စာရွီးဆရာ အကြောင်း

စာရွီးဆရာ နာမည် ပေါလု ဖြစ်ပါရေ။ စာရွီးဆရာ အကြောင်းကို အလှပ သိချင်ရေဆိုကေ ရောမဩဝါဒ စာစောင် နိဒါန်းမာ ကြည့်ပါ။

စာရွီးစာ အချိန်န နေရာ

ခရစ်သက္ကရာဇ် ၆၁-၆၂ နှစ်အထဲတွင်းမာ ရောမမြို့ထောင်ထဲကနီရို့ ပေါလု ဒေ စာစောင်ကို ရွီးလီပါရေ။

စာရွီးဆရာ၏ ရွယ်မှတ်ချက်

ဩနေသိမ်းကို သက်သက် ကျွန်အဖြစ် လက်မခံဘိုင်းန ကျုံသူညီအဖြစ် ချစ်ခြင်းမေတ္တာစိတ်န လက်ခံပတ်စီအတွက် ပေါလု ဒေ စာစောင်ကို ရွီးရို့ ကိုယ့်မာ မိတ်ဆွေ ဖိလေမုန်ကို တောင်းပန်လီပါရေ။ ဖိလေမုန်မာ ဩနေသိမ်းနာမည်န ကျွန်တစ်ယောက် ဟိလီပါရေ။ ဩနေသိမ်းစာ ကိုယ့်အပိုင်သျှင်က ထွက်ဗြီးလားခရို့ ထောင်ကျခံရနီစာ ပေါလုတို့ ရောက်လားခလီပါရေ။ သူစာ ပေါလုနအတူ ထောင်ထဲမာ ဟိလီရေခါ ပေါလု၏ ဟောပြောစာ တရားကို ကြားရို့ ယေရှုခရစ်တော်ကို ကျုံလီပါရေ (ဖိလေမုန် ၁:၁၀)။

စာအုပ် ခွဲခြားမှု

ဒေ စာစောင်စာ ပေါလု ရွီးလီစာ စာစောင်တိအထဲမာ အားကုံးစာထက် အတိုဆုံး စာစောင် ဖြစ်ပါရေ၊ အကြောင်းကား အတိကျ လူနှစ်ယောက်ကို ပြန်ရို့ ပေါင်းပီးဖို့အတွက် ဒေ စာစောင်ကို ရွီးလီစာ ဖြစ်ပါရေ။

အကြောင်းအရာ အကျဉ်းချုပ်

(က) နှုတ်ဆက်ခြင်း ၁:၁-၃

(ခ) ဖိလေမုန်ကို ချီမွမ်းခြင်း ၁:၄-၇

(ဂ) ဩနေသိမ်းအတွက် ဖိလေမုန်ကို တောင်းပန်ခြင်း ၁:၈-၂၂

(ဃ) အဆုံးသတ်ချက် စကား ၁:၂၃-၂၅

Philemon

နှုတ်ဆက်ခြင်း

သို့၊ ဖိလေမုန်။

1ငါ ပေါလု၊ ငါစာ ယေရှုခရစ်တော် အကြောင်းန ထောင်ကျခံနီရရေ။ ငါန ငါရို့မာ ညီတိမောသေ ဒေ စာစောင်ကို ရွီးလိုက်တေ။ ငါရို့မာ ချစ်ခင်စာ မိတ်ဆွေန လုပ်ဖေါ်ကိုင်ဖက်ဖြစ်သူ နင့်တို့ ဒေ စာစောင်ကို ရွီးလိုက်တေ။ 2အရာ ငါရို့မာ နမှအပ္ပိယတို့၊ ငါရို့နအတူ စစ်တိုက်ဖက်သား အာခိပ္ပုတို့ အရာ နင့် အိမ်မာ စုရို့ သတင်းဝင်နီကတ်စာ အသင်းတော် လူရို့တို့လည်း ဒေ စာစောင်ကို ရွီးလိုက်တေ။

3ငါရို့ အဖထာဝရဘုရားန အသျှင်ယေရှုခရစ်တော်စာ နင်ရို့ကို ကျေးဇူးတော်န ငြိမ်းချမ်းခြင်း ပီးပါစီ။

