Matthew 26

ယေရှုကို အသီသတ်ဖို့ ကြံခြင်း

(မာကု ၁၄:၁-၂၊ လုကာ ၂၂:၁-၂၊ ယောဟန် ၁၁:၄၅-၅၃)

1ထို ဟိသမျ စကားတိကို ပြောပြီးရေနောက် ယေရှုစာ ကိုယ့်တပည့်ရို့ကို ပြောလီရေ၊ 2“နှစ်ရက်ရွန်ရေခါ လွတ်မြောင့်ခြင်းပွဲ ကျဖို့ဗျာဆိုစာကို နင်ရို့ သိကတ်တေ။ ယင်းခါ လူရို့စာ မနုသသားတော်ကို ကားတိုင်မာ တင်ရို့ အသီသတ်ဖို့အတွက် ဖမ်းပီးကတ်လိမည်။”

3– 4ယင်းအချိန်ခါ ယဇ်ပုရောဟိတ်အကြီးရို့န ယုဒဂေါင်းဆောင်ဝါကြီးရို့စာ မဟာယဇ်ပုရောဟိတ် ကာယာဖအိမ်မာ တစ်စုတည်း စုကတ်လီရေ။ အရာ သူရို့စာ ယေရှုကို ဇာပိုင်ပျင်ရို့ အထဲမာအထဲ အသီသတ်ဖို့ ရဖို့လည်းဆိုစာကို အကြံချကတ်လီရေ။ 5ယေကေလည်း သူရို့စာ ပြောကတ်လီရေ၊ “ပွဲနိမာ လုပ်ရို့ ဖြစ်ဖို့ မဟုတ်၊ အကြောင်းကား လူရို့အထဲမာ ရောင်းရင်းသပ်ရို့ ဖြစ်နိုင်စရာ ဟိရေ။”

ယေရှု အဂေါင်းမာ ရီမွှီးဆီသွန်ခြင်း

(မာကု ၁၄:၃-၉၊ ယောဟန် ၁၂:၁-၈)

6ယေရှုစာ ဗေသနိရွာမာ အနူရောဂါက ကောင်းသူ ရှိမုန် အိမ်မာ ဟိလီရေခါ မိန်းမတစ်ယောက် သူ့တို့ လာလီရေ။ 7ယင်းမိန်းမစာ ကောင်းကောင်း တန်ဖိုးဟိစာ ရီမွှီးဆီကို တန်ဖိုးဟိစာ ကျောက်ဖြူဗူးတစ်လုံးမာ ထည့်ရို့ ယူလာလီရေ။ ယေရှု စားပွဲမာ ထိုင်လီရေခါ ယင်းမိန်းမစာ ထို ရီမွှီးဆီကို ယေရှု အဂေါင်းမာ သွန်လီရေ။ 8ယင်းခါ တပည့်ရို့စာ ယင်းသျှင့်ကို မြင်ရို့ မန်ပါပြီးကေ ပြောကတ်လီရေ၊ “ဒေ တန်ဖိုးဟိစာ ရီမွှီးဆီကို ဇာဖို့ ဖျက်ဘိုက်စာလည်း? 9ဒေ ရီမွှီးဆီကို ဈီးအများန ရောင်းရို့ တန်းကားတိကို ဆင်းရဲသားရို့ကို လှူဖို့ ရလီဖို့။” 10ယေရှုစာ ထိုစကားတိကို နားလည်ရို့ တပည့်ရို့ကို ပြောလီရေ၊ “နင်ရို့ ဒေ မိန်းမကို ဇာဖို့ စိတ်ဒုက္ခ ပီးကတ်စာလည်း? သူကား ငါ့အတွက် ကောင်းမြတ်စာ အလုပ်ကို လုပ်နီရေ။ 11ဆင်းရဲသားရို့ကား အမြဲတိုင်း နင်ရို့နအတူ ဟိကတ်တေ၊ ယေကေလည်း ငါကား အမြဲတိုင်း နင်ရို့နအတူ ဟိဖို့ မဟုတ်။ 12ဒေ မိန်းမစာ ငါ့ခန္ဓာမာ ရီမွှီးဆီ သွန်ရို့ ငါ့ကို သင်္ဂြိုဟ်ဖို့အတွက် အဆင်သင့် လုပ်စာ ဖြစ်တေ။ 13ငါ နင်ရို့ကို အမှန် ပြောရေ၊ ကမ္ဘာတစ်လုံးမာ သတင်းကောင်းကို ဟောပြောရေခါ ဒေ မိန်းမကို အောက်မိဖို့အတွက် သူလုပ်စာ အလုပ်အကြောင်းကိုလည်း ဟောပြောရလိမည်။”

