Matthew 27

ယေရှုကို အုပ်ချုပ်သူကြီးဘားမာ အပ်ခြင်း

(မာကု ၁၅:၁-၅၊ လုကာ ၂၃:၁-၅၊ ယောဟန် ၁၈:၂၈-၁၉:၁၆)

1နောက်တစ်ရက်နိ မိုးသောက်စောစောက ယဇ်ပုရောဟိတ်အကြီးရို့န ဂေါင်းဆောင်ဝါကြီးရို့ အားကုံးသူ ယေရှုကို အသီသတ်ဖို့ ဆိုပြီးကေ ဆုံးဖြတ်ကတ်လီရေ။ 2သူရို့စာ ယေရှုကို ချိုင်ယူလားရို့ ရောမအုပ်ချုပ်သူကြီးပိလတ်ဘားမာ အပ်ကတ်လီရေ။

ယုဒရှကာရုတ် သီခြင်း

(တမန်တော် ၁:၁၈-၁၉)

3ယေရှုကို ရန်သူရို့အလက်မာ ဖမ်းပီးလီသူ ယုဒရှကာရုတ်စာ ယေရှုကို တရားစစ်ဆေးရို့ သီဒါဏ်ပီးဖို့ ဆုံးဖြတ်စာကို မြင်ရေခါ ကောင်းကောင်း စိတ်ဒုက္ခ ရလီရေ။ ယင်းခါ သူစာ ယဇ်ပုရောဟိတ်အကြီးရို့န ဂေါင်းဆောင်ဝါကြီးရို့တို့ လားရို့ ထိုငွေသားတန်းကား အချပ်သုံးဆယ်ကို ပြန်ပီးလီရေ။ 4အရာ သူစာ ပြောလီရေ၊ “အပြစ်နကင်းသူတစ်ယောက်ကို အသီသတ်ဖို့အတွက် ဖမ်းပီးရို့ ငါ အပြစ် လုပ်ဘိုက်လိုက်ပျာ။” သူရို့စာ ပြောကတ်လီရေ၊ “ဒေ အကြောင်းကို ငါရို့န တစ်ခုလည်း မဆိုင်၊ နင်န ဆိုင်လိမည်။” 5ယင်းခါ ယုဒရှကာရုတ်စာ ထိုငွေသားတန်းကား အချပ်သုံးဆယ်ကို ဝိပဿနာကျောင်းထဲမာ ကြဲဘိုက်ခရို့ ထွက်လားခလီရေ အရာ သတွတ်ဆွဲရို့ သီလီရေ။

သင်္ချိုင်းရာ ဝယ်ခြင်း

6ယဇ်ပုရောဟိတ်အကြီးရို့စာ ထိုငွေသားတန်းကား အချပ်သုံးဆယ်ကို ကောက်ယူရို့ ပြောကတ်လီရေ၊ “ဒေ တန်းကားတိစာ သွီးအဖိုး ဖြစ်တေ။ ယင်းအတွက်န ဒေ တန်းကားတိကို ဝိပဿနာကျောင်း ဌာပ္ပနာဗူးမာ ထည့်ဖို့ မသင့်။” 7ယင်းနောက် သူရို့စာ ကိုယ်ရို့ အချင်းချင်း တိုင်ဘင်ရို့ အခြားပြည်သားရို့ သီကေ သင်္ဂြိုဟ်ဖို့အတွက် ထိုငွေသားတန်းကား အချပ်သုံးဆယ်န အိုးလုပ်သမားက လယ်တစ်ကွက် ဝယ်ကတ်လီရေ။ 8ယင်းအတွက်န ထိုလယ်ကို ဒေနိတိုင်အာင်ပင် “သွီး လယ်ပြင်” ဟို့ ခေါ်ကတ်တေ။ 9ယင်းပိုင် ဘုရားသတင်းပို့သူ ယေရမိ ဟောပြောခစာ စကား ပြည့်စုံလာလီရေ။ ဘုရားသတင်းပို့သူ ယေရမိစာ ဟောပြောခလီရေ၊
“သူရို့စာ ငွေသားတန်းကား အချပ်သုံးဆယ် ယူကတ်လီရေ။
ဒေ တန်းကားတိစာ သူ၏ တန်ဖိုး ဖြစ်တေ။
ဣသရေလလူမျိုးရို့စာ သူ၏ တန်ဖိုးကို ဆုံးဖြတ်ကတ်လီရေ။
10အသျှင်၏ အာဏာအတိုင်း သူရို့စာ ထိုငွေသားတန်းကား
အချပ်သုံးဆယ်န အိုးလုပ်သမားက လယ်တစ်ကွက် ဝယ်ကတ်လီရေ။”

