Philippians 2

ကျုံသူရို့အထဲမာ ညီညွန့်ခြင်း

1နင်ရို့ ခရစ်တော်န တစ်ကိုယ်တည်း ဖြစ်ကတ်တေအတွက်န ရဲဝံ့ပြည့်ကတ်ပျာ၊ ခရစ်တော်၏ ချစ်ခြင်းမေတ္တာ အကြောင်းန နင်ရို့ စိတ်အားရကတ်ပျာ၊ သန့်ရှင်းသောဝိညာဉ်တော်န နင်ရို့အထဲမာ ပေါင်းဖေါ်ဆက်ဆံမှု ဟိကတ်ပျာ အရာ နင်ရို့ စိတ်နှလုံးမာ သနားကြင်နာခြင်း ဟိဗျာ။ 2ယင်းအတွက်န နင်ရို့ အားကုံးသူ တစ်စိတ်တည်း ထားကတ်၊ တစ်ယောက်ကို တစ်ယောက် ချစ်ကတ် အရာ ရွယ်မှတ်ချက် တစ်ခုတည်း ထားကတ်။ ယင်းပိုင်ဆိုကေ ငါ့မာ ပျော်ပါးခြင်းနပြည့်စုံဖို့။ 3ကိုယ့်ကောင်းကျိုးရေးအတွက်၊ မဟုတ်ကေ ဘော်ကြော့စိတ်န တစ်ခုကိုလည်း မလုပ်ကတ်ကေ့။ ယင်းထက်ပင် နှိမ့်ချခြင်းစိတ်န အခြားတစ်ယောက်ကို ကိုယ့်ထက် တန်ဖိုး ပီးကတ်။ 4သက်သက် ကိုယ့်အကျိုးကို မရှာဘိုင်းန တစ်ယောက်အကျိုးကို တစ်ယောက် ရှာကတ်။

5ခရစ်တော်ယေရှု၏ စိတ်ဆန္ဒကို နင်ရို့ စိတ်နှလုံးမာလည်း ထားကတ်။
6ခရစ်တော် ကိုယ်တိုင် ထာဝရဘုရား ဟိလီရေ၊
ယေကေလည်း သူစာ ထာဝရဘုရားန အရှိရှိ နီဖို့အတွက် အားဒမ သိမ်းထားဖို့ မလိုလီ။
7ယင်းထက်ပင် သူစာ ကိုယ့်မာ ဟိသမျ ဘုန်းသိက္ခာကို စွန့်ဘိုက်ခလီရေ၊
အရာ လူ့ဇာတိအဖြစ် မွီးဖွားခြင်းကို ခံယူရို့ ကျွန်တစ်ယောက်ပိုင် နီထိုင်လီရေ။
8သူစာ ပကတိ လူတစ်ယောက်ပိုင် သီအောင်တထိ ထာဝရဘုရား၏ စကားတော်ကို နာခံလီရေ၊
ယင်းထက်မက သူစာ ထိုနာခံမှုအကြောင်းန ကိုယ့်အသက်ကို အသီခံလီရေ၊
အရာ သူစာ ကားတိုင်ထက်မာ အသီခံပြီးကေ ကိုယ့်ကိုကိုယ် နှိမ့်ချလီရေ။
9ယင်းအတွက်န ထာဝရဘုရားစာ သူ့ကို အမြင့်ဆုံးနေရာတို့ တင်ယူလီရေ၊
အရာ သူ့ကို အားကုံးသူထက် အကြီးမြတ်ဆုံး နာမည်တစ်ခု မှည့်လီရေ၊
10အကြောင်းကား သူစာ ဂေါင်းခင်ဘုံန ကမ္ဘာမာ ဟိသမျ အားကုံးသူကို ယေရှု ရှိက ဒူးထောက်စီချင်ရေ၊
ကမ္ဘာအောက်မာ ဟိသမျ အားကုံးသူကိုလည်း ဒူးထောက်စီချင်ရေ၊
11အရာ အားကုံးသူကို ယေရှုခရစ်တော်စာ အသျှင် ဖြစ်တေ ဟို့ ဝန်ခံစီချင်ရေ။
ယင်းပိုင်ဆိုကေ အဖထာဝရဘုရားစာ ဘုန်းတန်ခိုးကို ခံရဖို့။