ယုဒ ယေရှုကို ဖမ်းပီးဖို့ အခွင့်ရေးရှာခြင်း

(မာကု ၁၄:၁၀-၁၁၊ လုကာ ၂၂:၃-၆)

14ယင်းခါ ထိုတပည့်တစ်ဆယ့်နှစ်ယောက်အထဲက ယုဒရှကာရုတ်နာမည်န တပည့်တစ်ယောက်စာ ယဇ်ပုရောဟိတ်အကြီးရို့တို့ လားရို့ ပြောလီရေ၊ 15“ယေရှုကို ကိုယ်ဘင်ရို့အလက်မာ ဖမ်းပီးရေဆိုကေ ကိုယ်ဘင်ရို့ အကျွန့်ကို ဇာ ပီးကတ်ပါဖို့လည်း?” ယင်းခါ ယဇ်ပုရောဟိတ်အကြီးရို့စာ သူ့ကို ငွေသားတန်းကား အချပ်သုံးဆယ် ရွီရို့ ပီးကတ်လီရေ။ 16ယုဒရှကာရုတ်စာ ယင်းနိကပင်စရို့ ယေရှုကို ဖမ်းပီးဖို့အတွက် အခွင့်ရေး ရှာရို့ နီလီရေ။

အဆုံးခေါက် လွတ်မြောင့်ခြင်းပွဲ စားခြင်း

(မာကု ၁၄:၁၂-၂၁၊ လုကာ ၂၂:၇-၁၃၊ ၂၁-၂၃၊ ယောဟန် ၁၃:၂၁-၃၀)

17တဆီးမထည့်စာမုန့်ပွဲ ပထမနိမာ တပည့်ရို့စာ ယေရှုတို့ လာရို့ ပြောကတ်လီရေ၊ “ကိုယ်တော်အတွက် အကျွန်ရို့ ဇာမာ လွတ်မြောင့်ခြင်းပွဲကို အဆင်သင့် လုပ်ပါဖို့စာလည်း?” 18ယင်းခါ ယေရှုစာ ပြောလီရေ၊ “မြို့ထဲတို့ ဝင်ရို့ ငါနသိစာ လူတစ်ယောက်န အတွိခံခီကတ်။ အရာ နင်ရို့ သူ့ကို ပြောလီဖို့စာကား၊ ဆရာ ပြောလိုက်ပါရေ၊ ‘ငါ့မာ အချိန် ကျဗျာ။ ငါ ကိုယ့်တပည့်ရို့နအတူ နင့်အိမ်မာ လွတ်မြောင့်ခြင်းပွဲကို ကျင့်ပဖို့။’” 19ယေရှု အာဏာချရေအတိုင်း တပည့်ရို့စာ လွတ်မြောင့်ခြင်းပွဲကို အဆင်သင့် လုပ်ကတ်လီရေ။

