Matthew 25

အပျိုမဆယ်ယောက် ပုံဥပမာ

1“မနုသသားတော် ပြန်ရို့ ကြွလာရေနိမာ ဂေါင်းခင်နိုင်ငံတော်စာ ဒေပိုင် အပျိုမဆယ်ယောက်နတူလိမည်။ သူရို့စာ သမက်သျှာကို ကြိုဆိုဖို့အတွက် ဆီမီးခွက် ထွန်းရို့ ပြင်တို့ ထွက်လိုက်ကတ်လီရေ။ 2သူရို့အထဲမာ လိမ္မာစာ အပျိုမငါးယောက် အရာ မလိမ္မာစာ အပျိုမငါးယောက် ဟိကတ်လီရေ။ 3ထိုမလိမ္မာစာ အပျိုမငါးယောက်စာ ကိုယ်ရို့မာ ဆီမီးခွက်ကို ယူခကေလည်းသောက် ဆီမယူခကတ်လီ။ 4ယေကေလည်း လိမ္မာစာ အပျိုမငါးယောက်စာ ဆီမီးခွက်နအတူ ဆီကိုလည်း ပလင်းမာ ထည့်ရို့ ယူခကတ်လီရေ။ 5ယင်းခါ သမက်သျှာ လာဖို့ ကြာရေအတွက်န သူရို့ အားကုံးသူ ငိုက်ရို့ ငိုက်ရို့ အိပ်မောကျလားခကတ်လီရေ။

6“ယေကေလည်း ညဉ့်သိုင်ခေါင်လှောက်မာ၊ ‘ကြည့်လိုက်ကတ်၊ သမက်သျှာ လာနီဗျာ။ သမက်သျှာကို ကြိုဆိုဖို့ ထွက်လာကတ်ဖိ’ ဟို့ အားန အော်သံကို ကြားရလီရေ။ 7ယင်းခါ သူရို့ အားကုံးသူ ထရို့ ကိုယ်ရို့မာ ဆီမီးခွက်တိကို အဆင်သင့် လုပ်ကတ်လီရေ။ 8ယေကေလည်း ထိုမလိမ္မာစာ အပျိုမရို့စာ လိမ္မာစာ အပျိုမရို့ကို ပြောကတ်လီရေ၊ ‘ငါရို့မာ ဆီမီးခွက်တိ သီဖို့ပျင်နီဗျာ၊ ငါရို့ကို ဆီတစ်ဖဲ့ ပီးကတ်။’ 9ယင်းခါ ထိုလိမ္မာစာ အပျိုမရို့စာ ပြောကတ်လီရေ၊ ‘မဖြစ်နိုင်၊ ဒေမာ ဟိစာဆီန ငါရို့ အားကုံးသူအတွက် လောက်ဖို့ မဟုတ်။ ယင်းထက်ပင် နင်ရို့ ဆိုင်တို့ လားရို့ ကိုယ်ရို့အတွက် ဆီဝယ်ယူခီကတ်။’ 10ထိုမလိမ္မာစာ အပျိုမရို့ ဆီဝယ်ဖို့ ထွက်လားခကတ်တေ ချက်ချင်း သမက်သျှာ ရောက်လာလီရေ။ ယင်းခါ လိမ္မာစာ အပျိုမရို့စာ အဆင်သင့် ဟိကတ်တေအတွက်န သမက်သျှာနအတူ လက်ဆောင်ပွဲချစာ အိမ်တို့ လိုက်လားခကတ်လီရေ။ အရာ သူရို့ အားကုံးသူ အိမ်ထဲတို့ ဝင်ကတ်တေခါ လမ်းခဝကို ပိတ်ထားလိုက်လီရေ။

