Philippians 3
အယောင်ဆောင် ဆရာရို့ကို ရှောင်ဖို့စာ အကြောင်း
1ငါ့ ညီအစ်ကိုမောင်နမှရို့၊ အဆုံးမာ ငါ ပြောမည်၊ နင်ရို့စာ အသျှင်န တစ်ကိုယ်တည်း ဖြစ်ကတ်တေအတွက်န ဝမ်းသာကတ်။ နင်ရို့တို့ စကား တစ်ခွန်းတည်းကို အပြန်ပြန် ထပ်ရို့ ရွီးဖို့စာ ငါ မပင်ပန်း အရာ နင်ရို့ကို သတိပီးဖို့အတွက် ရွီးဖို့ သင့်ရေ။ 2နင်ရို့ ထိုခွီးတိကို ရှောင်ကတ်၊ ယင်းအဓိပ္ပါယ်ကား ဆိုးယုတ်စာ အလုပ်လုပ်နီသူရို့ကို ရှောင်ကတ်။ သူရို့စာ အရီဖျားလှီးမင်္ဂလာ လုပ်ဖို့စာကို အများ အရေးစစ်ရို့ လုပ်နီကတ်တေ။ 3ယေကေလည်း ငါရို့ရာ အမှန် အရီဖျားလှီးမင်္ဂလာကို ခံယူသူရို့ ဖြစ်ကတ်တေ၊ အကြောင်းကား ငါရို့စာ ထာဝရဘုရား၏ ဝိညာဉ်တော် ကူညီခြင်းန သူ့ကို ကိုးကွယ်နီကတ်တေ အရာ ငါရို့စာ ခရစ်တော်ယေရှု၏ အကြောင်းနပတ်သပ်ရို့ ဘော်ကြော့ကြင်းနီကတ်တေ။ ငါရို့စာ ကိုယ့်ခန္ဓာန ကိုယ်လုပ်နိုင်စာ ကောင်းမှုကုသိုလ်ကို အားမကိုးကတ်။ 4ငါ အမှန် ကိုယ်လုပ်စာ ကောင်းမှုကုသိုလ်ကို အားကိုးနိုင်ကေလည်း ငါ အားမကိုး။ အသူမဆို ကိုယ်လုပ်စာ ကောင်းမှုကုသိုလ်ကို အားကိုးစရာ အကြောင်း ဟိရေ ဟို့ မှတ်တေဆိုကေ ယင်းသူထက် အရာလည်း ပိုရို့ ငါ့မာ အားကိုးစရာ အကြောင်း ဟိရေဆိုစာကို သူစာ သိထားဖို့ သင့်ရေ။ 5ငါစာ မွီးဖွားရို့ ရှစ်ရက်နိမာ အရီဖျားလှီးမင်္ဂလာကို ခံယူလီရေ။ ငါစာ ဣသရေလလူမျိုးအထဲမာ ဗင်္ယာမိန် အမျိုးအနွယ်သား တစ်ယောက် ဖြစ်တေ။ ငါစာ ဟေဗြဲလူမျိုးအစစ် တစ်ယောက် ဖြစ်တေ။ အရာ မောရှေ၏ ပညှတ်တရားကို လိုက်နာခြင်းကနီရို့ ငါစာ ဖာရိရှဲအဖွဲ့သား တစ်ယောက်လည်း ဖြစ်တေ။ 6ငါစာ ကိုယ့်ယုဒဘာသာကို ကောင်းကောင်း ကိုးကွယ်ဖို့ အားပါလီရေ။ ယင်းအတွက်န ငါစာ ခရစ်တော်၏ အသင်းတော်တိကို ညှဉ်းဆဲလီရေ။ အရာ ထာဝရဘုရား၏ နှစ်သက်ခြင်းကို ခံရဖို့အတွက် ငါစာ မောရှေ၏ ပညှတ်တရားကို အပြည့်အစုံ လိုက်နာလီရေ။ ယင်းအတွက်န မောရှေ၏ ပညှတ်တရားကို ယူရို့ ငါ့ကို တစ်ယောက်လည်း အပြစ်တင်ဖို့ မရလီကတ်။ခရစ်တော်ကို သိရခြင်းရာ အားကုံးစာထက် အမြတ်ဆုံး