20ယင်းနောက် နီဝင်လာရေခါ ယေရှုစာ ကိုယ့်တပည့် တစ်ဆယ့်နှစ်ယောက်နအတူ စားသောက်ဖို့ ထိုင်လီရေ။ 21သူရို့ စားသောက်ကတ်တေခါ ယေရှုစာ ပြောလီရေ၊ “ငါ နင်ရို့ကို အမှန် ပြောရေ၊ နင်ရို့အထဲက တစ်ယောက် ငါ့ကို ရန်သူရို့အလက်မာ ဖမ်းပီးလိမည်။” 22ယင်းခါ တပည့်ရို့စာ ကောင်းကောင်း စိတ်ဒုက္ခ ရကတ်လီရေ အရာ တစ်ယောက်ပြီးကေ တစ်ယောက် ယေရှုကို မီးကတ်လီရေ၊ “အသျှင်၊ ထိုသူစာ အကျွန်ပါလော?” 23ယေရှုစာ သူရို့ကို အဖြေပီးလီရေ၊ “ငါနအတူ ခွက်မာ အလက်နှစ်ရို့ စားသူစာ ငါ့ကို ရန်သူရို့အလက်မာ ဖမ်းပီးလိမည်။ 24မနုသသားတော် အကြောင်းကို ကျမ်းစာမာ ရွီးရို့ ဟိရေအတိုင်း သူစာ သီရဖို့၊ ယေကေလည်း မနုသသားတော်ကို ရန်သူရို့အလက်မာ ဖမ်းပီးဖို့သူစာ အမင်္ဂလာဟိရေ။ သူစာ လူ့ဇာတိအဖြစ် မွီးဖွားခြင်းကို မခံယူလီကေပင် သူ့အတွက် ပိုရို့ ကောင်းလီဖို့သိ။” 25ယေရှုကို ရန်သူရို့အလက်မာ ဖမ်းပီးဖို့သူ ယုဒရှကာရုတ်စာ မီးလီရေ၊ “ဆရာ၊ ထိုသူစာ အကျွန်ပါလော?” ယင်းခါ ယေရှုစာ သူ့ကို ပြောလီရေ၊ “နင့်စကား မှန်ရေ။”

အသျှင်၏ ပွဲတော်မင်္ဂလာ

(မာကု ၁၄:၂၂-၂၆၊ လုကာ ၂၂:၁၄-၂၀၊ ၁ကောရိန္သု ၁၁:၂၃-၂၅)

26သူရို့ စားသောက်ကတ်တေခါ ယေရှုစာ ပေါင်မုန့်ကို ယူရို့ ထာဝရဘုရားကို ကျေးဇူးတင်လီရေ။ ယင်းနောက် သူစာ ထိုပေါင်မုန့်ကို ဖဲ့ပြီးကေ တပည့်ရို့ကို ပီးရို့ ပြောလီရေ၊ “ယော၊ စားကတ်၊ ဒေ ပေါင်မုန့်စာ ငါ့အသား ဖြစ်တေ။” 27ယင်းနောက် သူစာ စပျစ်ရည် ခွက်ကို ယူရို့ ထာဝရဘုရားကို ကျေးဇူးတင်လီရေ အရာ ယင်းစပျစ်ရည် ခွက်ကို တပည့်ရို့ကို ပီးရို့ ပြောလီရေ၊ “ဒေ စပျစ်ရည်ကို နင်ရို့ အားကုံးသူ သောက်ကတ်၊ 28အကြောင်းကား ဒေ စပျစ်ရည်စာ ငါ့သွီး ဖြစ်တေ။ လူအများကြီး အပြစ် ခွင့်ရွှတ်ခြင်းကို ရပတ်စီအတွက် ငါ့မာ ဒေ သွီးကို သွန်းလောင်းပီးဖို့။ လူရို့အတွက် ငါ့မာ ဒေ သွီးန ထာဝရဘုရား၏ စာချုပ်အသစ်ကို ထိုးရေ။ 29ငါ နင်ရို့ကို ပြောရေ၊ ဒေဂုကပင်စရို့ ငါ့အဖ၏ နိုင်ငံတော်မာ ငါ နင်ရို့နအတူ ထိုင်ရို့ စပျစ်ရည်အသစ်ကို မသောက်သကြား ငါ အရာ တစ်ခါလည်း စပျစ်ရည် မသောက်ပျာ။” 30ယင်းနောက် သူရို့စာ တေခြင်းတစ်ပုဒ် ဆိုပြီးကေ မြို့က ထွက်ရို့ သံလွင်တောင်တို့ တက်ကတ်လီရေ။

ပေတရု ငြင်းဖို့စာ အကြောင်း

(မာကု ၁၄:၂၇-၃၁၊ လုကာ ၂၂:၃၁-၃၄၊ ယောဟန် ၁၃:၃၆-၃၈)

31ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “ဒေနိ ညဉ့်မာ နင်ရို့ အားကုံးသူ ငါ့ကို စွန့်ရို့ ထွက်ဗြီးကတ်လိမည်။ အကြောင်းကား ကျမ်းစာမာ ရွီးရို့ ဟိရေ၊ ‘ငါ သိုးဆိတ်ကျောင်းသားကို သတ်ဘိုက်လိုက်ဖို့။ ယင်းအတွက်န သိုးဆိတ်တိ ကစက်ကရဲ ဖြစ်ကတ်လိမည်။’ 32ယေကေလည်း ငါ သီရာက ပြန်ရှင်ထမြောင့်ပြီးရေနောက် ငါစာ နင်ရို့ထက်အယင် ဂါလိလဲပြည်နယ်တို့ ကြွဖို့။” 33ယင်းခါ ပေတရုစာ သူ့ကို ပြောလီရေ၊ “အားကုံးသူ ကိုယ်တော်ကို စွန့်ရို့ ထွက်ဗြီးကတ်ကေလည်း အကျွန် တစ်ခါလည်း မထွက်ဗြီးပါ။” 34ယေရှုစာ သူ့ကို ပြောလီရေ၊ “ယေကေလည်း ငါ နင့်ကို အမှန် ပြောရေ၊ ဒေနိ ညဉ့်မာ ကြက်မတွန်ခင်အယင်က နင် ငါ့ကို မသိ ဟို့ သုံးခေါက်တိုင်အောင် ငြင်းလိမည်။” 35ယင်းခါ ပေတရုစာ သူ့ကို ပြောလီရေ၊ “အကျွန် ကိုယ်တော်နအတူ သီဖို့ကျကေလည်းသောက် ကိုယ်တော်ကို အကျွန် မသိ ဟို့ တစ်ခါလည်း မငြင်းပါ။” အခြားတပည့်ရို့လည်း အားကုံးသူ တစ်ခွန်းတည်း စကားကို ပြောကတ်လီရေ။

ဂေသရှေမန် ဥယျာဉ်မာ ဆုတောင်းခြင်း

(မာကု ၁၄:၃၂-၄၂၊ လုကာ ၂၂:၃၉-၄၆)

36ယင်းနောက် ယေရှုစာ တပည့်ရို့နအတူ ဂေသရှေမန်ဆိုစာ ဥယျာဉ်တစ်ခုတို့ ကြွလီရေ။ အရာ သူစာ တပည့်ရို့ကို ပြောလီရေ၊ “ငါ ထိုနေရာတို့ လားရို့ ဆုတောင်းနီသရိကို နင်ရို့ ဒေမာ ထိုင်ရို့ စောင့်နီကတ်။” 37ယင်းနောက် သူစာ ပေတရုန ဇေဗေဒဲသားနှစ်ယောက်ကို ကိုယ်နအတူ ခေါ်ယူလားခလီရေ။ ယင်းခါ သူစာ ကောင်းကောင်း စိတ်ဆိုးရို့ ဝမ်းနည်းလီရေ။ 38အရာ ယေရှုစာ သူရို့ကို ပြောလီရေ၊ “ငါ့မာ စိတ်ဒုက္ခ ရောက်ရို့ ငါ သီဖို့စာပိုင် တွိနီဗျာ။ နင်ရို့ ငါနအတူ ဒေ နေရာမာ မအိပ်ဘိုင်းန စောင့်နီကတ်။” 39ယင်းခါ သူစာ တစ်ဖဲ့အဝီးတို့ ကြွပြီးကေ မြေပြင်မာ အပြားဝပ်ရို့ ဆုတောင်းလီရေ၊ “အိုး အကျွန့် အဖ၊ ဖြစ်နိုင်ရေဆိုကေ အကျွန် ခံရဖို့စာ ဒုက္ခ-ဝေဒနာကို ပျောက်ကင်းစီပါ။ ယေကေလည်း အကျွန့် အလိုအတိုင်း မဟုတ်ပါ၊ ကိုယ်တော်၏ အလိုတော်အတိုင်း ဖြစ်ပါစီ။”

