Revelation of John 11
သက်သီပီးသူနှစ်ပါး ဟောပြောခြင်း
1ယင်းနောက် ဂေါင်းခင်နတ်သားတစ်ပါးစာ ပေတံတစ်ချောင်းကို ငါ့အလက်မာ အပ်ရို့ ပြောလီရေ၊ “ထ၊ ထာဝရဘုရား၏ ဝိပဿနာကျောင်းန ယဇ်ပလ္လင်ကို ခြင်ကြည့် အရာ ဝိပဿနာကျောင်းထဲမာ သတင်းဝင်နီသူရို့ကို ရွီကြည့်။ 2ယေကေလည်း ဝိပဿနာကျောင်းတလင်းကို မခြင်ကြည့်ကေ့၊ အကြောင်းကား ထိုကျောင်းတလင်းကို ငါ့လူ မဟုတ်သူရို့ကို ပီးဘိုက်လိုက်ပျာ။ ယုဒမဟုတ်သူရို့စာ သန့်ရှင်းစာ မြို့ကို လေးဆယ်နနှစ်လပတ်လုံး အခြီန နင်းကတ်လိမည်။ 3ယေကေလည်း ငါ့မာ သက်သီပီးသူ နှစ်ပါးကို ငါ တန်ခိုး ပီးဖို့။ အရာ သူရို့စာ ရက်ပေါင်းတစ်ထောင့်နှစ်ရာန ခြောက်ဆယ်ပတ်လုံး ခြယ်ဘောက်သာဝတ်ရို့ ထာဝရဘုရား၏ စကားတော်ကို ဟောပြောကတ်လိမည်။” 4ထိုသက်သီပီးသူနှစ်ပါးစာ ဝါဟောင်းပင်နှစ်ပင်န ဆီမီးကျိုင်နှစ်ခု ဖြစ်တေ။ သူရို့စာ ကမ္ဘာကို အုပ်ချုပ်စာ အသျှင် ရှိက ရပ်ရို့ ဟိကတ်တေ။ 5အသူမဆို ထိုသက်သီပီးသူရို့ကို ဘေးအန္တရာယ် ပီးချင်ရေဆိုကေ ထိုသက်သီပီးသူရို့စာ ကိုယ်ရို့ ရန်သူကို ပစက မီးထုတ်ရို့ ပြာကျအောင် လုပ်လိမည်။ အသူမဆို သူရို့ကို ဘေးအန္တရာယ် ပီးချင်ရေဆိုကေ သူစာ ယင်းပိုင် သီရလိမည်။ 6သူရို့နှစ်ပါး ထာဝရဘုရား၏ စကားတော်ကို ဟောပြောသရိကာလပတ်လုံး မိုးမကျရအောင် ဂေါင်းခင်ကို ပိတ်ထားဖို့စာ တန်ခိုး သူရို့မာ ဟိလိမည်။ အရာ ရီကို သွီးဖြစ်အောင် လုပ်ဖို့စာ တန်ခိုးန ကိုယ်လိုစာအဆီလှောက် ဒေ ကမ္ဘာကို အမျိုးအမျိုးပိုင် ဘေးအန္တရာယ် ပီးရို့ ဖျက်စီးဖို့စာ တန်ခိုးလည်း သူရို့မာ ဟိရေ။ 7သူရို့နှစ်ပါး သက်သီပီးရို့ ပြီးရေခါ ထိုအရှူတစ်ရာနက်စာတွင်းက တိရစ္ဆာန်တစ်ကောင် ထွက်လာရို့ သူရို့န တိုက်ဆိုင်လိမည် အရာ သူရို့ကို အနိုင်ယူရို့ အသီသတ်ဘိုက်လိမည်။ 8အရာ သူရို့ အကောင်တော်တိစာ သူရို့မာ အသျှင်ကို ကားတိုင်မာ တင်ရို့ အသီသတ်ဘိုက်လီစာ မဟာမြို့လမ်းမမာ ကျရို့ ဟိလိမည်။ ထိုမြို့စာ သောဒုံမြို့န အီဂျစ်ပြည် မဟုတ်၊ ယေကေလည်း ထိုမြို့ကို နှိုင်းယှဉ်ရို့ သောဒုံန အီဂျစ် ဟို့ ခေါ်စာ ဖြစ်တေ။ 9ယင်းခါ ဟိသမျ ပြည်၊ ဟိသမျ အမျိုးအနွယ်၊ ဟိသမျ ဘာသာစကား အရာ ဟိသမျ လူမျိုးအထဲက လူရို့စာ ထိုသူရို့ အကောင်တော်ကို သုံးရက်နတစ်မွန်းတည့်ပတ်လုံး ကြည့်နီကတ်လိမည်။ အရာ ထိုလူရို့စာ သက်သီပီးသူရို့ အကောင်တော်ကို တစ်ယောက်ကိုလည်း သင်္ဂြိုဟ်ဖို့ ပီးကတ်လိမည် မဟုတ်။ 10ထိုသက်သီပီးသူနှစ်ပါး သီလားခလီရေအတွက်န ကမ္ဘာမာ လူရို့စာ ကောင်းကောင်း ပျော်ကတ်လိမည် အရာ ပျော်ပွဲစားကတ်လိမည်။ သူရို့စာ တစ်ယောက်ကို တစ်ယောက် လက်ဆောင် ပီးကတ်လိမည်၊ အကြောင်းကား သူရို့နှစ်ပါး အကြောင်းန