11“နောက်ဆုံးပြီးမာ ထိုမလိမ္မာစာ အပျိုမရို့စာ လာရို့ ပြောကတ်လီရေ၊ ‘အမောင်၊ အကျွန်ရို့ကို တန်ခါးပိတ် ဖွင့်ပီးပါ။’ 12ယင်းခါ သမက်သျှာစာ သူရို့ကို ပြောလီရေ၊ ‘ငါ နင်ရို့ကို အမှန် ပြောရေ၊ ငါ နင်ရို့ကို မသိ။’” 13ပုံဥပမာ တင်ပြရို့ ပြီးရေခါ ယေရှုစာ ပြောလီရေ၊ “ယင်းအတွက်န နင်ရို့ သတိန စောင့်နီကတ်၊ အကြောင်းကား ထိုအချိန်န ထိုနိရက် အကြောင်းကို နင်ရို့ မသိကတ်။”

ကျွန်သုံးယောက် ပုံဥပမာ

(လုကာ ၁၉:၁၁-၂၇)

14“ဂေါင်းခင်နိုင်ငံတော်စာ အခြားပြည်တို့ ခရီးထွက်ဖို့စာ လူတစ်ယောက်နတူရေ။ သူစာ အခြားပြည်တို့ ခရီးမထွက်ခင်အယင်က ကိုယ့်မာ ဟိသမျ အမွီ-ဥစ္စာတိကို ကြည့်ရှုစောင့်သျှောက်ဖို့အတွက် ကိုယ့်ကျွန်ရို့ကို ခေါ်ရို့ တာဝန် အပ်ဘိုက်ခလီရေ။ 15ထိုလူစာ ကျွန် အားကုံးသူကို ကိုယ့်တန်ရာနကို တန်းကား တစ်ယောက်ကို ငါးထောင်၊ တစ်ယောက်ကို နှစ်ထောင် အရာ တစ်ယောက်ကို တစ်ထောင် ပီးဘိုက်ခလီရေ။ 16တန်းကားငါးထောင် ရလိုက်သူစာ ယင်းတန်းကားန စီးပွါးရေး လုပ်ရို့ အရာလည်း ငါးထောင် အမြတ်ရလီရေ။ 17အရာ တန်းကားနှစ်ထောင် ရလိုက်သူလည်းသောက် ယင်းတန်းကားန စီးပွါးရေး လုပ်ရို့ အရာလည်း တန်းကားနှစ်ထောင် အမြတ်ရလီရေ။ 18ယေကေလည်း တန်းကားတစ်ထောင် ရလိုက်သူစာ မြေပြင်မာ တွင်းတူးရို့ ကိုယ့်အပိုင်သျှင် တန်းကားတိကို မြှုတ်ထားလိုက်လီရေ။

19“ရက်ပေါင်းများစွာ ကြာရေခါ အပိုင်သျှင်စာ ပြန်လာရို့ ကိုယ့်ကျွန်ရို့က စာရင်းရှင်းဖို့ တောင်းလီရေ။ 20တန်းကားငါးထောင် ရလိုက်သူစာ အရာလည်း အမြတ် ငါးထောင် ယူလာရို့ ပြောလီရေ၊ ‘အသျှင်၊ ကိုယ်ဘင် အကျွန့်ကို တန်းကားငါးထောင် ပီးခလီပါရေ။ ကြည့်ပါ၊ အကျွန် ဒေ တန်းကားငါးထောင်န စီးပွါးရေး လုပ်ရို့ အရာလည်း ငါးထောင် အမြတ်ရလီပါရေ။’ 21ယင်းခါ အပိုင်သျှင်စာ သူ့ကို ပြောလီရေ၊ ‘အေး ကောင်းရေ၊ ကောင်းရေ၊ နင် သစ္စာဟိစာ ကျွန်ကောင်းတစ်ယောက် ဖြစ်တေ။ နင် တာဝန်အနည်းသျှေကို သစ္စာန ထန်းဆောင်ရေအတွက်န ငါ နင့်ကို အရာလည်း တာဝန် အများကြီး ပီးဖို့။ လာလတ်၊ ငါနအတူ ချမ်းသာခြင်း စဉ့်စိမ်ကို ခံခလိုက်။’

