Revelation of John 14
သိုးဆိတ်သျှေန လူပေါင်းတစ်သိန်းလေးသောင်းန လေးထောင်
1ယင်းနောက် ငါစာ ကြည့်လိုက်တေခါ ဇိအုန်တောင်ထက်မာ သိုးဆိတ်သျှေ ရပ်ရို့ ဟိစာကို မြင်လီရေ။ အရာ ထိုသိုးဆိတ်သျှေနအတူ လူပေါင်း တစ်သိန်းလေးသောင်းန လေးထောင် ရပ်ရို့ ဟိကတ်လီရေ။ ထိုလူရို့ နဖူးဇာမာ သိုးဆိတ်သျှေနာမည်န သူ့အဖနာမည် ရွီးရို့ ဟိလီရေ။ 2ယင်းနောက် ငါစာ ဂေါင်းခင်ဘုံက အားန တိုက်ရို့လားစာ ရီလှိုင်းလုံးအသံပိုင် အရာ အားန မိုးကြိုးစာအသံပိုင် အသံတစ်ခု ကြားလီရေ။ ငါ ကြားလီစာ အသံစာ စောင်းတီးသမားရို့ စောင်းတီးစာအသံနတူလီရေ။ 3ထိုတစ်သိန်းလေးသောင်းန လေးထောင် လူရို့စာ ပလ္လင်တော်၊ အသက်ရှင် သတ္တဝါလေးပါး အရာ ဂေါင်းဆောင်အကြီး နှစ်ဆယ်နလေးပါး ရှိက တေးခြင်းအသစ်တစ်ပုဒ်ကို ဆိုကတ်လီရေ။ ထိုတေးခြင်းကို တစ်ယောက်လည်း သင်ရို့ မရကတ်လီ။ သက်သက် ထိုတစ်သိန်းလေးသောင်းန လေးထောင် လူရို့ရာ သင်ရို့ ရကတ်လီရေ။ သူရို့စာ လောကသားရို့အထဲက ဝယ်ယူခြင်းကို ခံရလီစာ လူရို့ ဖြစ်ကတ်တေ။ 4သူရို့ တစ်ခါလည်း မိန်းမရို့န ကာမဂုဏ် မလိုက်စားလီကတ်။ ယင်းထက်ပင် သူရို့စာ ကိုယ်ရို့ကို သသန့်ရှရှင်း ထားလီကတ်တေ။ သူရို့စာ သိုးဆိတ်သျှေ လားစာနေရာတို့ သူ့နောက်က နောက်က လိုက်နီကတ်တေ။ သူရို့စာ ထာဝရဘုရားန သိုးဆိတ်သျှေဘားမာ ပထမ အသီးအဖြစ် ယဇ်ပူဇော်ခြင်းကို ခံရကတ်လီရေ အရာ သူရို့စာ လောကသားရို့အထဲက ဝယ်ယူခြင်းကို ခံရကတ်လီရေ။ 5သူရို့ တစ်ခါလည်း မုတ်သားစကား မပြောလီကတ် အရာ သူရို့မာ အပြစ်တစ်ခုလည်း မဟိလီ။ဂေါင်းခင်နတ်သားသုံးပါး ကျော်ညာခြင်း
6ယင်းနောက် ငါစာ ဂေါင်းခင်နတ်သား အရာတစ်ပါး ဂေါင်းခင်မာ ပျံနီစာကို မြင်လီရေ။ ထိုဂေါင်းခင်နတ်သားဘားမာ ထာဝရသတင်းကောင်း ပါလီရေ။ ထိုသတင်းကောင်းစာ လောကသားရို့ဘားမာ ဟောပြောဖို့အတွက် ဖြစ်တေ။ ယင်းအဓိပ္ပါယ်ကား ဟိသမျ လူမျိုး၊ ဟိသမျ အမျိုးအနွယ်၊ ဟိသမျ ဘာသာစကား အရာ ဟိသမျ ပြည်သားရို့ဘားမာ ဟောပြောဖို့အတွက် ဖြစ်တေ။ 7သူစာ အားန အော်ရို့ ပြောလီရေ၊ “ဂေါင်းခင်၊ ကမ္ဘာ၊ ပင်လယ် အရာ ရီမျက်တွင်းကို ဖန်ဆင်းလီစာ ထာဝရဘုရားကို ကိုးကွယ်ကတ်၊ ကြောက်လန့်ကတ် အရာ ဘုန်းတန်ခိုးကို ချီမွမ်းကတ်၊ အကြောင်းကား ဟိသမျ လူရို့ကို တရားစစ်ဆေးဖို့စာအချိန် ကျနီဗျာ။” 8ယင်းနောက် ဒုတိယ ဂေါင်းခင်နတ်သားတစ်ပါးစာ ပထမ ဂေါင်းခင်နတ်သား နောက်က ပျံလာရို့ ပြောလီရေ၊ “မဟာဗာဗုလုန်မြို့ ပျက်ဆုံးလားခဗျာ။ ထိုမြို့စာ ဟိသမျ လူမျိုးရို့ကို သူ့မာ အဆိပ်ဟိစာ ကာမဂုဏ် အရက်ကို သောက်စီလီရေ။” 9– 10ယင်းနောက် တတိယ ဂေါင်းခင်နတ်သားတစ်ပါးစာ သူရို့ နောက်က လာရို့ အသံအကြီးန ပြောလီရေ၊ “အသူမဆို ထိုတိရစ္ဆာန်န သူ့ရုပ်တုကို ကိုးကွယ်ရေဆိုကေ အရာ နဖူးဇာမာ မဟုတ်ကေ အလက်မာ ထိုတိရစ္ဆာန်၏ အမှတ်တရကို ကပ်တေဆိုကေ ယင်းသူလည်း ထာဝရဘုရား၏ အငြိုဒေါသ အရက်ကို သောက်ရလိမည်။ ထိုအရက်ကို ရီမရောဘိုင်းန ထာဝရဘုရား၏ အငြိုဒေါသ ခွက်မာ သွန်ချလိုက်ပျာ။ အရာ ယင်းသူစာ သန့်ရှင်းစာ ဂေါင်းခင်နတ်သားရို့န သိုးဆိတ်သျှေ ရှိက ကန့်ကျောက်န ရောထားစာမီးဖေါ်မာ ကျရို့ ဝေဒနာကို ခံရလိမည်။ 11ဒေ လူရို့ကို ဝေဒနာ ပီးဖို့စာ မီးဖေါ်ထဲက မီးခိုးစာ ထာဝရပတ်လုံး ထွက်နီလိမည်။ အရာ ထိုတိရစ္ဆာန်န သူ့ရုပ်တုကို ကိုးကွယ်သူစာ အရာ တိရစ္ဆာန်၏ အမှတ်တရကို လက်ခံသူစာ ညဉ့်ပါ-ရက်ပါ ဝေဒနာ ခံရစာက တစ်ခါလည်း အနားရလိမည် မဟုတ်။” 12ယင်းအဓိပ္ပါယ်ကား ထာဝရဘုရား၏ စကားတော်ကို လိုက်နာရို့ ယေရှုကို တတိုင်းမမြိုင်း ကျုံသူရို့စာ သည်းခံဖို့ အလိုဟိရေ။ 13ယင်းနောက် ငါစာ ဂေါင်းခင်ဘုံက စကားပြောစာ အသံကို ကြားလီရေ၊ “ဒေ စကားကို ရွီးထား၊ ဒေဂုကပင် အသျှင်န တစ်ကိုယ်တည်း ဖြစ်ရို့ အသီသတ်ခြင်းကို ခံရဖို့သူရို့စာ မင်္ဂလာ ဟိကတ်တေ။” အရာ သန့်ရှင်းသောဝိညာဉ်တော်စာ ပြောရေ၊ “ဟုတ်တေ၊ သူရို့စာ အမှန် မင်္ဂလာ ဟိကတ်တေ။ သူရို့စာ ကိုယ်ရို့ အလုပ်တိက အနားရကတ်လိမည်၊ အကြောင်းကား သူရို့ လုပ်လီကတ်စာ ကောင်းမြတ်စာ အလုပ်အတွက် ဆုကို ရကတ်လိမည်။”ကမ္ဘာမာ အသီးအနှံကို ရိတ်သိမ်းခြင်း