7အယင်ခါ ထိုဘာသာတရားကို လိုက်နာသူအနေန နီထိုင်လီစာ ငါ့မာ ဘဝစာ ငါ့အတွက် တန်ဖိုး ဟိလီရေ၊ ယေကေလည်း ငါ ခရစ်တော်ကို ရရေခါ ထိုအကြောင်းအရာတိ ငါ့ဘားမာ တစ်ခုလည်း တန်ဖိုး မဟိလိုက်ပျာ။ 8– 9အမှန် ငါ့မာ အသျှင်ယေရှုခရစ်တော်ကို သိရခြင်းစာ အားကုံးစာထက် အမြတ်ဆုံး ဖြစ်တေ။ ယင်းအတွက်န ထိုအကြောင်းအရာတိ ငါ့အတွက် တန်ဖိုးမဟိ ဟို့ ငါ မှတ်တေ။ ခရစ်တော်အတွက် ငါ ဟိသမျ အားကုံးကို အဆုံးခံဘိုက်လိုက်ပျာ။ ငါ ခရစ်တော်ကို ရချင်ရေ အရာ ခရစ်တော်န တစ်ကိုယ်တည်း ဖြစ်ချင်ရေ။ ယင်းအတွက်န ငါ ဟိသမျ အားကုံးကို အပုတ်အယွတ် ဟို့ မှတ်ပြီးကေ စွန့်ဘိုက်လိုက်ပျာ။ ငါ ပညှတ်တရားကို လိုက်နာရေအတွက်န ထာဝရဘုရား ငါ့ကို သူတော်ကောင်းအဖြစ် လက်ခံလီစာ မဟုတ်၊ ယေကေလည်း ခရစ်တော်ကို ကျုံရေအတွက်နရာ ငါ့ကို သူတော်ကောင်းအဖြစ် လက်ခံလီစာ ဖြစ်တေ။ ထိုသူတော်ကောင်းအဖြစ် လက်ခံခြင်းစာ ကျုံခြင်းကနီရို့ ထာဝရဘုရားက လာရေ။ 10ငါ ခရစ်တော်ကို သိချင်ရေ အရာ ခရစ်တော်ကို အရှင်လုပ်လီစာ တန်ခိုးကို သိချင်ရေ။ ငါ ခရစ်တော်ပိုင်တထန် ဒုက္ခ-ဝေဒနာကို ခံယူချင်ရေ။ ပြောလိုက်ဖို့ဆိုကေ သူအသီခံလီစာ စိတ်သဖေါကို ယူရို့ ငါလည်း အသီခံချင်ရေ။ 11ယင်းပိုင်ဆိုကေ ဇာမဆို ဖြစ်စီ ငါလည်း အမှန် သီရာက ပြန်ရှင်ထမြောင့်ဖို့။ဆုကို ရဖို့အတွက် ကြိုးစားခြင်း
12ငါ မျှော်လင်းနီစာ ဆုကို ရလားခဗျာ၊ မဟုတ်ကေ အပြည့်အစုံ စင်ကြယ်လားခဗျာ ဟို့ ငါ ပြောစာ မဟုတ်။ ယေကေလည်း ထိုဆုကို ဖမ်းဖို့အတွက် ငါ ဗြီးရို့ လိုက်နီရေ၊ အကြောင်းကား ပထမဆုံးခါ ကိုယ့်လူဖြစ်ဖို့အတွက် ခရစ်တော်ယေရှုစာ ငါ့ကို ခေါ်လီရေ။ 13– 14ညီအစ်ကိုမောင်နမှရို့၊ ငါ ထိုဆုကို ဖမ်းရို့ ရဗျာ ဟို့ ငါ မမှတ်၊ ယေကေလည်း ငါ အမြဲတိုင်း ကြိုးစားနီစာတစ်ခု ဟိရေ။ ယင်းအဓိပ္ပါယ် ဖြစ်တေကား နောက်က ဟိသမျ အားကုံးကို မိဘိုက်ခရို့ ရှိကဟိစာ ဆုကို ဖမ်းဖို့အတွက် ငါ အားထုတ်ပြီးကေ ဗြီးရို့ လိုက်နီရေ။ ယင်းခါရာ ဂေါင်းခင်ဘုံမာဟိစာ ဆုကို ငါ ရနိုင်ဖို့။ ထာဝရဘုရားစာ ထိုဆုကို ပီးဖို့အတွက် ခရစ်တော်ယေရှုကနီရို့ ငါရို့ကို ခေါ်လီရေ။ 15ယင်းအတွက်န ငါရို့ ဝိညာဉ်ရေးဖက်က ပြည့်စုံခြင်း ဟိသူရို့စာ ဒေပိုင် စိတ်သဖေါကို ထားဖို့ သင့်ရေ။ နင်ရို့အထဲမာ စိတ်သဖေါ မတူညီစာ အကြောင်းအရာတိ ဟိရေဆိုကေ ထိုအကြောင်းကို ထာဝရဘုရားစာ နင်ရို့ဘားမာ ရှရှင်းလလင်း ဖေါ်ပြလိမည်။ 16ဇာမဆိုဖြစ်ဖြစ် လာကတ်၊ ငါရို့ ဝိညာဉ်ရေးဖက်က ပြည့်စုံခြင်းကို ရစာလှောက်န နီထိုင်ကတ်မည်။ 17ညီအစ်ကိုမောင်နမှရို့၊ နင်ရို့ အားကုံးသူ ငါ့ပိုင် နီထိုင်ကတ် အရာ ငါ့ပိုင် နီထိုင်သူရို့ကို နင်ရို့ အလှပ ကြည့်ထားကတ်။ ဇာပိုင် နီထိုင်ဖို့လည်းဆိုစာကို ငါရို့ နင်ရို့ကို ပြပြီးဗျာ။ 18ငါ နင်ရို့ကို အပြန်ပြန် ပြောရို့ လာဗျာ အရာ ဒေဂုလည်း မျက်ရည်ကျရို့ ငါ အရာတစ်ပြန် ပြောရေ၊ ကားတိုင်မာ ခရစ်တော်၏ အသီခံခြင်း တရားတော်ကို ဆန့်ကျင်ရို့ နီထိုင်သူ အများကြီး ဟိကတ်တေ။ 19ယင်းအတွက်န သူရို့စာ ပျက်စီးခြင်းတို့ ရောက်ကတ်လိမည်။ သူရို့စာ ထာဝရဘုရား၏ ဝတ်ကို မပြုကတ်။ ယင်းထက်ပင် သူရို့စာ သက်သက် ကိုယ်ရို့အလိုကိုရာ ဖြည့်နီကတ်တေ။ သူရို့စာ ရှက်ကောင်းဖွယ်ရာ အကြောင်းကို ယူရို့ ဘော်ကြော့ကြင်းနီကတ်တေ အရာ သူရို့စာ သက်သက် လောကနဆိုင်စာ အကြောင်းတိကိုရာ ယူရို့ စဉ်းစားနီကတ်တေ။ 20ယေကေလည်း ငါရို့ကား ဂေါင်းခင်ဘုံသား ဖြစ်ကတ်တေ။ ငါရို့စာ ကိုယ်ရို့မာ ကယ်တင်သျှင် အသျှင်ယေရှုခရစ်တော် ဂေါင်းခင်ဘုံက ကြွလာဖို့အတွက် အောက်မိခြင်းစိတ်န စောင့်နီကတ်တေ။ 21အကြောင်းကား ယင်းအချိန်ခါ သူစာ ငါရို့မာ အားနည်းစာ ခန္ဓာကို ပြောင်းလှဲရို့ ကိုယ့်မာ ဘုန်းတန်ခိုးနပြည့်စုံစာ ခန္ဓာပိုင် ဖြစ်စီလိမည်။ ခရစ်တော်စာ ကိုယ့်တန်ခိုးန ထိုအလုပ်ကို လုပ်လိမည် အရာ ဟိသမျ အားကုံးကို ကိုယ့်အုပ်ချုပ်ခြင်းအောက်မာ ချထားလိမည်။
Copyright information for
RmzSC