ဖိလေမုန် ချစ်ခြင်းမေတ္တာန ကျုံခြင်းတရား

4– 5နင်စာ ထာဝရဘုရား၏ လူရို့ကို ချစ်ခြင်းမေတ္တာ ထားရေဆိုစာကို အရာ ယေရှုခရစ်တော်ကို ကျုံရေဆိုစာကို ငါ ကြားရဗျာ။ ယင်းအတွက်န ငါ အမြဲတိုင်း ဆုတောင်းရေခါ နင့်ကို အောက်မိရေ အရာ ငါ နင့်အတွက် ထာဝရဘုရားဘားမာ ကျေးဇူးတင်နီရေ။ 6ယေရှုခရစ်တော်၏ ဟိသမျ ပဿိကို နင် နားလည်ပတ်စီအတွက် ငါ ဆုတောင်းပီးရေ။ ထိုပဿိကို ငါရို့ ဝီမျှကတ်စာ ကျုံခြင်းတရားကနီရို့ နင် အရာလည်း ပိုရို့ နားလည်လိမည်။ 7ငါ့ ညီ၊ နင်စာ ထာဝရဘုရား၏ လူရို့ကို ချစ်ခြင်းမေတ္တာ ထားရို့ သူရို့ စိတ်နှလုံးကို အားခွန်အသစ် ပီးလီရေ။ ယင်းအတွက်န နင့် ချစ်ခြင်းမေတ္တာကို မြင်ရို့ ငါ ကောင်းကောင်း ပျော်ရေ အရာ ငါ့မာ စိတ်အားရရေ။

ဩနေသိမ်းကို လက်ခံဖို့အတွက် တောင်းပန်ခြင်း

8ယင်းအတွက်န နင် လုပ်သင့်စာအလုပ်တိကို လုပ်ဖို့အတွက် ခရစ်တော်နာမည်န ရဲဝံ့သတ္တိအပြည့် ထားရို့ ငါ နင့်ကို အာဏာ ပီးဖို့နိုင်ရေ၊ 9– 10ယေကေလည်း ငါ နင့်ကို ချစ်တေအတွက်န နင့်ဘားမာ ငါ တောင်းပန်ရေ။ ငါ ပေါလု၊ ငါစာ ဝါကြီးတစ်ယောက် ဖြစ်တေ။ ငါ ဒေဂု ခရစ်တော်ယေရှု အကြောင်းန ထောင်ကျခံနီရရေ။ ငါ ထောင်ကျသား တစ်ယောက်အနေန ငါ့သား ဩနေသိမ်းအတွက် ငါ နင့်ကို တောင်းပန်ရေ။ ငါ ထောင်ထဲမာ ဟိလီရေခါ ဩနေသိမ်းဘားမာ တရားဟောပြောလီရေ။ ယင်းခါ သူစာ ငါ ဟောပြောစာ တရားကို ကြားရို့ ယေရှုခရစ်တော်ကို ကျုံလီရေ။ ယင်းအတွက်န သူစာ ငါ့သားအရင်းနတူရေ။ 11တစ်ချိန်ခါ သူစာ နင့်ဘားမာ တစ်ခုလည်း တန်ဖိုး မဟိလီ၊ ယေကေလည်း ဒေဂု သူစာ နင့်ဘားမာလည်း တန်ဖိုး ဟိရေ အရာ ငါ့ဘားမာလည်း တန်ဖိုး ဟိရေ။