22“ယင်းနောက် တန်းကားနှစ်ထောင် ရလိုက်သူစာ လာရို့ ပြောလီရေ၊ ‘အသျှင်၊ ကိုယ်ဘင် အကျွန့်ကို တန်းကားနှစ်ထောင် ပီးခလီပါရေ။ ကြည့်ပါ၊ အကျွန် ဒေ တန်းကားနှစ်ထောင်န စီးပွါးရေး လုပ်ရို့ အရာလည်း နှစ်ထောင် အမြတ်ရလီပါရေ။’ 23ယင်းခါ အပိုင်သျှင်စာ သူ့ကို ပြောလီရေ၊ ‘အေး ကောင်းရေ၊ ကောင်းရေ၊ နင်လည်း သစ္စာဟိစာ ကျွန်ကောင်းတစ်ယောက် ဖြစ်တေ။ နင်လည်း တာဝန်အနည်းသျှေကို သစ္စာန ထန်းဆောင်ရေအတွက်န ငါ နင့်ကို အရာလည်း တာဝန် အများကြီး ပီးဖို့။ လာလတ်၊ ငါနအတူ ချမ်းသာခြင်း စဉ့်စိမ်ကို ခံခလိုက်။’

24“ယေကေလည်း တန်းကားတစ်ထောင် ရလိုက်သူစာ လာရို့ ပြောလီရေ၊ ‘အသျှင် ကြည့်ပါ၊ ကိုယ်ဘင် ကြောက်လန့်ဖို့ကောင်းစာ လူတစ်ယောက် ဖြစ်တေဆိုစာကို အကျွန် သိပါရေ။ ကိုယ်ဘင်စာ မပျိုးစာနေရာက ရိတ်သိမ်းပါရေ အရာ မကြဲစာနေရာက ကောက်ယူပါရေ။ 25ယင်းအတွက်န အကျွန် ကိုယ်ဘင်ကို ကြောက်ရို့ ကိုယ်ဘင် တန်းကားကို မြေပြင်မာ တွင်းတူးရို့ မြှုတ်ထားလိုက်လီပါရေ။ ကြည့်ပါ၊ ကိုယ်ဘင် တန်းကား ဒေမာ ဟိပါသိရေ။’ 26အပိုင်သျှင်စာ သူ့ကို ပြောလီရေ၊ ‘အယုတ်-ကျွန်ပျင်း! မပျိုးစာနေရာက ငါ ရိတ်သိမ်းရေ အရာ မကြဲစာနေရာက ကောက်ယူရေဆိုစာကို နင်ကား သိရေ။ 27ယင်းပိုင်ဆိုကေ နင် ငါ့တန်းကားကို ဇာဖို့ ဘဏ်မာ ထည့်ရို့ မထားလီစာလည်း? ထားလီဖို့ဆိုကေ ငါ ပြန်လာရေခါ တန်းကားအရင်းနအတူ အစီးလည်းသောက် တစ်ဖဲ့ ရလီဖို့။’ 28ယင်းနောက် သူစာ အခြားကျွန်ရို့ကို ပြောလီရေ၊ ‘နင်ရို့ ယင်းသူက ထိုတန်းကားတိကို ယူရို့ တန်းကားဆယ်ထောင် ဟိသူကို ပီးလိုက်ကတ်။ 29လလုံလောက် ဟိသူကို အရာလည်း ပိုရို့ သွန်ပီးဖို့သိ၊ ယင်းအတွက်န သူ့မာ အများကြီး ဖြစ်လိမည်။ ယေကေလည်း တစ်ခုလည်း မဟိသူက သူ့မာ ဟိစာတိကိုပင် လုယူဖို့သိ။ 30အသုံးမကျစာ ကျွန်ကို နင်ရို့ ပြင်က အမိုက်မှောင်တို့ ဝဲချလိုက်ကတ်။ ယင်းနေရာမာ လူရို့စာ ဝေဒနာကို ခံရရေအတွက်န သွားချင်းသွား ကြိတ်ပြီးကေ အော်ရို့ ငိုကတ်လိမည်။’

