Philippians 1

နှုတ်ဆက်ခြင်း

သို့၊ ဖိလိပ္ပိမြို့ အသင်းတော်။

1ငါ ပေါလုန တိမောသေ ငါရို့နှစ်ယောက်စာ ခရစ်တော်ယေရှု၏ ကျွန် ဖြစ်ကတ်တေ။ ဖိလိပ္ပိမြို့မာဟိစာ နင်ရို့ ဟိသမျ ထာဝရဘုရား၏ လူရို့တို့ ငါရို့ ဒေ စာစောင်ကို ပို့လိုက်တေ အရာ နင်ရို့မာ အသင်းတော် ဂေါင်းဆောင်အကြီးရို့န အသင်းတော် လူရို့ကို ပြုဇုသူရို့တို့လည်း ▼

▼ပြုဇုသူရို့ဒေ လူရို့ အကြောင်းကို အလှပ သိချင်ရေဆိုကေ တမန်တော် စာအုပ် ၆:၁-၆ မာ ကြည့်ပါ။

ဒေ စာစောင်ကို ပို့လိုက်တေ။

2ငါရို့မာ အဖထာဝရဘုရားန အသျှင်ယေရှုခရစ်တော်စာ နင်ရို့ကို ကျေးဇူးတော်န ငြိမ်းချမ်းခြင်း ပီးပါစီ။

ပေါလု ဆုတောင်းခြင်း

3ငါ နင်ရို့ကို တွက်ရတိုင်း နင်ရို့အတွက် ငါ ထာဝရဘုရားဘားမာ ကျေးဇူးတင်နီရေ။ 4နင်ရို့ အားကုံးသူအတွက် ငါ အမြဲတိုင်း ဝမ်းသာခြင်းန ထာဝရဘုရားဘားမာ ဆုတောင်းနီရေ၊ 5အကြောင်းကား နင်ရို့ ပထမနိကပင်စရို့ ဒေနိတိုင်အောင် ယေရှုခရစ်တော်၏ အကြောင်း သတင်းကောင်းကို ငါနအတူ ဟောပြောရို့ လာကတ်ပျာ။ 6နင်ရို့ စိတ်နှလုံးထဲမာ ထာဝရဘုရား ကောင်းမြတ်စာ အလုပ်တိကို လုပ်ဖို့ စဗျာဆိုစာကို ငါ ကျုံရေ။ ထာဝရဘုရားစာ ထိုကောင်းမြတ်စာ အလုပ်တိကို ခရစ်တော်ယေရှု ကြွလာဖို့နိတိုင်အောင် ဆက်လက်ရို့ လုပ်နီလိမည် အရာ သူစာ ထိုအလုပ်တိကို ယင်းနိမာ အဆုံးသတ်လိမည်။

7နင်ရို့ အားကုံးသူ အကြောင်းနပတ်သပ်ရို့ ငါ့မာ ဒေပိုင် စဉ်းစားဖို့ သင့်ရေ၊ အကြောင်းကား ငါ နင်ရို့ကို ကောင်းကောင်း ချစ်တေ။ ငါ ထောင်ထဲမာ ဟိလီရေခါ နင်ရို့ အားကုံးသူ ငါနအတူ ထာဝရဘုရား၏ ကြီးမြတ်စာ ပဿိကို ရလီကတ်တေ အရာ ငါ ယေရှုခရစ်တော်၏ အကြောင်း သတင်းကောင်းကို သက်သီပီးလီရေခါလည်း နင်ရို့ အားကုံးသူ ငါနအတူ ထာဝရဘုရား၏ ကြီးမြတ်စာ ပဿိကို ရလီကတ်တေ။ 8ခရစ်တော်ယေရှု၏ ချစ်ခြင်းမေတ္တာ ငါ့စိတ်နှလုံးမာ စွဲနီရေအတွက်န ငါ နင်ရို့ အားကုံးသူကို ကောင်းကောင်း အောက်မိရေဆိုစာကို ထာဝရဘုရား ကိုယ်တိုင် သိရေ။

9နင်ရို့မာ ချစ်ခြင်းမေတ္တာ အရာလည်း ပိုရို့ ကြီးပွါးလတ်အောင် ငါ ဆုတောင်းပီးနီရေ။ ယင်းခါရာ နင်ရို့မာ ချစ်ခြင်းမေတ္တာနအတူ ညာဏ်ပညာန နားလည်ခြင်းလည်း တိုးပွါးလာဖို့။ 10– 11ယင်းပိုင် နင်ရို့စာ အဆိုးန အကောင်းကို ခွဲခြားရို့ သိရကတ်လိမည် အရာ ကောင်းမြတ်စာတိကို နင်ရို့ ရွီးယူဖို့ နိုင်ကတ်လိမည်။ ယင်းခါရာ နင်ရို့စာ ယေရှုခရစ်တော် ကြွလာဖို့နိတိုင်အောင် စင်ကြယ်သူန သူတော်ကောင်းအဖြစ် နီဖို့နိုင်ကတ်လိမည် အရာ နင်ရို့စာ ယေရှုခရစ်တော်၏ ကူညီခြင်းန သူတော်ကောင်း ဖြစ်နိုင်ကတ်လိမည်။ ယင်းပိုင်ဆိုကေ ထာဝရဘုရားစာ ဘုန်းတန်ခိုးန ချီမွမ်းခြင်းကို ခံရလိမည်။