14ယင်းနောက် ငါစာ ကြည့်လိုက်တေခါ မိုးရိပ်အဖြူတစ်ခဲကို မြင်လီရေ အရာ ထိုမိုးရိပ်ထက်မာ မနုသသားတော်ပိုင် တစ်ပါး ထိုင်ရို့ ဟိလီရေ။ သူ့အဂေါင်းမာ ရွှေသရဖူတစ်ခု ဆောင်းရို့ ဟိလီရေ အရာ သူ့အလက်မာ ကောင်းကောင်း ပြတ်စာ စက်ကြယ်တစ်စင်း ကိုင်ရို့ ဟိလီရေ။ 15ယင်းနောက် အရာတစ်ပါး ဂေါင်းခင်နတ်သား ဝိပဿနာကျောင်းက ထွက်လာလီရေ အရာ သူစာ မိုးရိပ်အဖြူထက်မာ ထိုင်ရို့ ဟိလီသူကို အားန အော်ရို့ ပြောလီရေ၊ “အသီးအနှံ စုဆောင်းဖို့စာ အချိန် ကျပါဗျာ။ ကမ္ဘာမာ ဟိသမျ အသီးအနှံတိစာ မှည့်ပါဗျာ။ ယင်းအတွက်န ကိုယ်တော်၏ စက်ကြယ်ကို ရွှတ်ရို့ အသီးအနှံတိကို ရိတ်သိမ်းပါ။” 16ယင်းခါ မိုးရိပ်အဖြူထက်မာ ထိုင်ရို့ ဟိလီသူစာ စက်ကြယ်ကို ကိုင်ရို့ ရိတ်လီရေ အရာ ကမ္ဘာမာဟိစာ အသီးအနှံအားကုံး စုဆောင်းရို့ ပြီးလီရေ။ 17ယင်းနောက် အရာတစ်ပါး ဂေါင်းခင်နတ်သားစာ ဂေါင်းခင်ဘုံမာဟိစာ ဝိပဿနာကျောင်းက ထွက်လာလီရေ။ သူ့အလက်မာလည်း ပြတ်စာ စက်ကြယ်တစ်စင်း ကိုင်ရို့ ဟိလီရေ။ 18ယင်းနောက် အရာတစ်ပါး ဂေါင်းခင်နတ်သား ယဇ်ပလ္လင်ထဲက ထွက်လာလီရေ။ သူ့မာ မီးကို အုပ်စိုးနိုင်စာ တန်ခိုး ဟိလီရေ။ သူစာ စက်ကြယ် ကိုင်ရို့ ဟိလီစာ ဂေါင်းခင်နတ်သားကို အားန အော်ရို့ ပြောလီရေ၊ “စပျစ်သီးတိ မှည့်နီဗျာ၊ ယင်းအတွက်န နင့်မာ စက်ကြယ်ကို ရွှတ်ရို့ ကမ္ဘာမာ ဟိသမျ စပျစ်ပင်က စပျစ်သီးတိကို ဆွတ်ရို့စု။” 19ယင်းခါ ထိုဂေါင်းခင်နတ်သားစာ ကိုယ့် စက်ကြယ်ကို ကမ္ဘာတို့ ရွှတ်လိုက်ရို့ ကမ္ဘာမာဟိစာ စပျစ်ပင်က စပျစ်သီး အားကုံးကို ဆွတ်ရို့ စုလီရေ။ ယင်းနောက် ယင်းစပျစ်သီးတိကို စပျစ်သီး နယ်စာတွင်းတို့ ဘိုက်ချလိုက်လီရေ။ ဒေ စပျစ်သီး နယ်စာတွင်းစာ ထာဝရဘုရား၏ ကြောက်လန့်ဖို့ကောင်းစာ အငြိုဒေါသ ဖြစ်တေ။ 20မြို့ပြင်က စပျစ်သီး နယ်စာတွင်းမာ စပျစ်သီးတိကို နယ်ရေခါ သွီးထွက်လာလီရေ။ ထိုသွီးစာ လူတစ်ရပ်လှောက် တက်လီရေ အရာ မိုင်ပေါင်းနှစ်ရာလှောက် အဝီး ပြန့်လားခလီရေ။
Copyright information for
RmzSC