Rom 12 | RmzSC | STEP | ညီအစ်ကိုမောင်နမှရို့၊ ထာဝရဘုရားစာ ငါရို့ကို ကောင်းကောင်း သနားကြင်နာလီရေ။ ထို ဟိသမျ သနားကြင်နာခြင်း အကြောင်းန ငါ နင်ရို့ကို အရေးတကြီး တောင်းပန်ရေ၊ နင်ရို့မာ ကိုယ်ခန္ဓာကို အသက်ဟိစာ၊ သန့်ရှင်းစာ အရာ ထာဝရဘုရား၏ နှစ်သက်စာ ယဇ်ကောင်အဖြစ် ထာဝရဘုရားဘားမာ တင်အပ်ကတ်။ ဒေသျှင့်စာ မှန်ကန်ခြင်းနည်းလမ်းန ထာဝရဘုရားကို ဝတ်ပြုကိုးကွယ်ခြင်း ဖြစ်တေ။

Romans 12

ထာဝရဘုရားအတွက် အသက်ရှင်ခြင်း

1 ညီအစ်ကိုမောင်နမှရို့၊ ထာဝရဘုရားစာ ငါရို့ကို ကောင်းကောင်း သနားကြင်နာလီရေ။ ထို ဟိသမျ သနားကြင်နာခြင်း အကြောင်းန ငါ နင်ရို့ကို အရေးတကြီး တောင်းပန်ရေ၊ နင်ရို့မာ ကိုယ်ခန္ဓာကို အသက်ဟိစာ၊ သန့်ရှင်းစာ အရာ ထာဝရဘုရား၏ နှစ်သက်စာ ယဇ်ကောင်အဖြစ် ထာဝရဘုရားဘားမာ တင်အပ်ကတ်။ ဒေသျှင့်စာ မှန်ကန်ခြင်းနည်းလမ်းန ထာဝရဘုရားကို ဝတ်ပြုကိုးကွယ်ခြင်း ဖြစ်တေ။ 2 နင်ရို့ ဒေ ဆိုးယုတ်စာ လောကသားရို့ပိုင် မနီထိုင်ကတ်ကေ့။ ယင်းထက်ပင် နင်ရို့မာ စိတ်ကို အသစ် ပျင်ဆင်ဖို့အတွက် ထာဝရဘုရားကို အခွင့်ပီးကတ်။ ယင်းပိုင်ဆိုကေ နင်ရို့ ထာဝရဘုရား၏ အလိုတော်ကို သိရကတ်လိမည်။ ထာဝရဘုရား၏ အလိုတော်စာ ကောင်းမြတ်တေ၊ အပြည့်အစုံ စင်ကြယ်ရေ အရာ သူ့ကို နှစ်သက်အောင် လုပ်တေ။

3 ထာဝရဘုရား၏ ကြီးမြတ်စာ သနားကြင်နာခြင်းကို ငါ ခံရလီရေ။ ထိုသနားကြင်နာခြင်း အကြောင်းန ငါ နင်ရို့ အားကုံးသူကို ပြောရေ၊ နင်ရို့ ထင်မှတ်ဖို့ သင့်စာထက် ပိုရို့ ကိုယ်ရို့ကို အထင်မကြီးကတ်ကေ့။ ယေကေလည်း ထာဝရဘုရားက ရကတ်စာ ကျုံခြင်းတရားန နင်ရို့ ကိုယ်ရို့ကို စစ်ဆေးရို့ ကြည့်ကတ်။ 4 အကြောင်းကား ငါရို့ အားကုံးသူ ကိုယ်ခန္ဓာမာ အင်္ဂါ အများကြီး ဟိရေ၊ ယေကေလည်း ဟိသမျ အင်္ဂါတိစာ တစ်မျိုးတည်း အလုပ်ကို မလုပ်ကတ်။ 5 ယင်းပိုင်တထန် ငါရို့စာ လူဦးရေ အများကြီး ဖြစ်ကေလည်း ခရစ်တော်န ပေါင်းကျခြင်းကနီရို့ ငါရို့ အားကုံးသူ တစ်ကိုယ်တည်း ဖြစ်ကတ်ပျာ။ ငါရို့ အားကုံးသူ ထိုခန္ဓာမာ အင်္ဂါတိ ဖြစ်ကတ်တေ အရာ ငါရို့စာ တစ်ယောက်န တစ်ယောက် ဆက်ရို့ ဟိကတ်တေ။ 6 ထာဝရဘုရား၏ သနားကြင်နာခြင်းအတိုင်း ငါရို့စာ အခြား အခြား ဆုကျေးဇူးကို ခံရကတ်ပျာ။ အသူမဆို ဘုရားသတင်းပို့သူအဖြစ် ထာဝရဘုရား၏ စကားတော်ကို ဟောပြောဖို့ ဆုကျေးဇူးကို ရရေဆိုကေ သူစာ ကိုယ့်ကျုံခြင်းတရားအတိုင်း ထာဝရဘုရား၏ စကားတော်ကို ဟောပြော။ 7 အသူမဆို ပြုဇုဖို့ ဆုကျေးဇူးကို ရရေဆိုကေ သူစာ ပြုဇု အရာ အသူမဆို သွန်သင်ပီးဖို့ ဆုကျေးဇူးကို ရရေဆိုကေ သူစာ သွန်သင်ပီး။ 8 အသူမဆို အားပီးချက်စကား ပြောဖို့ ဆုကျေးဇူးကို ရရေဆိုကေ သူစာ အားပီးချက်စကား ပြော၊ အသူမဆို လှူဖို့ ဆုကျေးဇူးကို ရရေဆိုကေ သူစာ စေတနာစိတ်န ပီးလှူ၊ အသူမဆို အုပ်ချုပ်ဖို့ ဆုကျေးဇူးကို ရရေဆိုကေ သူစာ ဝါသနာစိတ်န အုပ်ချုပ် အရာ အသူမဆို ကူညီဖို့ ဆုကျေးဇူးကို ရရေဆိုကေ သူစာ စိတ်အပျော်န ကူညီ။