12ဒေဂု ငါ့ အသည်းကပင် စွဲရို့ ချစ်သူကို နင့်တို့ ပြန်ရို့ ရွှတ်တေ။ 13ငါစာ သတင်းကောင်းကို ဟောပြောရေအတွက် ငါ ထောင်ကျခံနီရေခါ သူစာ နင့်တက်စား ငါ့ကို ကူညီဖို့ရလတ်အောင် ငါ ယင်းသူကို ငါနအတူ ထားချင်လီရေ။ 14ယေကေလည်း နင့်က အခွင့် မရဘိုင်းန ငါ တစ်ခုလည်း မလုပ်ချင်။ အရာ ငါ့ကို ကူညီဖို့အတွက်မာ ငါ နင့်ကို အားဒမ မခိုင်းချင်။ နင် ကိုယ့်စေတနာစိတ်န ကူညီဖို့စာကိုရာ ငါ လိုရေ။ 15နင် ဩနေသိမ်းကို ထာဝရပတ်လုံး ပြန်ရို့ ရဖို့အတွက် သူစာ နင့်က တစ်နားသျှေ အဝီး ခွါရို့ လားခစာ ဖြစ်နိုင်ရေ။ 16ယေကေလည်း ဒေဂု သူ့ကို သက်သက် ကျွန်အဖြစ် မဟုတ်သိ၊ ကျွန်ထက် အချစ်ဆုံးညီအဖြစ် ပြန်ရို့ရလိမည်။ ငါ သူ့ကို ကောင်းကောင်း ချစ်တေ၊ ယေကေလည်း နင် ယင်းသူကို ကျုံသူညီန ကျွန်အဖြစ် ငါ့ထက် ပိုရို့ ချစ်ရဖို့။

17နင် ငါ့ကို လုပ်ဖေါ်ကိုင်ဖက် ဟို့ မှတ်တေဆိုကေ ဩနေသိမ်းကို ပြန်ရို့ လက်ခံလီ။ နင် ငါ့ကို ကြိုဆိုလက်ခံရေပိုင် ဩနေသိမ်းကိုလည်း ကြိုဆိုလက်ခံလီ။ 18ဩနေသိမ်း နင့်ကို ဆန့်ကျင်ရို့ တစ်ခုမသာ အပြစ်လုပ်စာ ဟိရေဆိုကေ အရာ ယင်းသူ နင့်ကို အကြွီးဆပ်ဖို့စာ ဟိရေဆိုကေ ထိုအကြွီးကို ငါ တာဝန်ယူရေ။ 19ထိုအကြွီးကို ဆပ်မည် ဟို့ ငါ ပေါလု ကိုယ်တိုင် ဒေ စာစောင်ကို ရွီးလိုက်တေ။ နင့်ဘဝအတွက် နင် ကိုယ်တိုင် ငါ့ကို အကြွီးဆပ်ဖို့ ဟိရေ။ ငါ ယင်းအကြောင်းကို မပြောချင်။ 20ငါ့ညီ ဖိလေမုန်၊ နင် အသျှင်၏ မျက်နှာကို ထောက်ရို့ ငါ့ကို တစ်ခေါက် ကျေးဇူးပြု။ နင် ခရစ်တော်ကို ကျုံသူတစ်ယောက်အနေန ငါ့စိတ်နှလုံးကို ပျော်ပါးခြင်းပီး။ 21နင် ငါ့တောင်းပန်ချက်ကို လက်ခံလိမည်ဆိုစာကို ကျုံရို့ စိတ်ချပြီးကေ ငါ ဒေ စာစောင်ကို ရွီးလိုက်စာဖြစ်တေ။ နင် အမှန် ငါ တောင်းပန်စာထက်ပင် ပိုရို့ လုပ်လိမည်ဆိုစာကို ငါ သိရေ။

22အရာတစ်ခု ပြောချင်စာကား၊ နင်ရို့ ငါ့အတွက် ထာဝရဘုရားဘားမာ ဆုတောင်းပီးရေအတွက်န ငါ အရာတစ်ပြန် နင်ရို့တို့ ရောက်ဖို့ဆိုစာကို ငါ မျှော်လင်းရို့ ဟိရေ။ ယင်းအတွက်န ငါ လာရေခါ တည်းဖို့အတွက် နင် အခန့်တစ်ခန့် အဆင်သင့်လုပ်ရို့ ထားလီ။

23ဧပဖြလည်း ခရစ်တော်ယေရှုအတွက် ငါနအတူ ထောင်ထဲမာ ဟိရေ။ အရာ သူစာ နင့်ကို နှုတ်ဆက်တေ။ 24ငါန လုပ်ဖက်သား ဖြစ်ကတ်စာ မာကု၊ အာရိတ္တာခု၊ ဒီမာ အရာ လုကာလည်း နင့်ကို နှုတ်ဆက်ကတ်တေ။

25အသျှင်ယေရှုခရစ်တော်၏ ကျေးဇူးတော် နင်ရို့နအတူ ဟိပါစီ။