ယေရှုကို အုပ်ချုပ်သူကြီးပိလတ် စစ်ဆေးခြင်း

(မာကု ၁၅:၁-၅၊ လုကာ ၂၃:၁-၅၊ ၁၃-၂၅၊ ယောဟန် ၁၈:၂၈-၁၉:၁၆)

11ယင်းခါ ယေရှုစာ အုပ်ချုပ်သူကြီးပိလတ်ရှိက ရပ်ရို့ ဟိလီရေ။ အရာ အုပ်ချုပ်သူကြီးစာ သူ့ကို မီးလီရေ၊ “နင် ယုဒလူမျိုးရို့မာ မင်းလော?” ယင်းခါ ယေရှုစာ သူ့ကို အဖြေပီးလီရေ၊ “ကိုယ်ဘင် ပြောစာစကား မှန်ရေ။”

12ယဇ်ပုရောဟိတ်အကြီးရို့န ဂေါင်းဆောင်ဝါကြီးရို့စာ ယေရှုကို အများကြီး အပြစ်တင်ကတ်လီရေ၊ ယေကေလည်း သူစာ တစ်ခုလည်း အဖြေမပီးဘိုင်းန တိန်းရို့ နီလီရေ။ 13ယင်းခါ ပိလတ်စာ သူ့ကို ပြောလီရေ၊ “ထိုသူရို့ နင့်ကို ဆန့်ကျင်ရို့ ဇာလှောက် အပြစ်တင်ကတ်တေလည်း နင် မကြားလော?” 14ယေကေလည်း သူစာ စကားတစ်ခွန်းလည်း အဖြေမပီးလီ။ ယင်းခါ ပိလတ်စာ ကောင်းကောင်း အံ့ဩလီရေ။

15အရာ အုပ်ချုပ်သူကြီးစာ နှစ်တိုင်း လွတ်မြောင့်ခြင်းပွဲနိမာ ကိုယ့်အလည့်အတိုင်း လူပရိတ်သတ်ရို့ သဖေါတူကတ်စာ ထောင်ကျသား တစ်ယောက်စီကို ရွှတ်ပီးနီရေ။ 16ယင်းခါ ဗာရဗ္ဗနာမည်န လူဆိုးကြီးတစ်ယောက် ထောင်ကျရို့ ဟိလီရေ။ 17ယင်းအတွက်န လူပရိတ်သတ်ရို့ တစ်စုတည်း စုကတ်တေခါ ပိလတ်စာ သူရို့ကို မီးလီရေ၊ “နင်ရို့အတွက် ငါ ထောင်ကျသား တစ်ယောက်ကို ရွှတ်ပီးဖို့။ နင်ရို့ အသူ့ကို ရွှတ်ပီးစီချင်ရေလည်း? ဗာရဗ္ဗကိုလော မဟုတ်ကေ ခရစ်တော် ဟို့ ခေါ်စာ ယေရှုကိုလော?” 18လူပရိတ်သတ်ရို့ ယေရှုကို မမြင်နိုင်ရေအတွက်န ကိုယ့်ဘားမာ ဖမ်းရို့ အပ်ကတ်လီရေဆိုစာကို အုပ်ချုပ်သူကြီးပိလတ်စာ သိထားလီရေ။ 19ပိလတ်စာ တရားပလ္လင်မာ ထိုင်ရေခါ သူ့မာ မယားစာ ဒေပိုင် သတင်းပို့လိုက်လီရေ၊ “ဒေနိ ညဉ့် အိပ်မက်မာ ထိုအပြစ်နကင်းသူ အကြောင်းကို ယူရို့ ငါ ကောင်းကောင်း စိတ်ဒုက္ခ ရလီရေ။ ယင်းအတွက်န အကို ယင်းသူကို တစ်ခုလည်း မလုပ်လီကေ့။”

