Romans 1

နှုတ်ဆက်ခြင်း

သို့၊ ရောမမြို့ အသင်းတော်။

1ငါ ပေါလု၊ ငါစာ ခရစ်တော်ယေရှု၏ ကျွန်တစ်ယောက် ဖြစ်တေ။ ငါ ရောမမြို့မာဟိစာ နင်ရို့ ကျုံသူရို့တို့ ဒေ စာစောင်ကို ရွီးလိုက်တေ။ ထာဝရဘုရားစာ ငါ့ကို ကိုယ့်တမန်တော်အဖြစ် ခေါ်လီရေ အရာ သူ၏ သတင်းကောင်းကို ဟောပြောဖို့အတွက် ငါ့ကို ရွီးကောက်ယူလီရေ။

2အယင်ကပင် ထိုသတင်းကောင်းကို လူရို့တို့ ပို့ပီးဖို့ ဆိုပြီးကေ ထာဝရဘုရား ဂတိခံလီရေ။ ထိုသတင်းကောင်းကို ပို့ပီးဖို့အတွက် သူစာ ကိုယ့်ဘုရားသတင်းပို့သူရို့ကို အသုံးပြုလီရေ။ ထိုဂတိတော် အကြောင်းကို သန့်ရှင်းစာ ကျမ်းစာမာ ရွီးရို့ ဟိလီရေ။ 3– 4ထိုသတင်းကောင်းစာ ထာဝရဘုရား၏ သားတော် အကြောင်း ဖြစ်တေ။ ထိုသားတော်စာ ယေရှုခရစ်တော် ဖြစ်တေ အရာ ယေရှုခရစ်တော်စာ ငါရို့မာ အသျှင် ဖြစ်တေ။ ယေရှုခရစ်တော်စာ လူ့ဇာတိအဖြစ် ဒါဝိဒ်မင်း၏ အမျိုးအနွယ်က မွီးဖွားလာလီရေ။ ယေကေလည်း သူစာ ထာဝရဘုရား၏ သားတော် ဖြစ်တေဆိုစာကို သန့်ရှင်းသောဝိညာဉ်တော်၏ တန်ခိုးကနီရို့ ဖေါ်ပြလီရေ၊ အရာ သူစာ ကိုယ့်မဟာတန်ခိုးန သီရာက ပြန်ရှင်ထမြောင့်ခြင်းကနီရို့လည်း ထာဝရဘုရား၏ သားတော် ဖြစ်တေဆိုစာကို ဖေါ်ပြလီရေ။ 5ထာဝရဘုရားစာ ယုဒမဟုတ်သူရို့ကို ကျုံခြင်းတရားန နာခံခြင်းလမ်းတို့ ယူလာချင်လီရေ၊ အကြောင်းကား သူစာ ခရစ်တော်၏ နာမည်ကို ချီမွမ်းခြင်း ရစီချင်လီရေ။ ယင်းအတွက်န သူစာ ခရစ်တော်ကနီရို့ ငါ့ကို သနားရို့ တမန်တော်အရာမာ ခန့်ထားလီရေ။ 6ထိုလူရို့အထဲမာ နင်ရို့လည်းသောက် ပါကတ်တေ။ ထာဝရဘုရားစာ ယေရှုခရစ်တော်၏ လူဖြစ်ဖို့အတွက် နင်ရို့ကို ခေါ်လီရေ။

7ရောမမြို့မာ ဟိကတ်စာ နင်ရို့ အားကုံးသူတို့ ငါ ဒေ စာစောင်ကို ရွီးလိုက်တေ။ ထာဝရဘုရားစာ နင်ရို့ကို ချစ်ရို့ ကိုယ့်လူဖြစ်ဖို့အတွက် ခေါ်လီရေ။ ငါရို့မာ အဖထာဝရဘုရားန အသျှင်ယေရှုခရစ်တော်စာ နင်ရို့ကို ကျေးဇူးတော်န ငြိမ်းချမ်းခြင်း ပီးပါစီ။

