Romans 11

ဣသရေလလူမျိုးကို ထာဝရဘုရား သနားခြင်း

1ယင်းပိုင်ဆိုကေ ငါ မီးမည်၊ ထာဝရဘုရားစာ ကိုယ့်လူရို့ကို ငြင်းပယ်ဘိုက်လိုက်ပျာလော? တစ်ခါလည်း မငြင်းပယ်! အကြောင်းကား ငါ ကိုယ်တိုင် ဣသရေလလူမျိုး တစ်ယောက် ဖြစ်တေ၊ ငါစာ အာဗြဟံ၏ အမျိုးအနွယ်သား တစ်ယောက် ဖြစ်တေ အရာ ထိုအမျိုးအနွယ်အထဲမာ ငါစာ ဗင်္ယာမိန်၏ အုပ်သားတစ်ယောက် ဖြစ်တေ။ 2အယင်ကပင် ကိုယ်ရွီးကောက်ထားလီစာ လူရို့ကို ထာဝရဘုရား မငြင်းပယ်လီ။ ဘုရားသတင်းပို့သူ ဧလိယ အကြောင်းကို ကျမ်းစာမာ ဇာ ပြောထားရေလည်းဆိုစာကို နင်ရို့ မသိကတ်လော? ဣသရေလလူမျိုးရို့ကို ဆန့်ကျင်ရို့ သူစာ ထာဝရဘုရားဘားမာ ဒေပိုင် ဆုတောင်းလီရေ၊ 3“အသျှင်၊ ဒေ သူရို့စာ ကိုယ်တော်၏ ဘုရားသတင်းပို့သူရို့ကို အသီသတ်ဘိုက်လိုက်ကတ်ပါဗျာ အရာ ကိုယ်တော်၏ ယဇ်ပလ္လင်တိကို ဖြိုဘိုက်လိုက်ကတ်ပါဗျာ။ ဒေဂု အကျွန် တစ်ယောက်တည်းရာ ကျန်ဟိပါရေ အရာ သူရို့စာ အကျွန့်ကိုလည်း အသီသတ်ဖို့ ကြိုးစားနီကတ်ပါရေ။” 4ယေကေလည်း ထာဝရဘုရား ဧလိယကို ဇာပိုင် အဖြေပီးလီရေလည်း? ထာဝရဘုရားစာ သူ့ကို အဖြေပီးလီရေ၊ “ငါ ကိုယ့်အတွက် လူခုနစ်ထောင်ကို ချန်ထားလိုက်ပျာ၊ အကြောင်းကား သူရို့စာ ဗာလနတ်ကို မကိုးကွယ်လီကတ်။” 5ယင်းပိုင်တထန် ဒေဂုလည်း ထာဝရဘုရား သနားရို့ ဣသရေလလူမျိုးအထဲက တစ်ချိုးလူရို့ကို ရွီးကောက်ထားဗျာ။ 6ကိုယ့်လူရို့ကို သနားရို့ ထာဝရဘုရား ရွီးကောက်ရို့ ထားလီရေဆိုကေ ယင်းသျှင့်စာ သူရို့ ကောင်းမှုကုသိုလ် အကြောင်းန မဟုတ်၊ အကြောင်းကား ကောင်းမှုကုသိုလ် အကြောင်းန ရွီးကောက်ရို့ ထားလီရေဆိုကေ သနားကြင်နာခြင်းစာ အခမဲ့ လက်ဆောင် မဖြစ်နိုင်။ 7ယင်းပိုင်ဆိုကေ သိရစာကား၊ ဣသရေလလူမျိုးရို့စာ ထာဝရဘုရား၏ နှစ်သက်ခြင်းကို ခံရဖို့အတွက် ကြိုးစားလီကတ်တေ၊ ယေကေလည်း သူရို့စာ နှစ်သက်ခြင်းကို မခံရလီကတ်။ ယင်းထက်ပင် ထာဝရဘုရား၏ ရွီးကောက်ခြင်းကို ခံရသူရို့ရာ ထိုနှစ်သက်ခြင်းကို ခံရလီကတ်တေ၊ ယေကေလည်း ကျန်ဟိကတ်စာ ဣသရေလလူမျိုးရို့ အားကုံးသူမာ စိတ်နှလုံးစာ ကျောက်ပိုင် ကျန်းလားခဗျာ။ 8ယင်းပိုင်တထန် ကျမ်းစာမာ ရွီးရို့ ဟိရေ၊
“သူရို့ စိတ်နှလုံးကို ထာဝရဘုရား ထိုင်းအောင် လုပ်ဘိုက်လိုက်ပျာ။
ယင်းအတွက်န ဒေနိတိုင်အောင် သူရို့စာ မျက်စိဟိရို့လည်း မမြင်ရကတ်၊
အရာ နားဟိရို့လည်း မကြားရကတ်။”

