Matthew 12:22-32
သန့်ရှင်းသောဝိညာဉ်တော်ကို တရိုက်ခြင်း
(မာကု ၃:၂၀-၃၀၊ လုကာ ၁၁:၁၄-၂၃၊ ၁၂:၁၀)
22ယင်းနောက် လူလိုင်းကေယောက် နတ်ဆိုးကိုင်စာ ပပွါး-မျက်ကန်း တစ်ယောက်ကို ယေရှုတို့ ယူလာကတ်လီရေ။ အရာ ယေရှုစာ သူ့ကို ကောင်းအောင် လုပ်လီရေ။ ယင်းခါရာ သူစာ မျက်စိလည်း မြင်ရလီရေ၊ စကားပြောဖို့လည်း နိုင်လီရေ။ 23ယင်းခါ အားကုံးသူ အံ့ဩရို့ ပြောကတ်လီရေ၊ “ဒေလူ ဒါဝိဒ်မင်း၏ သားတော်လော မသိ!” 24ယေကေလည်း ဖာရိရှဲအဖွဲ့သားရို့စာ ထိုစကားကို ကြားရို့ ပြောကတ်လီရေ၊ “ယင်းသူကား နတ်ဆိုးရို့မာ မင်း ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်ဖို့ နိုင်စာရာ!” 25ဖာရိရှဲအဖွဲ့သားရို့ စိတ်နှလုံးမာ စဉ်းစားချက်ကို သိရို့ ယေရှုစာ သူရို့ကို ပြောလီရေ၊ “နိုင်ငံတစ်ခုမာ လူရို့စာ ကိုယ်ရို့အချင်းချင်း မသင့်မတင် ဖြစ်ရို့ ကွဲလားခရေဆိုကေ ယင်းနိုင်ငံစာ ပျက်စီးခြင်းတို့ ရောက်ရရေ။ အရာ မြို့တစ်မြို့ မဟုတ်ကေ အိမ်တစ်အိမ်မာ ကိုယ်ရို့အချင်းချင်း မသင့်မတင် ဖြစ်ရို့ ကွဲလားခရေဆိုကေ ယင်းမြို့ မဟုတ်ကေ ယင်းအိမ်သားစာ တစ်ခါလည်း မတည်မြဲနိုင်။ 26ယင်းအတွက်န မာရ်နတ်စာ မာရ်နတ်ကို နှင်ထုတ်တေဆိုကေ သူစာ ကိုယ့်ကိုကိုယ် ကွဲအောင် လုပ်တေ။ ယင်းပိုင်ဆိုကေ သူ့နိုင်ငံ ဇာပိုင်ပျင်ရို့ တည်မြဲနိုင်ဖို့သိလည်း? 27ငါ ဗေလဇေဗုလ တန်ခိုးကို အသုံးပြုရို့ နတ်ဆိုးတိကို နှင်ထုတ်တေဆိုကေ ကိုယ်ဘင်ရို့မာ တပည့်ရို့ အသူ့ တန်ခိုးကို အသုံးပြုရို့ နတ်ဆိုးတိကို နှင်ထုတ်ကတ်စာလည်း? ယင်းအတွက်န ကိုယ်ဘင်ရို့ ပြောစာစကား မှားရေဆိုစာကို ကိုယ်ဘင်ရို့မာ တပည့်ရို့ လုပ်ကတ်စာ အလုပ်တိကနီရို့ သက်သီပြရေ။ 28ယေကေလည်း ငါ အမှန် ထာဝရဘုရား၏ ဝိညာဉ်တော် တန်ခိုးကို အသုံးပြုရို့ နတ်ဆိုးတိကို နှင်ထုတ်တေဆိုကေ ထာဝရဘုရား၏ နိုင်ငံတော်စာ ကိုယ်ဘင်ရို့အထဲမာ ရောက်နီဗျာ။ 29အယင်ဆုံး အားသျှင်ကို မချိုင်ထားဘိုင်းန တစ်ယောက်လည်း သူ့အိမ်က ပစ္စည်း-ဥစ္စာတိကို ထုတ်ယူလားဖို့ မနိုင်။ အားသျှင်ကို ချိုင်ရို့ ထားပြီးခါရာ သူ့အိမ်က ပစ္စည်း-ဥစ္စာတိကို ထုတ်ယူလားဖို့ နိုင်ရေ။ 30“ငါ့ဖက်က မနီသူစာ ငါ့ကို ဆန့်ကျင်သူ ဖြစ်တေ အရာ ငါနအတူ မစုမသိမ်းသူစာ ကြဲဖြန့်သူ ဖြစ်တေ။ 31ယင်းအတွက်န ငါ ကိုယ်ဘင်ရို့ကို ပြောရေ၊ လူရို့မာ ဟိသမျ အပြစ်န ထာဝရဘုရားကို တရိုက်ရို့ ပြောစာစကားတိ ခွင့်ရွှတ်ခြင်းကို ရလိမည်၊ ယေကေလည်း သန့်ရှင်းသောဝိညာဉ်တော်ကို တရိုက်ရို့ ပြောစာစကားတိ ခွင့်ရွှတ်ခြင်းကို ရလိမည် မဟုတ်။ 32အသူမဆို မနုသသားတော်ကို တရိုက်ရို့ စကား ပြောရေဆိုကေ သူစာ ခွင့်ရွှတ်ခြင်းကို ရလိမည်၊ ယေကေလည်း အသူမဆို သန့်ရှင်းသောဝိညာဉ်တော်ကို တရိုက်ရို့ စကား ပြောရေဆိုကေ သူစာ ခွင့်ရွှတ်ခြင်းကို ရလိမည် မဟုတ်။ ဒေ ဘဝမာလည်း မဟုတ် အရာ နောင်ဘဝမာလည်း မဟုတ်။
Copyright information for
RmzSC