Revelation of John 21

ဂေါင်းခင်အသစ်န ကမ္ဘာအသစ်

1ယင်းနောက် ငါစာ ဂေါင်းခင်အသစ်တစ်ခုန ကမ္ဘာအသစ်တစ်ခုကို မြင်လီရေ၊ အကြောင်းကား ဂေါင်းခင်အဟောင်းန ကမ္ဘာအဟောင်းစာ ကွယ်ပျောက်လားခဗျာ အရာ သမုဒ္ဒရာပင်လယ်လည်း မဟိလီဗျာ။ 2ယင်းနောက် သန့်ရှင်းစာ ယေရုရှလင်မြို့အသစ်ကို ဂေါင်းခင်ဘုံမာ ကျိန်းဝပ်စာ ထာဝရဘုရားက ဆင်းလာစာကို ငါ မြင်လီရေ။ ထိုမြို့စာ လင်သျှာအတွက် ဆင်ထားစာ မယားသျှာနတူလီရေ။ 3ယင်းနောက် ပလ္လင်တော်က ဒေပိုင် စကား ပြောစာအသံကို ငါ ကြားလီရေ၊ “ဒေဂု လူရို့အထဲမာ ထာဝရဘုရား ကျိန်းဝပ်ဖို့အတွက် နေရာ ချပြီးဗျာ။ ထာဝရဘုရားစာ လူရို့နအတူ ကျိန်းဝပ်ဖို့ အရာ သူရို့စာ ထာဝရဘုရား၏ လူရို့ ဖြစ်ကတ်ဖို့။ ထာဝရဘုရား ကိုယ်တိုင် လူရို့နအတူ ကျိန်းဝပ်ဖို့ အရာ ထိုလူရို့မာ ထာဝရဘုရား ဖြစ်ဖို့။ 4ထာဝရဘုရားစာ သူရို့မာ မျက်ရည် တစ်ပေါက်မကျန်ကို ပွတ်လိမည်။ အရာတစ်ပြန် သီခြင်း၊ ဝမ်းနည်းခြင်း၊ ငိုခြင်း အရာ နာခြင်း တစ်ခုလည်း ဟိလိမည် မဟုတ်၊ အကြောင်းကား ဟောင်းနွမ်းစာ ဟိသမျ အားကုံး ကွယ်ပျောက်လားခဗျာ။”

5ထိုပလ္လင်တော်မာ ထိုင်ရို့ ဟိလီသူစာ ငါ့ကို ပြောလီရေ၊ “ကြည့်၊ ငါ ဟိသမျ အားကုံးကို အသစ်ပျင်ရို့ လုပ်နီရေ။” ယင်းနောက် သူစာ အရာလည်း ပြောလီရေ၊ “ဒေ စကားကို ရွီးထား၊ အကြောင်းကား ဒေ စကားတိစာ ကျုံဖို့ ထိုက်တန်ရေ အရာ မှန်ရေ။”

6သူစာ ငါ့ကို အရာလည်း ပြောလီရေ၊ “အားကုံးစာ ပြီးဆုံးဗျာ။ ငါစာ အာလဖန ဩမေဃ ဖြစ်တေ၊ အစန အဆုံးလည်း ဖြစ်တေ။ ရီသောက်မွတ်သူကို အခမဲ့ အသက်ပီးနိုင်စာ ရီမျက်တွင်းက ရီကို ငါ သောက်ဖို့ ပီးဖို့။ 7အောင်မြင်ဖို့သူစာ ဒေသျှင့် အားကုံးကို ရလိမည်။ ငါစာ သူ့မာ ထာဝရဘုရား ဖြစ်ဖို့ အရာ သူစာ ငါ့သား ဖြစ်လိမည်။ 8ယေကေလည်း ကြောက်သူရို့၊ မကျုံသူရို့၊ ရွန်ဖို့ကောင်းသူရို့၊ လူသတ်သမားရို့၊ ကာမဂုဏ် လိုက်စားသူရို့၊ မှိုင်းဆရာရို့၊ ရုပ်တုကို ကိုးကွယ်သူရို့ အရာ မုတ်သားစကား ပြောသူရို့စာ မီးတောက်နီစာ ကန့်ကျောက်အိုင်မာ ကျကတ်လိမည်။ ဒေပိုင် မီးအိုင်မာ ကျခြင်းစာ ဒုတိယ သီခြင်း ဖြစ်တေ။”