20ယေကေလည်း ယဇ်ပုရောဟိတ်အကြီးရို့န ဂေါင်းဆောင်ဝါကြီးရို့စာ ဗာရဗ္ဗကို ထောင်က ရွှတ်ပီးဖို့အတွက် အရာ ယေရှုကို သီဒါဏ်ပီးဖို့အတွက် တောင်းဆိုလတ်အောင် လူရို့ကို စကားထိုးပီးကတ်လီရေ။ 21ယင်းနောက် အုပ်ချုပ်သူကြီးစာ လူရို့ကို ပြောလီရေ၊ “ဒေသူရို့နှစ်ယောက်မာ နင်ရို့အတွက် ငါ အသူ့ကို ရွှတ်ပီးဖို့စာလည်း?” ယင်းခါ သူရို့စာ ပြောကတ်လီရေ၊ “ဗာရဗ္ဗကို ရွှတ်ပီးပါ။” 22ယင်းခါ ပိလတ်စာ သူရို့ကို ပြောလီရေ၊ “ယင်းပိုင်ဆိုကေ ခရစ်တော် ဟို့ ခေါ်စာ ယေရှုကို ငါ ဇာ လုပ်ဖို့စာလည်း?” သူရို့ အားကုံးသူ အော်ရို့ ပြောကတ်လီရေ၊ “ယင်းသူကို ကားတိုင်မာ တင်ရို့ သတ်ဘိုက်လိုက်ပါ!”

23အရာ ပိလတ်စာ သူရို့ကို ပြောလီရေ၊ “ဇာဖို့လည်း၊ ဒေသူ ဇာ အပြစ် လုပ်လီရေလည်း?” ယင်းခါ သူရို့စာ အရာလည်း အားန အော်ရို့ ပြောကတ်လီရေ၊ “ယင်းသူကို ကားတိုင်မာ တင်ရို့ သတ်ဘိုက်လိုက်ပါ!”

24ပိလတ်စာ မြင်လီရေ၊ သူစာ လူရို့ကို တစ်ခုပိုင်လည်း လုပ်ရို့ မရလီဗျာ၊ ယင်းထက်ပင် ပိုရို့ ရောင်းရင်းသပ်ရို့ ဖြစ်ကတ်လီရေ။ ယင်းအတွက်န သူစာ ရီယူခပြီးကေ လူရို့ရှိထက်က အလက် ဆီးရို့ ပြောလီရေ၊ “ဒေ သူတော်ကောင်း သီရခြင်း အကြောင်းန ငါ့မာ တစ်ခုလည်း အပြစ် မဟိ။ ဒေ အကြောင်းစာ နင်ရို့န ဆိုင်လိမည်။” 25ယင်းခါ လူရို့စာ ပြောကတ်လီရေ၊ “ဒေသူ အသီခံရခြင်းအတွက် အကျွန်ရို့န အကျွန်ရို့မာ သားသမီးရို့ တာဝန် ယူပါဖို့။” 26ယင်းအတွက်န ပိလတ်စာ လူရို့အတွက် ဗာရဗ္ဗကို ရွှတ်ပီးလိုက်လီရေ၊ ယေကေလည်း ယေရှုကို စက်ကျာကြိုးန ရရိပေါ်အောင် ဘုတ်ပြီးကေ ကားတိုင်မာ တင်ရို့ အသီသတ်ဖို့အတွက် သူရို့အလက်မာ တင်အပ်လိုက်လီရေ။

စစ်သားရို့ ယေရှုကို ရယ်သွန်းပြုခြင်း

(မာကု ၁၅:၁၆-၂၀၊ ယောဟန် ၁၉:၁-၃)

