Revelation of John 1
1ဒေ စာစောင်မာ ရွီးရို့ဟိစာ အကြောင်းတိစာ ယေရှုခရစ်တော် ဖေါ်ပြလီစာ အကြောင်းတိ ဖြစ်တေ။ ဒေ အကြောင်းတိ အများမကြာခင် ဖြစ်ပျက်လာဖို့။ ဒေ အကြောင်းတိကို ကိုယ့်ကျွန်ရို့ကို ပြောပြဖို့အတွက် ထာဝရဘုရားစာ ယေရှုခရစ်တော်ဘားမာ ဖေါ်ပြလီရေ။ အရာ ယေရှုခရစ်တော်စာ ကိုယ့်ကျွန် ယောဟန်ဘားမာ ပြောပြဖို့အတွက် ကိုယ့်ဂေါင်းခင်နတ်သားတစ်ပါးကို ရွှတ်လိုက်လီရေ။ 2အရာ ယောဟန်စာ ထာဝရဘုရား၏ စကားတော်န ယေရှုခရစ်တော်၏ သက်သီခံချက်ကို မြင်ရေအတိုင်း သက်သီပီးလီရေ။ 3ဒေ စာစောင်မာ ရွီးရို့ဟိစာ ထာဝရဘုရား၏ စကားတော်ကို ဖတ်ပြသူစာ မင်္ဂလာဟိရေ အရာ ဒေ စကားတော်ကို ကြားရေအတိုင်း လိုက်နာသူရို့လည်း မင်္ဂလာ ဟိကတ်တေ၊ အကြောင်းကား ဖြစ်ပျက်လာဖို့စာအချိန် ပါးနီဗျာ။အသင်းတော် ခုနစ်ခုကို နှုတ်ဆက်ခြင်း
4– 5ငါ ယောဟန် အာရှိပြည်နယ်မာဟိစာ အသင်းတော် ခုနစ်ခုတို့ ငါ ဒေ စာစောင်ကို ရွီးလိုက်တေ။ ထာဝရဘုရားစာ ဒေဂု ဟိရေ၊ အယင်လည်း ဟိလီရေ အရာ နောက်အနာဂါတ်မာလည်း ကြွလာဖို့။ ထာဝရဘုရားန သူ၏ ပလ္လင်တော် ရှိက ဟိကတ်စာ ဝိညာဉ်တော် ခုနစ်ပါးစာ အရာ ယေရှုခရစ်တော်စာ နင်ရို့ကို ကျေးဇူးတော်န ငြိမ်းချမ်းခြင်း ပီးပါစီ။ ယေရှုခရစ်တော်စာ သစ္စာနပြည့်စုံစာ သက်သီခံတစ်ပါး ဖြစ်တေ။ သူစာ သီသူရို့အထဲက ပထမဆုံး ပြန်ရှင်ထမြောင့်လီရေ အရာ သူစာ လောကမာဟိစာ မင်းရို့ကို အုပ်ချုပ်သူ ဖြစ်တေ။ သူစာ ငါရို့ကို ချစ်တေ အရာ ကိုယ့်သွီးန ငါရို့ကို ချွတ်လီရေ။ 6ယေရှုခရစ်တော်စာ ငါရို့ကို အသုံးပြုရို့ နိုင်ငံတော်တစ်ခု တည်ထောင်ဗျာ အရာ သူ့မာ အဖထာဝရဘုရား၏ ဝတ်ကိုပြုဖို့အတွက် ငါရို့ကို ယဇ်ပုရောဟိတ်အဖြစ် ခန့်ထားဗျာ။ ယေရှုခရစ်တော်၏ ဘုန်းသိက္ခာန တန်ခိုးစာ ထာဝရပတ်လုံး တည်မြဲပါစီ။ အာမန်။ 7ကြည့်ကတ်၊ သူစာ မိုးရိပ်နအတူ ကြွလာနီရေ။ သူ့ကို အားကုံးသူ မြင်ရကတ်လိမည် အရာ သူ့ကို လှံန ထိုးလီသူရို့လည်း မြင်ရကတ်လိမည်။ ကမ္ဘာမာ ဟိသမျ လူရို့စာ သူ့အတွက် အားန အော်ရို့ ငိုကတ်လိမည်။ ဟုတ်တေ၊ ယင်းပိုင် ဖြစ်ပျက်လိမည်။ အာမန်။ 8အသျှင်ထာဝရဘုရား ပြောရေ၊ “ငါစာ အာလဖန ဩမေဃ ▼▼အာလဖန ဩမေဃဆိုစာ အဓိပ္ပါယ်ကား ဂရိလူမျိုးရို့မာ အစန အဆုံး အက္ခရာကို ခေါ်ပါရေ။ ဒေ အာလဖန ဩမေဃစာ အသျှင်ယေရှုမာ အခြားတစ်ခု နာမည် ဖြစ်ပါရေ။ အကြောင်းကား သူစာ အားကုံးစာမာ အစန အဆုံး ဖြစ်ပါရေ။ ဒေ နာမည်စာ အခန့်ငယ် ၁၇-မာလည်း ဟိပါရေ။
ဖြစ်တေ။ ငါ ဒေဂု ဟိရေ၊ အယင်လည်း ဟိလီရေ အရာ နောက်အနာဂါတ်မာလည်း ကြွလာဖို့။ ငါစာ အနန္တတန်ခိုးနပြည့်စုံစာ အသျှင် ဖြစ်တေ။” မနုသသားတော်ကို ကိုယ်ထင်မြင်ခြင်း
