Romans 16
ပေါလု၏ နှုတ်ဆက်ခြင်း
1ငါ ဒေဂု ငါရို့မာ နမှတော်သူ ဖိဗေအကြောင်းနပတ်သပ်ရို့ ထောက်ခံချက် ပီးရေ။ သူစာ ကင်ခြေမြို့ အသင်းတော်မာ ပြုဇုသူတစ်ယောက် ဖြစ်တေ။ 2ထာဝရဘုရား၏ လူရို့ကို ချစ်ခြင်းမေတ္တာန လက်ခံဖို့ သင့်စာပိုင် အသျှင်၏ နာမည်ကို ထောက်ရို့ နင်ရို့ သူ့ကို လက်ခံလီကတ်။ ဇာမဆို တစ်ခု နင်ရို့က အကူညီ တောင်းရေဆိုကေ နင်ရို့ သူ့ကို ကူညီလီကတ်။ အကြောင်းကား သူစာ လူအများကြီးကို ကူညီလီရေ၊ ယင်းထက်မက သူစာ ငါ့ကိုလည်း ကူညီလီရေ။ 3ပြစ်ကိလန အာကုလကို ငါ နှုတ်ဆက်တေ ဟို့ ပြောလီ။ သူရို့စာ ငါနအတူ ခရစ်တော်ယေရှု၏ သာသနာပြုဖက်သား ဖြစ်ကတ်တေ။ 4ငါ့ကို ကယ်ဆယ်ဖို့အတွက် သူရို့စာ သီဘေးနတွိကတ်လီရေ။ သက်သက် ငါ တစ်ယောက်တည်း ကျေးဇူးတင်စာ မဟုတ်သိ။ ယင်းထက်ပင် ဟိသမျ ယုဒမဟုတ်သူရို့ အသင်းတော်တိလည်း ထိုအကြောင်းနပတ်သပ်ရို့ ကျေးဇူးတင်ကတ်တေ။ 5သူရို့ အိမ်မာ အသင်းတော်အနေန တစ်စုတည်းစုရို့ သတင်းဝင်ကတ်သူရို့ကိုလည်း နှုတ်ဆက်လီ။ အရာ ငါချစ်ခင်စာ မိတ်ဆွေ ဧပဲနက်ကို နှုတ်ဆက်လီ။ သူစာ အာရှိပြည်နယ်မာ ပထမဆုံး ခရစ်တော်ကို ကျုံရို့ လက်ခံလီသူ ဖြစ်တေ။ 6နင်ရို့အတွက် ကြိုးစားအားထုတ်ရို့ အလုပ်လုပ်သူ မာရိကို နှုတ်ဆက်လီ။ 7အန္ဒြောနိတ်န ယုနိကို နှုတ်ဆက်လီ။ သူရို့စာ ငါ့ပိုင် ယုဒလူမျိုး ဖြစ်ကတ်တေ အရာ သူရို့လည်း ငါနအတူ ထောင်ကျလီကတ်တေ။ တမန်တော်ရို့လည်း သူရို့ကို ကောင်းကောင်း ရိုသေကတ်တေ။ အရာ သူရို့စာ ငါ့ထက်အယင် ခရစ်တော်ကို ကျုံလီကတ်တေ။ 8အသျှင်ကို ကျုံသူအနေန ငါချစ်ခင်စာ မိတ်ဆွေ အမ္ပလိကို နှုတ်ဆက်လီ။ 9ငါရို့နအတူ ခရစ်တော်၏ သာသနာပြုဖက်သား ဥရဗန်န ငါချစ်ခင်စာ မိတ်ဆွေ သတာခုကို နှုတ်ဆက်လီ။ 10အရာ ခရစ်တော်၏ တပည့်အစစ်ဖြစ်သူ အပေလေန အာရိတ္တောဗုလု အိမ်သားရို့ကို နှုတ်ဆက်လီ။ 11ငါ့ပိုင် ယုဒလူမျိုးဖြစ်သူ ဟေရောဒျုန်ကို နှုတ်ဆက်လီ။ နာကိသု မိသားစုရို့အထဲမာဟိစာ အသျှင်၏ လူရို့ကို