40ယင်းနောက် သူစာ တပည့်ရို့တို့ ပြန်လာရေခါ သူရို့ အိပ်မောကျရို့ ဟိကတ်စာကို မြင်လီရေ။ အရာ သူစာ ပေတရုကို ပြောလီရေ၊ “အား ဇာလည်းသျှင့်! နင်ရို့ ငါနအတူ တစ်နာရီပင် အနိုးမနီနိုင်ကတ်ကား! 41အပြစ်သွေးဆောင်ခြင်းမာ မကျရအောင် မအိပ်ဘိုင်းန ဆုတောင်းနီကတ်။ စိတ်က ချင်ကေလည်း ကိုယ်ခန္ဓာစာ အားနည်းရေ။” 42သူစာ ပြန်ကြွရို့ ဒုတိယခေါက် ဆုတောင်းလီရေ၊ “အိုး အကျွန့် အဖ၊ ဒေ ဒုက္ခ-ဝေဒနာကို အကျွန် မခံဘိုင်းန မရွတ်ရာဆိုကေ ကိုယ်တော်၏ အလိုတော် ပြည့်စုံပါစီ။” 43ယေရှု ပြန်လာရေခါ သူရို့ အရာတစ်ပြန် အိပ်မောကျရို့ ဟိကတ်စာကို မြင်လီရေ၊ အကြောင်းကား သူရို့စာ ကောင်းကောင်း အိပ်ချင်ရို့ ဟိကတ်လီရေ။

44သူစာ အရာတစ်ပြန် တပည့်ရို့ကို ထားရို့ ပြန်ကြွပြီးကေ အယင်ပိုင်တထန် တတိယခေါက် ဆုတောင်းလီရေ။ 45ယင်းနောက် သူစာ တပည့်ရို့တို့ ပြန်လာရို့ ပြောလီရေ၊ “နင်ရို့ ဒေဂုလည်း အိပ်ရို့ နားနီကတ်သိယလော? ကြည့်၊ မနုသသားတော်ကို လူဆိုးရို့အလက်မာ ဖမ်းပီးဖို့စာအချိန် ရောက်နီဗျာ။ 46ထ၊ ငါရို့ လားကတ်မည်။ ကြည့်! ငါ့ကို ရန်သူရို့အလက်မာ ဖမ်းပီးဖို့သူ ရောက်နီဗျာ။”

ယေရှုကို ရန်သူရို့ ဖမ်းခြင်း

(မာကု ၁၄:၄၃-၅၀၊ လုကာ ၂၂:၄၇-၅၃၊ ယောဟန် ၁၈:၁-၁၂)

47ယေရှု စကားပြောနီတုံးမာ ယုဒရှကာရုတ်စာ ယင်းနေရာတို့ ရောက်လာလီရေ။ သူစာ တပည့်တစ်ဆယ့်နှစ်ယောက်အထဲက တစ်ယောက် ဖြစ်တေ။ သူနအတူ လူအများကြီး ဒါးရှည်န ဒုတ်တိကို ကိုင်ရို့ ပါလတ်ကတ်လီရေ။ သူရို့ကို ယဇ်ပုရောဟိတ်အကြီးရို့န ဂေါင်းဆောင်ဝါကြီးရို့ ရွှတ်လိုက်လီစာ ဖြစ်တေ။ 48ယေရှုကို ရန်သူရို့အလက်မာ ဖမ်းပီးလီသူ ယုဒရှကာရုတ်စာ ယင်းအယင်က လူရို့ကို အမှတ်တရတစ်ခု ပီးရို့ ပြောလီရေ၊ “ငါ နမ်းရို့ နှုတ်ဆက်ဖို့သူစာ ယေရှု ဖြစ်တေ။ နင်ရို့ သူ့ကို ဖမ်းကတ်။” 49ယင်းအတွက်န ယုဒရှကာရုတ်စာ စိုက်စိုက် ယေရှုတို့ လာပြီးကေ၊ “ဆရာ၊ ငြိမ်းချမ်းပါစီ” ဟို့ ပြောရို့ ယေရှုကို နမ်းလီရေ။ 50ယင်းခါ ယေရှုစာ သူ့ကို ပြောလီရေ၊ “မိတ်ဆွေ၊ နင် လုပ်ဖို့ လာစာကို လုပ်ဖိ။” ယင်းခါ ချက်ချင်း လူရို့စာ လာရို့ ယေရှုကို ဖမ်းကတ်လီရေ။ 51ယေရှုနအတူ ပါလီသူရို့အထဲက တစ်ယောက်စာ ကိုယ့်ဒါးရှည်ကို ထုတ်ပြီးကေ ခွတ်ရို့ မဟာယဇ်ပုရောဟိတ် ကျွန်မာ နားရွက်တစ်ဖက် ဖြတ်ချလိုက်လီရေ။

