Rev 7 | RmzSC | STEP | ယင်းနောက် ငါစာ ကမ္ဘာ ဒေါင့်လေးဒေါင့်မာ ဂေါင်းခင်နတ်သားလေးပါး ရပ်ရို့ ဟိစာကို မြင်လီရေ။ သူရို့စာ ကမ္ဘာ၊ ပင်လယ် အရာ အပင်တိကို လီမတိုက်ရအောင်အတွက် ကမ္ဘာအရပ် လေးမျက်နှာက လာစာ လီတိကို ဆိရို့ ထားကတ်လီရေ။

Revelation of John 7

တံဆိပ်ရိုက်ခြင်းကို ခံရစာ ဣသရေလလူရို့

1 ယင်းနောက် ငါစာ ကမ္ဘာ ဒေါင့်လေးဒေါင့်မာ ဂေါင်းခင်နတ်သားလေးပါး ရပ်ရို့ ဟိစာကို မြင်လီရေ။ သူရို့စာ ကမ္ဘာ၊ ပင်လယ် အရာ အပင်တိကို လီမတိုက်ရအောင်အတွက် ကမ္ဘာအရပ် လေးမျက်နှာက လာစာ လီတိကို ဆိရို့ ထားကတ်လီရေ။ 2 ယင်းနောက် အခြား ဂေါင်းခင်နတ်သားတစ်ပါး အရှိဖက်က တက်လာစာကို ငါ မြင်လီရေ။ သူ့အလက်မာ အသက်သျှင် ထာဝရဘုရား၏ တံဆိပ်ကို ကိုင်ရို့ ဟိလီရေ။ ထိုဂေါင်းခင်နတ်သား လေးပါးစာ ဂေါင်းခင်န ပင်လယ်ကို ဖျက်စီးဖို့စာ တန်ခိုးကို ရကတ်လီရေ။ သူစာ ထိုဂေါင်းခင်နတ်သား လေးပါးကို အားန အော်ရို့ ပြောလီရေ၊ 3 “ငါရို့မာ ထာဝရဘုရား၏ ကျွန်ရို့ နဖူးဇာမာ တံဆိပ် မရိုက်သကြား ကမ္ဘာ၊ ပင်လယ် အရာ အပင်တိကို မဖျက်စီးကတ်ကေ့။”

4 ယင်းနောက် ငါစာ ထိုတံဆိပ် ရိုက်ခြင်းကို ခံရကတ်စာ လူဦးရေ စာရင်းရွီသံကို ကြားလီရေ။ ဣသရေလလူမျိုးရို့အထဲက လူဦးရေ တစ်သိန်းလေးသောင်းန လေးထောင် တံဆိပ် ရိုက်ခြင်းကို ခံရကတ်လီရေ။
5 – 6 – 7 – 8 ယုဒအမျိုးအနွယ်က တစ်သောင်းန နှစ်ထောင်၊
ရူဗင်အမျိုးအနွယ်က တစ်သောင်းန နှစ်ထောင်၊
ဂါဒ်အမျိုးအနွယ်က တစ်သောင်းန နှစ်ထောင်၊
အာရှာအမျိုးအနွယ်က တစ်သောင်းန နှစ်ထောင်၊
နဿလိအမျိုးအနွယ်က တစ်သောင်းန နှစ်ထောင်၊
မနာရှေအမျိုးအနွယ်က တစ်သောင်းန နှစ်ထောင်၊
ရှိမောင်အမျိုးအနွယ်က တစ်သောင်းန နှစ်ထောင်၊
လေဝိအမျိုးအနွယ်က တစ်သောင်းန နှစ်ထောင်၊
ဣသခါအမျိုးအနွယ်က တစ်သောင်းန နှစ်ထောင်၊
ဇာဗုလုန်အမျိုးအနွယ်က တစ်သောင်းန နှစ်ထောင်၊
ယောသပ်အမျိုးအနွယ်က တစ်သောင်းန နှစ်ထောင်၊
အရာ ဗင်္ယာမိန်အမျိုးအနွယ်က တစ်သောင်းန နှစ်ထောင် ဖြစ်တေ။