9အရာ ဒါဝိဒ်မင်းလည်း ပြောခလီရေ၊
“သူရို့ စားပွဲတိစာ ခုတ်နတူလီစီ၊
သူရို့မာ ပဿိတိစာ ကွန်နတူလီစီ၊
အကြောင်းကား သူရို့စာ အဆုံးမာ အပြစ်ဒါဏ်
ခံရကတ်ဖို့ဆိုစာကို သူရို့ မသိကတ်။
10သူရို့ ကြည့်ရို့ မမြင်ရအောင် သူရို့မာ မျက်စိ ကန်းလီစီ၊
အရာ ဝန်လီးဒုက္ခကို ခံရရေအတွက်န သူရို့မာ ခါးလည်း အမြဲတိုင်း ကုန်းလီစီ။”

11ယင်းပိုင်ဆိုကေ ယုဒလူမျိုးရို့စာ ထာဝရပတ်လုံးအတွက် ခလုံးတိုက်ရို့ လဲကျလားခကတ်ပျာလော? တစ်ခါလည်း မလဲကျ။ ယင်းထက်ပင် သူရို့ အပြစ်အကြောင်းန ယုဒမဟုတ်သူရို့စာ ကယ်တင်ခြင်း ရဖို့စာအခွင့်ကို ရကတ်ပျာ၊ အကြောင်းကား ထာဝရဘုရား၏ အလိုတော် ဖြစ်တေကား၊ ယုဒလူမျိုးရို့စာ ယုဒမဟုတ်သူရို့ကို မနာလိုဖြစ်ရို့ ကယ်တင်ခြင်းကို ရချင်ကတ်ပတ်စီအတွက် ဖြစ်တေ။ 12ယင်းပိုင်ဆိုကေ မြင်ရစာကား၊ ယုဒလူမျိုးရို့ အပြစ်အကြောင်းန ယုဒမဟုတ်သူရို့မာ အများကြီး အကျိုးကို ရကတ်လီရေ။ ဟုတ်တေ၊ သူရို့ ဆုံးရှုံးခြင်း အကြောင်းန ယုဒမဟုတ်သူရို့မာ အများကြီး အကျိုးကို ရကတ်လီရေ။ ယင်းပိုင်ဆိုကေ ယုဒလူမျိုးရို့ ထာဝရဘုရားတို့ စိတ်လှည့်ရို့ လာကတ်တေခါ ယုဒမဟုတ်သူရို့ အရာလည်း ပိုရို့ ပဿိကို ခံရကတ်ဖို့ မဟုတ်လော!

