Rev 20 | RmzSC | STEP | ယင်းနောက် ငါစာ ဂေါင်းခင်နတ်သားတစ်ပါး ဂေါင်းခင်ဘုံက ဆင်းလာစာကို မြင်လီရေ။ သူ့အလက်မာ အရှူတစ်ရာနက်စာတွင်းကို ဖွင့်စာ သွပွတ်န သံကျိုက်ကြိုး အကြီးတစ်ပင် ကိုင်ရို့ ဟိလီရေ။

Revelation of John 20

နှစ်ပေါင်းတစ်ထောင် အုပ်ချုပ်ခြင်း

1 ယင်းနောက် ငါစာ ဂေါင်းခင်နတ်သားတစ်ပါး ဂေါင်းခင်ဘုံက ဆင်းလာစာကို မြင်လီရေ။ သူ့အလက်မာ အရှူတစ်ရာနက်စာတွင်းကို ဖွင့်စာ သွပွတ်န သံကျိုက်ကြိုး အကြီးတစ်ပင် ကိုင်ရို့ ဟိလီရေ။ 2 – 3 သူစာ ထိုနဂါးကြီးဆိုစာ ခိုက်ဟောင်းက မြိန်ကို နှစ်ပေါင်းတစ်ထောင်အတွက် ဖမ်းရို့ ချိုင်လီရေ အရာ အရှူတစ်ရာနက်စာတွင်းတို့ ဘိုက်ချလိုက်လီရေ။ ထိုမြိန်ကို စာတန် မဟုတ်ကေ မာရ်နတ် ဟို့ ခေါ်ရေ။ ထိုနဂါးကြီးစာ နှစ်ပေါင်းတစ်ထောင် မပြည့်သကြား ကမ္ဘာမာ လူရို့ကို မှားယွင်းစာလမ်းတို့ ယူလားဖို့ မရလတ်အောင်အတွက် ဂေါင်းခင်နတ်သားစာ ထိုတွင်းကို ပိတ်ပြီးကေ တံဆိပ်ရိုက်ရို့ ထားလီရေ။ ယင်းနောက် နှစ်ပေါင်းတစ်ထောင် ပြည့်ရေခါ သူစာ တစ်နားသျှေအတွက် ပြန်ရို့ ရွတ်လိမည်။

4 ယင်းနောက် ငါစာ ပလ္လင်တိကို မြင်လီရေ။ ထိုပလ္လင်တိမာ ထိုင်ရို့ ဟိလီသူရို့ကို တရားစစ်ဆေးဖို့စာ အခွင့်အာဏာ ပီးလီရေ။ အရာ ထာဝရဘုရား၏ စကားတော်န ယေရှု၏ သွန်သင်ချက်ကို ဟောပြောလီရေအတွက်န လိုင်ဖင်း အပိုင်းခံလီသူရို့ ဝိညာဉ်တိကိုလည်း ငါ မြင်လီရေ။ သူရို့စာ ထိုတိရစ္ဆာန်န တိရစ္ဆာန် ရုပ်တုကို မကိုးကွယ်လီကတ် အရာ တိရစ္ဆာန်၏ အမှတ်တရကိုလည်း သူရို့ နဖူးဇာန အလက်မာ မခံယူလီကတ်။ အရာ သူရို့စာ သီရာက ပြန်ရှင်ထမြောင့်ရို့ ခရစ်တော်နအတူ နှစ်ပေါင်းတစ်ထောင် အုပ်စိုးကတ်လီရေ။ 5 ယေကေလည်း ကျန်ဟိလိုက်စာ အခြားသီသူရို့စာ နှစ်ပေါင်းတစ်ထောင် မပြည့်သကြား ပြန်ရှင်မထမြောင့်ကတ်လီ။ ဒေပိုင် ပြန်ရှင်ထမြောင့်ခြင်းစာ သီလားခသူရို့ ပထမခေါက် သီရာက ပြန်ရှင်ထမြောင့်ခြင်း ဖြစ်တေ။ 6 ဒေ ပထမခေါက် ပြန်ရှင်ထမြောင့်ခြင်းအထဲမာ ပါဝင်သူရို့စာ မင်္ဂလာ ဟိကတ်တေ အရာ သန့်ရှင်းကတ်တေ။ ဒုတိယ သီခြင်းတရားစာ သူရို့ကို အုပ်စိုးဖို့ မနိုင်ဗျာ။ ယင်းထက်ပင် သူရို့စာ ထာဝရဘုရားန ခရစ်တော်၏ ယဇ်ပုရောဟိတ် ဖြစ်ကတ်ဖို့ အရာ သူရို့စာ ခရစ်တော်နအတူ နှစ်ပေါင်းတစ်ထောင် အုပ်စိုးကတ်ဖို့။