27ယင်းနောက် အုပ်ချုပ်သူကြီးပိလတ်မာ စစ်သားရို့စာ ယေရှုကို နန်းထဲတို့ သွင်းယူလားခကတ်လီရေ အရာ ဟိသမျ စစ်သားရို့ကို ယေရှု လေးဖက်လက်စိမာ ဝန်းထားစီလီရေ။ 28သူရို့စာ ယေရှု ခန္ဓာက အဝတ်တိကို ချွတ်ရို့ ကြက်သွီးရောင်အဝတ်ကို ဝတ်ပီးကတ်လီရေ။ 29ယင်းနောက် သူရို့စာ စူးခက်ကို သရဖူတစ်ခု လုပ်ရို့ ယေရှု အဂေါင်းမာ ဆောင်းကတ်လီရေ အရာ သူ့ညာဖက်အလက်မာ မင်းကိုင်စာ တောင်မိတစ်ချောင်း အပ်ကတ်လီရေ။ ယင်းနောက် သူရို့စာ သူ့ရှိက ဒူးထောက်ပြီးကေ ရယ်သွန်းပြုရို့ ပြောကတ်လီရေ၊ “အိုး ယုဒလူမျိုးရို့မာ မင်း၊ မင်္ဂလာ ဟိပါစီ!” 30ယင်းခါ သူရို့စာ ယေရှု ခန္ဓာမာ တန်းဆီးဘိုက်ကတ်လီရေ အရာ ထိုဒုတ်န ယေရှုအဂေါင်းမာ အပြန်ပြန် ခေါက်ကတ်လီရေ။ 31စစ်သားရို့စာ ယေရှုကို ရယ်သွန်းပြုပြီးရေခါ သူ့ခန္ဓာက ကြက်သွီးရောင်အဝတ်ကို ချွတ်ပြီးကေ သူ့အဝတ်တိကို ပြန်ရို့ ဝတ်ပီးကတ်လီရေ။ ယင်းနောက် သူရို့စာ သူ့ကို ကားတိုင်မာ တင်ရို့ သတ်ဖို့အတွက် ယူလားကတ်လီရေ။

ယေရှုကို ကားတိုင်မာ တင်ခြင်း

(မာကု ၁၅:၂၁-၃၂၊ လုကာ ၂၃:၂၆-၄၃၊ ယောဟန် ၁၉:၁၇-၂၇)

32စစ်သားရို့စာ အုပ်ချုပ်သူကြီးအိမ်က ထွက်လားကတ်တေခါ လမ်းတစ်ပိုင်းမာ ရှိမုန်နာမည်န ကုရေနေမြို့သားတစ်ယောက်ကို တွိကတ်လီရေ။ စစ်သားရို့စာ အားဒမ သူ့ကို ယေရှု၏ ကားတိုင်ကို ရွက်ယူလားဖို့ ခိုင်းကတ်လီရေ။

33ယင်းနောက် သူရို့စာ “ဂေါလဂေါသ” ဟို့ ခေါ်စာ နေရာတစ်ခုတို့ ရောက်ကတ်လီရေ။ (ဂေါလဂေါသ အဓိပ္ပါယ်ကား အဂေါင်းခွန်နေရာ ဟို့ ခေါ်ရေ)။ 34သူရို့စာ ယင်းနေရာမာ ရောက်ကတ်တေခါ ဆီးခါးရည်န ရောထားစာ ပုံးရည်ကို ယေရှုကို သောက်စီကတ်လီရေ၊ ယေကေလည်း သူစာ တစ်ဖဲ့သျှေ မြည်းပြီးကေ အရာ သောက်ဖို့ မလိုလီဗျာ။ 35စစ်သားရို့စာ ယေရှုကို ကားတိုင်မာ တင်ရို့ သံမှိုခတ်ပြီးရေခါ သူ့အဝတ်အစားတိကို မဲဖေါက်ရို့ ကိုယ်ရို့အထဲမာ ဝီကတ်လီရေ။ 36ယင်းနောက် သူရို့စာ ယင်းနေရာမာ ထိုင်ရို့ ယေရှုကို စောင့်နီကတ်လီရေ။ 37အရာ သူရို့စာ ကားတိုင်မာ ယေရှုအဂေါင်းထက်က အပြစ်ဖေါ်ပြချက် ကမ္ဗည်းစာတစ်ခု ကပ်လီရေ။ ယင်းကမ္ဗည်းစာမာ၊ “ဒေသူ ယုဒလူမျိုးရို့မာ မင်း” ဟို့ ရွီးရို့ ဟိလီရေ။ 38သူရို့စာ ယင်းနိခါ ဒါးမြနှစ်ယောက်ကိုလည်း ယေရှုနအတူ ကားတိုင်မာ တင်ကတ်လီရေ။ သူရို့နှစ်ယောက်မာ တစ်ယောက်ကို ယေရှု ညာဖက်က အရာ အခြားတစ်ယောက်ကို ယေရှု ဘယ်ဖက်က တင်ကတ်လီရေ။

