Mat 26:31-35 | RmzSC | STEP | ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “ဒေနိ ညဉ့်မာ နင်ရို့ အားကုံးသူ ငါ့ကို စွန့်ရို့ ထွက်ဗြီးကတ်လိမည်။ အကြောင်းကား ကျမ်းစာမာ ရွီးရို့ ဟိရေ၊ ‘ငါ သိုးဆိတ်ကျောင်းသားကို သတ်ဘိုက်လိုက်ဖို့။ ယင်းအတွက်န သိုးဆိတ်တိ ကစက်ကရဲ ဖြစ်ကတ်လိမည်။’

Matthew 26:31-35

ပေတရု ငြင်းဖို့စာ အကြောင်း

(မာကု ၁၄:၂၇-၃၁၊ လုကာ ၂၂:၃၁-၃၄၊ ယောဟန် ၁၃:၃၆-၃၈)

31 ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “ဒေနိ ညဉ့်မာ နင်ရို့ အားကုံးသူ ငါ့ကို စွန့်ရို့ ထွက်ဗြီးကတ်လိမည်။ အကြောင်းကား ကျမ်းစာမာ ရွီးရို့ ဟိရေ၊ ‘ငါ သိုးဆိတ်ကျောင်းသားကို သတ်ဘိုက်လိုက်ဖို့။ ယင်းအတွက်န သိုးဆိတ်တိ ကစက်ကရဲ ဖြစ်ကတ်လိမည်။’ 32 ယေကေလည်း ငါ သီရာက ပြန်ရှင်ထမြောင့်ပြီးရေနောက် ငါစာ နင်ရို့ထက်အယင် ဂါလိလဲပြည်နယ်တို့ ကြွဖို့။” 33 ယင်းခါ ပေတရုစာ သူ့ကို ပြောလီရေ၊ “အားကုံးသူ ကိုယ်တော်ကို စွန့်ရို့ ထွက်ဗြီးကတ်ကေလည်း အကျွန် တစ်ခါလည်း မထွက်ဗြီးပါ။” 34 ယေရှုစာ သူ့ကို ပြောလီရေ၊ “ယေကေလည်း ငါ နင့်ကို အမှန် ပြောရေ၊ ဒေနိ ညဉ့်မာ ကြက်မတွန်ခင်အယင်က နင် ငါ့ကို မသိ ဟို့ သုံးခေါက်တိုင်အောင် ငြင်းလိမည်။” 35 ယင်းခါ ပေတရုစာ သူ့ကို ပြောလီရေ၊ “အကျွန် ကိုယ်တော်နအတူ သီဖို့ကျကေလည်းသောက် ကိုယ်တော်ကို အကျွန် မသိ ဟို့ တစ်ခါလည်း မငြင်းပါ။” အခြားတပည့်ရို့လည်း အားကုံးသူ တစ်ခွန်းတည်း စကားကို ပြောကတ်လီရေ။