ဟိသမျ လူမျိုးကို တရားစစ်ဆေးဖို့စာ အကြောင်း

31“မနုသသားတော် ကိုယ့်ဘုန်းတန်ခိုးကို ဆောင်ရို့ ဟိသမျ ဂေါင်းခင်နတ်သားရို့နအတူ ကြွလာရေခါ မင်းအဖြစ် ဘုန်းသိက္ခာဟိစာ ပလ္လင်တော်မာ ထိုင်လိမည်။ 32ယင်းခါ သူစာ ဟိသမျ လူမျိုးရို့ကို ကိုယ့်ရှိက တစ်စုတည်း စုလိမည်။ အရာ အကျောင်းသားတစ်ယောက် သိုးဆိတ်န ဆိတ်တိကို အခြားခွဲထားရေပိုင် သူစာ ဟိသမျ လူရို့ကို နှစ်ဝက် ဝက်လိမည်။ 33သူစာ သိုးဆိတ်တိကို ကိုယ့်ညာဖက်က၊ ဆိတ်တိကို ကိုယ့်ဘယ်ဖက်က ထားလိမည်။

34“ယင်းနောက် မင်းစာ ကိုယ့်ညာဖက်က ဟိကတ်စာ လူရို့ကို ပြောလိမည်၊ ‘ငါ့အဖ၏ ပဿိကို ခံရကတ်သူရို့၊ နင်ရို့ လာလတ်ကတ်။ ဒေ ကမ္ဘာကို ဖန်ဆင်းရေလှောက်ကပင် နင်ရို့အတွက် အဆင်သင့် လုပ်ရို့ဟိစာ နိုင်ငံတော်ကို ပိုင်ဆိုင်ခလိုက်ကတ်။ 35အကြောင်းကား ငါ အဝမ်းဆာလီရေခါ နင်ရို့ ငါ့ကို စားစရာ ပီးလီကတ်တေ၊ ငါ ရီသောက်မွတ်လီရေခါ ငါ့ကို ရီသောက်ဖို့ ပီးလီကတ်တေ၊ ငါ အာဂန္တုအဖြစ် အိမ်မာ တက်လီရေခါ ငါ့ကို အိမ်တင်ခံလီကတ်တေ၊ 36ငါ့မာ အဝတ်အစား မဟိ ဖြစ်လီရေခါ ငါ့ကို အဝတ် ပီးလီကတ်တေ၊ ငါ မကျန်းမာ ဖြစ်လီရေခါ ငါ့ကို ပြုဇုလီကတ်တေ အရာ ငါ ထောင်မာ ကျလီရေခါ ငါ့ကို ကြည့်ဖို့ လာလီကတ်တေ။’

37“ယင်းခါ ထိုသူတော်ကောင်းရို့စာ ပြောကတ်လိမည်၊ ‘အသျှင်၊ ကိုယ်တော် အဝမ်းဆာစာကို မြင်ရို့ အကျွန်ရို့ ဇာခါ ကိုယ်တော်ကို စားစရာ ပီးလီပါစာလည်း? အရာ ကိုယ်တော် ရီသောက်မွတ်စာကို မြင်ရို့ အကျွန်ရို့ ဇာခါ ကိုယ်တော်ကို ရီသောက်ဖို့ ပီးလီပါစာလည်း? 38အရာ အကျွန်ရို့ ကိုယ်တော်ကို ဇာခါ အာဂန္တုအဖြစ် အိမ်တင်ခံလီပါစာလည်း? အရာ ကိုယ်တော်မာ အဝတ်အစား မဟိစာကို မြင်ရို့ အကျွန်ရို့ ကိုယ်တော်ကို ဇာခါ အဝတ် ပီးလီပါစာလည်း? 39အရာ ကိုယ်တော် မကျန်းမာ ဖြစ်စာကို မြင်ရို့ အကျွန်ရို့ ဇာခါ ကိုယ်တော်ကို ပြုဇုလီပါစာလည်း? အရာ ကိုယ်တော် ထောင်မာ ကျနီရေဆိုစာကို သိရို့ အကျွန်ရို့ ဇာခါ ကိုယ်တော်ကို ကြည့်ဖို့ လားလီပါစာလည်း?’ 40ယင်းခါ မင်းစာ သူရို့ကို ပြောလိမည်၊ ‘ငါ နင်ရို့ကို အမှန် ပြောရေ၊ အသူမဆို ငါ့ညီအစ်ကိုရို့အထဲက အသျှေဆုံးတစ်ယောက်ကို အကူညီပီးလီရေခါ ယင်းသူစာ ငါ့ကို အကူညီပီးလီစာ ဖြစ်တေ။’

