Revelation of John 22

အသက်ပီးနိုင်စာ ရီထွက်စာချောင်း

1– 2ယင်းနောက် ထိုဂေါင်းခင်နတ်သားစာ အသက်ပီးနိုင်စာ ရီထွက်စာချောင်း တစ်ချောင်းကို ငါ့ကို ပြလီရေ။ ထိုချောင်းရီစာ မှန်ကျောက်ပိုင် ကြိုင်းရို့ ဟိလီရေ၊ အရာ ထိုချောင်းရီစာ ထာဝရဘုရား၏ ပလ္လင်တော်န သိုးဆိတ်သျှေ၏ ပလ္လင်တော်က ထွက်လာရို့ မြို့လမ်းမကြီး အလယ်က သျှောဆင်းနီလီရေ။ ထိုချောင်းကမ်းနား နှစ်ဖက်စုံက အသက်ပီးနိုင်စာ အပင် ဟိလီရေ။ ထိုအသက်ပီးနိုင်စာ အပင်တိစာ တစ်နှစ်မာ တစ်ဆယ့်နှစ်ခါ အသီးသီးရေ။ အရာ လတိုင်း အသီး အသစ် အသစ် သီးရေ။ ထိုအသက်ပီးနိုင်စာ အပင်က အရွက်တိစာ ဟိသမျ လူမျိုးရို့ကို ကျန်းမာအောင် လုပ်တေ။ 3အရာ ထိုမြို့မာ ကျိန်ဆဲထည့်ခြင်း တစ်ခုလည်း ဟိလိမည် မဟုတ်ပျာ။ ထာဝရဘုရား၏ ပလ္လင်တော်န သိုးဆိတ်သျှေ၏ ပလ္လင်တော်စာ ထိုမြို့မာ ဟိလိမည်။ အရာ ထာဝရဘုရား၏ ကျွန်ရို့စာ ထာဝရဘုရားကို ဝတ်ပြုကိုးကွယ်ကတ်လိမည်။ 4သူရို့စာ ထာဝရဘုရား၏ မျက်နှာကို မြင်ရကတ်လိမည် အရာ ထာဝရဘုရား၏ နာမည်စာ သူရို့ နဖူးဇာမာ ရွီးရို့ ဟိလိမည်။ 5ထိုမြို့မာ ညဉ့်မိုက်လိမည် မဟုတ် အရာ သူရို့အတွက် ဆီမီးကျိုင်န နီအလင်းရောင် အလို ဟိလိမည် မဟုတ်၊ အကြောင်းကား အသျှင်ထာဝရဘုရား ကိုယ်တိုင် သူရို့အတွက် အလင်း ဖြစ်လိမည်။ အရာ သူရို့စာ ထာဝရပတ်လုံး အုပ်ချုပ်လိမည်။

ယေရှု အယင်အမြန် ကြွလာဖို့

6ယင်းနောက် ထိုဂေါင်းခင်နတ်သားစာ ငါ့ကို ပြောလီရေ၊ “ဒေ စကား အားကုံး ကျုံဖို့ ထိုက်တန်ရေ အရာ မှန်ရေ။ အသျှင်ထာဝရဘုရားစာ အယင်ကခါ ဘုရားသတင်းပို့သူရို့ကနီရို့ စကား ပြောလီရေ။ သူစာ အများမကြာခင် အမှန် ဖြစ်ပျက်လာဖို့စာ အကြောင်းတိကို ကိုယ့်ကျွန်ရို့ဘားမာ ဖေါ်ပြချင်ရေ။ ယင်းအတွက်န သူစာ ကိုယ့်ဂေါင်းခင်နတ်သားကို ဖေါ်ပြဖို့ ရွှတ်လိုက်လီရေ။”

7အသျှင်ယေရှုစာ ပြောရေ၊ “ကြည့်၊ ငါ အယင်အမြန် ကြွလာဖို့! ဒေ စာအုပ်မာ ရွီးထားစာ ဟိသမျ အနာဂတ္တိစကားကို လိုက်နာသူစာ မင်္ဂလာ ဟိရေ။”

8ငါ ယောဟန်၊ ငါစာ ဒေ ဟိသမျ အားကုံးကို ကြားဖူးမြင်ဖူးလီရေ။ ငါစာ ဟိသမျ အားကုံးကို ကြားရို့ မြင်ရို့ ပြီးရေခါ ငါ့ကို ပြပီးလီစာ ဂေါင်းခင်နတ်သားကို ငါ ရှိခိုးဖို့အတွက် သူ့အခြီရင်းမာ ဒူးထောက်လီရေ။ 9ယေကေလည်း သူစာ ငါ့ကို ပြောလီရေ၊ “တန့်၊ ငါ့ကို ရှိမခိုးကေ့! ထာဝရဘုရားကိုရာ ရှိခိုး၊ အကြောင်းကား ငါစာ နင်န နင့်မာ ကျုံသူညီအစ်ကိုဖြစ်သူ ဘုရားသတင်းပို့သူရို့ပိုင် ကျွန်တစ်ယောက် ဖြစ်တေ။ အရာ ဒေ စာအုပ်မာ ရွီးထားစာ စကားတိကို လိုက်နာသူရို့ပိုင် ကျွန်တစ်ယောက် ဖြစ်တေ။”