ရွီရို့ မနိုင်စာ လူပရိတ်သတ်ရို့

9 ယင်းနောက် ငါစာ ဟိသမျ လူမျိုး၊ ဟိသမျ အမျိုးအနွယ်၊ ဟိသမျ တိုင်းပြည် အရာ ဟိသမျ ဘာသာစကားအထဲက ရွီရို့ မနိုင်စာ လူပရိတ်သတ်ရို့ကို မြင်လီရေ။ ထိုလူရို့စာ အဝတ်အဖြူ ဝတ်ပြီးကေ ခဇူလက်တိကို ကိုင်ရို့ ပလ္လင်တော်န သိုးဆိတ်သျှေ ရှိက ရပ်ရို့ ဟိကတ်လီရေ။ 10 သူရို့စာ အားန အော်ရို့ ပြောကတ်လီရေ၊ “ပလ္လင်တော်မာ ထိုင်ရို့ဟိသူ ငါရို့မာ ထာဝရဘုရားန သိုးဆိတ်သျှေ အလက်မာ ကယ်တင်ခြင်း ဟိရေ။”

11 ယင်းနောက် ဟိသမျ ဂေါင်းခင်နတ်သားရို့စာ ပလ္လင်တော်ကို၊ ဂေါင်းဆောင်အကြီးရို့ကို အရာ အသက်ရှင် သတ္တဝါလေးပါးကို ဝန်းရို့ ဟိကတ်လီရေ။ အရာ သူရို့စာ ပလ္လင်တော်ရှိက ဒူးထောက်ပြီးကေ ထာဝရဘုရားကို ရှိခိုးရို့ ပြောကတ်လီရေ၊ 12 “အာမန်! ချီမွမ်းခြင်း၊ ဘုန်းတန်ခိုး၊ ညာဏ်ပညာ၊ ကျေးဇူးတင်ခြင်း၊ ရိုသေခြင်း၊ တန်ခိုး အရာ အားခွန်ကို ကမ္ဘာအဆက်ဆက် ငါရို့မာ ထာဝရဘုရား ပိုင်ဆိုင်ပါစီ! အာမန်!”

13 ယင်းခါ ဂေါင်းဆောင်အကြီး တစ်ယောက်စာ ငါ့ကို မီးလီရေ၊ “ထိုအဝတ်အဖြူ ဝတ်သူရို့ အသူရို့လည်း? အရာ သူရို့ အားကုံးသူ ဇာက လာကတ်စာလည်း?”

14 ငါစာ သူ့ကို အဖြေပီးလီရေ၊ “အသျှင်၊ ကိုယ်တော်ရာ သူရို့ကို သိပါရေ။”

ယင်းခါ သူစာ ငါ့ကို ပြောလီရေ၊ “ဒေ သူရို့စာ မဟာဖီးဒုက္ခထဲက လာသူရို့ ဖြစ်ကတ်တေ။ သူရို့စာ ကိုယ်ရို့မာ အဝတ်တိကို သိုးဆိတ်သျှေ သွီးန ဖွတ်ရို့ ဖြူအောင် လုပ်ပြီးကတ်ပျာ။ 15 ယင်းအတွက်န ဒေ သူရို့ ထာဝရဘုရား၏ ပလ္လင်တော် ရှိက ရပ်ရို့ ဟိကတ်တေ အရာ ထာဝရဘုရား၏ ဝိပဿနာကျောင်းမာ ညဉ့်ပါ-ရက်ပါ ထာဝရဘုရားကို ဝတ်ပြုရို့ နီကတ်တေ။ ထိုပလ္လင်တော်မာ ထိုင်ရို့ ဟိသူစာ သူရို့ကို ကြည့်ရှုစောင်မလိမည်။ 16 သူရို့စာ အရာတစ်ခါလည်း ငတ်မွတ်ခြင်း ဟိကတ်လိမည် မဟုတ်၊ ရီသောက် မွတ်ကတ်လိမည် မဟုတ်။ သူရို့ ခန္ဓာမာ နီပူအဟိန် ကျလိမည် မဟုတ် အရာ ကောင်းကောင်း ဆာလောင်ခြင်းကိုလည်း ခံရကတ်လိမည် မဟုတ်၊ 17 အကြောင်းကား ထိုပလ္လင်တော်အလယ်မာ ရပ်ရို့ဟိစာ သိုးဆိတ်သျှေစာ သူရို့မာ သိုးဆိတ်ကျောင်းသား ဖြစ်လိမည်။ သူစာ ထိုသူရို့ကို အသက်သျှင် ရီမျက်တွင်းနားတို့ ခေါ်ယူလိမည် အရာ ထာဝရဘုရားစာ သူရို့မာ မျက်ရည် တစ်ပေါက်မကျန်ကို ပွတ်လိမည်။”