Matthew 5:24-29
24“ယင်းအတွက်န နင့် ပူဇော်သက္ကာတိကို ယဇ်ပလ္လင်မာ တင်ရို့ ထာဝရဘုရားဘားမာ ပူဇော်ရေခါ နင့်မာ ညီအစ်ကိုစာ နင့်ကို ဆန့်ကျင်ရို့ စကားပြောစရာ ဟိရေ ဟို့ တွက်ရရေဆိုကေ ထိုပူဇော်သက္ကာတိကို ယဇ်ပလ္လင် ရှိက ထားဘိုက်ခရို့ လားလီ။ ပထမဆုံး နင့် ညီအစ်ကိုန ဖြေရှင်းခီအုန့်သိ၊ ယင်းပြီးခါရာ လာရို့ ထိုပူဇော်သက္ကာတိကို ပူဇော်ခလိုက်။ 25အသူမဆို နင့်ကို ဆန့်ကျင်ရို့ တရားသူကြီးဘားမာ တရားစွဲချင်ရေဆိုကေ ယင်းသူ တရားယုံးတို့ မလားခင်အယင်က နင် အယင် လားရို့ သူန ဖြေရှင်းဘိုက်ခီ။ ယင်းပိုင် မဟုတ်ဆိုကေ သူစာ နင့်ကို တရားသူကြီးဘားမာ တင်အပ်လိမည်။ တရားသူကြီး တစ်ပြန် နင့်ကို ရဲသားဘားမာ တင်အပ်လိမည်။ အရာ ရဲသားစာ နင့်ကို ထောင်မာ ထည့်လိမည်။ 26ငါ နင့်ကို အမှန် ပြောရေ၊ အယော်တန်းကား မပီးသကြား နင် တစ်ခါလည်း ထောင်က ရွတ်လိမည် မဟုတ်။ကာမဂုဏ်အပြစ် အကြောင်း
(မဿဲ ၁၉:၉၊ မာကု ၁၀:၂-၁၂၊ လုကာ ၁၆:၁၈)
27“‘ကာမဂုဏ်ကို မလိုက်စားရ’ ဟို့ အယင်ကခါ ပီးလီစာ ပညှတ်ချက်ကို နင်ရို့ ကြားဖူးကတ်ပျာ။ 28ယေကေလည်း ငါ နင်ရို့ကို ပြောရေ၊ အသူမဆို မိန်းမတစ်ယောက်ကို ကိလေသာမျက်စိန ကြည့်ရေဆိုကေ သူစာ စိတ်မာ စိတ်မာ ထိုမိန်းမန ကာမဂုဏ် ပြစ်မှားရေ။ 29နင့်မာ ညာဖက်မျက်စိစာ နင့်ကို အပြစ်လမ်းတို့ ဆောင်ယူလားရေဆိုကေ ယင်းမျက်စိကို ထွတ်ရို့ ဝဲဘိုက်လိုက်။ နင့် ခန္ဓာတစ်ကိုယ်လုံး ငရဲမီးအိုင်မာ ကျရဖို့စာထက် မျက်စိတစ်လုံး ပျက်ရဖို့စာပင် နင့်အတွက် ပိုရို့ ကောင်းဖို့သိ။
Copyright information for
RmzSC