Matthew 9:1-8
တစ်စိတ်နာရောဂါသေတစ်ယောက် အကောင်းဖြစ်ခြင်း
(မာကု ၂:၁-၁၂၊ လုကာ ၅:၁၇-၂၆)
1ယင်းနောက် ယေရှုစာ လောင်းတစ်စင်းမာ တက်ရို့ မြစ်ကမ်းတစ်ဖက်က ကိုယ့်မြို့တို့ ပြန်ရို့ ကြွလာလီရေ။ 2ယင်းခါ လူလိုင်းကေယောက်စာ တစ်စိတ်နာရောဂါသေတစ်ယောက်ကို ရွက်ရို့ ယေရှုတို့ လာကတ်လီရေ။ ယင်းရောဂါသေစာ အိပ်ရာမာ လဲရို့ ဟိလီရေ။ အရာ ယေရှုစာ သူရို့မာ ကျုံခြင်းတရားကို မြင်ရို့ ရောဂါသေကို ပြောလီရေ၊ “နင် မကြောက်ကေ့။ နင့် အပြစ်ကို ခွင့်ရွှတ်လိုက်ပျာ။” 3ယင်းခါ ကျမ်းဆရာ လိုင်းကေယောက်စာ စိတ်မာ စိတ်မာ ပြောကတ်လီရေ၊ “ဒေလူ ထာဝရဘုရားကို တရိုက်တေကား!” 4ယေကေလည်း ယေရှုစာ သူရို့ စိတ်မာ စဉ်းစားချက်ကို သိရို့ ပြောလီရေ၊ “ကိုယ်ဘင်ရို့ စိတ်ထဲမာ ဇာဖို့ မကောင်းစာကို စဉ်းစားနီကတ်စာလည်း? 5ဇာပိုင် ပြောကေ ရွယ်ဖို့လည်း၊ ‘နင့် အပြစ်ကို ခွင့်ရွှတ်လိုက်ပျာ’ ဟို့ ပြောကေ ရွယ်ဖို့လော၊ မဟုတ်ကေ ‘နင် ထရို့ လားနီ’ ဟို့ ပြောကေ ရွယ်ဖို့လော? 6ယေကေလည်း ဒေ ကမ္ဘာမာ လူအပြစ်ကို ခွင့်ရွှတ်ဖို့စာ တန်ခိုး မနုသသားတော်မာ ဟိရေဆိုစာကို ကိုယ်ဘင်ရို့ သိလတ်အောင် ငါ ကိုယ်ဘင်ရို့ကို ပြမည်။” ယင်းပိုင် ပြောရေအတိုင်း သူစာ ရောဂါသေကို ပြောလီရေ၊ “ထ၊ နင့် အိပ်ရာကို ယူရို့ အိမ်တို့ လားလီ။” 7ယင်းခါ သူစာ ထရို့ ကိုယ့်အိမ်တို့ လားခလီရေ။ 8ထိုဖြစ်ပျက်ခြင်းကို မြင်ရို့ လူရို့စာ ကောင်းကောင်း ကြောက်ကတ်လီရေ၊ အရာ ထာဝရဘုရားစာ လူ့သားကို အကြီးအကျယ် တန်ခိုး ပီးရေအတွက်န လူရို့စာ ထာဝရဘုရားကို ချီမွမ်းကတ်လီရေ။
Copyright information for
RmzSC