Mat 21:1-11 | RmzSC | STEP | ယေရှုန သူ့တပည့်ရို့စာ ယေရုရှလင်မြို့နမနီးမဝီး သံလွင်တောင်ခြီရင်းမာဟိစာ ဗက်ဖာဂေရွာနားတို့ ရောက်ကတ်လီရေ။

Matthew 21:1-11

ယေရှု ယေရုရှလင်မြို့တို့ ဝင်ခြင်း

(မာကု ၁၁:၁-၁၁၊ လုကာ ၁၉:၂၈-၄၀၊ ယောဟန် ၁၂:၁၂-၁၉)

1 ယေရှုန သူ့တပည့်ရို့စာ ယေရုရှလင်မြို့နမနီးမဝီး သံလွင်တောင်ခြီရင်းမာဟိစာ ဗက်ဖာဂေရွာနားတို့ ရောက်ကတ်လီရေ။ 2 ယင်းခါ သူစာ ကိုယ့်တပည့်နှစ်ယောက်ကို ဒေပိုင် ပြောရို့ ရွှတ်လိုက်လီရေ၊ “နင်ရို့ ထိုရှိကဟိစာ ရွာတို့ လားခီကတ်။ ယင်းမာ ရောက်တေခါ ဝန်ရွက်မြင်းတစ်ကောင်ကို ချိုင်ရို့ တွိကတ်လိမည် အရာ ယင်းအနားမာ အသျှေလည်းသောက် တစ်ကောင် ဟိလိမည်။ ယင်းဝန်ရွက်မြင်းနှစ်ကောင်စုံကို ဖြီရို့ ငါ့တို့ ယူခကတ်။ 3 အသူမဆို နင်ရို့ကို မီးရေဆိုကေ၊ ‘ဒေ ဝန်ရွက်မြင်းသျှေကို အသျှင် အလိုဟိရေ’ ဟို့ ပြောခကတ်။ ယင်းခါ သူစာ ချက်ချင်း ရွှတ်ပီးလိမည်။” 4 ဘုရားသတင်းပို့သူကနီရို့ ဟောပြောခစာ စကားတိ ပြည့်စုံလာဖို့အတွက် ဒေပိုင် ဖြစ်ပျက်လာစာ ဖြစ်တေ။ ဘုရားသတင်းပို့သူစာ ဒေပိုင် ဟောပြောခလီရေ၊
5 “နင်ရို့ ယေရုရှလင်မြို့သားရို့ကို ပြောလိုက်ကတ်၊
‘ကြည့်ကတ်၊ နင်ရို့မာ အသျှင်မင်းကြီး နင်ရို့တို့ ကြွလာနီရေ။
သူစာ နုညံ့ခြင်းစိတ်န ဝန်ရွက်မြင်းကို စီးရို့ ကြွလာနီရေ၊
သူစာ ဝန်ရွက်မြင်းအမမာသား ဝန်ရွက်မြင်းသျှေကို စီးရို့ ကြွလာနီရေ။’”

6 တပည့်ရို့စာ ယေရှု အာဏာချရေအတိုင်း လားရို့ လုပ်ကတ်လီရေ။ 7 သူရို့စာ ဝန်ရွက်မြင်းအမန ဝန်ရွက်မြင်းသျှေကို ယူခရို့ နောက်ကုံးထက်မာ ကိုယ်ရို့ ကိုယ်ရုံကို ခင်းကတ်လီရေ။ ယင်းနောက် ယေရှုစာ ယင်းကိုယ်ရုံထက်မာ ထိုင်လီရေ။ 8 ယင်းခါ လူအများကြီး ကိုယ်ရို့ ကိုယ်ရုံကို လမ်းမာ ခင်းကတ်လီရေ။ အရာ တစ်ချိုးလူရို့စာ အပင်အခက်အလက်တိကို ခွတ်ယူခရို့ လမ်းမာ ခင်းကတ်လီရေ။

9 ယေရှု နောက်က-ရှိက လိုက်ကတ်သူရို့စာ အော်ရို့ ပြောကတ်လီရေ၊
“ဒါဝိဒ်မင်း၏ သားတော် ဟောရှဏ္ဏ ဖြစ်ပါစီ!
အသျှင်၏ နာမည်န ကြွလာသူစာ မင်္ဂလာ ဟိပါစီ!
ဂေါင်းခင်ဘုံလည်း ဟောရှဏ္ဏ ဖြစ်ပါစီ!”

10 ယေရှု ယေရုရှလင်မြို့တို့ ဝင်ရေခါ မြို့လုံးပြတ် ရောင်းရင်းသပ်ရို့ ဖြစ်လီရေ။ ယင်းခါ အားကုံးသူ မီးကတ်လီရေ၊ “အဝေး ဒေသူ အသူလည်း?” 11 လူရို့စာ ပြောကတ်လီရေ၊ “ဒေသူ ယေရှု ဖြစ်တေ၊ သူစာ ဂါလိလဲပြည်နယ် နာဇရက်မြို့သျှေက ကြွလာစာ ဘုရားသတင်းပို့သူ ဖြစ်တေ။”