Philippians 4

1ယင်းအတွက်န ငါ့ ညီအစ်ကိုမောင်နမှရို့၊ ငါ နင်ရို့ကို ချစ်တေ အရာ နင်ရို့ကို မြင်ချင်ရေ။ နင်ရို့စာ ငါ့ ဝမ်းသာခြင်းန ငါ့ အောင်ဆုသရဖူ ဖြစ်တေ။ ငါ ပြောစာပိုင် နင်ရို့ အသျှင်န တစ်ကိုယ်တည်း ဖြစ်ရို့ တည်မြဲနီကတ်။

ဩဝါဒပီးခြင်း

2ဧဝေါဒိန သုန္တုတ်ကို ငါ အရေးတကြီး တောင်းပန်ရေ၊ နင်ရို့ အသျှင်န တစ်ကိုယ်တည်း ဖြစ်ကတ်တေအတွက်န တစ်ယောက်န တစ်ယောက် သသင့်တတင် နီကတ် အရာ တစ်စိတ်တည်း ထားကတ်။

3အရာ ငါ့မာ လုပ်ဖေါ်ကိုင်ဖက် အစစ်ဖြစ်သူ၊ နင့်ကိုလည်း ငါ တောင်းပန်ရေ၊ နင် ထိုမိန်းမရို့ကို ကူညီလိုက်။ သူရို့စာ သတင်းကောင်းကို ဟောပြောဖို့စာ အလုပ်မာ ငါနအတူ ကောင်းကောင်း ကြိုးစားအားထုတ်ရို့ လုပ်လီကတ်တေ။ သူရို့စာ ကလေမင်နအတူ အရာ ငါ့မာ အခြား လုပ်ဖေါ်ကိုင်ဖက်ရို့နအတူ ဒုက္ခ ခံရလီကတ်တေ။ သူရို့စာ အသက်-စာအုပ်မာ နာမည်စာရင်း ဝင်ကတ်ပျာ။

4နင်ရို့ အသျှင်န တစ်ကိုယ်တည်း ဖြစ်ကတ်တေအတွက်န အမြဲတိုင်း ဝမ်းသာကတ်။ ငါ အရာတစ်ပြန် ပြောရေ၊ နင်ရို့ ဝမ်းသာကတ်။ 5နင်ရို့မာ နုညံ့စာ အကျင့်ကို အားကုံးသူ ရှိက ဖေါ်ပြကတ်။ အသျှင် အယင်အမြန် ကြွလာလိမည်။ 6နင်ရို့ တစ်ခု အကြောင်းအရာကိုလည်း ယူရို့ စိတ်မပူကတ်ကေ့။ ယင်းထက်ပင် နင်ရို့မာ ဟိသမျ လိုအပ်ချက် အကြောင်းအရာအတွက် ထာဝရဘုရားဘားမာ ဆုတောင်းကတ် အရာ နင်ရို့ ဆုတောင်းကတ်တေခါ အမြဲတိုင်း ထာဝရဘုရားကို ကျေးဇူးတင်ကတ်။ 7ယင်းပိုင်ဆိုကေ ထာဝရဘုရား၏ ငြိမ်းချမ်းခြင်းစာ နင်ရို့ နှလုံးသားန စိတ်ကို ကာကွယ်လိမည်၊ အကြောင်းကား နင်ရို့စာ ခရစ်တော်ယေရှုန တစ်ကိုယ်တည်း ဖြစ်ကတ်ပျာ။ ထိုငြိမ်းချမ်းခြင်းကို လူရို့ ညာဏ်ပညာန စဉ်းစားရို့လည်း နားမလည်နိုင်ကတ်။

8ညီအစ်ကိုမောင်နမှရို့၊ အဆုံးမာ ငါ ပြောမည်၊ မှန်ကန်စာ၊ တင့်တယ်စာ၊ ရိုးသားစာ၊ စင်ကြယ်စာ၊ လှပစာ၊ ရိုသေခြင်းကို ရထိုက်စာ၊ ကောင်းမြတ်စာ အရာ ချီမွမ်းခြင်းကို ရထိုက်စာ အကြောင်းအရာတိကို စိတ်ဝင်စားကတ်။ 9နင်ရို့ ငါ့က သင်ယူလီစာ၊ လက်ခံယူလီစာ အရာ မြင်လီစာအတိုင်း နင်ရို့ လေ့ကျင့်နီကတ်။ ယင်းပိုင်ဆိုကေ ငြိမ်းချမ်းခြင်း၏ ထာဝရဘုရားစာ နင်ရို့နအတူ ဟိလိမည်။

