Matthew 4:12-17
ယေရှု သာသနာပြုဖို့ စခြင်း
(မာကု ၁:၁၄-၁၅၊ လုကာ ၄:၁၄-၁၅)
12ယင်းနောက် ယေရှုစာ ရီနှစ်မင်္ဂလာပီးသူ ယောဟန် အဖမ်းခံရေဆိုစာကို ကြားလီရေခါ ဂါလိလဲပြည်နယ်တို့ ကြွလီရေ။ 13အရာ သူစာ နာဇရက်မြို့သျှေက ထွက်ရို့ ဂါလိလဲမြစ်ကမ်းနားမာဟိစာ ကပေရနောင်မြို့သျှေတို့ လားရို့ နီလီရေ။ ကပေရနောင်မြို့သျှေစာ ဇာဗုလုန်အရပ်န နဿလိအရပ်မာ ဟိလီရေ။ 14ဘုရားသတင်းပို့သူ ဟေရှာယ ဟောပြောခစာ စကားတိ ပြည့်စုံဖို့အတွက် ဒေပိုင် ဖြစ်ပျက်လာစာ ဖြစ်တေ။ ဟေရှာယစာ ဟောပြောခလီရေ၊15– 16“အမိုက်မှောင်ထဲမာ ဟိသူရို့စာ မဟာအလင်းကို မြင်ရကတ်ပျာ၊
အရာ သီခြင်းတရား၏ အရိပ်အောက်မာ ဟိသူရို့ဘားမာ အလင်းရောင် ကျရောက်ပျာ။
ထိုလူရို့စာ ဇာဗုလုန်အရပ်၊ နဿလိအရပ်၊ မြစ်ကမ်းနားတစ်သျှောက်လုံး၊ ယော်ဒန်ချောင်းအနောက်ကမ်း၊
အရာ ယုဒမဟုတ်သူရို့ ဟိကတ်စာ ဂါလိလဲပြည်နယ်မာ နီထိုင်ကတ်တေ။” 17ယင်းချိန်ကပင်စရို့ ယေရှုစာ ဒေပိုင် ဟောပြောလီရေ၊ “ကိုယ်ဘင်ရို့ အပြစ်က စိတ်လှည့်ရို့ လာကတ်ဖိ၊ အကြောင်းကား ဂေါင်းခင်နိုင်ငံတော် အပါးမာ ရောက်နီဗျာ။”
Copyright information for
RmzSC