Mat 14:22-33 | RmzSC | STEP | ယင်းနောက် ယေရှုစာ တပည့်ရို့ကို ကိုယ့်ထက်အယင် လောင်းမာ တက်ရို့ မြစ်ကမ်းတစ်ဖက်တို့ ကူးဖို့ ခိုင်းလီရေ။ အရာ တစ်ချိန်တည်းမာ သူစာ လူရို့ကို အိမ်တို့ ပြန်ရွှတ်လီရေ။

Matthew 14:22-33

ယေရှု ရီအထက်က ကြွခြင်း

(မာကု ၆:၄၅-၅၂၊ ယောဟန် ၆:၁၆-၂၁)

22 ယင်းနောက် ယေရှုစာ တပည့်ရို့ကို ကိုယ့်ထက်အယင် လောင်းမာ တက်ရို့ မြစ်ကမ်းတစ်ဖက်တို့ ကူးဖို့ ခိုင်းလီရေ။ အရာ တစ်ချိန်တည်းမာ သူစာ လူရို့ကို အိမ်တို့ ပြန်ရွှတ်လီရေ။ 23 သူစာ လူရို့ကို ရွှတ်လိုက်ပြီးရေနောက် နူးချင်းတည်း ဆုတောင်းဖို့အတွက် တောင်တို့ တက်လီရေ။ သူစာ နီဝင်ရို့လည်းသောက် နူးချင်းတည်း ယင်းတောင်ထက်မာ ဟိလီရေ။ 24 ယေကေလည်း တပည့်ရို့မာ လောင်းစာ ကမ်းနားက ခွါလားရို့ ကောင်းကောင်း အဝီးတို့ ရောက်လားခလီရေ။ ယင်းခါ လီအပြန်ထရေအတွက်န ရီလှိုင်းလုံး အက်ကျပြီးကေ သူရို့ လောင်းစာ ကောင်းကောင်း ယိုင်းနီလီရေ။ 25 ယင်းနောက် မိုးလင်းဖို့လုတ်မာ ယေရှုစာ ရီအထက်က တပည့်ရို့တို့ ကြွလာလီရေ။ 26 ယင်းခါ တပည့်ရို့စာ အသူလည်းမသိ ရီအထက်က လားနီစာကို မြင်ရို့ ကောင်းကောင်း ကြောက်ကတ်လီရေ အရာ သူရို့စာ အားန အော်ရို့ ပြောကတ်လီရေ၊ “အဝေး နတ်၊ နတ်!” 27 ယေကေလည်း ချက်ချင်း ယေရှုစာ သူရို့ကို ပြောလီရေ၊ “မကြောက်ကတ်ကေ့! ငါရာ၊ ရဲဝံ့ဖြည့်ကတ်!”

28 ယင်းခါ ပေတရုစာ သူ့ကို ပြောလီရေ၊ “အသျှင်၊ ကိုယ်တော် အမှန် ဖြစ်တေဆိုကေ အကျွန့်ကို ရီအထက်က ကိုယ်တော်တို့ လာဖို့ ခိုင်းပါ။” 29 အရာ ယေရှုစာ၊ “လာလတ်” ဟို့ ပြောလီရေ။ ယင်းခါ ပေတရုစာ လောင်းက ဆင်းရို့ ရီအထက်က ယေရှုတို့ လားဖို့ စလီရေ။ 30 ယေကေလည်း သူစာ လီအဟုန်ကို မြင်ရို့ ကြောက်ပြီးကေ ရီမာ နစ်ဖို့ ပျင်လီရေ။ အရာ သူစာ အားန အော်ရို့ ခေါ်လီရေ၊ “အိုး အသျှင်၊ အကျွန့်ကို ကယ်ဆယ်ပါ။” 31 ယင်းခါ ချက်ချင်း ယေရှုစာ သူ့အလက်ကို ကိုင်ရို့ ပြောလီရေ၊ “ကျုံခြင်းတရား အားနည်းသူ၊ ဇာဖို့ မယုံသင်္ခါ ဖြစ်စာလည်း?” 32 – 33 ယေရှုန ပေတရု လောင်းမာ တက်ကတ်တေခါ လီတန့်လားခလီရေ။ ယင်းခါ လောင်းမာ ဟိကတ်သူရို့စာ ယေရှုကို ရှိခိုးရို့ ပြောကတ်လီရေ၊ “ကိုယ်တော် အမှန် ထာဝရဘုရား၏ သားတော် ဖြစ်ပါရေ။”