41“ယင်းနောက် သူစာ ကိုယ့်ဘယ်ဖက်က ဟိကတ်စာ လူရို့ကို ပြောလိမည်၊ ‘အဝေး ကျိန်ဆဲအထည့် ခံရသူရို့၊ နင်ရို့ ငါ့နိုင်ဗြင်းက ပျောက်လီကတ်! အရာ မာရ်နတ်န သူ့အဖက်သားရို့အတွက် အဆင်သင့် လုပ်ထားစာ ထာဝရမီးအိုင်ထဲတို့ ဆင်းလီကတ်။ 42အကြောင်းကား ငါ အဝမ်းဆာလီရေခါ နင်ရို့ ငါ့ကို စားစရာ မပီးလီကတ်၊ ငါ ရီသောက်မွတ်လီရေခါ ငါ့ကို ရီသောက်ဖို့ မပီးလီကတ်၊ 43ငါ အာဂန္တုအဖြစ် အိမ်မာ တက်လီရေခါ ငါ့ကို အိမ်တင်မခံလီကတ်၊ ငါ့မာ အဝတ်အစား မဟိ ဖြစ်လီရေခါ ငါ့ကို အဝတ် မပီးလီကတ်၊ ငါ မကျန်းမာ ဖြစ်လီရေခါ ငါ့ကို မပြုဇုလီကတ် အရာ ငါ ထောင်မာ ကျလီရေခါ ငါ့ကို ကြည့်ဖို့ မလာလီကတ်။’

44“ယင်းခါ သူရို့စာ မင်းကို ပြောကတ်လိမည်၊ ‘အသျှင်၊ ကိုယ်တော် အဝမ်းဆာစာကို၊ ရီသောက်မွတ်စာကို၊ အာဂန္တုအဖြစ် အိမ်မာ တက်စာကို၊ အဝတ်အစား မဟိဖြစ်စာကို၊ မကျန်းမာ ဖြစ်စာကို အရာ ထောင်မာ ကျနီစာကို သိရို့-မြင်ရို့အတိုင်း အကျွန်ရို့ ဇာခါ မကူညီလီပါစာလည်း?’ 45ယင်းခါ မင်းစာ သူရို့ကို အဖြေပီးလိမည်၊ ‘ငါ နင်ရို့ကို အမှန် ပြောရေ၊ အသူမဆို ဒေ လူသျှေရို့အထဲက အသျှေဆုံးတစ်ယောက်ကို အကူညီ မပီးလီရေခါ ယင်းသူစာ ငါ့ကို အကူညီမပီးလီစာ ဖြစ်တေ။’” 46ယင်းနောက် ယေရှုစာ ပြောလီရေ၊ “ဒေ လူရို့စာ ထာဝရအပြစ်ဒါဏ်ကို ခံရကတ်လိမည်၊ ယေကေလည်း ထိုသူတော်ကောင်းရို့စာ ထာဝရအသက်ကို ရကတ်လိမည်။”