Rev 17 | RmzSC | STEP | ယင်းနောက် ခွက်ခုနစ်ချပ် ကိုင်ရို့ ဟိလီစာ ဂေါင်းခင်နတ်သား ခုနစ်ပါးအထဲက တစ်ပါးစာ လာရို့ ငါ့ကို ပြောလီရေ၊ “ပြည်တန်းဆာမကြီးတစ်ယောက် ရီအများကြီးအထက်မာ ထိုင်ရို့ ဟိရေ။ လာလတ်၊ ယင်းမိန်းမ ဇာပိုင် အပြစ်ဒါဏ် ခံရဖို့လည်းဆိုစာကို ငါ နင့်ကို ပြမည်။

Revelation of John 17

တိရစ္ဆာန်ကို စီးစာ ပြည်တန်းဆာမကြီး

1 ယင်းနောက် ခွက်ခုနစ်ချပ် ကိုင်ရို့ ဟိလီစာ ဂေါင်းခင်နတ်သား ခုနစ်ပါးအထဲက တစ်ပါးစာ လာရို့ ငါ့ကို ပြောလီရေ၊ “ပြည်တန်းဆာမကြီးတစ်ယောက် ရီအများကြီးအထက်မာ ထိုင်ရို့ ဟိရေ။ လာလတ်၊ ယင်းမိန်းမ ဇာပိုင် အပြစ်ဒါဏ် ခံရဖို့လည်းဆိုစာကို ငါ နင့်ကို ပြမည်။ 2 ကမ္ဘာမာ မင်းရို့စာ သူန ကာမဂုဏ် လိုက်စားလီကတ်တေ အရာ ကမ္ဘာမာ လူရို့စာ သူ့ကာမဂုဏ် အရက်ကို သောက်ရို့ ယစ်လီကတ်တေ။”

3 ယင်းနောက် ထိုဂေါင်းခင်နတ်သားစာ ငါ့ကို သဲကန္တာရတောပြင်တို့ ယူလားခလီရေ။ ယင်းခါ ငါစာ သန့်ရှင်းသောဝိညာဉ်တော် ဆောင်ယူခြင်းကို ခံရို့ ဟိလီရေ။ အရာ ငါစာ တိရစ္ဆာန် အနီတစ်ကောင်ကို စီးရို့ မိန်းမတစ်ယောက်ကို မြင်လီရေ။ ထိုတိရစ္ဆာန် ခန္ဓာတစ်ကိုယ်လုံးမာ ထာဝရဘုရားကို တရိုက်ဖို့အတွက် နာမည်အများကြီး ရွီးရို့ ဟိလီရေ။ ထိုတိရစ္ဆာန်မာ အဂေါင်းခုနစ်လုံးန အဂြိုဆယ်ချောင်း ဟိလီရေ။ 4 ထိုမိန်းမစာ ခရမ်းရောင်အဝတ်န ကြက်သွီးရောင်အဝတ်ကို ဝတ်ရို့ ဟိလီရေ။ အရာ သူ့ ခန္ဓာမာ ရွှေ၊ အမျိုးမျိုး တန်ဖိုးဟိစာ ကျောက်မျက် အရာ ကျောက်ပုလဲတိကို ဝတ်ရို့ ဟိလီရေ။ သူ့အလက်မာ ရွှေခွက်တစ်ချပ် ကိုင်ရို့ ဟိလီရေ။ ထိုရွှေခွက်မာ ဆိုးယုတ်ခြင်းတိန ကာမဂုဏ် ညစ်ညူးခြင်းတိ အပြည့် ဟိလီရေ။ 5 ထိုမိန်းမ နဖူးဇာမာ နားလည်ဖို့ ခက်ခဲစာ နာမည်တစ်ခု ရွီးရို့ ဟိလီရေ။ ထိုနာမည်စာ၊ “မဟာဗာဗုလုန်မြို့၊ ပြည်တန်းဆာရို့န ကမ္ဘာမာ ဟိသမျ ဆိုးယုတ်ခြင်းတိမာ အမိ ဖြစ်တေ။” 6 အရာ ထာဝရဘုရား၏ လူရို့ သွီးန ယေရှု အကြောင်းကို သက်သီပီးသူရို့ သွီးကို ထိုမိန်းမ သောက်ရို့ ယစ်နီစာကို ငါ မြင်လီရေ။

7 ငါ ထိုမိန်းမကို မြင်ရို့ ကောင်းကောင်း အံ့ဩလီရေ။ ယင်းခါ ထိုဂေါင်းခင်နတ်သားစာ ငါ့ကို ပြောလီရေ၊ “နင် ဇာဖို့ အံ့ဩစာလည်း? ထိုမိန်းမန သူစီးလီစာ အဂေါင်းခုနစ်လုံးန အဂြိုဆယ်ချောင်း ပါစာ တိရစ္ဆာန်၏ အနက်အဓိပ္ပါယ်ကို ငါ နင့်ကို ပြောပြမည်။ 8 နင် မြင်လီစာ တိရစ္ဆာန်စာ အယင် အရှင် ဟိလီရေ၊ ဒေဂု မဟိဗျာ၊ အရာ တစ်နားနီရေခါ အရှူတစ်ရာနက်စာတွင်းထဲက ထွက်လာရို့ ထာဝရပတ်လုံး ပျက်စီးခြင်းကို ခံရလိမည်။ ယင်းခါ ကမ္ဘာကို ဖန်ဆင်းရေလှောက်ကပင် အသက်-စာအုပ်မာ နာမည်စာရင်း မပါဝင်သူရို့စာ ထိုတိရစ္ဆာန်ကို မြင်ရို့ အံ့ဩကတ်လိမည်၊ အကြောင်းကား ထိုတိရစ္ဆာန်စာ အယင် အရှင် ဟိလီရေ၊ ဒေဂု မဟိဗျာ၊ အရာတစ်ပြန် လာဖို့သိ။

