Mat 11:7-19 | RmzSC | STEP | ယောဟန် တပည့်ရို့ ပြန်လားကတ်တေခါ ယေရှုစာ ယောဟန် အကြောင်းကို လူရို့ဘားမာ ပြောဖို့ စလီရေ၊ “ကိုယ်ဘင်ရို့ ဇာကို ကြည့်ဖို့အတွက် သဲကန္တာရတောပြင်တို့ လားခီကတ်စာလည်း? လီထရို့ လုတ်စာ ပန်းဇင်ဂြည်အရုံကိုလော?

Matthew 11:7-19

ယောဟန် အကြောင်းကို ယေရှု ပြောပြခြင်း

(လုကာ ၇:၂၄-၃၅)

7 ယောဟန် တပည့်ရို့ ပြန်လားကတ်တေခါ ယေရှုစာ ယောဟန် အကြောင်းကို လူရို့ဘားမာ ပြောဖို့ စလီရေ၊ “ကိုယ်ဘင်ရို့ ဇာကို ကြည့်ဖို့အတွက် သဲကန္တာရတောပြင်တို့ လားခီကတ်စာလည်း? လီထရို့ လုတ်စာ ပန်းဇင်ဂြည်အရုံကိုလော? 8 မဟုတ်ကေ ဇာကို ကြည့်ဖို့ လားခီကတ်စာလည်း? လှပတင့်တယ်စာ အဝတ် ဝတ်သူကိုလော? လှပတင့်တယ်စာ အဝတ်ကို ဝတ်သူရို့ကား မင်းနန်းမာရာ နီကတ်တေ။ 9 မဟုတ်ကေ ဇာကို ကြည့်ဖို့ လားခီကတ်စာလည်း? ဘုရားသတင်းပို့သူကိုလော? ဟုတ်တေ၊ ငါ ကိုယ်ဘင်ရို့ကို ပြောရေ၊ ကိုယ်ဘင်ရို့ လားရို့ ကြည့်ခီသူစာ ဘုရားသတင်းပို့သူထက်လည်း ကြီးမြတ်တေ! 10 ယောဟန် အကြောင်းကို ကျမ်းစာမာ ရွီးရို့ ဟိရေ၊
‘နားထောင်၊ ငါ နင့် ရှိက ငါ့မာ သတင်းပို့သူတစ်ယောက်ကို ရွှတ်လိုက်ဖို့။
သူစာ နင် လားဖို့စာလမ်းကို အဆင်သင့် လုပ်လိမည်။’

11 “ငါ ကိုယ်ဘင်ရို့ကို အမှန် ပြောရေ၊ လူ့သားရို့အထဲမာ ရီနှစ်မင်္ဂလာပီးသူ ယောဟန်ထက် ကြီးမြတ်သူ တစ်ယောက်လည်း မဟိ။ ယေကေလည်း ဂေါင်းခင်နိုင်ငံတော်မာ အားကုံးသူထက် အသျှေဆုံး ဖြစ်သူလည်း ယောဟန်ထက် ကြီးမြတ်တေ။ 12 ရီနှစ်မင်္ဂလာပီးသူ ယောဟန် တရားဟောပြောဖို့ စရေလှောက်ကပင် ဒေနိတိုင်အောင် တစ်ချိုးလူရို့ ဂေါင်းခင်နိုင်ငံတော်ကို ညှဉ်းဆဲနီကတ်တေ၊ အရာ တစ်ချိုးလူရို့ ဂေါင်းခင်နိုင်ငံတော်ကို အားဒမ အပိုင်သိမ်းဖို့ ကြိုးစားနီကတ်တေ။ 13 အကြောင်းကား ယောဟန်လက်ထက် တိုင်အောင် ဘုရားသတင်းပို့သူရို့န မောရှေ၏ ပညှတ်တရားစာ နောက်အနာဂါတ် အကြောင်းကို ဟောပြောရို့ လာလီရေ။ 14 ကိုယ်ဘင်ရို့ ငါ့စကားတိကို လက်ခံဖို့ သဖေါဟိရေဆိုကေ နားထောင်ကတ်။ ယောဟန်စာ ကြွလာဖို့ စကားဟိလီစာ ဘုရားသတင်းပို့သူ ဧလိယ ဖြစ်တေ။ 15 ငါ့စကားကို နားထောင်ချင်သူရို့ နားထောင်ကတ်။”

16 “ဒေခိုက်မာ လူရို့ကို ငါ အသူ့န နှိုင်းယှဉ်ရဖို့လည်း? သူရို့စာ ဈီးတလင်းမာ ထိုင်နီကတ်စာ အသျှေရို့နတူကတ်တေ။ သူရို့စာ အခြား အသျှေတစ်တိုင်ကို ခေါ်ရို့ ပြောကတ်တေ၊
17 ‘ငါရို့ နင်ရို့အတွက် နှဲမှုတ်လီကတ်တေ၊
ယေကေလည်း နင်ရို့ မကလီကတ်။
အရာ ငါရို့ ဝမ်းနည်းစာ တေးခြင်းကို ဆိုလီကတ်တေ၊
ယေကေလည်း နင်ရို့ ဝမ်းနည်းခြင်း ပြန်ရို့ မငိုလီကတ်။’

18 “အကြောင်းကား ယောဟန် ရောက်လာရေခါ အခြားလူရို့ပိုင် မစားမသောက်လီ။ ယင်းအတွက်န လူရို့၊ ‘သူ့ကို နတ်ဆိုး ကိုင်နီဗျာ’ ဟို့ ပြောကတ်တေ။ 19 အရာ မနုသသားတော် ကြွလာရေခါ အခြားလူရို့ပိုင် စားသောက်လီရေ။ ယင်းအတွက်န လူရို့ ပြောကတ်တေ၊ ‘ထိုမာ စားကြူး-သောက်ကြူးသူတစ်ယောက်ကို ကြည့်လိုက်ကတ်! သူစာ ဖန်ဒါကောက်သမားရို့န လူဆိုးရို့မာ မိတ်ဆွေ ဖြစ်တေ။’ ယေကေလည်း အသူ့မာမဆို ညာဏ်ပညာ ကောင်းရေ မကောင်းဆိုစာကို သူ့အလုပ်ကနီရို့ သိရရေ။”