Romans 15

ကျုံခြင်း အားနည်းသူရို့ကို ကူညီဖို့စာအကြောင်း

1ငါရို့ ကျုံခြင်းတရား ခိုင်မာသူရို့စာ ကိုယ်ရို့ အကျိုးကို မရှာဘိုင်းန ကျုံခြင်းတရား အားနည်းသူရို့ကို ကူညီမစားကတ်ရဖို့။ အရာ ငါရို့စာ သူရို့မာ အားနည်းခြင်းတိကို သည်းခံကတ်ရဖို့။ 2ကျုံသူညီအစ်ကိုမောင်နမှရို့မာ ကျုံခြင်းတရား ခိုင်မာလတ်အောင် ငါရို့ အားကုံးသူ သူရို့ကို ကောင်းမြတ်စာ အလုပ်တိကို လုပ်ဖို့အတွက် ကူညီကတ်ရဖို့။ 3အကြောင်းကား ခရစ်တော်လည်း ကိုယ့်အကျိုးကို မရှာလီ။ ကျမ်းစာမာ ရွီးရို့ ဟိရေ၊ “ကိုယ်တော်ကို ပုတ်ခတ်ရို့ ပြောစာစကား အားကုံး အကျွန့်ဘားမာ ကျပါရေ။”

4အယင်ကပင် ကျမ်းစာမာ ရွီးထားခစာ စကားတိစာ ငါရို့ကို သွန်သင်ပီးဖို့အတွက် ဖြစ်တေ။ ငါရို့စာ ထိုကျမ်းစာက သည်းခံခြင်းန စိတ်အားရကတ်တေ။ အရာ ထိုသည်းခံခြင်းန စိတ်အား ရခြင်းကနီရို့ ငါရို့ မျှော်လင်းချက်ကို ရကတ်တေ။ 5သည်းခံခြင်းန စိတ်အားရခြင်းစာ ထာဝရဘုရားက လာရေ။ ခရစ်တော်ယေရှု၏ အလိုတော်အတိုင်း နင်ရို့ အသက်ရှင်နီကတ်တေခါ ထာဝရဘုရားစာ နင်ရို့ အားကုံးသူကို စိတ်တစ်ညီတစ်ညွန့်တည်း လုပ်ပါစီ။ 6ယင်းပိုင်ဆိုကေ နင်ရို့ တစ်ညီတည်းစိတ်န အရာ တစ်ခွန်းတည်းစကားန ငါရို့မာ အသျှင်ယေရှုခရစ်တော်၏ အဖထာဝရဘုရားကို ချီမွမ်းဖို့ ရကတ်လိမည်။

သတင်းကောင်း အားကုံးသူအတွက်

7ယင်းအတွက်န ခရစ်တော် နင်ရို့ကို ချစ်ခြင်းမေတ္တာန လက်ခံလီစာပိုင် နင်ရို့လည်း တစ်ယောက်ကို တစ်ယောက် ချစ်ခြင်းမေတ္တာန လက်ခံကတ်။ ယင်းပိုင်ဆိုကေ ထာဝရဘုရား၏ ဘုန်းတန်ခိုး ပေါ်ထွန်းလိမည်။ 8– 9နင်ရို့ မှတ်ထားကတ်၊ ထာဝရဘုရားစာ အဖိုးအဖီးအစိုင်လာရို့ဘားမာ ဂတိတော်ကို ခံထားလီရေ၊ အရာ ထာဝရဘုရား၏ ဂတိတော်ကို ပြည့်စုံအောင် လုပ်ဖို့အတွက် ခရစ်တော်စာ ယုဒလူမျိုးရို့ဘားမာ ပြုဇုသူ ဖြစ်ဖို့ ကျလီရေ။ ခရစ်တော်စာ ယင်းပိုင် ကျွန်ဖြစ်ခြင်းကနီရို့ ထာဝရဘုရား၏ ဂတိတော် မှန်ရေဆိုစာကို သက်သီ ပြချင်လီရေ၊ အရာ ယုဒမဟုတ်သူရို့ကို ထာဝရဘုရား၏ သနားကြင်နာခြင်း အကြောင်းန သူ့ကို ချီမွမ်းလည်း ချီမွမ်းစီချင်လီရေ။ ထိုစကားတိပိုင် ကျမ်းစာမာ ရွီးရို့ ဟိရေ၊
“ယင်းအတွက်န အခြားလူမျိုးရို့အထဲမာ အကျွန် ကိုယ်တော်ကို ချီမွမ်းပါမည်၊
အရာ ကိုယ်တော်၏ နာမည်ကို ချီမွမ်းရို့ တေးခြင်း ဆိုပါမည်။”