ဖိလိပ္ပိမြို့ အသင်းတော်ကို ပေါလု ကျေးဇူးတင်ခြင်း

10အသျှင်စာ ငါ့ကို ကောင်းကောင်း ဝမ်းသာခြင်း ပီးလီရေ၊ အကြောင်းကား ရက်ပေါင်းများစွာ ကြာရေခါ နင်ရို့ အရာတစ်ပြန် ငါ့အတွက် စဉ်းစားကတ်တေ။ အမှန် နင်ရို့ အမြဲတိုင်း ငါ့အတွက် စဉ်းစားရို့ နီလီကတ်တေ။ ယေကေလည်း နင်ရို့စာ ယင်းပိုင် စဉ်းစားချက်ကို ဖေါ်ပြဖို့ အခွင့်ရေး မရကတ်လီ။ 11ငါ့မာ လိုအပ်ချက်တိအတွက်န ငါ ဒေ စကားတိကို ပြောစာ မဟုတ်၊ အကြောင်းကား ငါ အခြေအနေတိုင်းမာ နှစ်သက်ခြင်းစိတ်န နီဖို့တတ်ပျာ။ 12ငတ်မွတ်ခြင်း ကျရေခါ ဖြစ်စီ၊ ချမ်းသာကြွယ်ဝရေခါ ဖြစ်စီ၊ ငါ နှစ်သက်ခြင်းစိတ်န နီဖို့တတ်တေ။ ဝရေခါ ဖြစ်စီ၊ ငတ်တေခါ ဖြစ်စီ အရာ ချမ်းသာကြွယ်ဝရေခါ ဖြစ်စီ၊ ဆင်းရဲပင်ပန်းရေခါ ဖြစ်စီ၊ အခြေအနေတိုင်းမာ ဇာပိုင် နှစ်သက်ခြင်းစိတ်န နီရဖို့လည်းဆိုစာကို ငါ သင်ယူပြီးဗျာ။ 13ခရစ်တော်က ရလီစာ တန်ခိုးန ဟိသမျ အားကုံးကို ငါ ခံယူနိုင်ရေ။

14ယေကေလည်း ငါ ဒုက္ခ-ဝေဒနာကို ခံရရေအချိန်မာ နင်ရို့ ငါ့ကို ကူညီဖို့ ရောက်လာကတ်တေအတွက်န ကောင်းရေ။ 15အိုး ဖိလိပ္ပိမြို့ အသင်းတော် လူရို့၊ နင်ရို့ကား သိကတ်တေ၊ ငါ နင်ရို့ဘားမာ ပထမ သတင်းကောင်းကို ဟောပြောပြီးရေနောက် မာကေဒေါနိပြည်နယ်က ထွက်လားခလီရေ။ ယင်းခါ နင်ရို့ အသင်းတော်တစ်ခုတည်းရာ ငါ့ကို အကူညီ ပီးလီရေ။ 16အရာ ငါ သက်သာလောနိတ်မြို့မာ နီလီရေခါလည်း နင်ရို့ သုံးလေးခေါက် အကူညီ ပို့ပီးရို့ ငါ့မာ လိုအပ်ချက်တိကို ဖြည့်ပီးကတ်လီရေ။ 17နင်ရို့က တစ်ခုမသာ အကူညီ ရဖို့ လိုရို့ ငါ ထိုစကားတိကို ပြောစာ မဟုတ်။ ယေကေလည်း ပီးလှူခြင်းကနီရို့ နင်ရို့ ကောင်းကျိုးကို ရကတ်ပတ်စီအတွက် ငါ ထိုစကားတိကို ပြောစာ ဖြစ်တေ။ 18ငါ့မာ လိုအပ်ချက် အားကုံးကို ငါ ရဗျာ၊ ယင်းထက်မက ငါ လိုအပ်စာထက် ပိုရို့လည်း ငါ့မာ ဟိရေ။ နင်ရို့ ဧပဖြောဒိတ်န ပို့လိုက်စာ လက်ဆောင်ကို ရရို့ ဒေဂု ငါ့မာ ဟိသမျ လိုအပ်ချက် ပြည့်စုံဗျာ။ ထိုလက်ဆောင်တိစာ ထာဝရဘုရား၏ နှစ်သက်-မွှီးကြိုင်စာ ပူဇော်သက္ကာနတူရေ။ 19ခရစ်တော်ယေရှုဘားမာ ထာဝရဘုရား၏ ဘုန်းတန်ခိုးနပြည့်စုံစာ ဥစ္စာ ဟိရေ။ ထိုဥစ္စာက ယူရို့ နင်ရို့မာ ဟိသမျ လိုအပ်ချက်ကို ငါ့ထာဝရဘုရား ဖြည့်ပီးလိမည်။ 20ငါရို့မာ အဖထာဝရဘုရားစာ ကမ္ဘာအဆက်ဆက် ထာဝရပတ်လုံး ဘုန်းကြီးပါစီ။ အာမန်။

အဆုံးခေါက် နှုတ်ဆက်ခြင်း

21ခရစ်တော်ယေရှုန တစ်ကိုယ်တည်း ဖြစ်ကတ်စာ ထာဝရဘုရား၏ လူတိုင်းကို ငါ နှုတ်ဆက်တေ ဟို့ ပြောပြလီ။ အရာ ငါနအတူ ဟိကတ်စာ ကျုံသူညီအစ်ကိုရို့စာ နင်ရို့ကို နှုတ်ဆက်ကတ်တေ။ 22အရာ ဒေ နေရာမာ ဟိကတ်စာ ထာဝရဘုရား၏ ဟိသမျ လူရို့၊ အရေးကြီးဆုံး ဖြစ်တေကား ရောမဧကရာဇ်မင်း၏ နန်းတော်မာ ဟိကတ်စာ လူရို့လည်း နင်ရို့ကို နှုတ်ဆက်ကတ်တေ။

23နင်ရို့ အားကုံးသူ စိတ်နှလုံးမာ အသျှင်ယေရှုခရစ်တော်၏ ကျေးဇူးတော် ဟိပါစီ။ အာမန်။