Matthew 28
ယေရှု သီရာက ပြန်ရှင်ထမြောင့်ခြင်း
(မာကု ၁၆:၁-၈၊ လုကာ ၂၄:၁-၁၂၊ ယောဟန် ၂၀:၁-၉)
1 သတင်းနိ ရွန်ရို့ တလင်္ဂနွီနိ မိုးသောက်စောစောက မာဂဒလမြို့သမ မာရိန အခြားမာရိစာ သင်္ချိုင်းဂူကို ကြည့်ဖို့အတွက် လားကတ်လီရေ။ 2ယင်းခါ ဗြုန်းခနိုင်းပျင်ရို့ ငယင်ကြီးတစ်ခု လုတ်လီရေ၊ အကြောင်းကား အသျှင်၏ ဂေါင်းခင်နတ်သားတစ်ပါး ဂေါင်းခင်ဘုံက ဆင်းလာလီရေ။ အရာ သူစာ သင်္ချိုင်းဂူဝမာ ပိတ်ထားစာ ကျောက်လုံးကို ရွှိရို့ ယင်းအထက်မာ ထိုင်လီရေ။ 3သူ့မာ မျက်နှာစာ လျှပ်ပြက်စာနတူလီရေ အရာ သူ့မာ အဝတ်စာ ဂွန်းပိုင် ဖဖွီးဆဆွ ဟိလီရေ။ 4သင်္ချိုင်းဂူဝမာ စောင့်နီကတ်စာ စစ်သားရို့စာ သူ့ကို ကြောက်ရို့ တုန်ပြီးကေ သီဖို့စာပိုင် ဖြစ်ကတ်လီရေ။ 5ယင်းခါ ဂေါင်းခင်နတ်သားစာ ထိုမိန်းမရို့ကို ပြောလီရေ၊ “နင်ရို့ မကြောက်ကတ်ကေ့၊ အကြောင်းကား ကားတိုင်မာ တင်ရို့ အသတ်ခံလီစာ ယေရှုကို နင်ရို့ ရှာနီကတ်တေဆိုစာကို ငါ သိရေ။ 6ယေကေလည်း သူကား ဒေမာ မဟိဗျာ၊ အကြောင်းကား သူ မသီခင်အယင်က ပြောခရေအတိုင်း ပြန်ရှင်ထမြောင့်လားခဗျာ။ နင်ရို့ လာရို့ ကြည့်ခလိုက်ကတ်၊ သူ့အကောင်တော် ထားလီစာနေရာကို ငါ ပြမည်။ 7နင်ရို့ ဒေဂု အယင်အမြန် လားရို့ သူ့တပည့်ရို့ဘားမာ ပြောပြခီကတ်၊ ‘သူစာ သီရာက ပြန်ရှင်ထမြောင့်လားခဗျာ အရာ နင်ရို့ထက် အယင် ဂါလိလဲပြည်နယ်တို့ ကြွလိမည်။ နင်ရို့ သူ့ကို ယင်းမာ မြင်ရကတ်လိမည်။’ နင်ရို့ ငါ ပြောလိုက်စာ စကားတိကို မှတ်ထားလီကတ်။” 8ယင်းခါ ထိုမိန်းမရို့စာ သင်္ချိုင်းဂူရှင်းက အယင် ထွက်လားခကတ်လီရေ။ အရာ သူရို့စာ ဂေါင်းခင်နတ်သား ပြောပြလိုက်စာ သတင်းကို တပည့်ရို့ဘားမာ ပြောပြဖို့အတွက် ဗြီးလားကတ်လီရေ။ ယင်းခါ သူရို့စာ ကောင်းကောင်း ကြောက်ကတ်လီရေ၊ ယေကေလည်း သူရို့မာ စိတ်နှလုံးစာ ပျော်ပါးခြင်းန ပြည့်စုံလီရေ။ 9သူရို့ ဗြီးလားနီတုံးမာ ယေရှုစာ ဗြုန်းခနိုင်းပျင်ရို့ သူရို့ရှိက ရောက်လာရို့ ပြောလီရေ၊ “နင်ရို့မာ ငြိမ်းချမ်းခြင်း ဟိစီ!” ယင်းခါ ထိုမိန်းမရို့စာ ယေရှုအနားတို့ လားပြီးကေ သူ့အခြီကို ကိုင်ရို့ ရှိခိုးကတ်လီရေ။ 10အရာ ယေရှုစာ သူရို့ကို ပြောလီရေ၊ “မကြောက်ကတ်ကေ့၊ နင်ရို့ လားလီကတ်၊ ငါ့ ညီအစ်ကိုရို့ကို ဂါလိလဲပြည်နယ်တို့ လားဖို့အတွက် ပြောခီကတ်။ သူရို့ ငါ့ကို ယင်းမာ မြင်ရကတ်လိမည်။”ပြန်ရှင်ထမြောင့်ခြင်း၏ သတင်းကို ဖုံးရွှက်ခြင်း
