Mat 23 | RmzSC | STEP | ယင်းနောက် ယေရှုစာ လူပရိတ်သတ်ရို့န ကိုယ့်တပည့်ရို့ကို ပြောလီရေ၊

Matthew 23

ဘာသာရေး ဂေါင်းဆောင်ရို့ကို အပြစ်တင်ခြင်း

(မာကု ၁၂:၃၈-၄၀၊ လုကာ ၁၁:၃၇-၅၂၊ ၂၀:၄၅-၄၇)

1 ယင်းနောက် ယေရှုစာ လူပရိတ်သတ်ရို့န ကိုယ့်တပည့်ရို့ကို ပြောလီရေ၊ 2 “ပညှတ်တရားကို သွန်သင်ပီးဖို့အတွက် ကျမ်းဆရာရို့န ဖာရိရှဲအဖွဲ့သားရို့မာ မောရှေပိုင် အခွင့်အာဏာ ဟိရေ။ 3 ယင်းအတွက်န သူရို့ လုပ်ဖို့ ခိုင်းရေအတိုင်း နင်ရို့ လုပ်ကတ် အရာ သူရို့ ပြောရေအတိုင်း နင်ရို့ လိုက်နာကတ်။ ယေကေလည်း သူရို့ လုပ်ကတ်စာပိုင် နင်ရို့ မလုပ်ကတ်ကေ့၊ အကြောင်းကား သူရို့ပစက ပြောစာပိုင် အလက်က မလုပ်ကတ်။ 4 သူရို့စာ လီးနိုင်သရိ ဝန်ထုပ်တိကို လူရို့ကို ရွက်ဖို့ ခိုင်းကတ်တေ၊ ယေကေလည်း သူရို့ ကိုယ်တိုင် ထိုလူရို့ကို ကူညီဖို့အတွက် လက်ညှိုးသျှေတစ်ချောင်းပင် လှုတ်ဖို့ မလိုကတ်။ 5 ထိုကျမ်းဆရာရို့န ဖာရိရှဲအဖွဲ့သားရို့စာ လူရို့က ချီမွမ်းခြင်းကို ရဖို့အတွက် ဟိသမျ ကောင်းမှုကုသိုလ်ကို လုပ်နီကတ်တေ။ သူရို့စာ ကျမ်းချက်တိကို ကြီးနိုင်သရိ လက်ဖွဲ့ ထိုးရို့ ဝတ်နီကတ်တေ၊ အရာ ကိုယ်ရို့ကို သူတော်ကောင်း ဟို့ ပြဖို့အတွက် ကိုယ်ရုံစွမ်တိမာ ရှည်နိုင်သရိ ပန်းဖွားတိကို ဆွဲထားကတ်တေ။ 6 သူရို့စာ တရားဇရပ်တိန ပွဲသဖင်တိမာ အမြင့်မြတ်ဆုံးနေရာမာ ထိုင်ဖို့ နှစ်သက်ကတ်တေ၊ 7 သူရို့စာ ရိုသေခြင်းကို ခံရဖို့အတွက် ဈီးတိမာ လည်နီကတ်တေ အရာ လူရို့က ဆရာ ဟို့ ခေါ်စာကို ကြားချင်ကတ်တေ။