10ယင်းနောက် သူစာ ငါ့ကို ပြောလီရေ၊ “ဒေ စာအုပ်မာ ရွီးထားစာ ဟိသမျ အနာဂတ္တိစကားကို နင် ဖုံးရို့ မထားကေ့၊ အကြောင်းကား ယင်းစကားတိစာ ပြည့်စုံဖို့အချိန် ပါးနီဗျာ။ 11မတရားလုပ်သူစာ ဆက်ရို့ မတရားလုပ်နီပတ်စီ အရာ ဆိုးယုတ်စာ အလုပ်လုပ်နီသူစာ ဆက်ရို့ ဆိုးယုတ်စာ အလုပ်လုပ်နီပတ်စီ။ ကောင်းမြတ်စာ အလုပ်လုပ်နီသူစာ ဆက်ရို့ ကောင်းမြတ်စာ အလုပ်လုပ်နီပတ်စီ အရာ သန့်ရှင်းသူစာ ဆက်ရို့ သန့်ရှင်းနီပတ်စီ။”

12အသျှင်ယေရှုစာ ပြောရေ၊ “ကြည့်၊ ငါ အယင်အမြန် ကြွလာဖို့! အရာ လူတိုင်းကို အလုပ်န ထိုက်တန်စာ ဆုကို ပီးဖို့အတွက် ငါ ယူလာဖို့။ 13ငါစာ အာလဖန ဩမေဃ ဖြစ်တေ၊ ပထမန နောက်ဆုံး ဖြစ်တေ အရာ အစန အဆုံးလည်း ဖြစ်တေ။

14“ကိုယ်ရို့မာ အဝတ်တိကို ဖွတ်သူရို့စာ မင်္ဂလာ ဟိကတ်တေ။ သူရို့စာ အသက်ပီးနိုင်စာ အပင်က အသီးကို စားဖို့စာ အခွင့်အာဏာန လမ်းခဝတိကနီရို့ မြို့ထဲတို့ ဝင်ဖို့စာ အခွင့်အာဏာကို ရကတ်လိမည်။ 15ယေကေလည်း ကောင်းကောင်း ညစ်ညူးဆိုးယုတ်စာ အလုပ်ကို လုပ်သူရို့၊ မန်းဒရားဆရာရို့၊ ကာမဂုဏ် လိုက်စားသူရို့၊ လူသတ်သမားရို့၊ ရုပ်တုကို ကိုးကွယ်သူရို့ အရာ လူကို လိမ်လှည့်ဖို့ နှစ်သက်ရို့ လိမ်လှည့်သူရို့စာ မြို့ပြင်က ကျရို့ ဟိကတ်လိမည်။

16“ငါ ယေရှု၊ ငါစာ ဒါဝိဒ်မင်း၏ အမြစ်န အမျိုးအနွယ်သား ဖြစ်တေ အရာ မိုးသောက် ကြယ်ကြီးလည်း ဖြစ်တေ။ နင်ရို့ အသင်းတော်တိမာ ဒေ အကြောင်း အားကုံးကို သက်သီပီးဖို့အတွက် ငါ့မာ ဂေါင်းခင်နတ်သားတစ်ပါးကို ရွှတ်လိုက်လီရေ။”

17 သန့်ရှင်းသောဝိညာဉ်တော်န မယားသျှာစာ ပြောရေ၊ “ကြွလာပါ။” အရာ ဒေ စကားကို ကြားသူရို့လည်း “ကြွလာပါ” ဟို့ ပြောကတ်။ ရီသောက်မွတ်သူစာ လာလတ် အရာ ရီသောက်ချင်သူစာ အခမဲ့ အသက်ပီးနိုင်စာ ရီကို လာရို့ သောက်ခလိုက်။

အဆုံးသတ်ချက် စကား

18ဒေ စာအုပ်မာ ရွီးထားစာ ဟိသမျ အနာဂတ္တိစကားကို နားထောင်သူကို ငါ သတိပီးရေ။ အသူမဆို ဒေ စကားတိမာ အရာလည်း အခြား စကားတိကို ပေါင်းရေဆိုကေ ထာဝရဘုရားလည်း ဒေ စာအုပ်မာ ရွီးထားစာ ဟိသမျ ဘေးအန္တရာယ်ကို သူ့ဘားမာ ကျရောက်စီလိမည်။ 19အရာ အသူမဆို ဒေ စာအုပ်မာ ရွီးထားစာ ဟိသမျ အနာဂတ္တိစကားအထဲက တစ်ချိုးစကားကို နှုတ်ပယ်ရေဆိုကေ ထာဝရဘုရား ဒေ စာအုပ်မာ ရွီးထားစာ အသက်ပီးနိုင်စာ အပင်က အသီးကို စားဖို့စာ အခွင့်အာဏာန သန့်ရှင်းစာမြို့တို့ ဝင်ရဖို့စာ အခွင့်အာဏာကို သူ့က လုယူလိမည်။

20ဒေ ဟိသမျ အကြောင်းအရာကို သက်သီပီးသူစာ ပြောရေ၊ “ဟုတ်တေ၊ ငါ အယင်အမြန် ကြွလာဖို့။”

အာမန်။ အသျှင်ယေရှု ကြွလာပါ။

21အသျှင်ယေရှု၏ ကျေးဇူးတော် ဟိသမျ ကျုံသူရို့နအတူ ဟိပါစီ။ အာမန်။