နှုတ်ဆက်လီ။ 12တရုဖဲနန တရုဖေါသဆိုစာ မိန်းမရို့ကို နှုတ်ဆက်လီ။ ထိုမိန်းမရို့စာ အသျှင်၏ သာသနာပြုစာ အလုပ်မာ လုပ်နီကတ်တေ။ ငါ ချစ်ခင်စာ ပေရသိကိုလည်း နှုတ်ဆက်လီ။ ထိုမိန်းမလည်း အသျှင်၏ အလုပ်မာ ပင်ပန်းခံရို့ လုပ်နီရေ။ 13အရာ ခရစ်တော်ကို ကျုံရေအတွက်န နာမည်ကျော်သူ ရုဖုန သူ့အမိကို နှုတ်ဆက်လီ။ သူ့အမိစာ ငါ့အမိနတူရေ။ 14အသုံကြိတ်၊ ဖလေကုန်၊ ဟေရမေ၊ ပတ်ရောဘ၊ ဟေရမ အရာ သူရို့နအတူ ခရစ်တော်ကို ကျုံသူ အခြားညီအစ်ကိုမောင်နမှရို့ကိုလည်း နှုတ်ဆက်လီ။ 15ဖိလောလုပ်၊ ယုလိ၊ နေရုန သူ့မာနမှ၊ ဩလုမ္ပ အရာ သူရို့နအတူ နီထိုင်ကတ်စာ ထာဝရဘုရား၏ ဟိသမျ လူရို့ကို နှုတ်ဆက်လီ။ 16ချစ်ခြင်းမေတ္တာစိတ်န နင်ရို့ တစ်ယောက်ကို တစ်ယောက် နှုတ်ဆက်လီကတ်။ ခရစ်တော်၏ ဟိသမျ အသင်းတော်တိ နင်ရို့ကို နှုတ်ဆက်လိုက်ကတ်တေ။အဆုံး အမှာစကား
17ညီအစ်ကိုမောင်နမှရို့၊ တစ်ချိုးလူရို့စာ အသင်းခွဲခြင်းန တားဆီးခြင်းတိကို လုပ်နီကတ်တေ။ ယင်းသျှင့်တိ နင်ရို့ ရလီကတ်စာ သွန်သင်ချက်န မကိုက်ညီ။ ယင်းအတွက်န ငါ နင်ရို့ကို အရေးတကြီး တောင်းပန်ရေ၊ သူရို့ကို နင်ရို့ သတိပီးလီကတ် အရာ သူရို့က အဝီး ရှောင်ရို့ နီလီကတ်၊ 18အကြောင်းကား သူရို့စာ ငါရို့ အသျှင်ခရစ်တော်၏ ဝတ်ကို မပြုဘိုင်းန ကိုယ်ရို့အဝမ်းအတွက် လောကဝတ်ကို ပြုနီကတ်တေ။ သူရို့စာ နုညံ့ချိုသာစာ စကားန မြှောင့်ပီးစာ စကားကို ပြောရို့ စိတ်ညံ့သူရို့ကို လိမ်နီကတ်တေ။ 19နင်ရို့ နာခံကတ်တေဆိုစာ အကြောင်းကို အားကုံးသူ ကြားရကတ်ပျာ။ ယင်းအတွက်န ငါ နင်ရို့ကို ကောင်းကောင်း နှစ်သက်တေ။ ယေကေလည်း ငါ နင်ရို့ကို ကောင်းမြတ်စာကို သိရို့ လက်ခံစီချင်ရေ အရာ ဆိုးယုတ်စာတိက အဝီး ရှောင်ရို့ နီစီချင်ရေ။ 20ငြိမ်းချမ်းခြင်း၏ အသျှင်ထာဝရဘုရားစာ မာရ်နတ်ကို အယင်အမြန် နင်ရို့ အခြီအောက်မာ ချရို့ ကြိတ်ဘိုက်လိမည်။ ငါရို့မာ အသျှင်ယေရှုခရစ်တော်၏ သနားကြင်နာခြင်း နင်ရို့နအတူ ဟိပါစီ။အဆုံးခေါက် နှုတ်ဆက်ခြင်း