ယေရုရှလင်မြို့ အသစ်

9နောက်ဆုံး ဘေးအန္တရာယ်ခုနစ်ခု အပြည့်န ခွက်ခုနစ်ချပ်ကို ကိုင်ရို့ ဟိလီစာ ဂေါင်းခင်နတ်သား ခုနစ်ပါးအထဲက တစ်ပါးစာ ငါ့တို့ လာရို့ ပြောလီရေ၊ “လာလတ်၊ သိုးဆိတ်သျှေ မယားသျှာကို ငါ နင့်ကို ပြမည်။” 10ယင်းနောက် ထိုဂေါင်းခင်နတ်သားစာ ငါ့ကို ကောင်းကောင်း အမြင့်ကြီး တောင်တစ်တောင်တို့ ယူလားခလီရေ။ ယင်းခါ ငါစာ သန့်ရှင်းသောဝိညာဉ်တော် ဆောင်ယူခြင်းကို ခံရို့ ဟိလီရေ။ အရာ သူစာ ငါ့ကို ဂေါင်းခင်ဘုံမာ ကျိန်းဝပ်နီစာ ထာဝရဘုရားက ဆင်းလာစာ သန့်ရှင်းစာ ယေရုရှလင်မြို့ကို ပြလီရေ။ 11ထိုမြို့စာ ထာဝရဘုရား၏ ဘုန်းရောင်ခြေတော်န တောက်ပြောင်နီလီရေ။ ထိုမြို့အရောင်စာ တန်ဖိုးဟိစာ မှန်ကျောက်န နဂါးသွဲ့ကျောက်ပိုင် ပပြောင်လလက် တောက်ရို့ ဟိလီရေ။ 12ထိုမြို့မာ အမြင့်ကြီးပျင်ရို့ တန်ဖိုးဟိစာကျောက်န ဆင့်စာထရန်တစ်ခု ဟိလီရေ။ ထိုကျောက်ထရန်မာ လမ်းခဝတစ်ဆယ့်နှစ်ပေါက် ဟိလီရေ။ ထိုလမ်းခဝတိမာ ဂေါင်းခင်နတ်သား တစ်ဆယ့်နှစ်ပါး စောင့်ရို့ ဟိလီရေ။ ထိုတန်ခါးပိတ်မာ ဣသရေလလူမျိုး တစ်ဆယ့်နှစ်စိုင် နာမည် ရွီးရို့ ဟိလီရေ။ 13အရှိဖက်၊ မြောက်ဖက်၊ တောင်ဖက် အရာ အနောက်ဖက် အရပ်လေးမျက်နှာစုံက လမ်းခဝသုံးပေါက်စီ ဟိလီရေ။ 14အရာ ထိုမြို့ကို ရန်ထားစာ ကျောက်ထရန်စာ အုပ်မြစ်တစ်ဆယ့်နှစ်မြစ်အထက်က ဆင့်ရို့ ဟိလီရေ အရာ ထိုအုပ်မြစ်တိမာ သိုးဆိတ်သျှေ၏ တမန်တော် တစ်ဆယ့်နှစ်ပါး နာမည် ရွီးရို့ ဟိလီရေ။