ပေါလု ရောမမြို့တို့ လားဖို့ တောင်းတခြင်း

8နင်ရို့ ကျုံခြင်းတရား၏ သတင်းကို ကမ္ဘာတစ်လုံးသား ကြားရကတ်ပျာ။ ယင်းအတွက်န ငါ ပထမဆုံး နင်ရို့ အားကုံးသူအတွက် ယေရှုခရစ်တော်ကနီရို့ ငါ့ ထာဝရဘုရားကို ကျေးဇူးတင်ရေ။ 9ငါ နင်ရို့အတွက် အမြဲတိုင်း ဆုတောင်းနီရေဆိုစာကို ထာဝရဘုရား ကိုယ်တိုင် သက်သီခံ ဖြစ်တေ။ ငါစာ ထာဝရဘုရား၏ သားတော် အကြောင်း သတင်းကောင်းကို ဟောပြောနီရေ။ ယင်းပိုင် ဟောပြောခြင်းကနီရို့ ငါစာ စိတ်ပါ-ကိုယ်ပါ ထာဝရဘုရားကို ဝတ်ပြုနီရေ။ 10ငါ နင်ရို့တို့ လာဖို့ ရလတ်အောင်အတွက် ထာဝရဘုရားဘားမာ ဆုတောင်းနီရေ။ ထာဝရဘုရား အလိုဟိရေဆိုကေ ဒေချိန်းခေါက် ငါ နင်ရို့တို့ လာဖို့စာ အခွင့်ရေးကို ရမည်။ 11နင်ရို့စာ ဝိညာဉ်ရေးဖက်က ခိုင်မာခြင်း ဟိကတ်ပတ်စီအတွက် ငါ နင်ရို့ကို ဝိညာဉ်၏ ဆုကျေးဇူး ပီးချင်ရေ။ ယင်းအတွက်န ငါ ကောင်းကောင်း နင်ရို့န အတွိခံချင်ရေ၊ 12အကြောင်းကား ယင်းခါ ငါရို့ အားကုံးသူ ကိုယ်ရို့ ကျုံခြင်းတရားကနီရို့ တစ်ယောက်က တစ်ယောက် စိတ်အား ရနိုင်ကတ်ဖို့။

13ညီအစ်ကိုမောင်နမှရို့၊ ငါ နင်ရို့တို့ အခါပေါင်းများစွာ လာဖို့ ကြိုးစားရို့အတိုင်းလည်း တားဆီးခြင်းကို ခံရလီရေဆိုစာကို ငါ နင်ရို့ကို သိစီချင်ရေ။ အခြားနေရာတိမာ ဟိကတ်စာ ယုဒမဟုတ်သူရို့အထဲမာ ငါ တရားတော်ကို ဟောပြောရို့ ဝိညာဉ်နဆိုင်စာ အကျိုးကို ရလီရေ။ ယင်းပိုင်တထန် နင်ရို့အထဲမာလည်း ဝိညာဉ်နဆိုင်စာ အကျိုးကို ရစီချင်ရေ။ ယင်းအတွက်န ငါ နင်ရို့တို့ လာချင်စာ ဖြစ်တေ။ 14ငါ့မာ အားကုံးသူကို ပြုဇုဖို့စာ တာဝန် ဟိရေ။ လူရိုင်း ဖြစ်စီ၊ လူယဉ် ဖြစ်စီ အရာ ပညာတတ်သူ ဖြစ်စီ၊ ပညာမတတ်သူ ဖြစ်စီ၊ အားကုံးသူအတွက် ငါ့မာ တာဝန် ဟိရေ။ 15ယင်းအတွက်န ရောမမြို့မာ ဟိကတ်စာ နင်ရို့ဘားမာလည်း ယေရှုခရစ်တော်၏ အကြောင်း သတင်းကောင်းကို ဟောပြောဖို့အတွက် ငါ အားပါရေ။

သတင်းကောင်း၏ တန်ခိုး

16ငါစာ ယေရှုခရစ်တော်၏ အကြောင်း သတင်းကောင်းကို ဟောပြောဖို့အတွက် အသျှင်းလည်း မရှက်၊ အကြောင်းကား ထိုသတင်းကောင်းစာ ထာဝရဘုရား၏ တန်ခိုး ဖြစ်တေ။ ထာဝရဘုရားစာ ထိုတန်ခိုးန ဟိသမျ ကျုံသူရို့ကို ကယ်တင်ခြင်း ပီးရေ။ ပထမဆုံး ယုဒလူမျိုးရို့ကို၊ ယင်းနောက် ယုဒမဟုတ်သူရို့ကို ကယ်တင်ခြင်း ပီးရေ။ 17အကြောင်းကား ထာဝရဘုရား လူကို ဇာပိုင်ပျင်ရို့ သူတော်ကောင်းအဖြစ် လက်ခံရေလည်းဆိုစာကို ထိုသတင်းကောင်းကနီရို့ ဖေါ်ပြလီရေ။ ထာဝရဘုရားစာ အစကပင် အဆုံးတိုင်အောင် သက်သက် ကျုံခြင်းတရားကနီရို့ရာ လူကို သူတော်ကောင်းအဖြစ် လက်ခံရို့ လာလီရေ။ ကျမ်းစာမာ ရွီးရို့ ဟိရေ၊ “သူတော်ကောင်းအဖြစ် လက်ခံခြင်းကို ရသူစာ ကျုံခြင်းတရားကနီရို့ အသက်ကို ရလိမည်။”