8 “ယေကေလည်း နင်ရို့ သတိထားကတ်! နင်ရို့စာ လူရို့က ဆရာ ဟို့ အခေါ် မခံကတ်ကေ့၊ အကြောင်းကား နင်ရို့မာ ဆရာ တစ်ယောက်တည်းရာ ဟိရေ။ အရာ နင်ရို့ အားကုံးသူ တစ်ယောက်န တစ်ယောက် ညီအစ်ကို ဖြစ်ကတ်တေ။ 9 ဒေ ကမ္ဘာမာ နင်ရို့ တစ်ယောက်ကိုလည်း အဖ ဟို့ မခေါ်ကတ်ကေ့၊ အကြောင်းကား နင်ရို့မာ အဖ တစ်ပါးတည်းရာ ဟိရေ အရာ သူစာ ဂေါင်းခင်ဘုံမာ ကျိန်းဝပ်နီရေ။ 10 နင်ရို့စာ လူရို့က ဂေါင်းဆောင် ဟို့ အခေါ် မခံကတ်ကေ့၊ အကြောင်းကား နင်ရို့မာ ဂေါင်းဆောင် တစ်ပါးတည်းရာ ဟိရေ၊ သူစာ ခရစ်တော် ဖြစ်တေ။ 11 နင်ရို့အထဲမာ အကြီးဆုံး ဖြစ်သူစာ နင်ရို့ကို ပြုဇုသူ ဖြစ်ရဖို့။ 12 ကိုယ့်ကို ချီးမြှောင့်သူစာ နှိမ့်ချခြင်းကို ခံရလိမည် အရာ ကိုယ့်ကို နှိမ့်ချသူစာ ချီးမြှောင့်ခြင်းကို ခံရလိမည်။

13 “အယောင်ဆောင် ကျမ်းဆရာရို့န ဖာရိရှဲအဖွဲ့သားရို့၊ ကိုယ်ဘင်ရို့အတွက် အမင်္ဂလာဟိရေ! ကိုယ်ဘင်ရို့ လူရို့ ရှိက ဂေါင်းခင်နိုင်ငံတော်၏ လမ်းခဝကို ပိတ်ထားကတ်တေ။ ကိုယ်ဘင်ရို့ ကိုယ်တိုင်လည်း မဝင်ကတ် အရာ ဝင်ဖို့ ကြိုးစားသူရို့ကိုလည်း ဝင်ဖို့ မပီးကတ်။

14 ^{▼▼ ပထမဆုံး ရွီးလီစာ ဂရိဘာသာ ကျမ်းစာအဟောင်းတိမာ ဒေ အခန့်ငယ် ၁၄-မာ စကားတိ ရွီးရို့ မဟိပါ။}“အယောင်ဆောင် ကျမ်းဆရာရို့န ဖာရိရှဲအဖွဲ့သားရို့၊ ကိုယ်ဘင်ရို့အတွက် အမင်္ဂလာဟိရေ! ကိုယ်ဘင်ရို့စာ လူရို့က ချီမွမ်းခြင်းကို ရဖို့အတွက် ရှည်နိုင်သရိ ဆုကို တောင်းနီကတ်တေ။ ယေကေလည်း ကိုယ်ဘင်ရို့စာ မဆမရို့ ပစ္စည်း-ဥစ္စာတိကို အားဒမ လုယူနီကတ်တေ။ ယင်းအတွက်န ကိုယ်ဘင်ရို့ အရာလည်း အများကြီး အပြစ်ဒါဏ် ခံရကတ်လိမည်။

15 “အယောင်ဆောင် ကျမ်းဆရာရို့န ဖာရိရှဲအဖွဲ့သားရို့၊ ကိုယ်ဘင်ရို့အတွက် အမင်္ဂလာဟိရေ! ကိုယ်ဘင်ရို့စာ လူတစ်ယောက်ကို ကိုယ်ရို့ ဘာသာတရားလမ်းတို့ ကူးပြောင်းယူခဖို့အတွက် ကမ္ဘာတစ်လုံးကို ပတ်နီကတ်တေ။ အရာ သူစာ ကိုယ်ဘင်ရို့ ဘာသာတရားလမ်းတို့ ကူးပြောင်းလာရေခါ ကိုယ်ဘင်ရို့စာ ယင်းသူကို ကိုယ်ရို့ထက် ပိုရို့ ငရဲမီးအိုင်မာ အပြစ်ဒါဏ် ခံဖို့ထိုက်တန်လတ်အောင် လုပ်နီကတ်တေ။

