Matthew 8:5-13
စစ်ဗိုလ်မာ ကျွန် အကောင်းဖြစ်ခြင်း
(လုကာ ၇:၁-၁၀)
5ယင်းနောက် ယေရှုစာ ကပေရနောင်မြို့သျှေတို့ ကြွလီရေ။ ယင်းခါ ရောမစစ်သရွဲတစ်ရာကိုပိုင်စာ စစ်ဗိုလ်တစ်ယောက် သူ့တို့ လာရို့ တောင်းပန်လီရေ၊ 6“အသျှင်၊ အကျွန့်မာ ကျွန်တစ်ယောက် တစ်စိတ်နာရောဂါဖြစ်ရို့ အိပ်ရာမာ လဲရို့ ဟိပါရေ၊ သူစာ ကောင်းကောင်း ဝေဒနာကို ခံနီရပါရေ။” 7ယင်းခါ ယေရှုစာ စစ်ဗိုလ်ကို ပြောလီရေ၊ “ငါ လားရို့ ယင်းသူကို ကောင်းအောင် လုပ်မည်။” 8သူစာ ယေရှုကို ပြောလီရေ၊ “အသျှင်၊ အကျွန် ကိုယ်တော်ကို အိမ်တင်ခံဖို့ မထိုက်တန်ပါ။ ကိုယ်တော် သက်သက် နှုတ်တော်နရာ ပြောပါ။ ယင်းပိုင်ဆိုကေ အကျွန့် ကျွန်မာ ရောဂါကောင်းပါလိမည်။ 9ကိုယ်တော်၏ တန်ခိုးအာဏာ အကြောင်းကို အကျွန် သိပါရေ၊ အကြောင်းကား အကျွန်လည်း အခြားတစ်ယောက် စကားကို လိုက်နာရပါရေ အရာ စစ်သားရို့စာ အကျွန့်စကားကို လိုက်နာရပါရေ။ အကျွန် တစ်ယောက်ကို ‘လားခီ’ ဟို့ ပြောရေဆိုကေ သူစာ လားခပါရေ။ အခြားတစ်ယောက်ကို ‘လာလတ်’ ဟို့ ပြောရေဆိုကေ သူစာ လာပါရေ။ အရာ အကျွန့်မာ ကျွန်ကို ‘ဒေသျှင့် လုပ်’ ဟို့ ပြောရေဆိုကေ သူစာ လုပ်ပါရေ။” 10သူ့စကားကို ကြားရို့ ယေရှုစာ အံ့ဩလီရေ။ အရာ သူစာ ကိုယ့်နောက်က လိုက်ကတ်သူရို့ကို ပြောလီရေ၊ “ငါ ကိုယ်ဘင်ရို့ကို အမှန် ပြောရေ၊ ဣသရေလလူမျိုးအထဲက တစ်ယောက်မာလည်း ဒေလှောက် ကြီးကျယ်စာ ကျုံခြင်းတရားကို ငါ မမြင်ဖူးသိ။ 11ငါ ကိုယ်ဘင်ရို့ကို အမှန် ပြောရေ၊ အရှိဖက်န အနောက်ဖက်က လူအများကြီး လာကတ်လိမည်၊ အရာ သူရို့စာ အာဗြဟံ၊ ဣဇာက် အရာ ယာကုပ်နအတူ ဂေါင်းခင်နိုင်ငံတော်မာ စားသောက်ဖို့ ထိုင်ကတ်လိမည်။ 12ယေကေလည်း ဣသရေလလူမျိုးအထဲက ဂေါင်းခင်နိုင်ငံတော်တို့ ဝင်ရဖို့စကား ဟိလီသူရို့စာ ငရဲပြည်မာ အမိုက်မှောင်ထဲတို့ ဘိုက်ချခြင်းကို ခံရကတ်လိမည်။ ယင်းနေရာမာ လူရို့စာ ဝေဒနာကို ခံရရေအတွက်န သွားချင်းသွား ကြိတ်ပြီးကေ အော်ရို့ ငိုကတ်လိမည်။” 13ယင်းနောက် ယေရှုစာ သူ့ကို ပြောလီရေ၊ “ကိုယ်ဘင် လားလီ။ ကိုယ်ဘင် ကျုံရေအတိုင်း ဖြစ်လိမည်။” ယင်းခါ ချက်ချင်း သူ့မာ ကျွန်စာ ကောင်းလားခလီရေ။
Copyright information for
RmzSC