Rev 8 | RmzSC | STEP | ယင်းနောက် သိုးဆိတ်သျှေစာ သတ္တမ တံဆိပ်ကို ခွါပြီးရေခါ ဂေါင်းခင်ဘုံမာ နာရီ ခွဲလှောက် တစ်ခုလည်း အသံမထွက်လီ။

Revelation of John 8

သတ္တမ တံဆိပ်ကို ခွါခြင်း

1 ယင်းနောက် သိုးဆိတ်သျှေစာ သတ္တမ တံဆိပ်ကို ခွါပြီးရေခါ ဂေါင်းခင်ဘုံမာ နာရီ ခွဲလှောက် တစ်ခုလည်း အသံမထွက်လီ။ 2 အရာ ငါစာ ထာဝရဘုရား၏ ရှိက ရပ်နီကတ်စာ ဂေါင်းခင်နတ်သား ခုနစ်ပါးကို မြင်လီရေ။ ထိုဂေါင်းခင်နတ်သား ခုနစ်ပါးကို ဘောခုနစ်တံ အပ်လီရေ။

3 ယင်းနောက် အခြား ဂေါင်းခင်နတ်သားတစ်ပါးစာ ယဇ်ပလ္လင်ရှိတို့ လာရို့ ရပ်လီရေ။ ယင်းဂေါင်းခင်နတ်သား အလက်မာ အမွှီးနံသာထည့်စာ ရွှေလောင်ပန်း တစ်ချပ် ကိုင်ရို့ ဟိလီရေ။ အရာ ပလ္လင်တော်ရှိကဟိစာ ရွှေယဇ်ပလ္လင်မာ တင်ရို့ ပူဇော်ဖို့အတွက် ထာဝရဘုရား၏ ဟိသမျ လူရို့ ဆုတောင်းခြင်းန အမွှီးနံသာ အများကြီး ထိုဂေါင်းခင်နတ်သား လောင်ပန်းမာ ထည့်လီရေ။ 4 ထိုဂေါင်းခင်နတ်သား အလက်က အမွှီးနံသာ အခိုးတိစာ ထာဝရဘုရား၏ လူရို့ ဆုတောင်းခြင်းန ရောရို့ ဂေါင်းခင်ဘုံမာဟိစာ ထာဝရဘုရားတို့ ရောက်လားခလီရေ။ 5 ယင်းခါ ထိုဂေါင်းခင်နတ်သားစာ ယဇ်ပလ္လင်က မီးကို ယူရို့ အမွှီးနံသာ လောင်ပန်းမာ ထည့်ပြီးကေ ကမ္ဘာတို့ သွန်ချလိုက်လီရေ။ ယင်းအတွက်န မိုးကြိုးလီရေ၊ ကြောက်လန့်စရာ အသံတိမြည်လီရေ၊ လျှပ်ပြက်လီရေ အရာ ငယင်လုတ်လီရေ။

ဘောလေးတံကို မှုတ်ခြင်း

6 ယင်းနောက် ဘောခုနစ်တံကို ရလီကတ်စာ ဂေါင်းခင်နတ်သား ခုနစ်ပါးစာ ထိုဘောတိကို မှုတ်ဖို့အတွက် အဆင်သင့် လုပ်ကတ်လီရေ။ 7 ပထမ ဂေါင်းခင်နတ်သားစာ ကိုယ့် ဘောကို မှုတ်ပြီးရေခါ သွီးန ရောထားစာ မိုးသီးကျောက်န မီးခဲကို ကမ္ဘာတို့ သွန်ချလိုက်လီရေ။ ယင်းအတွက်န ကမ္ဘာမြေသုံးပုံတစ်ပုံ၊ သစ်ပင်-ဝါးပင်သုံးပုံတစ်ပုံ အရာ ဟိသမျ စိမ်းလန်းစာ မြက်ပင်တိစာ လောင်လားခလီရေ။

8 ယင်းနောက် ဒုတိယ ဂေါင်းခင်နတ်သားစာ ကိုယ့် ဘောကို မှုတ်လီရေ။ ယင်းခါ တောက်လောင်နီစာ တောင်ကြီးပိုင် တစ်ခုကို ပင်လယ်တို့ ဘိုက်ချလိုက်လီရေ။ ယင်းအတွက်န ပင်လယ်မာ ရီသုံးပုံတစ်ပုံ သွီးဖြစ်လားခလီရေ၊ 9 ပင်လယ်ထဲမာ အသက်ရှင် သတ္တာဝါ သုံးပုံတစ်ပုံ သီလားခလီရေ အရာ သင်္ဘောသုံးပုံတစ်ပုံ ပျက်ဆုံးလားခလီရေ။

10 – 11 ယင်းနောက် တတိယ ဂေါင်းခင်နတ်သားစာ ကိုယ့်ဘောကို မှုတ်လီရေ။ ယင်းခါ ဂေါင်းခင်က တောက်နီစာ မီးခဲပိုင် ကြယ်ကြီးတစ်လုံးစာ ချောင်းသုံးပုံတစ်ပုံန ရီမျက်တွင်း သုံးပုံတစ်ပုံမာ ကြွီကျလီရေ။ ထိုကြယ်ကြီးနာမည် အဓိပ္ပါယ်ကား “ဆီးခါး” ဖြစ်တေ။ ယင်း ကြယ်ကြီး အကြောင်းန ရီသုံးပုံတစ်ပုံ ခါးလားခလီရေ။ အရာ ထို ရီ ခါးရေအတွက်န လူအများကြီး သီလားခကတ်လီရေ။

12 ယင်းနောက် စတုတ္ထ ဂေါင်းခင်နတ်သားစာ ကိုယ့်ဘောကို မှုတ်လီရေ။ ယင်းခါ နီသုံးပုံတစ်ပုံ၊ လသုံးပုံတစ်ပုံ အရာ ကြယ်သုံးပုံတစ်ပုံမာ အက်ကျလီရေအတွက်န မိုက်လားခလီရေ။ အရာ ရက်သုံးပုံတစ်ပုံန ညဉ့်သုံးပုံတစ်ပုံလည်း အလင်း မဟိလီဗျာ။

13 ယင်းနောက် ငါ ကြည့်လိုက်တေခါ ဂေါင်းခင်အလယ်မာ စွန်ပုတ်ကြီး တစ်ကောင် ပျံနီစာကို မြင်လီရေ။ အရာ ထိုစွန်ပုတ်ကြီးစာ အားန အော်ရို့ ပြောလီရေ၊ “ကျန်စာ ဂေါင်းခင်နတ်သား သုံးပါး ကိုယ်ရို့ ဘောတိကို မှုတ်ကတ်တေခါ ဒေ ကမ္ဘာမာ လူရို့အတွက် ဖီးဒုက္ခ ကျရောက်လိမည်၊ ဖီးဒုက္ခ ကျရောက်လိမည်၊ ဖီးဒုက္ခ ကျရောက်လိမည်။”