မာရ်နတ် မီးအိုင်မာ ဘိုက်ချခံခြင်း

7 ယင်းနောက် မာရ်နတ်စာ နှစ်ပေါင်းတစ်ထောင် ပြည့်ရေခါ ထောင်က ရွတ်လိမည်။ 8 ယင်းခါ သူစာ “ဂေါဂ-မာဂေါဂ” ဟို့ ခေါ်စာ ကမ္ဘာမာ ဟိသမျ လူမျိုးရို့ကို မှားယွင်းစာလမ်းတို့ ယူလားလိမည် အရာ စစ်တိုက်ဖို့အတွက် သူရို့ကို တစ်စုတည်း စုလိမည်။ သူရို့မာ လူဦးရေစာ ပင်လယ်ကမ်းနားမာ ရွီရို့ မနိုင်စာ သဲတိပိုင် ဖြစ်လိမည်။ 9 ယင်းခါ သူရို့စာ လားရို့ ထာဝရဘုရား၏ လူရို့ နီထိုင်ကတ်စာ နေရာကို အရာ ထာဝရဘုရား၏ အချစ်ဆုံး မြို့ကို ဝန်းကတ်လီရေ။ ယေကေလည်း ထာဝရဘုရားစာ ဂေါင်းခင်ဘုံက မီးချရို့ သူရို့ကို သတ်ဘိုက်လီရေ။ 10 အရာ သူရို့ကို မှားယွင်းစာလမ်းတို့ ဆောင်ယူလားစာ မာရ်နတ်စာ မီးတောက်နီစာ ကန့်ကျောက်အိုင်တို့ ဘိုက်ချခြင်းကို ခံရလီရေ။ ထိုတိရစ္ဆာန်န အယောင်ဆောင် ဘုရားသတင်းပို့သူစာ ယင်းအယင်ကပင် ကန့်ကျောက်အိုင်တို့ ဘိုက်ချခြင်းကို ခံရကတ်လီရေ။ သူရို့စာ ယင်းမာ ထာဝရပတ်လုံး ညဉ့်ပါ-ရက်ပါ ဝေဒနာကို ခံရကတ်ဖို့။

အဆုံး တရားစစ်ဆေးခြင်း

11 ယင်းနောက် ငါစာ အကြီးသန် ပလ္လင်တော်အဖြူတစ်ခုန ပလ္လင်တော်မာ ထိုင်နီစာ ထာဝရဘုရားကို မြင်လီရေ။ သူ့ရှိထက်က ကမ္ဘာန ဂေါင်းခင်စာ ထွက်ဗြီးလားခလီရေ အရာ သူရို့ကို အရာ မမြင်ရလီဗျာ။ 12 ယင်းနောက် အကြီး-အသျှေ သီလားခသူရို့ အားကုံးသူ ထိုပလ္လင်တော် ရှိက ရပ်ရို့ ဟိစာကို ငါ မြင်လီရေ။ ယင်းပြီးနောက် အမျိုးမျိုး စာအုပ်တိကို ဖွင့်လီရေ အရာ ထိုစာအုပ်တိနအတူ “အသက်-စာအုပ်” ဟို့ ခေါ်စာ အခြားစာအုပ်တစ်အုပ်ကိုလည်း ဖွင့်လီရေ။ ထိုစာအုပ်တိမာ လူအသီရို့ အလုပ်အကြောင်းကို ရွီးရို့ ဟိလီရေ။ စာအုပ်တိမာ ရွီးရို့ ဟိရေအတိုင်း လူသီရို့စာ တရားစစ်ဆေးခြင်းကို ခံရကတ်လီရေ။ 13 ယင်းခါ သမုဒ္ဒရာပင်လယ်မာ သီလားခသူရို့စာ တရားစစ်ဆေးခြင်းကို ခံရဖို့အတွက် သမုဒ္ဒရာပင်လယ်စာ သူရို့ကို ထာဝရဘုရားတို့ ပြန်အပ်လီရေ။ အရာ သီခြင်းတရားန သီသူရို့နိုင်ငံမာ ဟိလီကတ်စာ လူသီရို့စာ တရားစစ်ဆေးခြင်းကို ခံရဖို့အတွက် သီခြင်းတရားန သီသူရို့နိုင်ငံလည်း သူရို့ကို ထာဝရဘုရားတို့ ပြန်အပ်ကတ်လီရေ။ သူရို့ အားကုံးသူ ကိုယ်ရို့ လုပ်ခကတ်စာ အလုပ်အတိုင်း တရားစစ်ဆေးခြင်းကို ခံရကတ်လီရေ။ 14 ယင်းနောက် သီခြင်းတရားန သီသူရို့နိုင်ငံစာ မီးအိုင်တို့ ဘိုက်ချခြင်းကို ခံရလီရေ။ ဒေ မီးအိုင်တို့ ဘိုက်ချခြင်းကို ခံရခြင်းစာ ဒုတိယ သီခြင်း ဖြစ်တေ။ 15 အရာ အသက်-စာအုပ်မာ နာမည်စာရင်း မပါဝင်သူရို့လည်း မီးအိုင်တို့ ဘိုက်ချခြင်းကို ခံရကတ်လီရေ။