10ကျမ်းစာမာ အရာလည်း ရွီးရို့ ဟိရေ၊
“အိုး ယုဒမဟုတ်သူရို့၊
ထာဝရဘုရား၏ လူရို့နအတူ နင်ရို့ သူ့ကို ချီမွမ်းကတ်။”

11ကျမ်းစာမာ အရာလည်း ရွီးရို့ ဟိရေ၊
“အိုး ဟိသမျ လူမျိုးရို့၊
အသျှင်၏ ဘုန်းတန်ခိုးကို ချီမွမ်းကတ်။
အိုး ဟိသမျ လူရို့၊
သူ့ကို ချီမွမ်းကတ်။”

12အရာတစ်ပြန် ဟေရှာယစာ ပြောလီရေ၊
“ယေရှဲ၏ အမျိုးအနွယ်အထဲက တစ်ပါး ကြွလာလိမည်၊
သူစာ ဟိသမျ လူမျိုးရို့ကို အုပ်ချုပ်လိမည်။
အရာ ဟိသမျ လူမျိုးရို့ သူ့ကို မျှော်လင်းကတ်လိမည်။”

13မျှော်လင်းချက်၏ ထာဝရဘုရား နင်ရို့မာ ကျုံခြင်းတရားကနီရို့ နင်ရို့ကို ဟိသမျ ဝမ်းသာခြင်းန ငြိမ်းချမ်းခြင်း ပြည့်စုံအောင် လုပ်ပါစီ။ ယင်းပိုင်ဆိုကေ သန့်ရှင်းသောဝိညာဉ်တော်၏ တန်ခိုးကနီရို့ နင်ရို့ စိတ်နှလုံးမာ မျှော်လင်းချက် ပြည့်စုံလိမည်။

