင်းခါ သူစာ အရာလည်း လူလိုင်းကေယောက် အလုပ် မလုပ်ဘိုင်းန ဈီးမာ ရပ်နီကတ်စာကို မြင်လီရေ။ 4သူစာ ထိုလူရို့ကို ပြောလီရေ၊ ‘နင်ရို့လည်းသောက် ငါ့ စပျစ်ခင်းမာ လားရို့ အလုပ် လုပ်ခီကတ်။ ငါ နင်ရို့ကို ထိုက်တန်စာ လုပ်ခကို ပီးမည်။’ 5ယင်းခါ ထိုလူရို့လည်း စပျစ်ခင်းမာ အလုပ်လုပ်ဖို့ လားခကတ်လီရေ။

“ထိုအိမ်သျှင်စာ တစ်ဆယ့်နှစ်နာရီလှောက်မာ တစ်ခေါက် အရာ သုံးနာရီလှောက်မာ တစ်ခေါက် ပြင်တို့ ထွက်လားခပြီးကေ အယင်ပိုင် အငှားသား ရှာရို့ ရွှတ်လိုက်လီရေ။ 6ယင်းနောက် စပျစ်ခင်းအပိုင်သျှင်စာ ငါးနာရီလှောက်မာ ပြင်တို့ ထွက်လားခလီရေခါ လူလိုင်းကေယောက် ရပ်နီကတ်စာကို မြင်လီရေ။ အရာ သူစာ ထိုလူရို့ကို မီးလီရေ၊ ‘နင်ရို့ အလုပ် မလုပ်ဘိုင်းန ရက်ပြတ်တစ်ရက် ဇာဖို့ ဒေမာ ရပ်နီကတ်စာလည်း?’ 7ယင်းခါ ထိုလူရို့စာ သူ့ကို အဖြေပီးကတ်လီရေ၊ ‘အကျွန်ရို့ကို တစ်ယောက်လည်း အလုပ်လုပ်ဖို့ မခေါ်ပါ။’ စပျစ်ခင်းအပိုင်သျှင်စာ သူရို့ကို ပြောလီရေ၊ ‘နင်ရို့လည်းသောက် ငါ့ စပျစ်ခင်းမာ လားရို့ အလုပ် လုပ်ခီကတ်။’ 8ယင်းနောက် နီဝင်လာရေခါ စပျစ်ခင်းအပိုင်သျှင်စာ ကိုယ့်အလုပ်သမားကို ပြောလီရေ၊ ‘အငှားသားရို့ကို ခေါ်လိုက် အရာ နောက်ဆုံး ရောက်လာစာ အငှားသားကပင်စရို့ ပထမဆုံး ရောက်လာစာ အငှားသားတိုင်အောင် အားကုံးသူကို လုပ်ခ ပီးလိုက်။’

9“ညဇာ ငါးနာရီလှောက်မာ အလုပ်လုပ်ဖို့ လာကတ်စာ အငှားသားရို့ အားကုံးသူ ငွေသားတန်းကား တစ်ချပ်စီ ယူရို့ ပြန်လားခကတ်လီရေ။ 10ယင်းခါ ပထမ အလုပ်လုပ်ဖို့ ရောက်လာကတ်စာ အငှားသားရို့စာ ထိုလူရို့ထက် ပိုရို့ ရဖို့ ဟို့ ထင်ကတ်လီရေ၊ ယေကေလည်း သူရို့လည်းသောက် အားကုံးသူ ငွေသားတန်းကား တစ်ချပ်စီရာ ရကတ်လီရေ။ 11အရာ သူရို့စာ အိမ်သျှင်ကို မန်တက်ရို့ အမျိုးမျိုး စကား ပြောကတ်လီရေ၊ 12‘နောက်ဆုံးပြီးမာ လာရို့ တစ်နာရီတောက် အလုပ်လုပ်သူရို့ကို ကိုယ်ဘင် အကျွန်ရို့န အရှိရှိ လုပ်ခ ပီးလိုက်ပါစာလော? ယေကေလည်း အကျွန်ရို့ကား တစ်ရက်ပတ်လုံး နီပူခံရို့ အလုပ် လုပ်လီကတ်ပါရေ။’ 13ယင်းခါ အပိုင်သျှင်စာ သူရို့အထဲက တစ်ယောက်ကို ပြောလီရေ၊ ‘အဝေး မိတ်ဆွေ၊ ငါ နင့်ကို တစ်ခုလည်း မတရား မလုပ်ကား! နင် ငွေသားတန်းကား တစ်ချပ်န အလုပ်လုပ်ဖို့ သဖေါတူလီရေ မဟုတ်လော? 14နင် ကိုယ်ရစုသင့်ရာကို ယူရို့ လားလီ။ နင့်ကို ပီးစာပိုင်တထန် နောက်ဆုံးပြီးမာ လာသူကိုလည်း ငါ ပီးချင်ရေ။ 15ငါ့ တန်းကားတိကို ငါ လိုစာပိုင် အသုံးပြုဖို့ ငါ့မာ အခွင့်အာဏာ မဟိလော? မဟုတ်ကေ ငါ သနားရေအတွက်န နင် မျက်စိ စူးစာလော?’”