ဟိသမျ လူရို့ ပြစ်မှားခြင်း

18လူရို့စာ ထာဝရဘုရား၏ မှန်ကန်ခြင်းကို မတရားစာန ဖုံးထားရေ အရာ သူရို့စာ ထာဝရဘုရားကို ရိုသေကြောက်လန့်ခြင်း မထားဘိုင်းန ဟိသမျ မတရားအလုပ်ကို လုပ်နီကတ်တေ။ ယင်းအတွက်န ဂေါင်းခင်ဘုံကနီရို့ ထာဝရဘုရား၏ အငြိုဒေါသစာ လူရို့ဘားမာ ကျရောက်နီရေ။ 19လူရို့ ထာဝရဘုရား၏ အကြောင်းကို သိဖို့စာအဆီလှောက်ကို ပပွင့်လလင်း သိကတ်တေ၊ အကြောင်းကား ထာဝရဘုရား ကိုယ်တိုင် ကိုယ့်အကြောင်းကို လူရို့ဘားမာ ဖေါ်ပြဗျာ။ 20လူ့မျက်စိန မမြင်ရစာ ထာဝရဘုရား၏ ဂုဏ်ပါရမီ ဟို့ ခေါ်စာ ထာဝရ တန်ခိုးန အကျင့်သီလတိစာ ကမ္ဘာကို ဖန်ဆင်းရေလှောက်ကပင် ပပွင့်လလင်း ပေါ်ထွန်းလာဗျာ။ လူရို့စာ ထာဝရဘုရား၏ ဖန်ဆင်းခြင်းတိကနီရို့ သူ၏ တန်ခိုးန အကျင့်သီလတိကို အလှပ နားလည်နိုင်ရေ။ ယင်းအတွက်န လူရို့မာ ကိုယ်ရို့ လုပ်ကတ်စာ ဆိုးယုတ်စာ အလုပ်တိအတွက် အကြောင်းပြစရာ တစ်ခုလည်း မဟိဗျာ။ 21လူရို့စာ ထာဝရဘုရားကို သိရို့အတိုင်းလည်း ထာဝရဘုရားကို ချီမွမ်းခြင်း မပြုလီကတ် အရာ သူ့ကို ကျေးဇူးလည်း မတင်လီကတ်။ သူရို့စာ ထာဝရဘုရား၏ အကြောင်းနပတ်သပ်ရို့ အမှား စဉ်းစားနီကတ်ပျာ။ ယင်းအတွက်န သူရို့မာ စိတ်နှလုံးစာ မှောင်မိုက်လားခဗျာ။ 22အရာ သူရို့စာ ကိုယ်ရို့ကို ပညာသျှင် ဖြစ်တေ ဟို့ ပြောကတ်တေ၊ ယေကေလည်း သူရို့စာ အမှန် လူဘော ဖြစ်လားခကတ်ပျာ။ 23ထာဝရဘုရားစာ သီခြင်းနကင်းစာ အသျှင် ဖြစ်တေ အရာ သူစာ ဘုန်းတန်ခိုးနလည်း ပြည့်စုံရေ။ ယေကေလည်း သူရို့စာ ထာဝရဘုရားကို မကိုးကွယ်ဘိုင်း တည်မြဲခြင်း မဟိစာ လူရုပ်တု၊ ငှက်ရုပ်တု၊ တရိစ္ဆန်ရုပ်တု၊ ရင်ဖတ်န တွားရို့လားစာ သတ္တဝါ ရုပ်တုတိကို ကိုးကွယ်နီကတ်ပျာ။

24ယင်းအတွက်န ထာဝရဘုရားစာ သူရို့ စိတ်နှလုံးမာဟိစာ ကာမဂုဏ်အလိုဆန္ဒအတိုင်း ဆိုးယုတ်စာ အလုပ်ကို လုပ်ရို့ နီကတ်ပတ်စီအတွက် ရွှတ်လိုက်လီရေ။ ယင်းအတွက်န သူရို့စာ ကိုယ်ရို့အချင်းချင်း တစ်ယောက်န တစ်ယောက် ဆိုးယုတ်စာ အလုပ်ကို လုပ်ရို့ ကိုယ်ရို့ခန္ဓာကို သိက္ခာ ချကတ်ပျာ။ 25သူရို့စာ ထာဝရဘုရား၏ မှန်ကန်ခြင်းကို စွန့်ရို့ မုတ်သားကို လက်ခံကတ်ပျာ အရာ ဖန်ဆင်းသျှင်ကို ပယ်ရို့ ဖန်ဆင်းစာ ဝန်တိကို ကိုးကွယ်နီကတ်ပျာ။ ယေကေလည်း ဖန်ဆင်းစာ အသျှင်ထာဝရဘုရားစာ ကမ္ဘာအဆက်ဆက် ဘုန်းကြီးပါစီ။ အာမန်။