ကိုယ့်အလုပ်အကြောင်းကို ပေါလု တင်ပြခြင်း

14ငါ့ ညီအစ်ကိုမောင်နမှရို့၊ နင်ရို့ စိတ်နှလုံးမာ ဟိသမျ ကောင်းမြတ်စာ အလိုဆန္ဒန ပြည့်စုံရေ၊ နင်ရို့မာ ဟိသမျ ညာဏ်ပညာန ပြည့်စုံရေ အရာ နင်ရို့ တစ်ယောက်ကို တစ်ယောက် ဆုံးမဩဝါဒ ပီးနိုင်ရေဆိုစာ အကြောင်းနပတ်သပ်ရို့ ငါ နင်ရို့ကို ကျုံရေ။ 15– 16ယေကေလည်း တစ်ချိုး အကြောင်းအရာတိကို ငါ နင်ရို့ကို အတွက်ဖေါ်ရို့ ပီးချင်ရေ။ ယင်းအတွက်န ရဲဝံ့သတ္တိ ဖြည့်ရို့ ငါ နင်ရို့တို့ စာရွီးလိုက်စာ ဖြစ်တေ၊ အကြောင်းကား ယုဒမဟုတ်သူရို့ဘားမာ ခရစ်တော်ယေရှု၏ ပြုဇုသူအဖြစ် အလုပ်လုပ်ဖို့အတွက် ထာဝရဘုရား ငါ့ကို သနားလီရေ။ ငါစာ ယုဒမဟုတ်သူရို့ကို ထာဝရဘုရား၏ နှစ်သက်စာ ယဇ်ကောင် ဖြစ်စီချင်ရေ အရာ သူရို့ကို သန့်ရှင်းသောဝိညာဉ်တော်ကနီရို့ သန့်ရှင်းစီချင်ရေ။ ယင်းအတွက်န ယုဒမဟုတ်သူရို့ဘားမာ ထာဝရဘုရား၏ သတင်းကောင်းကို ငါ ဟောပြောနီရေ။ 17ယေရှုခရစ်တော်န တစ်ကိုယ်တည်း ဖြစ်ရို့ ငါလုပ်စာ ထာဝရဘုရား၏ အလုပ်ကို ယူရို့ ငါ့မာ ဘော်ကြော့ကြင်းဖို့စာ အခွင့်အာဏာ ဟိရေ။ 18ခရစ်တော် ငါ့ကနီရို့ လုပ်လီစာ အလုပ်တိကို ပယ်ရို့ အခြားအလုပ်တစ်ခုကိုလည်း ယူရို့ ငါ ဘော်ကြော့မကြင်း။ 19ခရစ်တော်စာ ငါ့စကားန ငါ့အလုပ်ကနီရို့၊ အံ့ဩဖွယ်-နိမိတ်လက္ခဏာ အလုပ်ကနီရို့ အရာ သန့်ရှင်းသောဝိညာဉ်တော်၏ တန်ခိုးကနီရို့ ယုဒမဟုတ်သူရို့ကို ထာဝရဘုရားတို့ ယူလာလီရေ။ ယင်းအတွက်န ယေရုရှလင်မြို့ကပင်စရို့ ဣလုရိပြည်တိုင်အောင် ဟိသမျ နေရာမာ ခရစ်တော်၏ အကြောင်း သတင်းကောင်းကို ငါ အပြည့်အစုံ ဟောပြောပြီးဗျာ။ 20ခရစ်တော်၏ နာမည်ကို တစ်ခါလည်း မကြားဖူးစာ နေရာမာ သတင်းကောင်းကို ဟောပြောဖို့စာရာ ငါ့မာ ရွယ်မှတ်ချက် ဖြစ်တေ၊ အကြောင်းကား အခြားတစ်ယောက် အသင်းတော် တည်ဆောက်လီစာ နေရာမာ ငါ တရားမဟောချင်။ 21ကျမ်းစာမာ ရွီးရို့ ဟိရေ၊ “အသျှင်၏ အကြောင်းကို ဟောပြောဖူးသူတစ်ယောက်လည်း မဟိ၊ ယေကေလည်း ထိုအကြောင်းကို လူရို့ မြင်ရကတ်လိမည်။ အရာ သူရို့စာ ထိုအကြောင်းကို တစ်ခါလည်း မကြားဖူးကတ်၊ ယေကေလည်း သူရို့ နားလည်ကတ်လိမည်။”