ခရစ်တော်အတွက် အသက်ရှင်ခြင်း

12ညီအစ်ကိုမောင်နမှရို့၊ ငါ နင်ရို့ကို သိစီချင်စာကား၊ ငါ တွိကြုံရစာ ဖြစ်ပျက်ခြင်း အကြောင်းန ငါ အရာလည်း ပိုရို့ သတင်းကောင်းကို ဟောပြောဖို့ အခွင့်ရေး ရဗျာ။ 13ယင်းအတွက်န ငါစာ ခရစ်တော်အကြောင်းန ထောင်ကျခံနီရရေဆိုစာကို မင်းနန်းမာ စောင့်စာ စစ်သရွဲရို့န အခြား အားကုံးသူ သိရကတ်ပျာ။ 14အရာ ငါ ထောင်ကျခံနီရရေအတွက်န အများကြီး ကျုံသူညီအစ်ကိုရို့စာ အရာလည်း ပိုရို့ အသျှင်ကို ကျုံလာကတ်ပျာ။ ယင်းအတွက်န သူရို့စာ အရာလည်း ပိုရို့ ရဲဝံ့သတ္တိအပြည့်န ထာဝရဘုရား၏ စကားတော်ကို ဟောပြောဖို့နိုင်ကတ်ပျာ။

15အမှန် စကားပြောလိုက်ဖို့ဆိုကေ သူရို့အထဲမာ တစ်ယောက်တစ်ရီ တုံ့ပြိုင်စာစိတ်န အသင်းခွဲဖို့စာစိတ်ကို ထားရို့ ခရစ်တော်၏ အကြောင်း သတင်းကောင်းကို ဟောပြောနီကတ်တေ။ အရာ တစ်ယောက်တစ်ရီ ကောင်းမြတ်စာ ရွယ်မှတ်ချက်ကို ယူရို့ သတင်းကောင်းကို ဟောပြောနီကတ်တေ။ 16ဒေ ဒုတိယအဖွဲ့သားရို့မာ ချစ်ခြင်းမေတ္တာ ဟိရေအတွက်န ခရစ်တော်၏ အကြောင်း သတင်းကောင်းကို ဟောပြောနီကတ်တေ၊ အကြောင်းကား သတင်းကောင်းကို ကာကွယ်ဖို့အတွက် ထာဝရဘုရား ငါ့ကို ခန့်ထားလီရေဆိုစာကို သူရို့ သိကတ်တေ။ 17ယေကေလည်း ထိုပထမ အဖွဲ့သားရို့စာ ကိုယ်ရို့ ကောင်းကျိုးရေးအတွက် ခရစ်တော်၏ အကြောင်း သတင်းကောင်းကို ဟောပြောနီကတ်တေ။ သူရို့စာ ကောင်းမြတ်စာ ရွယ်မှတ်ချက်န သတင်းကောင်းကို ဟောပြောနီကတ်စာ မဟုတ်၊ အကြောင်းကား ငါ ထောင်ကျခံနီရရေခါ သူရို့ သတင်းကောင်းကို ဟောပြောခြင်းကနီရို့ ငါ့ကို စိတ်ဒုက္ခ ပီးချင်ကတ်တေ။ 18ယေကေလည်း ငါ့မာ တစ်ခုလည်း အရေးမကြီး! အဓိကစကား ဖြစ်တေကား၊ ကောင်းမြတ်စာ ရွယ်မှတ်ချက်န ဖြစ်စီ၊ ဆိုးယုတ်စာ ရွယ်မှတ်ချက်န ဖြစ်စီ၊ သူရို့စာ လူရို့ဘားမာ ခရစ်တော်၏ အကြောင်း သတင်းကောင်းကို ဟောပြောနီကတ်တေ။ ယင်းအတွက်န ငါ ကောင်းကောင်း ဝမ်းသာရေ။ ဟုတ်တေ၊ ငါ အရာလည်း ဝမ်းသာရို့ နီဖို့သိ၊ 19အကြောင်းကား နင်ရို့ ဆုတောင်းခြင်းန ယေရှုခရစ်တော်၏ ဝိညာဉ် ကူညီခြင်းကနီရို့ ငါ လွတ်မြောင့်ခြင်းကို ရဖို့ဆိုစာကို ငါ သိရေ။