26လူရို့စာ ထိုဆိုးယုတ်စာ အလုပ်တိကို လုပ်တေအတွက်န ထာဝရဘုရားစာ သူရို့ကို ညစ်ညူး-ရှက်ကောင်းဖွယ်ရာ ကာမဂုဏ်အပြစ်လမ်းတို့ ရွှတ်လိုက်လီရေ။ မိန်းမရို့စာ ယောက်ျားရို့န ပကတိ ပေါင်းဖေါ်ခြင်းကို ပယ်ရို့ ကိုယ်ရို့ မိန်းမချင်း သဘာဝန မကိုက်ညီစာ ကာမဂုဏ်ကို လိုက်စားနီကတ်ပျာ။ 27ယင်းပိုင်တထန် ယောက်ျားရို့လည်း မိန်းမရို့န ပကတိ ပေါင်းဖေါ်ခြင်းကို ပယ်ရို့ ကိုယ်ရို့ ယောက်ျားချင်း သဘာဝန မကိုက်ညီစာ ကာမဂုဏ်ကို လိုက်စားနီကတ်ပျာ။ ထိုအလုပ်တိစာ ကောင်းကောင်း ရှက်ကောင်းဖွယ်ရာ အပြစ်တိ ဖြစ်တေ။ ယင်းအတွက်န သူရို့ အားကုံးသူ ကိုယ်ရို့မာ မှားယွင်းခြင်းန ထိုက်တန်စာ အပြစ်ဒါဏ်ကို ခံရကတ်ပျာ။

28လူရို့ ကိုယ့်ကို ဂရုမစိုက်တေအတွက်န ထာဝရဘုရားစာ သူရို့ကို မိုက်မဲစာ စဉ်းစားချက်တို့ ရွှတ်လိုက်လီရေ။ ယင်းအတွက်န သူရို့စာ မလုပ်သင့်စာ အလုပ်တိကို လုပ်နီကတ်တေ။ 29သူရို့ ဘဝမာ မတရားပေါင်းမျိုးစုံ လုပ်ခြင်း၊ ဆိုးယုတ်ခြင်း၊ လောဖတတ်ခြင်း၊ အကျင့်ပျက်ခြင်း၊ မနာလိုခြင်း၊ လူအသက်ကို သတ်ခြင်း၊ ရန်တွိခြင်း၊ လိမ်လှည့်ခြင်း၊ အခြားလူကို ဖျက်စီးဖို့စာ စိတ်သဖေါထားခြင်း အရာ သူရို့မာ အခြားတစ်ယောက် အကြောင်းကို စကားတင်းပြောခြင်းန ပြည့်စုံနီရေ။ 30အရာ သူရို့ ဘဝမာ အခြားလူကို ပုတ်ခတ်ရို့ စကားပြောခြင်း၊ ထာဝရဘုရားကို မုန်းခြင်း၊ ကြမ်းတမ်းခြင်း၊ စိတ်နီကြီးခြင်း၊ ဘော်ကြော့ကြင်းခြင်း အရာ အမိအဖ စကားကို မနာခံခြင်းတိ ဟိရေ။ အရာ သူရို့စာ မတရားအလုပ်ကို လုပ်ဖို့အတွက် အသစ် နည်းလမ်းတိကို ဖေါ်ထုတ်နီကတ်တေ။ 31သူရို့စာ နားလည်ဖို့ မလိုကတ်၊ သစ္စာတရား မဟိကတ်၊ မိသားစုကို တိုင်အောင်ပင် ချစ်ခြင်းမေတ္တာ မဟိကတ် အရာ သူရို့ စိတ်နှလုံးမာ သနားကြင်နာခြင်းဆိုစာ မဟိကတ်။ 32သူရို့ ထာဝရဘုရား၏ တရားစစ်ဆေးခြင်း အကြောင်းကို အလှပ သိကတ်စာကား၊ ထိုဆိုးယုတ်စာ အပြစ်တိကို လုပ်သူရို့စာ ထိုက်တန်စာ သီဒါဏ်ကို ခံရကတ်ဖို့။ သူရို့စာ ထိုအကြောင်းကို သိရို့အတိုင်းလည်း သက်သက် ကိုယ်ရို့ လုပ်ရို့ မနီကတ်သိ။ ယင်းထက်ပင် ကိုယ်ရို့ပိုင် ထိုဆိုးယုတ်စာ အပြစ်တိကို လုပ်နီသူရို့ကိုလည်း သူရို့ အားပီးကတ်တေ။