21ငါ့ လုပ်ဖေါ်ကိုင်ဖက်ဖြစ်သူ တိမောသေစာ နင်ရို့ကို နှုတ်ဆက်တေ။ လုကိ၊ ယာသုန် အရာ သောသိပတရုလည်း နင်ရို့ကို နှုတ်ဆက်ကတ်တေ။ သူရို့လည်း ငါ့ပိုင် ယုဒလူမျိုး ဖြစ်ကတ်တေ။ 22ငါ တေရတိ၊ ပေါလု၏ နှုတ်ထွက်စကားန ငါ ဒေ စာစောင်ကို ရွီးလိုက်တေ။ ငါလည်း အသျှင်၏ တပည့်အနေန နင်ရို့ကို နှုတ်ဆက်တေ။ 23ငါ့ကို ဧည့်ခံသူစာ အရာ အသင်းတော် လူရို့ တစ်စုတည်းစုရို့ သတင်းဝင်နီကတ်စာ အိမ်သျှင် ဂါယုစာ နင်ရို့ကို နှုတ်ဆက်တေ။ ဒေ မြို့အသင်းတော်မာ ဘဏ္ဍာထိန်းဖို့ တာဝန် ရသူ ဧရတ္တုန ငါရို့မာ ကျုံသူညီအစ်ကို ကွာတုလည်း နင်ရို့ကို နှုတ်ဆက်ကတ်တေ။ 24 ▼▼ပထမဆုံး ရွီးလီစာ ဂရိဘာသာ ကျမ်းစာအဟောင်းတိမာ ဒေ အခန့်ငယ် ၂၄-မာ စကားတိ ရွီးရို့ မဟိပါ။
ငါရို့မာ အသျှင်ယေရှုခရစ်တော်၏ ကျေးဇူးတော် နင်ရို့ အားကုံးသူနအတူ ဟိပါစီ။ 25ငါစာ ယေရှုခရစ်တော်၏ အကြောင်း သတင်းကောင်းကို ဟောပြောနီရေ။ ငါ့ သတင်းကောင်းကနီရို့ နင်ရို့ကို ခိုင်မာအောင် လုပ်ဖို့စာ တန်ခိုး ထာဝရဘုရားမာ ဟိရေ။ ဒေ သတင်းကောင်းစာ ထာဝရဘုရား၏ ဖုံးရွှက်စာ ရွယ်မှတ်ချက် ဖြစ်တေ။ ထာဝရဘုရားစာ နှစ်ပေါင်းများစွာ အယင်ကပင် ဒေ ဖုံးရွှက်စာ ရွယ်မှတ်ချက်ကို တစ်ယောက်ဘားမာလည်း မဖေါ်ပြဘိုင်းန ထားလီရေ၊ 26ယေကေလည်း ဒေဂု ဒေ ဖုံးရွှက်စာ ရွယ်မှတ်ချက် ပေါ်ထွန်းလာဗျာ။ ဒေ ဖုံးရွှက်စာ ရွယ်မှတ်ချက် အကြောင်းကို ငါ ဟောပြောနီရေ။ ဒေ ဖုံးရွှက်စာ ရွယ်မှတ်ချက်စာ ထာဝရဘုရား၏ အာဏာအတိုင်း ဘုရားသတင်းပို့သူရို့ ရွီးထားခြင်းကနီရို့ ဟိသမျ လူမျိုးရို့ဘားမာ ပေါ်ထွန်းလာဗျာ၊ အကြောင်းကား သူရို့စာ ခရစ်တော်ကို ကျုံရို့ ထာဝရဘုရား၏ စကားတော်ကို လိုက်နာကတ်ပတ်စီအတွက် ဖြစ်တေ။ 27ထာဝရဘုရား တစ်ပါးတည်းရာ ညာဏ်ပညာန ပြည့်စုံရေ။ ယေရှုခရစ်တော်၏ အလုပ်ကနီရို့ ကမ္ဘာအဆက်ဆက် ထာဝရဘုရား၏ ဘုန်းကြီးပါစီ။ အာမန်။
Copyright information for
RmzSC