ခရစ်တော်အတွက် အသက်ရှင်ခြင်းရာ အဓိက

20ငါ တစ်ခုပိုင်လည်း အရှက်ကျဖို့ မဟုတ်။ ယင်းထက်ပင် ငါ့မာ ရဲဝံ့သတ္တိအပြည့်အစုံ ဟိဖို့ဆိုစာကို ငါ ကောင်းကောင်း မျှော်လင်းနီရေ။ ယင်းအတွက်န ငါ အယင်ခါပိုင် ဒေဂုလည်း ငါ့ကနီရို့ ခရစ်တော်၏ ဘုန်းတန်ခိုးကို ပေါ်ထွန်းစီချင်ရေ။ ငါ အရှင်ဟိရေပင် ဖြစ်စီ အရာ သီရေပင် ဖြစ်စီ၊ ငါ အမြဲတိုင်း ခရစ်တော်၏ ဘုန်းတန်ခိုးကို ပေါ်ထွန်းစီချင်ရေ၊ 21အကြောင်းကား ငါ့စဉ်းစားချက်မာ ခရစ်တော်အတွက် အသက်ရှင်ခြင်းစာ အဓိကစကား ဖြစ်တေ သီခြင်းစာ ငါ့အတွက် ပိုရို့ အကျိုးဟိရေ။ 22ယေကေလည်း ငါစာ အသက်ရှင်နီရေဆိုကေ ခရစ်တော်အတွက် တန်ဖိုးဟိစာ အလုပ်ကို အရာလည်း အများကြီး လုပ်နိုင်ဖို့။ ငါ အသက်ရှင်ခြင်းကို ရွီးကောက်ယူဖို့လော မဟုတ်ကေ သီခြင်းကို ရွီးကောက်ယူဖို့လောဆိုစာကို ငါ မသိ။ 23နှစ်ဖက်စုံက ငါ့ကို ဆွဲငင်နီရေ။ ငါစာ သီလားခပြီးကေ ခရစ်တော်နအတူ နီချင်ရေ၊ အကြောင်းကား ယင်းသျှင့်စာ ငါ့အတွက် ပိုရို့ ကောင်းရေ။ 24ယေကေလည်း နင်ရို့အတွက် ငါ အသက်ရှင်နီဖို့စာ ပိုရို့ အရေးကြီးရေ။ 25ယင်းအတွက်န ငါ အမှန် သိရစာကား၊ နင်ရို့မာ ကျုံခြင်းတရား တိုးပွါးဖို့အတွက် အရာ ထိုကျုံခြင်းတရား အကြောင်းန နင်ရို့ ဝမ်းသာဖို့အတွက် ငါ အသက်ရှင်နီဖို့။ 26ငါ နင်ရို့တို့ အရာတစ်ပြန် လာရေခါ နင်ရို့စာ ခရစ်တော်ယေရှုကနီရို့ ငါ့ကို ယူရို့ နင်ရို့မာ ဝမ်းသာခြင်းန ပြည့်စုံကတ်လိမည်။

27အဓိကစကား ဖြစ်တေကား၊ ခရစ်တော်၏ အကြောင်း သတင်းကောင်းန ကိုက်ညီလတ်အောင် နင်ရို့ နီထိုင်ကတ်။ ယင်းပိုင်ဆိုကေ ငါ ကိုယ်တိုင် နင်ရို့တို့ လာရို့ ကြည့်ရေပင် ဖြစ်စီ၊ အရာ အဝီးကနီရို့ နင်ရို့ စကားကို နားထောင်ရေပင် ဖြစ်စီ၊ နင်ရို့ အားကုံးသူ ကျုံခြင်းတရားဖက်မာ တစ်စိတ်တစ်ကိုယ်တည်းန တည်မြဲနီကတ်တေဆိုစာကို ငါ ကြားရဖို့။ အရာ သတင်းကောင်းက ရစာ ကျုံခြင်းတရားအတွက် နင်ရို့ တစ်ညီတစ်ညွန့်တည်း တိုက်ဆိုင်နီကတ်တေဆိုစာကိုလည်း ငါ မြင်ရဖို့။ 28နင်ရို့ကို ဆန့်ကျင်သူရို့ကို နင်ရို့ တစ်ခုပိုင်လည်း မကြောက်ကတ်ကေ့။ ယင်းပိုင်ဆိုကေ သူရို့စာ ကိုယ်ရို့ ပျက်စီးခြင်းတို့ ရောက်ကတ်ဖို့ဗျာ၊ ယေကေလည်း နင်ရို့စာ ကယ်တင်ခြင်းကို ရကတ်ဖို့ဗျာဆိုစာကို သိရကတ်လိမည်။ အရာ ထိုကယ်တင်ခြင်းစာ ထာဝရဘုရားက လာရေဆိုစာကိုလည်း သူရို့ သိရကတ်လိမည်။ 29နင်ရို့ သက်သက် ခရစ်တော်ကို ကျုံဖို့ ရလတ်အောင်အတွက် မဟုတ်သိ၊ ကျုံခြင်းတရား အကြောင်းန ဒုက္ခ-ဝေဒနာကို ခံယူဖို့အတွက်လည်း ထာဝရဘုရား နင်ရို့ကို ပဿိ ပီးလီရေ။ 30တစ်ချိန်ခါ ငါ ဒုက္ခ ခံရလီစာကို နင်ရို့ မြင်လီကတ်တေ အရာ ဒေဂုလည်း ငါ ဒုက္ခ ခံရနီစာ အကြောင်းကို နင်ရို့ ကြားရကတ်တေ။ နင်ရို့လည်း ငါ့ပိုင်တထန် တစ်မျိုးတည်း ဒုက္ခကို ခံရနီကတ်တေ။