ယုဒမဟုတ်သူရို့ ကယ်တင်ခြင်းကို ခံရခြင်း

13အိုး ယုဒမဟုတ်သူရို့၊ ငါ နင်ရို့ကို ပြောရေ၊ ငါ တမန်တော်အနေန ယုဒမဟုတ်သူရို့ဘားမာ သာသနာပြုနီရေ။ ငါ တမန်တော်အနေန ကိုယ့်အလုပ်ကို ကောင်းကောင်း အရေးကြီးရေ ဟို့ မှတ်တေ။ 14အကြောင်းကား ငါ ကိုယ့်ယုဒလူမျိုးရို့ကို မနာလိုစိတ် သွင်းပီးရို့ သူရို့အထဲက တစ်ချိုးလူရို့ကို ကယ်တင်ချင်ရေ။ 15ထာဝရဘုရားစာ ယုဒလူမျိုးရို့ကို ငြင်းပယ်ရို့ ယုဒမဟုတ်သူရို့န ပြန်ပေါင်းလီရေ။ ယင်းပိုင်ဆိုကေ ထာဝရဘုရား အရာတစ်ပြန် ယုဒလူမျိုးရို့ကို လက်ခံရေခါ သူရို့အခြေအနေ ဇာပိုင် ဖြစ်ဖို့လည်း? သူရို့စာ သီရာက ပြန်ရှင်ထမြောင့်ကတ်စာ လူရို့နတူဖို့ မဟုတ်လော? 16ဂျုံမုန့်တစ်ခဲအထဲက ပထမ လုပ်စာပေါင်မုန့်ကို ယူရို့ ထာဝရဘုရားဘားမာ လှူရေဆိုကေ ဂျုံမုန့်တစ်ခဲလုံး သန့်ရှင်းရေ။ ဝါဟောင်းပင်မာ အမြစ်တိ သန့်ရှင်းရေဆိုကေ အခက်အလက်တိလည်း သန့်ရှင်းရေ။ ယင်းပိုင်တထန် အာဗြဟံ၏ အမျိုးအနွယ်သားရို့လည်း သန့်ရှင်းကတ်ဖို့။

17– 18ထိုဝါဟောင်းပင်က တစ်ချိုးအခက်အလက်တိကို ခွတ်ရို့ နင့်ပိုင် တောဝါဟောင်းပင်က အခက်အလက်တိကို ထိုအငုတ်တိမာ ဆက်လီရေ။ အရာ နင်စာ ထိုဝါဟောင်းပင်အစစ်က အရည်ဩဇာကို စုတ်ငင်နီရေ။ ယေကေလည်း အခွတ်ခံစာ အခက်အလက်တိထက် နင် ကိုယ့်ကိုယ်ကို အကြီးအကျယ် မမှတ်ကေ့၊ အကြောင်းကား နင် အမြစ်တိကို အရည်ဩဇာ ပီးထားစာ မဟုတ်။ ယင်းထက်ပင် အမြစ်တိရာ နင့်ကို အရည်ဩဇာ ပီးထားရေ။

19နင် ဒေပိုင် ပြောနိုင်စရာ ဟိရေ၊ “ငါ့ကို ဆက်ဖို့အတွက် ထိုအခက်အလက်တိကို ခွတ်ဘိုက်လိုက်တေ။” 20ဟုတ်တေ၊ နင့်စကား မှန်ရေ! ယေကေလည်း သူရို့စာ ကိုယ်ရို့ မကျုံရေအတွက်န အခွတ်ခံရလီကတ်တေ အရာ နင် ကျုံရေအတွက်န ထိုဝါဟောင်းပင်အစစ်မာ အဆက် ခံရလီရေ။ ယင်းအတွက်န နင် ဘော်ကြော့မကြင်းကေ့။ ယင်းထက်ပင် ထာဝရဘုရားကို ရိုသေကြောက်လန့်ခြင်းထား၊ 21အကြောင်းကား ထိုဝါဟောင်းပင်အစစ်က အခက်အလက်တိကို တိုင်အောင်ပင် ထာဝရဘုရား မတာလီဆိုကေ နင့်ကိုလည်း တာလိမည် မဟုတ်။