16 “ကိုယ်ဘင်ရို့အတွက် အမင်္ဂလာဟိရေ! ကိုယ်ဘင်ရို့ ကိုယ်တိုင် မျက်ကန်း ဖြစ်ရို့ပင်လည်း အခြားလူရို့ကို လမ်းပြကတ်တေ။ အရာ ကိုယ်ဘင်ရို့စာ ပြောနီကတ်တေ၊ ‘အသူမဆို ဝိပဿနာကျောင်းကို တိုင်တန်းရို့ အကျိန်ကိုင်ရေဆိုကေ ယင်းအကျိန်စာ မတည်၊ ယေကေလည်း အသူမဆို ဝိပဿနာကျောင်းမာဟိစာ ရွှေတိကို တိုင်တန်းရို့ အကျိန်ကိုင်ရေဆိုကေ ယင်းအကျိန်စာ တည်ရေ။’ 17 ပညာတုံးရို့န မျက်ကန်းရို့! ဇာသျှင့် အကြီးဆုံးလည်း? ရွှေလော မဟုတ်ကေ ရွှေကို သန့်ရှင်းအောင် လုပ်စာ ဝိပဿနာကျောင်းလော?

18 “ကိုယ်ဘင်ရို့ အရာတစ်ပြန် ဒေပိုင်လည်း ပြောနီကတ်တေ၊ ‘အသူမဆို ယဇ်ပလ္လင်ကို တိုင်တန်းရို့ အကျိန်ကိုင်ရေဆိုကေ ယင်းအကျိန်စာ မတည်၊ ယေကေလည်း အသူမဆို ယဇ်ပလ္လင်မာ တင်ထားစာ ပူဇော်သက္ကာကို တိုင်တန်းရို့ အကျိန်ကိုင်ရေဆိုကေ ယင်းအကျိန်စာ တည်ရေ။’ 19 မျက်ကန်းရို့! ဇာသျှင့် အကြီးဆုံးလည်း? ပူဇော်သက္ကာလော၊ မဟုတ်ကေ ပူဇော်သက္ကာကို သန့်ရှင်းအောင် လုပ်စာ ယဇ်ပလ္လင်လော? 20 ယင်းအတွက်န ယဇ်ပလ္လင်ကို တိုင်တန်းရို့ အကျိန်ကိုင်သူစာ ယဇ်ပလ္လင်န ယဇ်ပလ္လင်ထက်မာဟိစာ အားကုံးကို တိုင်တန်းရို့ အကျိန်ကိုင်ရေ။ 21 အရာ ဝိပဿနာကျောင်းကို တိုင်တန်းရို့ အကျိန်ကိုင်သူစာ ဝိပဿနာကျောင်းန ဝိပဿနာကျောင်းထဲမာ ကျိန်းဝပ်နီသူကို တိုင်တန်းရို့ အကျိန်ကိုင်ရေ။ 22 ဂေါင်းခင်ဘုံကို တိုင်တန်းရို့ အကျိန်ကိုင်သူစာ ထာဝရဘုရား၏ ပလ္လင်တော်န ပလ္လင်တော်မာ ထိုင်နီသူကို တိုင်တန်းရို့ အကျိန်ကိုင်ရေ။

23 “အယောင်ဆောင် ကျမ်းဆရာရို့န ဖာရိရှဲအဖွဲ့သားရို့၊ ကိုယ်ဘင်ရို့အတွက် အမင်္ဂလာဟိရေ! ကိုယ်ဘင်ရို့စာ နှုန်း၊ ဆီးသား အရာ စမုန့်စပါးကို အမြဲတိုင်း ဆယ်ဖို့တစ်ဖို့ လှူနီကတ်တေ။ ယေကေလည်း တရားမျှတခြင်း၊ သနားကြင်နာခြင်း အရာ သစ္စာထားခြင်းကို ကိုယ်ဘင်ရို့ ပယ်ဘိုက်လိုက်ကတ်ပျာ။ ယင်းသျှင့်တိစာ မောရှေ၏ ပညှတ်တရားမာ အရာလည်း ပိုရို့ အရေးကြီးစာ အကြောင်းတိ ဖြစ်တေ။ ထိုအကြောင်းတိကိုလည်း မပယ်ဘိုင်းန ကိုယ်ဘင်ရို့ လိုက်နာဖို့ သင့်လီကတ်တေ။ 24 ကိုယ်ဘင်ရို့ ကိုယ်တိုင် မျက်ကန်း ဖြစ်ရို့ပင်လည်း အခြားလူရို့ကို လမ်းပြကတ်တေ။ ကိုယ်ဘင်ရို့စာ ခြင်သျှေတစ်ကောင် မပါရအောင် ရီကို စစ်ရို့ သောက်ကတ်တေ၊ ယေကေလည်း ကုလားအုပ်ကိုဆိုကေကား မျိုဘိုက်လိုက်ကတ်တေ။