ကမ္ဘာမာ လူရို့စာ ကောင်းကောင်း ဝေဒနာ ခံရကတ်လီရေ။ 11ယေကေလည်း သုံးရက်နတစ်မွန်းတည့် ရွန်ရေခါ ထာဝရဘုရားစာ သူရို့ အကောင်တော်မာ ဇီဝအသက်ကို မှုတ်ရို့ သွင်းလီရေ။ အရာ သူရို့စာ အခြီကို အားပြုရို့ ရပ်ကတ်လီရေ။ ယင်းခါ သူရို့ကို မြင်သူရို့စာ ကောင်းကောင်း ကြောက်ကတ်လီရေ။ 12ယင်းနောက် ထိုသက်သီပီးသူနှစ်ပါးစာ ဂေါင်းခင်ဘုံက၊ “ဒေ နေရာတို့ တက်လာလတ်” ဟို့ အားန အော်ရို့ ခေါ်စာအသံကို ကြားကတ်လီရေ။ ယင်းခါ သူရို့စာ ကိုယ်ရို့ ရန်သူရို့ ရှိထက်က မိုးရိပ်နအတူ ဂေါင်းခင်ဘုံတို့ တက်လားခလီရေ။ 13ယင်းအချိန်မာ ငယင်ကြီးတစ်ခု လုတ်လီရေ။ ယင်းအတွက်န ထိုမြို့စာ ဆယ်ပုံတစ်ပုံ ပြိုကျလားခလီရေ အရာ လူပေါင်းခုနစ်ထောင် သီလားခလီရေ။ ယင်းခါ အရှင်ကျန်ဟိလိုက်သူရို့ အားကုံးသူ ကြောက်ရို့ ဂေါင်းခင်ဘုံမာဟိစာ ထာဝရဘုရား၏ ဘုန်းတန်ခိုးကို ချီမွမ်းကတ်လီရေ။ 14ဒေပိုင် ဖြစ်ပျက်ခြင်းကနီရို့ ဒုတိယ ဖီးဒုက္ခ ပြီးဆုံးဗျာ။ ကြည့်၊ တတိယ ဖီးဒုက္ခစာ အများမကြာခင် ကျရောက်လိမည်။သတ္တမ ဘောကို မှုတ်ခြင်း
15ယင်းနောက် သတ္တမ ဂေါင်းခင်နတ်သားစာ ကိုယ့် ဘောကို မှုတ်လီရေ။ ယင်းခါ ငါစာ ဂေါင်းခင်ဘုံက အသံအကြီးန စကားပြောစာကို ကြားလီရေ၊“ဒေ လောက၏ နိုင်ငံစာ ငါရို့မာ အသျှင်န သူ၏ ခရစ်တော် နိုင်ငံတော် ဖြစ်ပျာ၊
အရာ သူစာ ထိုနိုင်ငံတော်ကို ထာဝရပတ်လုံး အုပ်ချုပ်လိမည်။” 16ထာဝရဘုရား၏ ရှိက ဟိကတ်စာ ဂေါင်းဆောင်အကြီး နှစ်ဆယ်နလေးပါးစာ ထာဝရဘုရားကို ရှိခိုးကတ်လီရေ။ 17အရာ သူရို့စာ ပြောကတ်လီရေ၊
“အိုး အနန္တတန်ခိုးနပြည့်စုံစာ အသျှင်ထာဝရဘုရား၊
ကိုယ်တော်စာ ဒေဂု ဟိစာပိုင် အယင်လည်း ဟိလီပါရေ။
အကျွန်ရို့ ကိုယ်တော်ကို ကျေးဇူးတင်ပါရေ၊
အကြောင်းကား ကိုယ်တော်စာ ကိုယ့်မဟာတန်ခိုးန နိုင်ငံတော်ကို အုပ်ချုပ်ဖို့ စပါဗျာ။
18ဟိသမျ လူမျိုးရို့ မန်တက်ကတ်ပါဗျာ၊
ယေကေလည်း ဒေဂု ကိုယ်တော်၏ အငြိုဒေါသ ဖေါ်ပြဖို့စာအချိန် ကျပါဗျာ၊
အရာ သီသူရို့ကို တရားစစ်ဆေးဖို့စာအချိန် ကျပါဗျာ။
အရာ ကိုယ်တော်၏ ကျွန်ဖြစ်ကတ်စာ ဘုရားသတင်းပို့သူရို့ကို၊ ကျုံသူရို့ကို၊
အရာ ကိုယ်တော်ကို ရိုသေကြောက်လန့်စာ အကြီး-အသျှေ အားကုံးသူကို ဆုပီးဖို့စာအချိန် ကျပါဗျာ။
ယင်းသျှင့်ကိုအပယ် ကမ္ဘာကို ဘေးအန္တရာယ် ပီးသူရို့ကို ဖျက်စီးဖို့စာအချိန်လည်း ကျပါဗျာ။” 19ယင်းနောက် ဂေါင်းခင်ဘုံမာဟိစာ ထာဝရဘုရား၏ ဝိပဿနာကျောင်းစာ ပွင့်လီရေ အရာ ဝိပဿနာကျောင်းထဲမာ စာချုပ်-တိုက်တာကို မြင်ရလီရေ။ ယင်းခါ လျှပ်ပြက်လီရေ၊ ကြောက်လန့်စရာအသံ မြည်လီရေ၊ မိုးကြိုးလီရေ၊ ငယင်လုတ်လီရေ အရာ အများကြီး ကျောက်မိုးရွာလီရေ။
Copyright information for
RmzSC