Revelation of John 15
ဂေါင်းခင်နတ်သား ခုနစ်ပါးန ဘေးအန္တရာယ်ခုနစ်ခု
1ယင်းနောက် ငါစာ ဂေါင်းခင်ဘုံမာ ကြီးမြတ်စာ အခြား အံ့ဩဖွယ်-နိမိတ်လက္ခဏာ တစ်ခုကို မြင်လီရေ။ ထိုနိမိတ်လက္ခဏာစာ ဒေပိုင်၊ ဂေါင်းခင်နတ်သား ခုနစ်ပါးအလက်မာ ဘေးအန္တရာယ်ခုနစ်ခုကို ကိုင်ရို့ ဟိလီရေ။ ထိုဘေးအန္တရာယ်တိကို နောက်ဆုံး ဘေးအန္တရာယ် ဟို့ ခေါ်ရေ၊ အကြောင်းကား ထိုဘေးအန္တရာယ်တိ ပီးခြင်းကနီရို့ ထာဝရဘုရား၏ အငြိုဒေါသလည်း ပြီးဆုံးဖို့။ 2ယင်းနောက် ငါစာ မီးနရောစာ မှန်ပင်လယ်တစ်ခုပိုင် မြင်လီရေ။ ထိုတိရစ္ဆာန်န တိရစ္ဆာန် ရုပ်တုကို အရာ တိရစ္ဆာန်နာမည် ၆၆၆ ဂဏန်းကို အောင်မြင်သူရို့ကိုလည်း ငါ မြင်လီရေ။ သူရို့စာ ထာဝရဘုရားက ရလီစာ စောင်းတိကို ကိုင်ရို့ ထိုမှန်ပင်လယ်နားမာ ရပ်ရို့ ဟိကတ်လီရေ။ 3သူရို့စာ ထာဝရဘုရား၏ ကျွန် မောရှေ တေးခြင်းန သိုးဆိတ်သျှေ တေးခြင်းကို ဆိုကတ်လီရေ၊“အိုး အနန္တတန်ခိုးနပြည့်စုံစာ အသျှင်ထာဝရဘုရား၊
ကိုယ်တော်၏ အလုပ်စာ ကောင်းကောင်း ကြီးမြတ်ပါရေ၊
အရာ ကောင်းကောင်း အံ့ဩဖွယ် ဖြစ်ပါရေ!
အိုး ဟိသမျ လူမျိုးရို့မာ မင်း၊
ကိုယ်တော်၏ နည်းလမ်းစာ တရားမျှတခြင်းန မှန်ကန်ခြင်း ဟိပါရေ!
4အိုး အသျှင်၊ ကိုယ်တော်ကို အသူ မကြောက်ပါလည်း?
အရာ ကိုယ်တော်၏ နာမည်ကို အသူ မချီမွမ်းပါလည်း?
အကြောင်းကား ကိုယ်တော် တစ်ပါးတည်းရာ သန့်ရှင်းပါရေ။
ဟိသမျ လူမျိုးရို့ ကိုယ်တော်တို့ လာကတ်ပါလိမည်၊
အရာ အားကုံးသူ ကိုယ်တော်ကို ကိုးကွယ်ကတ်ပါလိမည်၊
အကြောင်းကား ကိုယ်တော်၏ တရားမျှတခြင်း ပေါ်ထွန်းပါဗျာ။” 5ယင်းနောက် ဂေါင်းခင်ဘုံမာ ဝိပဿနာကျောင်း ဖွင့်ရို့ ဟိစာကို ငါ မြင်လီရေ။ ယင်းအဓိပ္ပါယ်ကား သန့်ရှင်းစာ တဲခုတ်ထဲမာ မဟာသန့်ရှင်းစာနေရာ ဖွင့်ရို့ ဟိစာကို ငါ မြင်လီရေ။ 6ယင်းခါ ထိုဂေါင်းခင်နတ်သား ခုနစ်ပါးစာ ဘေးအန္တရာယ်ခုနစ်ခုကို ယူရို့ ဝိပဿနာကျောင်းမာ မဟာသန့်ရှင်းစာနေရာက ထွက်လာကတ်လီရေ။ သူရို့စာ ပပြောင်လလက် ဖြူစင်စာ အဝတ်ကို ဝတ်ရို့ ဟိလီရေ အရာ ရွှေရင်ပတ်ကို ဇလွယ်ခက်ရို့ ဟိလီရေ။ 7ယင်းနောက် သတ္တဝါလေးပါးအထဲက တစ်ပါးစာ ထိုဂေါင်းခင်နတ်သား ခုနစ်ပါးကို ရွှေခွက်ခုနစ်ချပ် ပီးလီရေ။ ထိုခွက်တိမာ ကမ္ဘာအဆက်ဆက် အသက်ရှင်နီစာ ထာဝရဘုရား၏ အငြိုဒေါသ အပြည့် ဟိလီရေ။ 8ထာဝရဘုရား၏ ဘုန်းတန်ခိုးန တန်ခိုးက ထွက်လာစာ မီးခိုးတိစာ မဟာသန့်ရှင်းစာနေရာမာ ပြည့်လားခလီရေ။ ထိုဂေါင်းခင်နတ်သား ခုနစ်ပါးမာ ဘေးအန္တရာယ်ခုနစ်ခု မပြီးဆုံးသကြား ထိုမဟာသန့်ရှင်းစာနေရာတို့ တစ်ယောက်လည်း ဝင်ဖို့ မရကတ်လီ။
Copyright information for
RmzSC