16ပုံဥပမာ တင်ပြရို့ ပြီးရေခါ ယေရှုစာ ပြောလီရေ၊ “ယင်းပိုင် ဒေ ဘဝမာ အနိမ့်ဆုံးနေရာကို ရသူရို့စာ နောင်ဘဝမာ အမြင့်ဆုံးနေရာကို ရကတ်လိမည်၊ အရာ ဒေ ဘဝမာ အမြင့်ဆုံးနေရာကို ရသူရို့စာ နောင်ဘဝမာ အနိမ့်ဆုံးနေရာကို ရကတ်လိမည်။”

ကိုယ်သီဖို့စာ အကြောင်းကို တတိယခေါက် ပြောပြခြင်း

(မာကု ၁၀:၃၂-၃၄၊ လုကာ ၁၈:၃၁-၃၄)

17ယင်းနောက် ယေရှုစာ ယေရုရှလင်မြို့တို့ လားရေလမ်းမာ ကိုယ့်တပည့်တစ်ဆယ့်နှစ်ယောက်ကို တစ်ဖက်တို့ ခေါ်ယူရို့ ပြောလီရေ၊ 18“နားထောင်ကတ်၊ ငါရို့ ဒေဂု ယေရုရှလင်မြို့တို့ လားကတ်စာ ဖြစ်တေ။ ထိုမြို့မာ လူရို့စာ မနုသသားတော်ကို ဖမ်းရို့ ယဇ်ပုရောဟိတ်အကြီးရို့န ကျမ်းဆရာရို့အလက်မာ အပ်ကတ်လိမည်။ ထိုဂေါင်းဆောင်ရို့စာ သူ့ကို တရားစစ်ဆေးရို့ သီဒါဏ် ပီးကတ်လိမည်။ 19အရာ သူရို့စာ သူ့ကို ရယ်သွန်းပြုဖို့အတွက်၊ ကြိမ်ဒါဏ်ပီးဖို့အတွက် အရာ ကားတိုင်မာ တင်ရို့ အသီသတ်ဖို့အတွက် ယုဒမဟုတ်သူရို့အလက်မာ အပ်ကတ်လိမည်။ ယေကေလည်း သူစာ သုံးရက်နိမာ သီရာက ပြန်ရှင်ထမြောင့်လိမည်။”

ညီအစ်ကိုနှစ်ယောက် တောင်းဆိုချက်

(မာကု ၁၀:၃၅-၄၅)

20ယင်းနောက် ဇေဗေဒဲ မယားစာ ကိုယ့်သားနှစ်ယောက်ကို ယူရို့ ယေရှုတို့ လာလီရေ အရာ ယေရှုကို တစ်ခုမသာ တောင်းပန်ဖို့ အလိုန ရှိခိုးလီရေ။ 21ယေရှုစာ သူ့ကို မီးလီရေ၊ “ကိုယ်ဘင် ဇာ လိုစာလည်း?” ယင်းခါ သူစာ ယေရှုကို တောင်းပန်လီရေ၊ “အသျှင်၊ ကိုယ်တော်၏ နိုင်ငံတော်မာ အကျွန့် သားနှစ်ယောက်ကို ကိုယ်တော် ညာဖက်က တစ်ယောက် အရာ ဘယ်ဖက်က တစ်ယောက် ထိုင်ဖို့အခွင့် ပီးပါ။” 22ယေကေလည်း ယေရှုစာ ပြောလီရေ၊ “နင်ရို့ ဇာ တောင်းကတ်တေလည်းဆိုစာကို မသိကတ်။ ငါ ခံရဖို့စာ ဒုက္ခ-ဝေဒနာကို နင်ရို့ ခံနိုင်ကတ်ဖို့လော?” ယင်းခါ သူရို့စာ အဖြေပီးကတ်လီရေ၊ “ခံနိုင်ပါရေ။” 23ယေရှုစာ သူရို့ကို ပြောလီရေ၊ “နင်ရို့ အမှန် ငါ ခံရဖို့စာ ဒုက္ခ-ဝေဒနာကို ခံရကတ်လိမည်၊ ယေကေလည်း ငါ့ညာဖက်န ငါ့ဘယ်ဖက်က ထိုင်ဖို့စာ အခွင့်အာဏာ ငါ့မာ မဟိ။ ငါ့အဖ အဆင်သင့် လုပ်ထားသူရို့ရာ ငါ့ညာဖက်န ငါ့ဘယ်ဖက်က ထိုင်ဖို့စာ အခွင့်အာဏာကို ရကတ်လိမည်။”

