Mat 26:20-25 | RmzSC | STEP | ယင်းနောက် နီဝင်လာရေခါ ယေရှုစာ ကိုယ့်တပည့် တစ်ဆယ့်နှစ်ယောက်နအတူ စားသောက်ဖို့ ထိုင်လီရေ။

Matthew 26:20-25

20 ယင်းနောက် နီဝင်လာရေခါ ယေရှုစာ ကိုယ့်တပည့် တစ်ဆယ့်နှစ်ယောက်နအတူ စားသောက်ဖို့ ထိုင်လီရေ။ 21 သူရို့ စားသောက်ကတ်တေခါ ယေရှုစာ ပြောလီရေ၊ “ငါ နင်ရို့ကို အမှန် ပြောရေ၊ နင်ရို့အထဲက တစ်ယောက် ငါ့ကို ရန်သူရို့အလက်မာ ဖမ်းပီးလိမည်။” 22 ယင်းခါ တပည့်ရို့စာ ကောင်းကောင်း စိတ်ဒုက္ခ ရကတ်လီရေ အရာ တစ်ယောက်ပြီးကေ တစ်ယောက် ယေရှုကို မီးကတ်လီရေ၊ “အသျှင်၊ ထိုသူစာ အကျွန်ပါလော?” 23 ယေရှုစာ သူရို့ကို အဖြေပီးလီရေ၊ “ငါနအတူ ခွက်မာ အလက်နှစ်ရို့ စားသူစာ ငါ့ကို ရန်သူရို့အလက်မာ ဖမ်းပီးလိမည်။ 24 မနုသသားတော် အကြောင်းကို ကျမ်းစာမာ ရွီးရို့ ဟိရေအတိုင်း သူစာ သီရဖို့၊ ယေကေလည်း မနုသသားတော်ကို ရန်သူရို့အလက်မာ ဖမ်းပီးဖို့သူစာ အမင်္ဂလာဟိရေ။ သူစာ လူ့ဇာတိအဖြစ် မွီးဖွားခြင်းကို မခံယူလီကေပင် သူ့အတွက် ပိုရို့ ကောင်းလီဖို့သိ။” 25 ယေရှုကို ရန်သူရို့အလက်မာ ဖမ်းပီးဖို့သူ ယုဒရှကာရုတ်စာ မီးလီရေ၊ “ဆရာ၊ ထိုသူစာ အကျွန်ပါလော?” ယင်းခါ ယေရှုစာ သူ့ကို ပြောလီရေ၊ “နင့်စကား မှန်ရေ။”