52ယင်းခါ ယေရှုစာ သူ့ကို ပြောလီရေ၊ “နင့် ဒါးရှည်ကို ဒါးအိပ်မာ ထိုးထား။ ဒါးရှည်ကို ကိုင်သူရို့စာ ဒါးရှည်န အခွတ်ခံရို့ သီရရေ။ 53ငါစာ ငါ့အဖကို အကူညီတောင်းရေဆိုကေ ဒေဂုပင် ထောင်သောင်းမက ဂေါင်းခင်နတ်သားရို့ကို ရွှတ်လိုက်ဖို့ဆိုစာကို နင်ရို့ မသိကတ်လော? 54ယေကေလည်း ယင်းပိုင် လုပ်တေဆိုကေ ကျမ်းစာမာ ရွီးရို့ဟိစာ စကားတိ ဇာပိုင် ပြည့်စုံဖို့လည်း? အကြောင်းကား ဟိသမျ အားကုံး ဒေပိုင် ဖြစ်ပျက်လာဖို့ ဆိုပြီးကေ ကျမ်းစာမာ ရွီးရို့ ဟိရေ။”

55ယင်းနောက် ယေရှုစာ လူရို့ကို ပြောလီရေ၊ “သူခိုး-ဒါးမြကို ဖမ်းဖို့ လာစာပိုင် ဒုတ်န ဒါးတိကို ယူရို့ ကိုယ်ဘင်ရို့ ငါ့ကို ဖမ်းဖို့ လာကတ်စာလော? ငါ နိတိုင်း ဝိပဿနာကျောင်းမာ ထိုင်ရို့ သွန်သင်ပီးရို့ နီလီရေ၊ ယေကေလည်း ကိုယ်ဘင်ရို့ ယင်းခါ ငါ့ကို မဖမ်းလီကတ်ကား! 56ယေကေလည်း ဘုရားသတင်းပို့သူရို့ ရွီးထားခစာ ကျမ်းစာတိ ပြည့်စုံဖို့အတွက် ဟိသမျ အားကုံး ဖြစ်ပျက်လာစာ ဖြစ်တေ။” ယင်းခါ တပည့်ရို့ အားကုံးသူ ယေရှုကို စွန့်ရို့ ထွက်ဗြီးလားခကတ်လီရေ။

မဟာတိုင်ဘင်အဖွဲ့သားရို့ ယေရှုကို စစ်ဆေးခြင်း

(မာကု ၁၄:၅၃-၆၅၊ လုကာ ၂၂:၆၆-၇၁၊ ယောဟန် ၁၈:၁၃-၁၄၊ ၁၉-၂၄)