25 “အယောင်ဆောင် ကျမ်းဆရာရို့န ဖာရိရှဲအဖွဲ့သားရို့၊ ကိုယ်ဘင်ရို့အတွက် အမင်္ဂလာဟိရေ! ကိုယ်ဘင်ရို့စာ လောင်ပန်း-ဟင်းစားအပြင်ကို စင်အောင် ပွတ်နီကတ်တေ၊ ယေကေလည်း ကိုယ်ဘင်ရို့အထဲမာ လုယူခြင်းန လောဖတတ်ခြင်း ပြည့်နီရေ။ 26 မျက်ကန်း ဖာရိရှဲအဖွဲ့သားရို့! ပထမဆုံး ထိုလောင်ပန်း-ဟင်းစားအထဲကို စင်အောင် ပွတ်ကတ်။ ယင်းပိုင်ဆိုကေ ပြင်ကလည်း စင်လိမည်။

27 “အယောင်ဆောင် ကျမ်းဆရာရို့န ဖာရိရှဲအဖွဲ့သားရို့၊ ကိုယ်ဘင်ရို့အတွက် အမင်္ဂလာဟိရေ! ကိုယ်ဘင်ရို့စာ ထုန်းဖြူကျန်ထားစာ သင်္ချိုင်းဂူနတူကတ်တေ။ ယင်းသင်္ချိုင်းဂူစာ ပြင်ကကား ကောင်းကောင်း လှရေ၊ ယေကေလည်း အထဲမာကား လူသီအရိုးတိန အမျိုးမျိုး အပုတ်အယွတ်တိ ပြည့်နီရေ။ 28 ယင်းပိုင်တထန် လူရို့ မျက်စိမာ ပြင်ကကား ကိုယ်ဘင်ရို့ကို သူတော်ကောင်းပိုင် မြင်ကတ်တေ၊ ယေကေလည်း အထဲမာကား ဟန်ဆောင်ခြင်းန လိမ်လှည့်ခြင်းတိ ပြည့်နီရေ။

29 “အယောင်ဆောင် ကျမ်းဆရာရို့န ဖာရိရှဲအဖွဲ့သားရို့၊ ကိုယ်ဘင်ရို့အတွက် အမင်္ဂလာဟိရေ! ကိုယ်ဘင်ရို့စာ ဘုရားသတင်းပို့သူရို့ သင်္ချိုင်းတိကို အသစ်ပျင်ရို့ ဆင့်နီကတ်တေ အရာ သူတော်ကောင်းရို့ သင်္ချိုင်းတိကို အလှပပျင်ရို့ ဆင်ထားကတ်တေ။ 30 ကိုယ်ဘင်ရို့ ပြောနီကတ်တေ၊ ‘ငါရို့စာ ငါရို့မာ အဖိုးအဖီးအစိုင်လာရို့ လက်ထက်ခါ ဟိလီဖို့ဆိုကေ ဘုရားသတင်းပို့သူရို့ကို အသီသတ်ဖို့အတွက် သူရို့န ဝင်ပါလီဖို့ မဟုတ်။’ 31 ထိုစကားကနီရို့ ကိုယ်ဘင်ရို့စာ ဘုရားသတင်းပို့သူရို့ကို အသီသတ်ဘိုက်လီသူရို့မာ အမျိုးအနွယ်သား ဖြစ်ကတ်တေဆိုစာကို ကိုယ်ဘင်ရို့ ကိုယ်တိုင် ဝန်ခံကတ်တေ။ 32 ယင်းပိုင်ဆိုကေ ကိုယ်ဘင်ရို့မာ အဖိုးအဖီးအစိုင်လာရို့ စခကတ်စာ အလုပ်တိကို ကိုယ်ဘင်ရို့ အဆုံးသတ်ကတ်။

