Rev 6 | RmzSC | STEP | သိုးဆိတ်သျှေစာ ထိုတံဆိပ်ခုနစ်ခုမာ ပထမ တံဆိပ်ကို ခွါလီရေခါ ငါစာ ကြည့်လီရေ။ ယင်းခါ သတ္တဝါလေးပါးအထဲက တစ်ပါးစာ မိုးကြိုးသံပိုင် စကားပြောစာကို ကြားလီရေ၊ “လာလတ်။”

Revelation of John 6

တံဆိပ်ခြောက်ခုကို ခွါခြင်း

1 သိုးဆိတ်သျှေစာ ထိုတံဆိပ်ခုနစ်ခုမာ ပထမ တံဆိပ်ကို ခွါလီရေခါ ငါစာ ကြည့်လီရေ။ ယင်းခါ သတ္တဝါလေးပါးအထဲက တစ်ပါးစာ မိုးကြိုးသံပိုင် စကားပြောစာကို ကြားလီရေ၊ “လာလတ်။” 2 ယင်းခါ ငါ မြင်းအဖြူတစ်ကောင် ထွက်လာစာကို မြင်လီရေ။ ထိုမြင်းအဖြူကို စီးသူအလက်မာ မြှားတစ်လက် ကိုင်ရို့ ဟိလီရေ။ သူ့ကို သရဖူတစ်ခု ပီးလီရေ အရာ သူစာ အနိုင်ရသူပိုင် အရာလည်း အနိုင်ရဖို့အတွက် ထွက်လားခလီရေ။

3 သိုးဆိတ်သျှေစာ ဒုတိယ တံဆိပ်ကို ခွါလီရေခါ ငါစာ ဒုတိယ သတ္တဝါ ပြောစာကို ကြားလီရေ၊ “လာလတ်။” 4 ယင်းခါ အခြား မြင်းအနီတစ်ကောင် ထွက်လာလီရေ။ လူရို့စာ တစ်ယောက်ကို တစ်ယောက် အသီသတ်ကတ်ပတ်စီအတွက် ထိုမြင်းအနီ စီးသူကို ကမ္ဘာက ငြိမ်းချမ်းခြင်းကို တင်ယူဖို့စာ တန်ခိုးကို ပီးလီရေ အရာ သူ့ကို ဒါးရှည်အကြီးလည်း တစ်စင်း ပီးလီရေ။

5 သိုးဆိတ်သျှေစာ တတိယ တံဆိပ်ကို ခွါလီရေခါ ငါစာ တတိယ သတ္တဝါ ပြောစာကို ကြားလီရေ၊ “လာလတ်။” ယင်းခါ ငါ မြင်းအမဲ တစ်ကောင်ကို မြင်ရလီရေ။ ထိုမြင်းအမဲကို စီးသူအလက်မာ ဖာလီတစ်ခု ကိုင်ရို့ ဟိလီရေ။ 6 အရာ ငါစာ ထိုအသက်ရှင် သတ္တဝါလေးပါးအလယ်က ပြောစာအသံကို ကြားလီရေ၊ “လူတစ်ယောက်မာ တစ်ရက်လုပ်ခအတွက် ဂျုံဆန်တစ်သိုက် ရရေ၊ မဟုတ်ကေ ဂျိတ်ဆန်သုံးသိုက် ရရေ။ အရာ ဝါဟောင်းဆီန စပျစ်ရည်ကို နင် မဖျက်ဘိုက်ကေ့။”

7 သိုးဆိတ်သျှေစာ စတုတ္ထ တံဆိပ်ကို ခွါလီရေခါ ငါစာ စတုတ္ထ အသက်ရှင် သတ္တဝါ ပြောစာကို ကြားလီရေ၊ “လာလတ်။” 8 ယင်းခါ ငါစာ မြင်းအမွဲ တစ်ကောင်ကို မြင်လီရေ။ ထိုမြင်းအမွဲကို စီးသူနာမည်စာ သီခြင်းတရား ဖြစ်တေ။ အရာ သူ့အဖက်သား သီသူရို့နိုင်ငံစာ သူ့နောက်က လိုက်လီရေ။ သူရို့စာ ကမ္ဘာ လေးပုံတစ်ပုံကို အုပ်ချုပ်ဖို့အတွက် တန်ခိုးကို ရကတ်လီရေ၊ အကြောင်းကား သူရို့စာ လူရို့ကို ဒါးရှည်န ထိုးဖို့အတွက်၊ ငတ်မွတ်ခေါင်းပါးခြင်း ကျရောက်စီဖို့အတွက်၊ အနာရောဂါ ဖြစ်စီဖို့အတွက် အရာ ကမ္ဘာမာဟိစာ တောရိုင်းတိရစ္ဆာန်ကို အသုံးပြုရို့ လူရို့ကို အသီသတ်ဖို့အတွက် ဖြစ်တေ။