24ထိုစကားတိကို ကြားရို့ အခြားတပည့်ဆယ်ယောက်စာ သူရို့ ညီအစ်ကိုနှစ်ယောက်ကို မန်ပါကတ်လီရေ။ 25ယင်းခါ ယေရှုစာ တပည့်ရို့ကို ခေါ်ရို့ ပြောလီရေ၊ “ယုဒမဟုတ်သူရို့မာ အုပ်ချုပ်သူရို့စာ တန်ခိုးအာဏာန သူရို့ကို အုပ်ချုပ်ကတ်တေဆိုစာကို နင်ရို့ သိကတ်တေ။ အရာ သူရို့မာ ဂေါင်းဆောင်ရို့စာ သူရို့ကို အာဏာချကတ်တေဆိုစာကိုလည်း နင်ရို့ သိကတ်တေ။ 26ယေကေလည်း နင်ရို့အထဲမာ ယင်းပိုင် ဖြစ်ဖို့ မသင့်။ နင်ရို့အထဲမာ အကြီးဖြစ်ချင်သူစာ နင်ရို့ကို ပြုဇုသူ ဖြစ်ရဖို့။ 27အရာ နင်ရို့အထဲမာ အကြီးမြတ်ဆုံးဖြစ်ချင်သူစာ နင်ရို့ဘားမာ ကျွန်ခံရဖို့။ 28မှတ်ထားကတ်၊ မနုသသားတော်စာ ပြုဇုခြင်းကို ခံရဖို့အတွက် ကြွလာစာ မဟုတ်၊ ယေကေလည်း ပြုဇုဖို့အတွက် ကြွလာစာ ဖြစ်တေ အရာ ကိုယ့်အသက်ကို စွန့်ရို့ လူအများကြီးကို ကယ်ဆယ်ဖို့အတွက် ကြွလာစာ ဖြစ်တေ။”

မျက်ကန်းနှစ်ယောက် အကောင်းဖြစ်ခြင်း

(မာကု ၁၀:၄၆-၅၂၊ လုကာ ၁၈:၃၅-၄၃)

29ယေရှုန သူ့တပည့်ရို့စာ ယေရိခေါမြို့က ထွက်ရို့ ကြွကတ်တေခါ လူပရိတ်သတ် အများကြီး ယေရှုနောက်က လိုက်ကတ်လီရေ။ 30ယင်းခါ မျက်ကန်းနှစ်ယောက် လမ်းနားမာ ထိုင်ရို့ ဟိကတ်လီရေ။ ယေရှု ယင်းလမ်းက ကြွလာနီရေဆိုစာကို ကြားကတ်တေခါ သူရို့စာ အားန အော်ရို့ ပြောကတ်လီရေ၊ “အိုး အသျှင်၊ ဒါဝိဒ်မင်း၏ သားတော်၊ အကျွန်ရို့ကို သနားပါ!” 31သူရို့ တိန်းရို့ နီလတ်အောင် လူရို့စာ သူရို့ကို ဟောက်ကတ်လီရေ။ ယေကေလည်း သူရို့စာ အရာလည်း အားန အော်ရို့ ခေါ်ကတ်လီရေ၊ “အိုး အသျှင်၊ ဒါဝိဒ်မင်း၏ သားတော်၊ အကျွန်ရို့ကို သနားပါ!” 32ယင်းခါ ယေရှုစာ တန့်ပြီးကေ သူရို့ကို ကိုယ့်တို့ ခေါ်ရို့ မီးလီရေ၊ “နင်ရို့ ဇာ လိုကတ်စာလည်း? အရာ နင်ရို့အတွက် ငါ ဇာလုပ်ရဖို့လည်း?” 33သူရို့စာ အဖြေပီးကတ်လီရေ၊ “အသျှင်၊ အကျွန်ရို့ မြင်ချင်ပါရေ။” 34ယင်းခါ ယေရှုစာ သူရို့ကို သနားရို့ သူရို့ မျက်စိမာ အလက်န တို့ရေချက်ချင်း သူရို့စာ မြင်ရကတ်လီရေ အရာ သူရို့ ယေရှု၏ နောက်က လိုက်ကတ်လီရေ။