33 “အိုး မြိန်ဆိုးရို့န မြိန်အမျိုးရို့! ကိုယ်ဘင်ရို့ ဇာပိုင်ပျင်ရို့ ငရဲမီးအိုင်မာ ခံရဖို့စာ အပြစ်ဒါဏ်က ရွတ်ကတ်ဖို့စာလည်း? 34 ယင်းအတွက်န ငါ ကိုယ်ဘင်ရို့တို့ ဘုရားသတင်းပို့သူရို့ကို၊ ပညာသျှင်ရို့ကို အရာ ကျမ်းဆရာရို့ကို ရွှတ်လိုက်မည်။ ကိုယ်ဘင်ရို့စာ သူရို့အထဲက တစ်ချိုးလူရို့ကို အသီသတ်ကတ်လိမည်၊ တစ်ချိုးလူရို့ကို ကားတိုင်မာ တင်ရို့ သတ်ကတ်လိမည်။ အရာ တစ်ချိုးလူရို့ကို တရားဇရပ်မာ ကြိမ်ဒါဏ် ပီးကတ်လိမည် အရာ တစ်ရွာကနီရို့ တစ်ရွာတို့ နှင်ထုတ်ကတ်လိမည်။ 35 ယင်းအတွက်န သူတော်ကောင်း အာဗေလကပင်စရို့ သန့်ရှင်းစာနေရာန ယဇ်ပလ္လင်ကြားမာ ကိုယ်ဘင်ရို့ အသီသတ်လီကတ်စာ ဗာရခိသား ဇာခရိတိုင်အောင် ဒေ ကမ္ဘာမာ ဟိသမျ သူတော်ကောင်းရို့ကို အသီသတ်ခြင်း အကြောင်းန ကိုယ်ဘင်ရို့ အပြစ်အတင် ခံရကတ်လိမည်။ 36 ငါ ကိုယ်ဘင်ရို့ကို အမှန် ပြောရေ၊ ထို ဟိသမျ လူရို့ကို အသီသတ်ခြင်း အကြောင်းန ဒေခိုက်မာ လူရို့စာ အပြစ်အတင် ခံရကတ်လိမည်။

ယေရုရှလင်မြို့သားရို့အတွက် ယေရှု ဝမ်းနည်းခြင်း

(လုကာ ၁၃:၃၄-၃၅)

37 “ယေရုရှလင်မြို့သားရို့! အိုး ယေရုရှလင်မြို့သားရို့! နင်ရို့စာ ဘုရားသတင်းပို့သူရို့ကို အသီသတ်နီကတ်တေ အရာ နင်ရို့တို့ ရွှတ်လိုက်သူရို့ကို ကျောက်လုံး ဘိုက်ရို့ သတ်နီကတ်တေ။ ကြက်မစာ ကြက်သျှေတိကို ကိုယ့်အတောင်အောက်က စုထားစာပိုင် ငါလည်းသောက် နင်ရို့မာ သားသမီးရို့ကို အပြန်ပြန် ကိုယ့်အနားမာ စုထားဖို့ ကြည့်လီရေ၊ ယေကေလည်း နင်ရို့ သဖေါမတူလီကတ်။ 38 ယင်းအတွက်န နင်ရို့ ကြည့်ကတ်! နင်ရို့မာ ဝိပဿနာကျောင်းကို ထာဝရဘုရား စွန့်ဘိုက်လိုက်ပျာ။ 39 အရာ ငါ နင်ရို့ကို ပြောရေ၊ ‘အသျှင်၏ နာမည်န ကြွလာသူစာ မင်္ဂလာ ဟိပါစီ’ ဟို့ နင်ရို့ မပြောသကြား နင်ရို့ ငါ့ကို အရာ မြင်ရကတ်လိမည် မဟုတ်ပျာ။”