Romans 10
1ညီအစ်ကိုမောင်နမှရို့၊ ငါ ကိုယ့်ဣသရေလလူမျိုးရို့ကို ကယ်တင်ခြင်း ရစီချင်ရေ။ ယင်းအတွက်န ငါ့စိတ်နှလုံးမာ တောင်းတခြင်းန ထာဝရဘုရားဘားမာ ငါ ဆုတောင်းရေ။ 2သူရို့စာ ထာဝရဘုရားကို ကောင်းကောင်း ကြည်ညိုကတ်တေဆိုစာကို ငါ ဝန်ခံရေ၊ ယေကေလည်း ဇာပိုင်ပျင်ရို့ ထာဝရဘုရား၏ နှစ်သက်ခြင်းကို ခံရဖို့လည်းဆိုစာကို သူရို့ မသိကတ်။ 3အကြောင်းကား ထာဝရဘုရား လူရို့ကို ဇာပိုင်ပျင်ရို့ သူတော်ကောင်းအဖြစ် လက်ခံရေလည်းဆိုစာကို သူရို့ နားမလည်လီကတ်။ အရာ လူရို့ကို သူတော်ကောင်းအဖြစ် လက်ခံစာ ထာဝရဘုရား၏ နည်းလမ်းကို သူရို့ လက်မခံလီကတ်။ ယင်းအတွက်န သူရို့စာ ကိုယ်ရို့ ကြိုးစားအားထုတ်ခြင်းကနီရို့ ထာဝရဘုရား၏ နှစ်သက်ခြင်းကို ခံရဖို့စာကို ကြည့်ကတ်လီရေ။ 4ခရစ်တော်စာ ပညှတ်တရား၏ တောင်းဆိုချက်ကို ပြည့်စုံအောင် လုပ်ရို့ ပညှတ်တရားကို အဆုံးသတ်လီရေ။ ယင်းအတွက်န ဒေဂု သူ့ကို ကျုံသူရို့စာ ထာဝရဘုရား၏ နှစ်သက်ခြင်းကို ခံရကတ်တေ။ကယ်တင်ခြင်းစာ ဟိသမျ လူရို့အတွက်
5ပညှတ်တရားကို လိုက်နာခြင်းကနီရို့ ထာဝရဘုရား၏ နှစ်သက်ခြင်းကို ခံရဖို့စာ အကြောင်းကို မောရှေ ရွီးထားခလီရေ၊ “ပညှတ်တရားမာ ဟိသမျ ပညှတ်ချက်ကို လိုက်နာသူစာ ပညှတ်တရားကနီရို့ အသက်ကို ရလိမည်။” 6ယေကေလည်း ကျုံခြင်းတရားကနီရို့ ထာဝရဘုရား၏ နှစ်သက်ခြင်းကို ခံရဖို့စာ အကြောင်းကို ကျမ်းစာမာ ရွီးရို့ ဟိရေ၊ “‘ဂေါင်းခင်ဘုံတို့ အသူ တက်ဖို့လည်း’ ဟို့ စိတ်မာ စိတ်မာ မပြောကေ့။” ယင်းအဓိပ္ပါယ်ကား၊ ခရစ်တော်ကို ချယူခဖို့အတွက် ဂေါင်းခင်ဘုံတို့ အသူ တက်ဖို့လည်း? 7မဟုတ်ကေ၊ “‘သီသူရို့နိုင်ငံတို့ အသူ ဆင်းဖို့လည်း’ ဟို့ မပြောကေ့။” ယင်းအဓိပ္ပါယ်ကား၊ ခရစ်တော်ကို အရာတစ်ပြန် အရှင်လုပ်ဖို့အတွက် သီသူရို့နိုင်ငံတို့ အသူ ဆင်းဖို့လည်း? 8ထိုအကြောင်းကို ကျမ်းစာမာ အရာလည်း ရွီးရို့ ဟိရေ၊ “ထာဝရဘုရား၏ စကားတော်စာ နင့်အနားမာ ဟိရေ အရာ နင့် ပစန နင့် စိတ်နှလုံးမာ ဟိရေ။” ငါရို့ ဟောပြောနီကတ်စာ ကျုံခြင်းတရား၏ စကားတော်စာ ထာဝရဘုရား၏ ထိုစကားတော် ဖြစ်တေ။ 9ထိုစကားတော် ဖြစ်တေကား ဒေပိုင်၊ နင်စာ ယေရှုကို အသျှင် ဖြစ်တေ ဟို့ နင့်ပစန ဝန်ခံရေဆိုကေ အရာ ထာဝရဘုရားစာ ယေရှုကို သီရာက ပြန်ရှင်ထမြောင့်စီလီရေ ဟို့ နင့် စိတ်နှလုံးမာ ကျုံရေဆိုကေ နင် ကယ်တင်ခြင်းကို ရလိမည်၊ 10အကြောင်းကား စိတ်နှလုံးမာ ကျုံရေအတွက်န ထာဝရဘုရားစာ လူရို့ကို သူတော်ကောင်းအဖြစ် လက်ခံရေ အရာ ပစန ဝန်ခံရေအတွက်န ကယ်တင်ခြင်းကို ပီးရေ။ 11ကျမ်းစာမာ ပြောထားရေ၊ “အသူမဆို