15ငါန စကားပြောလီစာ ဂေါင်းခင်နတ်သားစာ ထိုမြို့န မြို့လမ်းခဝတိကို အရာ ထိုကျောက်ထရန်ကို ခြင်ဖို့အတွက် ရွှေပေတံတစ်ချောင်း ကိုင်ရို့ ဟိလီရေ။ 16ထိုမြို့စာ အယား-အနံ တစ်ညီတည်း ဟိလီရေ။ ယင်းနောက် သူစာ ထိုမြို့ကို ပေတံန ခြင်ကြည့်ရေခါ အယား-အနံ အရာ ဇောက် မိုင်ပေါင်းတစ်ထောင့်ငါးရာစီ ဟိလီရေ။ 17ယင်းနောက် ထိုဂေါင်းခင်နတ်သားစာ ကျောက်ထရန်ကိုလည်း ခြင်ကြည့်လီရေ။ ယင်းခါ ဇောက် တစ်ရာ့လေးဆယ်နလေးတောင် ဟိလီရေ။ သူစာ လူရို့ပိုင်တထန် အလက်န တောင်လီစာ ဖြစ်တေ။ 18ထိုကျောက်ထရန်ကို နဂါးသွဲ့ကျောက်န ဆင့်လီစာ ဖြစ်တေ အရာ ထိုမြို့ကို ပပြောင်လလက် မှန်နတူစာ ရွှေအစင်န တည်ဆောက်လီစာ ဖြစ်တေ။ 19ထိုကျောက်ထရန် အုပ်မြစ်မာ အမျိုးမျိုး တန်ဖိုးဟိစာကျောက်န ကွတ်ရို့ ဟိလီရေ။ ပထမ အုပ်မြစ်စာ နဂါးသွဲ့ကျောက်၊ ဒုတိယစာ နီလာကျောက်၊ တတိယစာ မဟူရာကျောက်၊ စတုတ္ထစာ မြကျောက်၊ 20ပဥ္စမစာ ကြောင်မျက်စီကျောက်၊ ဆဋ္ဌမစာ ပတ္တမြားကျောက်နီ၊ သတ္တမစာ ခရုသုလိတ်ကျောက်၊ အဋ္ဌမစာ မျက်ရွဲကျောက်၊ နဝမစာ ဥဿဖရားကျောက်၊ ဒသမစာ ခရုသုပြတ်ကျောက်၊ ဧကဒသမစာ နီလာသွီးကျောက် အရာ ဒွါဒသမစာ နီလာခရမ်းကျောက် ဖြစ်တေ။ 21အရာ ထိုမြို့လမ်းခဝ တစ်ဆယ့်နှစ်ပေါက်ကို ကျောက်ပုလဲ တစ်ဆယ့်နှစ်လုံးန လုပ်ထားလီစာ ဖြစ်တေ။ မြို့လမ်းခဝ တစ်ပေါက်စီကို ကျောက်ပုလဲ တစ်လုံးစီန လုပ်ထားလီစာ ဖြစ်တေ။ အရာ မြို့လမ်းမကြီးစာ လက်တပေါက်မာထည့်စာ မှန်နတူစာ ရွှေအစင်န လုပ်ထားလီစာ ဖြစ်တေ။

22ထိုမြို့မာ ဝိပဿနာကျောင်းကို ငါ မမြင်ရလီ၊ အကြောင်းကား အနန္တတန်ခိုးနပြည့်စုံစာ အသျှင်ထာဝရဘုရားန သိုးဆိတ်သျှေ ကိုယ်တိုင် ယင်းမြို့မာ ဝိပဿနာကျောင်း ဖြစ်တေ။ 23ထာဝရဘုရား၏ ဘုန်းရောင်ခြေတော်စာ မြို့ကို အလင်းရောင် ပီးရေ အရာ သိုးဆိတ်သျှေစာ ယင်းမြို့မာ ဆီမီးကျိုင် ဖြစ်တေ။ ယင်းအတွက်န ယင်းမြို့ကို အလင်းရောင် ပီးဖို့အတွက် နီန လကို အလိုမဟိ။ 24ဟိသမျ လူမျိုးရို့စာ ထိုအလင်းရောင်မာ လမ်းသျှောက်ကတ်လိမည်။ ကမ္ဘာမာ မင်းရို့စာ ကိုယ်ရို့မာ ဘုန်းသိက္ခာကို ယူရို့ ထိုမြို့တို့ လာကတ်လိမည်။ 25ထိုမြို့လမ်းခဝတိစာ တစ်ရက်ပတ်လုံး ဖွင့်ရို့ ဟိလိမည်၊ အကြောင်းကား ထိုမြို့မာ ညဉ့် မဟိ။ 26ဟိသမျ လူမျိုးရို့စာ ကိုယ်ရို့မာ ဘုန်းသိက္ခာန ရိုသေခြင်းကို ထိုမြို့တို့ ယူလာကတ်လိမည်။ 27ယေကေလည်း မစင်ကြယ်သူရို့၊ ဆိုးယုတ်စာ အလုပ်ကို လုပ်သူရို့ အရာ မုတ်သားစကား ပြောသူရို့ တစ်ယောက်လည်း ထိုမြို့တို့ ဝင်ရကတ်လိမည် မဟုတ်။ သက်သက် သိုးဆိတ်သျှေ၏ အသက်-စာအုပ်မာ နာမည်စာရင်း ပါဝင်သူရို့ရာ ထိုမြို့တို့ ဝင်ရကတ်လိမည်။