22ယင်းအတွက်န ထာဝရဘုရား ဇာလှောက် သနားကြင်နာတတ်တေလည်းဆိုစာကို အရာ ဇာလှောက် ခက်ခဲရေလည်းဆိုစာကို နင် စဉ်းစားကြည့်။ ထာဝရဘုရားစာ မနာခံသူရို့အတွက် ကောင်းကောင်း ခက်ခဲရေ၊ ယေကေလည်း နင် ထာဝရဘုရား၏ သနားကြင်နာခြင်းကို အားကိုးရေဆိုကေ ထာဝရဘုရား နင့်ကို သနားကြင်နာလိမည်။ ယင်းပိုင် မဟုတ်ဆိုကေ နင်လည်းသောက် ခွတ်ဘိုက်ခြင်းကို ခံရလိမည်။ 23အရာ ဣသရေလလူမျိုးရို့စာ ကျုံခြင်းတရား မဟိစာစိတ်ကို စွန့်ရို့ ထာဝရဘုရားတို့ လာကတ်တေဆိုကေ ကိုယ့်အပင်အငုတ်မာ ပြန်ရို့ ဆက်ခြင်းကို ခံရကတ်ဖို့၊ အကြောင်းကား ဒေပိုင် ဆက်ဖို့စာ အလုပ်ကို ထာဝရဘုရားရာ လုပ်နိုင်ရေ။ 24နင်စာ တစ်ချိန်ခါ တောဝါဟောင်းပင်က အခက်အလက် ဟိလီရေ အရာ နင့်ကို ထိုအပင်က ခွတ်ယူခရို့ ဥယျာဉ်ထဲမာဟိစာ ဝါဟောင်းပင်အစစ်မာ စနစ်မကျဘိုင်းန ဆက်ပီးလီရေ။ ယင်းပိုင်ဆိုကေ ဝါဟောင်းပင်အစစ်က အခက်အလက်တိကို ကိုယ့်အပင်အငုတ်မာ အရာတစ်ပြန် အရွယ်ကာသား ဆက်ပီးဖို့ မဟုတ်လော?

ဟိသမျ လူရို့ကို ထာဝရဘုရား သနားခြင်း

25ညီအစ်ကိုမောင်နမှရို့၊ နင်ရို့ ကိုယ့်ကိုကိုယ် ညာဏ်ပညာသျှင် ဟို့ မမှတ်ရအောင် ငါ နင်ရို့ကို ဖုံးရွှက်စာ မှန်ကန်ခြင်းတစ်ခုကို နားလည်ပြချင်ရေ။ ထိုမှန်ကန်ခြင်းစာ ဒေပိုင်၊ ယုဒမဟုတ်သူရို့အထဲက ယေရှုခရစ်တော်ကို ကျုံသူရို့မာ လူဦးရေ မပြည့်သကြား ယုဒလူမျိုးအထဲက များကာ လူရို့မာ စိတ်နှလုံး ပြောင်းလှဲခြင်း ဟိလိမည် မဟုတ်။ 26ဟိသမျ ဣသရေလလူမျိုးရို့ ကယ်တင်ခြင်းကို ရကတ်ဖို့စာ အကြောင်းကို ကျမ်းစာမာ ဒေပိုင် ရွီးရို့ ဟိရေ၊
“ဇိအုန်တောင်က ကယ်တင်သျှင် ကြွလာလိမည်၊
သူစာ ယာကုပ်၏ အမျိုးအနွယ်သားရို့ အပြစ်တိကို ဖျောက်ဘိုက်လိမည်။
27ငါစာ သူရို့အထဲက အပြစ်တိကို ဖျောက်ဘိုက်တေခါ
ငါ သူရို့န ဂတိတော် စာချုပ်အသစ်တစ်ခု ထိုးဖို့။”