11ထိုမိန်းမရို့ လားခကတ်တေခါ သင်္ချိုင်းဂူဝမာ စောင့်နီကတ်စာ စစ်သားရို့စာ မြို့ထဲတို့ လားရို့ ဖြစ်ပျက်စာ အကြောင်းအရာတိကို ယဇ်ပုရောဟိတ်အကြီးရို့ဘားမာ ပြောပြကတ်လီရေ။ 12ယင်းခါ ယဇ်ပုရောဟိတ်အကြီးရို့န ဂေါင်းဆောင်ဝါကြီးရို့စာ တစ်စုတည်း စုရို့ တိုင်ဘင်ကတ်လီရေ။ ယင်းနောက် သူရို့စာ ထိုစစ်သားရို့ကို တန်းကား အများကြီး ပီးရို့ ပြောကတ်လီရေ၊ 13“‘အကျွန်ရို့ ညဉ့်မာ အိပ်ကတ်တေခါ ယေရှု တပည့်ရို့ လာရို့ သူ့အကောင်ကို ခိုးယူလားခလီပါရေ’ ဟို့ နင်ရို့ ပြောလီကတ်။ 14ဒေ စကားကို အုပ်ချုပ်သူကြီးပိလတ် ကြားရေဆိုကေ ငါရို့ သူ့ကို ငြိမ်းဝပ်အောင် လုပ်မည် အရာ နင်ရို့ ဒါဏ် ခံရကတ်ဖို့စာက ငါရို့ ကယ်ဆယ်မည်။” 15ယင်းခါ ထိုစစ်သားရို့စာ တန်းကားတိကို ယူရို့ ဂေါင်းဆောင်ရို့ မှာလိုက်စာပိုင်တထန် ပြောပြကတ်လီရေ။ ထိုစစ်သားရို့ ပြောလီစာ စကားတိ ဒေနိတိုင်အောင်ပင် ယုဒလူမျိုးရို့အထဲမာ ပြန့်ကျယ်ရို့ ဟိသိရေ။မဟာပညှတ်ချက်
(မာကု ၁၆:၁၅-၁၈၊ လုကာ ၂၄:၄၅-၄၉၊ ယောဟန် ၂၀:၂၂-၂၃၊ တမန်တော် ၁:၈)
16တပည့်တစ်ဆယ့်တစ်ယောက်စာ ဂါလိလဲပြည်နယ်တို့ လားခကတ်လီရေ အရာ သူရို့စာ ယေရှု မှာလိုက်စာ တောင်တို့ တက်ကတ်လီရေ။ 17သူရို့စာ ယင်းတောင်ထက်မာ ယေရှုကို မြင်ကတ်တေခါ ဒူးထောက်ရို့ ရှိခိုးကတ်လီရေ။ ယေကေလည်း သူရို့အထဲမာ တစ်ချိုးတပည့်ရို့စာ မယုံသင်္ခါ ဖြစ်ကတ်လီရေ။ 18ယင်းခါ ယေရှုစာ သူရို့အနားတို့ လာရို့ ပြောလီရေ၊ “ဂေါင်းခင်ဘုံန ကမ္ဘာမာ ဟိသမျ တန်ခိုးအာဏာကို ငါ့ကို အပ်ပြီးဗျာ။ 19ယင်းအတွက်န နင်ရို့ ကမ္ဘာတစ်လုံးမာ လားရို့ ဟိသမျ လူမျိုးရို့ကို ငါ့တပည့် ဖြစ်အောင် လုပ်လီကတ်။ အရာ အဖခမည်းတော်၊ သားတော်၊ သန့်ရှင်းသောဝိညာဉ်တော်နာမည်န သူရို့ကို ရီနှစ်မင်္ဂလာ ပီးလီကတ်။ 20ငါ နင်ရို့ကို ပီးလီစာ ပညှတ်ချက် အားကုံးကို လိုက်နာဖို့အတွက် သူရို့ကို သွန်သင်ပီးလီကတ်။ အရာ နင်ရို့ မှတ်ထားကတ်၊ ကမ္ဘာကုန်ဆုံးရေနိတိုင်အောင် ငါ အမြဲတိုင်း နင်ရို့နအတူ ဟိရေ။”
Copyright information for
RmzSC