57ထိုလူရို့စာ ယေရှုကို ဖမ်းရို့ မဟာယဇ်ပုရောဟိတ် ကာယာဖအိမ်တို့ ယူလားခကတ်လီရေ။ ထိုအိမ်မာ ကျမ်းဆရာရို့န ဂေါင်းဆောင်ဝါကြီးရို့ တစ်စုတည်း စုရို့ ဟိကတ်လီရေ။ 58ယင်းခါ ပေတရုစာ အဝီးကနီရို့ ယေရှု နောက်က နောက်က လိုက်လာပြီးကေ မဟာယဇ်ပုရောဟိတ် အိမ်ရင်းတို့တိုင်အောင် ရောက်လာလီရေ။ အရာ သူစာ နောက်ဆုံးပြီးမာ ဇာဖြစ်ဖို့ မဖြစ်ဆိုစာကို ကြည့်ဖို့အတွက် တတ်ဂွင်းထဲတို့ ဝင်ရို့ အစောင့်သားရို့နအတူ ထိုင်လီရေ။

59ယဇ်ပုရောဟိတ်အကြီးရို့န မဟာတိုင်ဘင်အဖွဲ့မာ ဟိသမျ လူရို့စာ ယေရှုကို သီဒါဏ်ပီးဖို့အတွက် မုတ်သားသက်သီ ရှာကတ်လီရေ။ 60အရာ မုတ်သားသက်သီပီးသူ အများကြီး ရောက်လာကတ်လီရေ၊ ယေကေလည်း သူရို့စာ ယေရှုကို သီဒါဏ်ပီးဖို့ ထိုက်တန်စာ သက်သီ တစ်ခုလည်း မရကတ်လီ။ 61နောက်ဆုံးပြီးမာ လူနှစ်ယောက် လာရို့ ပြောကတ်လီရေ၊ “‘ငါ ထာဝရဘုရား၏ ကျောင်းကို ဖြိုဘိုက်လိုက်ရို့ သုံးရက်အထဲတွင်းမာ ပြန်ရို့ ဆောက်နိုင်ရေ’ ဟို့ ဒေသူ ပြောလီပါရေ။”

62ယင်းခါ မဟာယဇ်ပုရောဟိတ်စာ ထရို့ ယေရှုကို ပြောလီရေ၊ “ဒေသူရို့ နင့်ကို ဆန့်ကျင်ရို့ ဇာ ဇာ သက်သီ ပီးကတ်တေလည်း? နင် တစ်ခုလည်း အဖြေမပီးဗျာလော?” 63ယေကေလည်း ယေရှုစာ တစ်ခုလည်း အဖြေမပီးဘိုင်းန တိန်းရို့ နီလီရေ။ မဟာယဇ်ပုရောဟိတ်စာ အရာတစ်ပြန် သူ့ကို ပြောလီရေ၊ “နင် ခရစ်တော်ဆိုစာ ထာဝရဘုရား၏ သားတော် ဟုတ်လော မဟုတ်လောဆိုစာကို အသက်သျှင် ထာဝရဘုရား၏ နာမည်န အကျိန်ကိုင်ရို့ ငါရို့ကို ပြောကြည့်န။” 64ယင်းခါ ယေရှုစာ သူ့ကို ပြောလီရေ၊ “ဟုတ်တေ၊ ကိုယ်ဘင် ပြောစာစကား မှန်ရေ။ ယေကေလည်း ငါ ကိုယ်ဘင်ရို့ကို အရာလည်း ပြောရေ၊ နောက်အနာဂါတ်မာ မနုသသားတော်ကို အနန္တတန်ခိုးနပြည့်စုံစာ ထာဝရဘုရား၏ ညာဖက်က ထိုင်ရို့ဟိစာန မိုးရိပ်ထက်မာ တက်ရို့ ကြွလာစာကို ကိုယ်ဘင်ရို့ မြင်ရကတ်လိမည်။”