9ငါစာ နင်ရို့မာ အစ်ကိုသေ ယောဟန် ဖြစ်တေ။ ငါ ယေရှုန တစ်ကိုယ်တည်း ဖြစ်ရို့ နင်ရို့နအတူ တစ်ချက်တည်း ဒုက္ခကို ခံရနီဗျာ၊ တစ်နိုင်ငံတည်းသား ဖြစ်ပျာ အရာ တစ်ချက်တည်း သည်းခံခြင်းကို အဝီငဗျာ။ ငါစာ ထာဝရဘုရား၏ စကားတော်ကို ဟောပြောရေအတွက်န အရာ ယေရှု အကြောင်းကို သက်သီပီးရေအတွက်န အပြစ်ဒါဏ်အဖြစ် ငါ့ကို ပတ်မုကျွန်းတို့ ပို့လိုက်လီရေ။ 10ငါစာ အသျှင်၏ နိရက်ဆိုစာ သတင်းနိမာ သန့်ရှင်းသောဝိညာဉ်တော် ဆောင်ယူခြင်းကို ခံရရို့ ဟိလီရေ။ ယင်းအချိန်ခါ ငါ့နောက်က လူတစ်ယောက် အားန စကားပြောသံကို ကြားရလီရေ။ ထိုစကားပြောသံစာ ဘောမှုတ်စာအသံနတူလီရေ။ 11ထိုစကားပြောသံစာ ငါ့ကို ပြောလီရေ၊ “နင် မြင်ရဖို့စာတိကို စာအုပ် တစ်အုပ်မာ ရွီးရို့ ဧဖက်မြို့၊ စမုရနမြို့၊ ပေရဂံမြို့၊ သွာတိရမြို့၊ သာဒိမြို့၊ ဖိလဒေလဖိမြို့ အရာ လောဒိကိမြို့မာဟိစာ အသင်းတော် ခုနစ်ခုတို့ ပို့လိုက်။” 12ငါန စကားပြောနီသူကို ကြည့်ဖို့အတွက် နောက်တို့ လှည့်လီရေခါ ငါစာ ရွှေဆီမီးကျိုင် ခုနစ်ချောင်းကို မြင်ရလီရေ။ 13ထိုဆီမီးကျိုင်တိ အလယ်မာ မနုသသားတော်ပိုင် တစ်ယောက် ရပ်ရို့ ဟိလီရေ။ သူစာ အင်္ကျီအရှည် ဝတ်ရို့ ဟိလီရေ အရာ ရွှေရင်ပတ်ကို ဇလွယ်ခက်ရို့ ဟိလီရေ။ 14သူ့အဂေါင်းမာ ဆံပင်စာ သိုးဆိတ်အမွီးန ဂွန်းပိုင် ဖဖွီးဆဆွ ဟိလီရေ အရာ သူ့မျက်စိစာ မီးညွန့်နတူလီရေ။ 15သူ့အခြီစာ မီးန စင်အောင်ချွတ်စာ ကြီးဝါနတူလီရေ အရာ သူ့အသံစာ သမုဒ္ဒရာပင်လယ်မာ ရီလှိုင်းလုံး ကျောက်လုံးမာ အက်ကျစာအသံနတူလီရေ။ 16သူ့ညာဖက်အလက်မာ ကြယ်ခုနစ်လုံး ကိုင်ရို့ ဟိလီရေ အရာ သူ့ပစက ကောင်းကောင်း ပြတ်စာ ဒါးသျှေတစ်စင်း ထွက်လာလီရေ။ ထိုဒါးသျှေမာ နှစ်ဖက်စုံက အသွား ဟိလီရေ။ အရာ သူ့မျက်နှာစာ အပူအဟိန်ကြီးစာ နီရောင်နတူလီရေ။ 17ငါ သူ့ကို မြင်ရေခါ သီဖို့စာပိုင် ဖြစ်ရို့ သူ့အခြီရင်းမာ လဲကျလီရေ။ ယင်းခါ သူစာ ကိုယ့်ညာဖက်အလက်ကို ငါ့ခန္ဓာမာ တင်ရို့ ပြောလီရေ၊ “နင် မကြောက်ကေ့။ ငါစာ အစန အဆုံး ဖြစ်တေ။ 18ငါ ထာဝရပတ်လုံး အသက်အရှင် ဟိရေ။ ငါ သီလားခလီရေ၊ ယေကေလည်း ကြည့်၊ ငါ ကမ္ဘာအဆက်ဆက် အသက်အရှင် ဟိရေ။ အရာ သီခြင်းတရားန သီသူရို့နိုင်ငံကို ဖွင့်နိုင်စာ တန်ခိုး ငါ့မာ ဟိရေ။ 19ယင်းအတွက်န နင် မြင်လီစာတိန ဒေဂု ဖြစ်ပျက်နီစာတိကို အရာ နောက်အနာဂါတ်မာ ဖြစ်ပျက်လာဖို့စာတိကို ရွီးရို့ထား။ 20ငါ့ညာဖက်အလက်မာ ကိုင်ရို့ မြင်လီစာ ကြယ်ခုနစ်လုံးန ရွှေဆီမီးကျိုင် ခုနစ်ချောင်း အနက်အဓိပ္ပါယ် ဖြစ်တေကား ဒေပိုင်၊ ကြယ်ခုနစ်လုံးစာ အသင်းတော်ခုနစ်ခုမာ တမန်ခုနစ်ပါး ဖြစ်တေ အရာ ရွှေဆီမီးကျိုင် ခုနစ်ချောင်းစာ အသင်းတော် ခုနစ်ခု ဖြစ်တေ။
Copyright information for
RmzSC