28ဣသရေလလူမျိုးရို့စာ သတင်းကောင်းကို ငြင်းပယ်ရေအတွက်န ဒေဂု ထာဝရဘုရား၏ ရန်သူ ဖြစ်ကတ်တေ။ ဒေပိုင် ဖြစ်ပျက်ခြင်း အကြောင်းကား နင်ရို့ ကောင်းကျိုးရေးအတွက် ဖြစ်တေ။ ယေကေလည်း သူရို့စာ ရွီးကောက်ခြင်းကို ခံရစာဖက်က ထာဝရဘုရား၏ ချစ်ခင်သူ ဖြစ်ကတ်တေ။ အရာ သူရို့ အဖိုးအဖီးအစိုင်လာရို့ဘားမာ ခံထားလီစာ ဂတိတော်အကြောင်းန ထာဝရဘုရားစာ သူရို့ကို ကောင်းကောင်း ချစ်တေ၊ 29အကြောင်းကား ထာဝရဘုရားစာ အသူ့ကိုမဆို ခေါ်ရေဆိုကေ အရာ ပီးလှူရေဆိုကေ သူ၏ ဆုံးဖြတ်ချက်စာ တစ်ခါလည်း မပြောင်းလှဲ။ 30တစ်ချိန်ခါ နင်ရို့စာ ထာဝရဘုရား၏ စကားတော်ကို မနာခံလီကတ်၊ ယေကေလည်း ဒေဂု ယုဒလူမျိုးရို့ မနာခံမှု အကြောင်းန နင်ရို့စာ ထာဝရဘုရား၏ သနားကြင်နာခြင်းကို ခံရကတ်ပျာ။ 31ယင်းပိုင်တထန် ဒေဂု ယုဒလူမျိုးရို့စာ မနာခံ ဖြစ်နီကတ်တေ၊ အကြောင်းကား နင်ရို့ ထာဝရဘုရား၏ သနားကြင်နာခြင်းကို ခံရခြင်းကနီရို့ သူရို့လည်း သနားကြင်နာခြင်းကို ခံရကတ်ပတ်စီအတွက် ဖြစ်တေ။ 32ဟိသမျ လူရို့ မနာခံမှု အကြောင်းန ထာဝရဘုရားစာ သူရို့ကို ထောင်ကျသားကိုပိုင် လှောင်ထားလီရေ၊ အကြောင်းကား သူစာ ဟိသမျ လူရို့ဘားမာ ကိုယ့်သနားကြင်နာခြင်းကို ဖေါ်ပြချင်လီရေ။

ထာဝရဘုရားကို ချီမွမ်းခြင်း

33ထာဝရဘုရား၏ သနားကြင်နာခြင်းစာ ကောင်းကောင်း ကြီးမြတ်တေ။ သူ၏ ညာဏ်ပညာတိစာ ကောင်းကောင်း နက်နဲရေ! အရာ သူ၏ စစ်ဆေးခြင်းန ဆုံးဖြတ်ချက်ကို နားမလည်နိုင်။ 34ယင်းပိုင်တထန် ကျမ်းစာမာ ရွီးရို့ ဟိရေ၊
“အသျှင်၏ စိတ်သဖေါကို အသူ သိနိုင်ရေလည်း?
သူ့ကို အသူ အကြံညာဏ် ပီးနိုင်ရေလည်း?
35ထာဝရဘုရား ကျေးဇူးပြန်ဆပ်ဖို့ ကျလတ်အောင်
အသူ ထာဝရဘုရားကို ကျေးဇူးပြုလီရေလည်း?”

36အကြောင်းကား ထာဝရဘုရားရာ ဟိသမျ အားကုံးကို ဖန်ဆင်းလီရေ။ ထို ဟိသမျ အားကုံး သူ့ကနီရို့ အရာ သူ၏ ဘုန်းတန်ခိုး ပေါ်ထွန်းဖို့အတွက် တည်မြဲနီရေ။ ကမ္ဘာအဆက်ဆက် ထာဝရဘုရား၏ ဘုန်းကြီးပါစီ။ အာမန်။