65ယင်းခါ မဟာယဇ်ပုရောဟိတ်စာ ကိုယ့်အဝတ်ကို ဆုတ်ရို့ ပြောလီရေ၊ “ဒေသူ ထာဝရဘုရားကို တရိုက်ရို့ စကား ပြောရေ။ ငါရို့မာ အရာ သက်သီပီးဖို့ ဇာလိုသိယလည်း? ဒေဂု ဒေသူ ထာဝရဘုရားကို တရိုက်ရို့ စကားပြောစာကို ကိုယ်ဘင်ရို့ ကိုယ်တိုင် ကြားလိုက်ကတ်တေ။ 66ကိုယ်ဘင်ရို့ ဇာပိုင် မှတ်ကတ်တေလည်း?” ယင်းခါ လူရို့စာ အဖြေပီးကတ်လီရေ၊ “ဟုတ်ပါရေ၊ ဒေသူ သီဒါဏ်ခံဖို့ ထိုက်တန်ပါရေ။” 67ယင်းခါ လူရို့စာ ယေရှု မျက်နှာမာ တန်းဆီးဘိုက်ကတ်လီရေ၊ လက်သီးထိုးကတ်လီရေ အရာ ပါးသတ်ကတ်လီရေ။ 68အရာ သူရို့စာ ပြောကတ်လီရေ၊ “အဝေး ခရစ်တော်၊ နင့်ကို အသူ ဘုတ်စာလည်း ပြောကြည့်န?”

ယေရှုကို ပေတရု ငြင်းခြင်း

(မာကု ၁၄:၆၆-၇၂၊ လုကာ ၂၂:၅၄-၆၂၊ ယောဟန် ၁၈:၁၅-၁၈၊ ၁၈:၂၅-၂၇)

69ယင်းခါ ပေတရုစာ အိမ်ပြင်က တတ်ဂွင်းမာ ထိုင်ရို့ ဟိလီရေ။ အရာ ကျွန်မသျှေ တစ်ယောက်စာ သူ့တို့ လာရို့ ပြောလီရေ၊ “ဒေ အမောင်လည်းသောက် ထိုဂါလိလဲပြည်နယ်သား ယေရှုနအတူ ဟိလီရေ မဟုတ်လော?” 70ယေကေလည်း ပေတရုစာ အားကုံးသူရှိထက်က ငြင်းလီရေ၊ “နင် ဇာ ပြောရေလည်းဆိုစာကို ငါ မသိ။”

71ယင်းနောက် သူစာ လမ်းခဝနားတို့ လားခလီရေ။ အရာ အခြားကျွန်မသျှေတစ်ယောက်စာ သူ့ကို မြင်ရေခါ ယင်းမာ ဟိကတ်စာ လူရို့ကို ပြောလီရေ၊ “ဒေ အမောင်ကား နာဇရက်မြို့သျှေသား ယေရှုနအတူ ဟိလီရေ။” 72ယင်းခါ ပေတရုစာ အကျိန်ကိုင်ရို့ အရာတစ်ပြန် ငြင်းလီရေ၊ “ငါ ယင်းလူကို မသိ။”

73ယင်းနေရာမာ ရပ်ရို့ ဟိလီကတ်သူရို့စာ တစ်နားနီရေခါ ပေတရုတို့ လာရို့ ပြောကတ်လီရေ၊ “နင် အမှန် ထိုသူရို့အဖွဲ့သား တစ်ယောက် ဖြစ်တေ၊ အကြောင်းကား နင့်စကား ပြောပုံကို ကြားရို့ ငါရို့ သိရရေ။” 74ယင်းခါ သူစာ ကိုယ့်ကိုကိုယ် ပဌနာထည့်ပြီးကေ အကျိန်ကိုင်ရို့ ပြောလီရေ၊ “ငါ ယင်းသူကို အသျှင်းလည်း မသိ။” ယင်းခါ ချက်ချင်း ကြက်တွန်လီရေ။

75ယင်းခါ ပေတရုစာ ယေရှု ပြောစာစကားကို တွက်ရလီရေ။ ယင်းအယင်က ယေရှုစာ သူ့ကို ပြောလီရေ၊ “ကြက်မတွန်ခင်အယင်က နင် ငါ့ကို မသိ ဟို့ သုံးခေါက်တိုင်အောင် ငြင်းလိမည်။” ယင်းခါ သူစာ ပြင်တို့ ထွက်လားခပြီးကေ ကောင်းကောင်း ဝမ်းနည်းရို့ ငိုလီရေ။