39ထိုလမ်းက လားသူရို့ အားကုံးသူ လိုင်ညိုက်ပြီးကေ ယေရှုကို သရော်ရို့ ပြောကတ်လီရေ၊ 40“နင် ဝိပဿနာကျောင်းကို ဖြိုရို့ သုံးရက်အထဲတွင်းမာ ပြန်ရို့ ဆောက်ဖို့နိုင်ရေ ဆိုကား! ယင်းပိုင်ဆိုကေ နင် ဒေဂု ကိုယ့်ကိုကိုယ် ကယ်ဆယ်။ နင် အမှန် ထာဝရဘုရား၏ သားတော် ဖြစ်တေဆိုကေ ကားတိုင်က ဆင်းလာလတ်။”

41ယင်းပိုင်တထန် ယဇ်ပုရောဟိတ်အကြီးရို့၊ ကျမ်းဆရာရို့ အရာ ဂေါင်းဆောင်ဝါကြီးရို့လည်း ယေရှုကို သရော်ရို့ ပြောကတ်လီရေ၊ 42“ယင်းသူ အခြားလူရို့ကို ကယ်ဆယ်နိုင်ကေလည်း ကိုယ့်ကို ကယ်ဆယ်ဖို့ မနိုင်။ ယင်းသူ ဣသရေလလူမျိုးရို့မာ မင်း မဟုတ်လော? ဒေဂု ယင်းသူ ကားတိုင်က ဆင်းလာရေဆိုကေ ငါရို့ ယင်းသူကို ကျုံကတ်ဖို့။ 43ယင်းသူ ထာဝရဘုရားကို အားကိုးရေ။ ဒေဂု ထာဝရဘုရားစာ ယင်းသူကို ကယ်ဆယ်ချင်ရေဆိုကေ ကယ်ဆယ်ပတ်စီ၊ အကြောင်းကား သူကား ကိုယ့်ကိုကိုယ် ထာဝရဘုရား၏ သားတော် ဟို့ ခံရေ။” 44ယေရှုနအတူ ကားတိုင်မာ အတင်ခံလီကတ်စာ ဒါးမြနှစ်ယောက်လည်းသောက် ယင်းပိုင်တထန် ယေရှုကို သရော်ရို့ ပြောကတ်လီရေ။

ယေရှု ကားတိုင်ထက်မာ အသက်စွန့်ခြင်း

(မာကု ၁၅:၃၃-၄၁၊ လုကာ ၂၃:၄၄-၄၉၊ ယောဟန် ၁၉:၂၈-၃၇)

45ယင်းနိ မွန်းတည့် တစ်ဆယ့်နှစ်နာရီကပင် နီကျသုံးနာရီတိုင်အောင် တစ်ပြည်လုံး မှိုင်းလားခလီရေ။ 46နီကျသုံးနာရီလှောက်မာ ယေရှုစာ အားန အော်ရို့ ပြောလီရေ၊ “ဧလိ၊ ဧလိ၊ လာမာ ရှာဗခသာနိ။” ယင်းစကား အဓိပ္ပါယ်ကား၊ “အကျွန့် ထာဝရဘုရား၊ အကျွန့် ထာဝရဘုရား၊ ဇာဖို့ အကျွန့်ကို စွန့်ဘိုက်ခပါစာလည်း?”