တောက်ပြောင်စာ ကြယ်တိပိုင် ထွန်းလင်းခြင်း

12ငါ ချစ်ခင်စာ ညီအစ်ကိုမောင်နမှရို့၊ နင်ရို့ကား အမြဲတိုင်း နာခံရို့ လာကတ်ပျာ။ ယင်းပိုင်တထန် သက်သက် ငါ ရောက်ရို့ ဟိရေခါ နင်ရို့ ထာဝရဘုရား၏ စကားတော်ကို နာခံကတ်ဖို့စာ မဟုတ်သိ။ ယင်းထက်ပင် ငါ ရောက်ရို့ မဟိခါလည်း ရိုသေကြောက်လန့်ခြင်းန ထာဝရဘုရား၏ စကားတော်ကို နင်ရို့ နာခံကတ်။ အရာ နင်ရို့ ကယ်တင်ခြင်းကို ရကတ်ပျာဆိုစာကို နင်ရို့ အလုပ်ကနီရို့ ဖေါ်ပြကတ်၊ 13အကြောင်းကား ထာဝရဘုရားစာ နင်ရို့ စိတ်နှလုံးမာ အလုပ်လုပ်နီရေ။ ယင်းအတွက်န နင်ရို့စာ ထာဝရဘုရား၏ နှစ်သက်စာ အလုပ်ကို လုပ်ချင်ကတ်လိမည် အရာ တန်ခိုးကို ရကတ်လိမည်။

14– 15– 16နင်ရို့စာ မတားမဆီး-မငြင်းမခုံဘိုင်းန ဟိသမျ အားကုံးကို လုပ်ကတ်။ ယင်းပိုင်ဆိုကေ နင်ရို့စာ အပြစ်နကင်းသူန စင်ကြယ်သူ ဖြစ်နိုင်ကတ်လိမည် အရာ ဒေခိုက်မာ အသိညာဏ် မဟိသူရို့န ဆိုးယုတ်သူရို့အထဲမာ ထာဝရဘုရား၏ ပြည့်စုံစာ သားသမီး ဖြစ်နိုင်ကတ်လိမည်။ အရာ နင်ရို့စာ ဒေ လောကမာ တောက်ပြောင်စာ ကြယ်တိပိုင် တောက်ပြောင်ကတ်လိမည်။ နင်ရို့ အသက်ပီးနိုင်စာ စကားတော်ကို နနောင်းတည်းရို့ ထားကတ်။ ယင်းပိုင်ဆိုကေ ခရစ်တော် ကြွလာရေနိမာ ငါ ကြိုးစားအားထုတ်ခြင်းန လုပ်ကိုင်ခြင်းတိ အကျိုးမဟိ မဖြစ်လီ ဆိုပြီးကေ ငါ ဘော်ကြော့ကြင်းဖို့စာ အခွင့်ရေးကို ရဖို့။ 17နင်ရို့စာ ကျုံခြင်းတရားအတွက် အများကြီး ဒုက္ခ-ဝေဒနာကို ခံရနီကတ်တေ။ ယင်းပိုင်တထန် ငါလည်း ကိုယ့်ဘဝကို ထာဝရဘုရားဘားမာ ယဇ်ပူဇော်ရေ။ ယင်းပိုင် ယဇ်ပူဇော်ဖို့ ကျကေလည်း ငါ စိတ်ပျော်ရေ အရာ နင်ရို့နအတူ ငါ ဝမ်းသာရေ။ 18ယင်းပိုင်တထန် နင်ရို့လည်း ငါနအတူ စိတ်ပျော်ဖို့ သင့်ရေ အရာ ဝမ်းသာဖို့လည်း သင့်ရေ။