ခရစ်တော်ကို ကျုံသူရို့ နီထိုင်ခြင်း

9 ချစ်ခြင်းမေတ္တာမာ ဟန်ဆောင်မှု မပါစီကတ်ကေ့။ ဆိုးယုတ်စာတိကို ရွန်ကတ် အရာ ကောင်းမြတ်စာတိကို နနောင်းတည်းထားကတ်။ 10 နင်ရို့ ခရစ်တော်ကို ကျုံသူအနေန တစ်ယောက်ကို တစ်ယောက် အသဲကစွဲရို့ ချစ်ကတ်။ ကိုယ့်ကိုထက် အခြားတစ်ယောက်ကို ပိုရို့ ရိုသေကတ်။ 11 နင်ရို့ အမြဲတိုင်း ထာဝရဘုရား၏ အလုပ်မာ မပျင်းမရိဘိုင်းန ကြိုးစားအားထုတ်ရို့ လုပ်နီကတ် အရာ နင်ရို့ စိတ်ပါကိုယ်ပါ အသျှင်၏ အလုပ်ကို အမြဲတိုင်း လုပ်နီကတ်။ 12 နင်ရို့ ရှိကဟိစာ မျှော်လင်းချက်အတွက် ဝမ်းသာကတ်။ ဒုက္ခ-ဝေဒနာကို စိတ်ရှည်ခြင်းန သည်းခံကတ် အရာ အမြဲတိုင်း ဆုတောင်းနီကတ်။ 13 ထာဝရဘုရား၏ လူရို့ ဆင်းရဲကတ်တေခါ ကူညီမစားကတ်။ အာဂန္တုရို့ကို ကြိုဆိုလက်ခံကတ်။

14 နင်ရို့ကို ညှဉ်းဆဲသူရို့ကို ကျိန်ဆဲမထည့်ဘိုင်းန မေတ္တာပို့ကတ်။ 15 အခြားလူရို့ ပျော်ကတ်တေခါ နင်ရို့လည်း သူရို့နအတူ ပျော်ကတ် အရာ အခြားလူရို့ ဝမ်းနည်းရို့ ငိုကတ်တေခါ နင်ရို့လည်း သူရို့နအတူ ငိုကတ်။ 16 နင်ရို့ တစ်ယောက်န တစ်ယောက် အလှပ သသင့်တတင် နီကတ်။ နင်ရို့ စိတ်နီမကြီးကတ်ကေ့၊ ယင်းထက်ပင် တာဝန်သျှေကိုလည်း ထန်းဆောင်ကတ်။ နင်ရို့ ကိုယ့်ကိုကိုယ် ညာဏ်ပညာသျှင် ဟို့ မမှတ်ကတ်ကေ့။

17 အသူမဆို မတရားလုပ်တေဆိုကေ သူ့ကို လက်စားမဆပ်ကတ်ကေ့။ ဟိသမျ လူရို့ ကောင်းရေ ဟို့ မှတ်ဖို့စာ အလုပ်ကို လုပ်ဖို့အတွက် စိတ်ဝင်စားကတ်။ 18 နင်ရို့ တတ်နိုင်သလှောက် ဟိသမျ လူရို့န သသင့်တတင် နီထိုင်ဖို့စာကို ကြိုးစားကတ်။

19 ချစ်ခင်စာ ညီအစ်ကိုမောင်နမှရို့၊ နင်ရို့ ကိုယ်တိုင် လက်စား မဆပ်ကတ်ကေ့။ ယင်းထက်ပင် ထာဝရဘုရားကို လက်စားဆပ်ဖို့အခွင့် ပီးကတ်။ ကျမ်းစာမာ ရွီးရို့ ဟိရေ၊
“မတရားလုပ်သူကို လက်စားဆပ်ဖို့စာ အခွင့်အာဏာ ငါ့မာ ဟိရေ။
သူ့အပြစ်န ထိုက်တန်စာ ဒါဏ်ကို ငါ သူ့ကို ပီးဖို့။”

20 ကျမ်းစာမာ ရွီးရို့ ဟိရေအတိုင်း၊
“နင့် ရန်သူ အဝမ်းဆာရေဆိုကေ နင် သူ့ကို စားဖို့ ပီးလိုက်။
အရာ သူစာ ရီသောက်မွတ်တေဆိုကေ နင် သူ့ကို ရီသောက်ဖို့ ပီးလိုက်။
ယင်းပိုင် လုပ်တေဆိုကေ နင့် ရန်သူ အရှက်ကျလိမည်။”

21 ဆိုးယုတ်ခြင်းဘားမာ အရှုံး မခံကတ်ကေ့၊ ယင်းထက်ပင် ကောင်းမြတ်စာကို အသုံးပြုရို့ ဆိုးယုတ်ခြင်းကို အနိုင်ယူကတ်။