47ယင်းနေရာမာ ရပ်ရို့ ဟိလီသူရို့အထဲက လိုင်းကေယောက် ထိုစကားကို ကြားရို့ ပြောကတ်လီရေ၊ “ယင်းသူ ဧလိယကို ခေါ်နီရေ။” 48အရာ သူရို့အထဲက တစ်ယောက်စာ ချက်ချင်း ဗြီးလားရို့ ပုံးရည်မာ နှစ်ပြီးသား ဖေါ့တုံးတစ်တုံးကို ဒုတ်တစ်ချောင်းမာ ချိုင်ရို့ ယေရှုပစမာ တို့လီရေ။ 49ယေကေလည်း အခြားလူရို့စာ ပြောကတ်လီရေ၊ “ဟိပတ်စီ၊ ယင်းသူကို ကယ်ဆယ်ဖို့အတွက် ဧလိယ လာမည်လော ကြည့်မည်။”

50ယင်းနောက် ယေရှုစာ အရာတစ်ပြန် အားန အော်ရို့ အသက် စွန့်လီရေ။ 51ယင်းခါ ဝိပဿနာကျောင်းမာ ကာထားစာ ရန်ကာစာ အထက်ကပင် အောက်တို့တိုင်အောင် စုတ်လားခလီရေ။ အရာ ငယင်လုတ်ရို့ ကျောက်လုံးကြီးတိ ကွဲလားခလီရေ။ 52တစ်ချိုးသင်္ချိုင်းဂူတိ ပွင့်လားခလီရေ အရာ သီလားခကတ်လီစာ ထာဝရဘုရား၏ လူအများကြီး သီရာက ပြန်ရှင်ထမြောင့်ကတ်လီရေ။ 53အရာ ယေရှု သီရာက ပြန်ရှင်ထမြောင့်ပြီးရေနောက် သူရို့စာ သင်္ချိုင်းဂူခေါင်းက ထွက်ရို့ သန့်ရှင်းစာ ယေရုရှလင်မြို့ထဲတို့ ဝင်လားခကတ်လီရေ။ အရာ သူရို့စာ ယင်းမြို့ထဲမာ လူအများကြီးဘားမာ အမြင်ခံကတ်လီရေ။ 54ယေရှုကို စောင့်နီလီကတ်စာ စစ်သရွဲတစ်ရာကိုပိုင်စာ စစ်ဗိုလ်န စစ်သားရို့စာ ငယင်လုတ်စာန အခြား ဖြစ်ပျက်ခြင်းတိကို မြင်ရို့ ကောင်းကောင်း ကြောက်ပြီးကေ ပြောကတ်လီရေ၊ “ဒေသူ အမှန် ထာဝရဘုရား၏ သားတော် ဟိလီရေ။”

55ယေရှုကို ပြုဇုဖို့အတွက် ဂါလိလဲပြည်နယ်ကပင် ယေရှုနအတူ လိုက်လာကတ်စာ အများကြီး မိန်းမရို့လည်း အဝီးက ရပ်ရို့ ဟိသမျ ဖြစ်ပျက်ခြင်းကို ကြည့်နီကတ်လီရေ။ 56ထိုမိန်းမရို့အထဲမာ မာဂဒလမြို့သမ မာရိ၊ ယာကုပ်န ယောသပ်အမိ မာရိ အရာ ဇေဗေဒဲ မယားလည်း ဟိလီရေ။

ယေရှုကို သင်္ဂြိုဟ်ခြင်း

(မာကု ၁၅:၄၂-၄၇၊ လုကာ ၂၃:၅၀-၅၆၊ ယောဟန် ၁၉:၃၈-၄၂)