9 သိုးဆိတ်သျှေစာ ပဉ္စမ တံဆိပ်ကို ခွါလီရေခါ ငါစာ ယဇ်ပလ္လင်အောက်က ဝိညာဉ်တိကို မြင်လီရေ။ ထိုဝိညာဉ်တိစာ ထာဝရဘုရား၏ စကားတော်ကို ဟောပြောရေအတွက်န အရာ ကိုယ်ရို့ ကျုံခြင်းတရား အကြောင်းကို သက်သီ ပီးရေအတွက်န အသီသတ်ခြင်းကို ခံလီသူရို့ ဝိညာဉ်တိ ဖြစ်တေ။ 10 သူရို့စာ အားန အော်ရို့ ပြောကတ်လီရေ၊ “အိုး အသျှင်၊ ကိုယ်တော် သန့်ရှင်းပါရေ အရာ မှန်ကန်ခြင်းန ပြည့်စုံပါရေ။ အကျွန်ရို့ သွီးအတွက် ဒေ လောကသားရို့ကို တရားမစစ်ဆေးဘိုင်းန အရာ လက်စားမဆပ်ဘိုင်းန ကိုယ်တော် ဇာမျှရက် နီပါဖို့သိလည်း?” 11 ယင်းခါ သူရို့ အားကုံးသူကို အင်္ကျီအရှည် အဖြူသား တစ်ထည်စီ ပီးလီရေ။ ယင်းနောက် သူရို့ကို အရာတစ်နားသျှေ နားနီဖို့အတွက် ပြောလီရေ၊ အကြောင်းကား သူရို့ပိုင် အသီသတ်ခြင်းကို ခံရဖို့သူရို့စာ ဒေဂုလည်း ကျန်ဟိကတ်သိရေ။ ထိုလူရို့စာ သူရို့မာ လုပ်ဖေါ်ကိုင်ဖက်ရို့န ညီအစ်ကိုမောင်နမှရို့ ဖြစ်ကတ်တေ။

12 အရာ သိုးဆိတ်သျှေစာ ဆဋ္ဌမ တံဆိပ်ကို ခွါလီရေခါ ငါစာ ငယင်ကြီးတစ်ခု လုတ်စာကို မြင်လီရေ။ ယင်းခါ နီစာ မမဲပုတ် ဖြစ်လားခလီရေ အရာ လစာ သွီးပိုင် အနီ ဖြစ်လားခလီရေ။ 13 လီအားန ထရေခါ အချိန်မတိုင်ဘိုင်း သဖန်းပင်က သဖန်းသီး ကြွီကျစာပိုင် ဂေါင်းခင်မာ ကြယ်တိစာ ကမ္ဘာတို့ ကြွီကျလီရေ။ 14 အရာ ဂေါင်းခင်စာ စာလိပ်ပိုင် လိပ်လားခလီရေ။ အရာ ဟိသမျ တောင်တိန ကျွန်းတိစာ ကိုယ့်နေရာကကိုယ် ရွိလားခလီရေ။ 15 ယင်းနောက် ကမ္ဘာမာ ဟိသမျ မင်းရို့၊ အာဏာသျှင်ရို့၊ စစ်ဗိုလ်ရို့၊ သူဌေးရို့၊ လူကြီးရို့၊ ဟိသမျ ကျွန်ရို့ အရာ လွတ်လပ်သူရို့စာ တောင်အခေါင်းတိန ကျောက်လုံးကြီးကြားတိမာ ရွှက်ရို့ နီကတ်လီရေ။ 16 သူရို့စာ တောင်တိန ကျောက်လုံးတိကို ပြောကတ်လီရေ၊ “ငါရို့ဘားမာ ကျခလိုက် အရာ ပလ္လင်တော်မာ ထိုင်ရို့ ဟိသူမျက်နှာတော်က ငါရို့ကို ကွယ်ရို့ထား အရာ သိုးဆိတ်သျှေ အငြိုဒေါသကလည်း ကွယ်ရို့ထား၊ 17 အကြောင်းကား သူရို့နှစ်ပါး အငြိုဒေါသ ဖေါ်ပြဖို့စာ ရက်ကြီးရက်မြတ် ရောက်နီဗျာ။ ထိုအငြိုဒေါသ ရှိက အသူ အသက်ရှင်နီနိုင်ဖို့လည်း?”