ထိုအသျှင်ကို ကျုံရေဆိုကေ သူစာ စိတ်ပျက်လိမည် မဟုတ်။” 12ယုဒလူမျိုးန ယုဒမဟုတ်သူရို့အထဲမာ တစ်ခုပိုင်လည်း ခွဲခြားမှု မဟိ၊ အကြောင်းကား အားကုံးသူအတွက် အသျှင်ဆိုစာ တစ်ပါးတည်းရာ ဟိရေ။ သူစာ ကိုယ့်ဘားမာ ဆုတောင်းသူရို့ အားကုံးသူကို မတိုင်းမထွာဘိုင်းန ပဿိ သွန်ပီးရေ။ 13ကျမ်းစာမာ ရွီးရို့ ဟိရေ၊ “အသူမဆို ကယ်တင်ခြင်းကို ရဖို့အတွက် အသျှင်ထာဝရဘုရားကို ခေါ်ရေဆိုကေ သူစာ ကယ်တင်ခြင်းကို ရလိမည်။” 14ယေကေလည်း ကိုယ်ရို့ မကျုံသူကို သူရို့ ဇာပိုင်ပျင်ရို့ ခေါ်ကတ်ဖို့လည်း? အရာ မကြားဖူးသူကို သူရို့ ဇာပိုင်ပျင်ရို့ ကျုံကတ်ဖို့လည်း? အရာ တစ်ယောက်လည်း မပြောပြဆိုကေ ဇာပိုင်ပျင်ရို့ ကြားကတ်ဖို့လည်း? 15အရာ ပြောပြဖို့အတွက် တစ်ယောက်ကိုလည်း ရွှတ်ဖို့သူမဟိဆိုကေ ဇာပိုင်ပျင်ရို့ ပြောပြဖို့လည်း? ကျမ်းစာမာ ရွီးရို့ ဟိရေ၊ “သတင်းကောင်းကို ဟောပြောဖို့ လာသူရို့မာ အခြီတိစာ လှပရေ။” 16ယေကေလည်း ထိုသတင်းကောင်းကို အားကုံးသူ လက်မခံလီကတ်။ ဘုရားသတင်းပို့သူ ဟေရှာယစာ ပြောလီရေ၊ “အိုး အသျှင်၊ အကျွန်ရို့ ဟောပြောစာ တရားတော်ကို အသူ ကျုံလီပါရေလည်း?” 17ယင်းအတွက်န ထာဝရဘုရား၏ စကားတော်ကို နားထောင်ခြင်းကနီရို့ရာ ကျုံခြင်းတရား ရောက်လာရေ အရာ ခရစ်တော်၏ အကြောင်းကို ဟောပြောခြင်းကနီရို့ရာ ထိုစကားတော်ကို ကြားရရေ။ 18ယင်းပိုင်ဆိုကေ ငါ ပြောမည်၊ ဣသရေလလူမျိုးရို့ ထိုစကားတော်ကို မကြားဖူးလီကတ်လော? ဟုတ်တေ၊ သူရို့ ကြားဖူးလီကတ်တေ၊ အကြောင်းကား ကျမ်းစာမာ ရွီးရို့ ဟိရေ၊“ထိုစကားတော်ကို ဟောပြောသူရို့ အသံစာ ကမ္ဘာတစ်လုံးမာ ပြန့်ကျယ်လားခဗျာ၊
အရာ သူရို့ စကားတိစာ ကမ္ဘာအစွမ်းတို့တိုင်အောင် ပြန့်ကျယ်လားခဗျာ။” 19ငါ အရာတစ်ပြန် ပြောမည်၊ ထိုစကားတော်ကို ဣသရေလလူမျိုးရို့ နားမလည်လီကတ်လော? နားလည်လီကတ်တေ၊ အကြောင်းကား ထာဝရဘုရားစာ မောရှေကနီရို့ ပြောလီရေ၊
“ရွီရာမာ မထည့်စာ လူမျိုးရို့ကို အသုံးပြုရို့ ငါ နင့်ကို မနာလိုစိတ် သွင်းပီးဖို့၊
အရာ ပညာတုံး လူမျိုးတစ်မျိုးကို အသုံးပြုရို့ ငါ နင့်ကို မန်မြှောင့်ပီးဖို့။” 20ယင်းနောက် ထာဝရဘုရားစာ ဟေရှာယကနီရို့ အရာလည်း ပြောလီရေ၊
“ငါ့ကို မရှာသူရို့စာ ငါ့ကို တွိကတ်ပျာ၊
အရာ ငါ့ကို မခေါ်သူရို့ဘားမာ ငါ ကိုယ့်ကို ဖေါ်ပြဗျာ။” 21ယေကေလည်း ထာဝရဘုရားစာ ဣသရေလလူမျိုးရို့ အကြောင်းကို ပြောလီရေ၊
“ငါ သူရို့ကို လက်ခံဖို့အတွက် တစ်ရက်လုံး စောင့်နီလီရေ၊
ယေကေလည်း သူရို့စာ မနာခံသူန တစ်ဖက်ခွတ် ဟိကတ်လီရေ။”
Copyright information for
RmzSC