57ယင်းနိ နီဝင်လာရေခါ ယောသပ်နာမည်န အရိမသဲမြို့သား သူဌေးတစ်ယောက်စာ ယေရုရှလင်မြို့တို့ လာလီရေ။ သူလည်းသောက် ယေရှု တပည့်တစ်ယောက် ဟိလီရေ။ 58သူစာ အုပ်ချုပ်သူကြီးပိလတ်တို့ လားရို့ ယေရှု အကောင်တော်ကို တောင်းလီရေ။ ယင်းခါ အုပ်ချုပ်သူကြီးစာ ယေရှု အကောင်တော်ကို ယောသပ်ကို ပီးဖို့အတွက် ကိုယ့်စစ်သားရို့ကို အာဏာချလိုက်လီရေ။ 59ယင်းခါ ယောသပ်စာ ယေရှု အကောင်တော်ကို ယူလားရို့ ခြေသားအဝတ်န ရိုက်လီရေ။ 60ယင်းနောက် သူစာ ယေရှု အကောင်တော်ကို ကိုယ့်အတွက် တောင်ကို ထွင်းထားစာ သင်္ချိုင်းဂူအသစ်မာ ထားလီရေ။ ယင်းနောက် သူစာ သင်္ချိုင်းဂူဝမာ ကျောက်လုံးကြီးတစ်လုံးကို ပိတ်ရို့ ထားဘိုက်ခလီရေ။ 61မာဂဒလမြို့သမ မာရိန အခြားမာရိစာ သင်္ချိုင်းဂူ ရှိက ထိုင်ရို့ ကြည့်နီကတ်လီရေ။

သင်္ချိုင်းဂူဝမာ စောင့်ခြင်း

62နောက်တစ်ရက်နိ ယုဒလူမျိုးရို့ သတင်းနိမာ ယဇ်ပုရောဟိတ်အကြီးရို့န ဖာရိရှဲအဖွဲ့သားရို့စာ အုပ်ချုပ်သူကြီးပိလတ်တို့ လားရို့ ပြောကတ်လီရေ၊ 63“ဆရာ၊ ထိုဘောရီးတတ် မသီခင်အယင်က၊ ‘ငါ သုံးရက် ရွန်ရေခါ ပြန်ရှင်ထမြောင့်ဖို့’ ဟို့ ပြောခလီစာ စကားကို အကျွန်ရို့ တွက်ရကတ်ပါရေ။ 64ယင်းအတွက်န သုံးရက်တိုင်အောင် သင်္ချိုင်းဂူဝမာ စောင့်ဖို့အတွက် အစောင့်သားရို့ကို ကိုယ်ဘင် အာဏာချလိုက်ပါ။ ယင်းပိုင် မဟုတ်ဆိုကေ သူ့တပည့်ရို့ လာရို့ ယေရှု အကောင်တော်ကို ခိုးယူလားပြီးကေ၊ ‘သူစာ သီရာက ပြန်ရှင်ထမြောင့်လားခဗျာ’ ဟို့ လူရို့ဘားမာ ပြောနိုင်ပါရေ။ ယင်းပိုင်ဆိုကေ ပထမ လိမ်စာထက် နောက်ဆုံး လိမ်စာ ပိုရို့ ဆိုးလာပါဖို့။” 65ယင်းခါ အုပ်ချုပ်သူကြီးပိလတ်စာ သူရို့ကို ပြောလီရေ၊ “စစ်သားတစ်ဖွဲ့ကို ခေါ်ယူလားရို့ ကိုယ်ဘင်ရို့ တတ်နိုင်သလှောက် အရေးစိုက်ရို့ စောင့်စီဖို့စာကို ကြိုးစားလီကတ်။” 66ယင်းအတွက်န သူရို့ ပြန်လားရို့ သင်္ချိုင်းဂူဝမာ ပိတ်ထားစာ ကျောက်လုံးကို တံဆိပ်ရိုက်ကတ်လီရေ။ အရာ ယင်းသင်္ချိုင်းဂူကို အလှပ အရေးစိုက်ရို့ စောင့်ဖို့အတွက် သူရို့စာ စစ်သားတစ်ဖွဲ့ ထားကတ်လီရေ။