ရောမမြို့တို့ လားဖို့အတွက် ပေါလု စီစဉ်ခြင်း

22ယင်းအတွက်န ငါ အခါပေါင်းများစွာ နင်ရို့တို့ လာဖို့ ကြိုးစားကေလည်း လာဖို့ မရနိုင်လီ။ 23ယေကေလည်း ဒေဂု ထို ဟိသမျ နေရာတိမာ ငါ့အတွက် အလုပ် မဟိဗျာ။ အရာ နှစ်ပေါင်းများစွာ အယင်ကပင် ငါ နင်ရို့တို့ လာချင်လီရေ။ 24ယင်းအတွက်န ငါ စပိန်ပြည်တို့ လားရေလမ်းခရီးမာ နင်ရို့တို့ ဝင်ခချင်ရေ။ ငါ မျှော်လင်းနီစာကား၊ ယင်းခါ နင်ရို့နအတူ ပပျော်ပပါး လိုင်းကေရက် နီခဖို့။ ယင်းနောက် နင်ရို့ ငါ့ကို စပိန်ပြည်တို့ ပို့ဖို့အတွက် စီစဉ်ဖို့ ရကတ်ဖို့။ 25ယေကေလည်း ဒေဂု ငါ ထာဝရဘုရား၏ လူရို့ကို ကူညီဖို့အတွက် ယေရုရှလင်မြို့တို့ လားဖို့ ကျရေ၊ 26အကြောင်းကား ယေရုရှလင်မြို့မာဟိစာ ထာဝရဘုရား၏ လူရို့အထဲမာ ဆင်းရဲသူ-ဆင်းရဲသားရို့ ဟိကတ်တေ။ မာကေဒေါနိပြည်နယ်သားရို့န အာခါယပြည်နယ်သားရို့စာ ထိုဆင်းရဲသားရို့ကို ကူညီဖို့အတွက် ကိုယ်ရို့ နိုင်အားသလှောက်ကို အလှူတန်းကား ထည့်ကတ်လီရေ။ 27သူရို့စာ ထိုအလှူတန်းကားကို စေတနာစိတ်န ထည့်ကတ်လီရေ။ ထိုပြည်နယ်မာ အသင်းတော်တိစာ ယေရုရှလင်မြို့မာ ထာဝရဘုရား၏ လူရို့ကို ကူညီဖို့ တာဝန် ဟိကတ်တေ၊ အကြောင်းကား ယုဒမဟုတ်သူရို့စာ ယုဒလူမျိုးရို့က ဝိညာဉ်၏ ဆုကျေးဇူးကို အဝီငလီကတ်တေ။ ယင်းအတွက်န ယုဒမဟုတ်သူရို့လည်း ယုဒလူမျိုးရို့ကို အိမ်ထောင်ရေး အကြောင်းမာ ကူညီဖို့ သင့်ကတ်တေ။ 28ယင်းအတွက်န ထိုအလှူတန်းကားတိ ယေရုရှလင်မြို့တို့ ပပြောင့်သသား ပို့ရို့ ရောက်ပျာဆိုစာကို သိပြီးခါရာ ငါ နင်ရို့ကနီရို့ စပိန်ပြည်တို့ လားဖို့။ 29ငါ နင်ရို့တို့ လာရေခါ ခရစ်တော်၏ ပြည့်စုံစာ ပဿိကို ယူလာဖို့ဆိုစာကို ငါ သိရေ။

30ညီအစ်ကိုမောင်နမှရို့၊ ငါရို့မာ အသျှင်ယေရှုခရစ်တော်ကနီရို့ အရာ သန့်ရှင်းသောဝိညာဉ်တော်၏ ချစ်ခြင်းမေတ္တာကနီရို့ ငါ နင်ရို့ကို အရေးတကြီး တောင်းပန်ရေ။ နင်ရို့ ငါနအတူ ငါ့အတွက် ထာဝရဘုရားဘားမာ ဆုတောင်းပီးကတ်။ 31ငါ ယုဒပြည်နယ်မာဟိစာ ထာဝရဘုရားကို ငြင်းပယ်သူရို့အလက်က ရွတ်လတ်အောင် အရာ ယေရုရှလင်မြို့မာဟိစာ ထာဝရဘုရား၏ လူရို့ ငါ့ကူညီခြင်းကို လက်ခံလတ်အောင် နင်ရို့ ဆုတောင်းပီးကတ်။ 32ယင်းပိုင်ဆိုကေ ထာဝရဘုရား၏ အလိုတော်အတိုင်း ငါ စိတ်အပျော်န နင်ရို့တို့ လာဖို့ ရဖို့ အရာ ငါရို့ တစ်ယောက်ကို တစ်ယောက် အားပီးကူညီဖို့ ရကတ်ဖို့။ 33ငြိမ်းချမ်းခြင်း၏ အသျှင်ထာဝရဘုရား နင်ရို့ အားကုံးသူနအတူ ဟိပါစီ။ အာမန်။