တိမောသေကို ချီမွမ်းခြင်း

19အသျှင်ယေရှု အလိုဟိရေဆိုကေ ငါ တိမောသေကို နင်ရို့တို့ အယင်အမြန် ရွှတ်လိုက်ဖို့ ဆိုပြီးကေ ငါ မျှော်လင်းနီရေ။ ယင်းပိုင်ဆိုကေ နင်ရို့က သတင်းကို ကြားရရို့ ငါလည်း စိတ်အားရဖို့။ 20တိမောသေပိုင် နင်ရို့ အကြောင်းနပတ်သပ်ရို့ အမှန် စဉ်းစားဖို့သူ ငါ့နိုင်ဗြင်းမာ တစ်ယောက်လည်း မဟိ၊ 21အကြောင်းကား အခြားလူရို့ အားကုံးသူ သက်သက် ကိုယ်ရို့အကျိုးကိုရာ ရှာနီကတ်တေ၊ ယေကေလည်း ယေရှုခရစ်တော်၏ အကျိုးကို ရှာသူတစ်ယောက်လည်း မဟိ။ 22ယေကေလည်း တိမောသေ အကျင့်သီလ အကြောင်းကို နင်ရို့ သိကတ်တေ။ သားတစ်ယောက် ကိုယ့်အဖနအတူ အလုပ်လုပ်နီစာပိုင် သူလည်း ငါနအတူ ယေရှုခရစ်တော်၏ အကြောင်း သတင်းကောင်းကို ဟောပြောဖို့စာ အလုပ်မာ ဝင်ရို့ လုပ်နီရေ။ 23ယင်းအတွက်န ငါ ဇာ ဖြစ်ဖို့လည်းဆိုစာကို သိရေချက်ချင်း ငါ သူ့ကို နင်ရို့တို့ ရွှတ်လိုက်ဖို့ ဆိုပြီးကေ ငါ မျှော်လင်းနီရေ။ 24အရာ ငါလည်း အယင်အမြန် လာဖို့ နိုင်ဖို့ဆိုစာကို ငါစာ အသျှင်ကို ကျုံရို့ စိတ်ချနီရေ။

ဧပဖြောဒိတ်ကို ပြန်ရွှတ်ခြင်း

25အရာ ဧပဖြောဒိတ်ကို နင်ရို့တို့ ရွှတ်လိုက်ဖို့ အလိုဟိရေ ဟို့ ငါ ထင်လီရေ။ သူစာ ငါ့မာ ကျုံသူညီအစ်ကို တစ်ယောက် ဖြစ်တေ အရာ သူစာ ငါ့မာ လုပ်ဖေါ်ကိုင်ဖက်န စစ်တိုက်ဖက်သားလည်း ဖြစ်တေ။ ပြုဇုသူအဖြစ် ငါ့ လိုအပ်ချက်ကို ဖြည့်ပီးဖို့အတွက် နင်ရို့ သူ့ကို ငါ့တို့ ရွှတ်လိုက်ကတ်လီရေ။ 26သူစာ နင်ရို့ အားကုံးသူကို မြင်ချင်ရေအတွက်န ငါ သူ့ကို ပြန်ရွှတ်လိုက်မည်။ အရာ သူခန္ဓာ မကောင်း ဖြစ်လီစာ အကြောင်းကို နင်ရို့ ကြားလီကတ်တေအတွက်န သူစာ ကောင်းကောင်း စိတ်ပူနီရေ။ 27ဟုတ်တေ၊ သူစာ ခန္ဓာ မကောင်း ဖြစ်ရို့ သီဖို့စာပိုင် ဖြစ်လီရေ၊ ယေကေလည်း ထာဝရဘုရားစာ သူ့ကို သနားလီရေ။ သက်သက် သူ့ကို သနားလီစာ မဟုတ်သိ၊ ယင်းထက်ပင် ထာဝရဘုရားစာ ငါ့ကိုလည်း သနားလီရေ၊ အကြောင်းကား ထာဝရဘုရားစာ ငါ့ကို ဒုက္ခအထက်က အရာလည်း ဒုက္ခထပ်ရို့ မပီးချင်လီ။ 28ယင်းအတွက်န ငါ သူ့ကို နင်ရို့တို့ ကောင်းကောင်း ရွှတ်လိုက်ချင်ရေ။ သူစာ နင်ရို့တို့ ရောက်တေခါ နင်ရို့ သူ့ကို မြင်ရို့ ပျော်ကတ်လိမည် အရာ ငါလည်း စိတ်အီးချမ်းသာ ကျဖို့။ 29ယင်းအတွက်န အသျှင်၏ လူအဖြစ် အပြည့်အစုံ စိတ်အပျော်န နင်ရို့ သူ့ကို လက်ခံလီကတ်။ အရာ နင်ရို့ ယင်းပိုင်ဇတ် လူရို့ကို ရိုသေလီကတ်၊ 30အကြောင်းကား ခရစ်တော်၏ အလုပ်အကြောင်းန သူစာ ကိုယ့်ကို ဖီးဒုက္ခမာ ချလီရေ။ အရာ သူစာ ငါ့ကို ကူညီဖို့အတွက် ကိုယ့်အသက်ကို တိုင်အောင်ပင် စွန့်ဖို့ သဖေါတူလီရေ။ နင်ရို့ ငါ့အတွက် လုပ်ဖို့ မနိုင်လီစာကို သူစာ လုပ်လီရေ။