9 “ဒေဂု ပြောပြဖို့စာတိကို နားလည်ဖို့အတွက် ညာဏ်ပညာ အလိုဟိရေ။ ထိုတိရစ္ဆာန်မာ အဂေါင်းခုနစ်လုံးစာ မိန်းမ ထိုင်နီစာ တောင်ခုနစ်လုံး ဖြစ်တေ။ အရာ ထိုအဂေါင်းခုနစ်လုံးစာ မင်းခုနစ်ပါးလည်း ဖြစ်တေ။ 10 ထိုမင်းခုနစ်ပါးအထဲက ငါးပါးစာ အယင်ကပင် သီလားခကတ်ပျာ။ ယေကေလည်း ဒေဂု တစ်ပါး အရှင် ဟိသိရေ အရာ တစ်ပါး ဒေဂုလည်း မလာသိ။ ထိုမင်းစာ ရောက်လာရေခါ တစ်နားသျှေရာ အုပ်ချုပ်ရလိမည်။ 11 အယင် အရှင် ဟိလီစာ တိရစ္ဆာန်စာ ဒေဂု မဟိဗျာ၊ သူစာ အဋ္ဌမ မင်း ဖြစ်တေ။ သူစာ မင်းခုနစ်ပါးအထဲမာ တစ်ပါး ဟိလီရေ၊ အရာ သူစာ ထာဝရပတ်လုံး ပျက်စီးခြင်းကို ခံရလိမည်။

12 “နင် မြင်လီစာ အဂြိုဆယ်ချောင်းစာ မင်းဆယ်ပါး ဖြစ်တေ။ သူရို့စာ ဒေဂုလည်း အုပ်ချုပ်ဖို့ မစကတ်သိ၊ ယေကေလည်း သူရို့စာ ထိုတိရစ္ဆာန်နအတူ မင်းအဖြစ် တစ်နားသျှေအတွက် အုပ်ချုပ်ဖို့စာ တန်ခိုးကို ရကတ်လိမည်။ 13 ထိုမင်းရို့မာ ရွယ်မှတ်ချက် တစ်ခုတည်း ဖြစ်ကတ်တေ။ အရာ သူရို့ အားကုံးသူ ကိုယ်ရို့မာ တန်ခိုးန ပိုင်ဆိုင်ခွင့်တိကို ထိုတိရစ္ဆာန်ဘားမာ အပ်ကတ်လိမည်။ 14 သူရို့စာ သိုးဆိတ်သျှေကို ဆန့်ကျင်ရို့ စစ်တိုက်ကတ်လိမည်။ ယေကေလည်း သိုးဆိတ်သျှေစာ သူရို့ကို စစ်တိုက်ရို့ အနိုင်ယူလိမည်၊ အကြောင်းကား သူစာ အသျှင်ရို့မာ အသျှင်၊ မင်းရို့မာ မင်း ဖြစ်တေ။ အရာ ထာဝရဘုရား၏ ခေါ်ခြင်းကို ခံရကတ်စာ၊ ရွီးကောက်ခြင်းကို ခံရကတ်စာ အရာ သစ္စာတရား ထားကတ်စာ လူရို့စာ သိုးဆိတ်သျှေနအတူ နီရကတ်လိမည်။”

15 ယင်းနောက် ထိုဂေါင်းခင်နတ်သားစာ ငါ့ကို ပြောလီရေ၊ “နင် ထိုပြည်တန်းဆာမ ထိုင်နီစာ ရီတိကို မြင်လီရေ။ ထို ရီတိစာ တိုင်းပြည် အများကြီး၊ လူအများကြီး၊ လူမျိုး အများကြီး အရာ ဘာသာစကား အများကြီး ဖြစ်ကတ်တေ။ 16 အရာ နင် မြင်လီစာ တိရစ္ဆာန်န အဂြိုဆယ်ချောင်းစာ ထိုပြည်တန်းဆာမကို မုန်းကတ်လိမည်။ သူရို့စာ ထိုမိန်းမက ဟိသမျ အားကုံးကို လုယူရို့ သူ့ကို ခခဲတတုံး လုပ်ကတ်လိမည် အရာ သူ့အသားကို စားကတ်လိမည်။ ယင်းနောက် သူရို့စာ ထိုမိန်းမကို မီးဖေါ်မာ ထည့်ကတ်လိမည်။ 17 အကြောင်းကား ထာဝရဘုရားစာ ကိုယ့်ရွယ်မှတ်ချက် အောင်မြင်ဖို့အတွက် သူရို့ နှလုံးသားမာ ယင်းပိုင် စိတ်သဖေါကို သွင်းပီးလီစာ ဖြစ်တေ။ ယင်းအတွက်န သူရို့စာ တစ်စိတ်တည်း ဖြစ်ရို့ ကိုယ်ရို့မာ တန်ခိုးတိကို ထိုတိရစ္ဆာန်ဘားမာ အပ်ကတ်လိမည်၊ အကြောင်းကား ထာဝရဘုရား၏ ရွယ်မှတ်ချက် မပြည့်စုံသကြား ထိုတိရစ္ဆာန်စာ အုပ်ချုပ်ဖို့ ရလတ်အောင်အတွက် ဖြစ်တေ။ 18 နင် မြင်လီစာ မိန်းမစာ မဟာမြို့ ဖြစ်တေ။ ထိုမဟာမြို့စာ လောကမာ ဟိသမျ မင်းရို့ကို အုပ်ချုပ်နီရေ။”