Romans 3

ထာဝရဘုရား၏ သစ္စာတရား

1ယင်းပိုင်ဆိုကေ အခြားလူရို့ထက် ယုဒလူမျိုးရို့မာ ဇာ အမြတ် ဟိလီရေလည်း? သူရို့မာ အရီဖျားလှီးမင်္ဂလာ ခံယူခြင်းစာ ဇာ အကျိုး ဟိရေလည်း? 2ဟုတ်တေ၊ ဟိသမျ ဖက်က အမြတ် ဟိလီရေ။ ထာဝရဘုရားစာ ကိုယ့်စကားတော်ကို ပထမဆုံး ယုဒလူမျိုးရို့ကို ပီးလီရေ။ 3ယေကေလည်း သူရို့အထဲက တစ်ချိုးလူရို့စာ သစ္စာဖေါက်ကတ်လီရေ။ ယင်းပိုင်ဆိုကေ သူရို့ သစ္စာဖေါက်ကတ်လီရေအတွက်န ထာဝရဘုရားလည်း သစ္စာဖေါက်ဖို့လော? 4တစ်ခါလည်း မဖေါက်နိုင်။ ဟိသမျ လူရို့ သစ္စာဖေါက်ကတ်ကေလည်း ထာဝရဘုရားစာ အမြဲတိုင်း သစ္စာတည်ရေ။ ကျမ်းစာမာ ရွီးရို့ ဟိရေ၊ “ကိုယ်တော်၏ ဆုံးဖြတ်ချက်စာ မှန်ပါရေ အရာ ကိုယ်တော် တရားစစ်ဆေးရေခါလည်း အောင်မြင်ပါလိမည်။”

5ငါရို့ အပြစ် လုပ်ကတ်တေခါ ထာဝရဘုရား၏ ရိုးသားခြင်းကို ပပွင့်လလင်း မြင်ရရေ။ ယင်းပိုင်ဆိုကေ ထာဝရဘုရား ငါရို့ကို အပြစ်ဒါဏ် ပီးရေခါ မတရားလုပ်တေ ဟို့ ပြောဖို့စာလော? တစ်ချိုးလူရို့ စဉ်းစားကတ်တေအတိုင်း ငါ ထိုစကားတိကို ပြောစာ ဖြစ်တေ။ 6ထာဝရဘုရား တစ်ခါလည်း မတရားမလုပ်! ထာဝရဘုရား မတရားလုပ်တေဆိုကေ လူ့သားရို့ကို ဇာပိုင်ပျင်ရို့ တရားစစ်ဆေးဖို့လည်း?

7တစ်ယောက်တစ်ရီ ပြောနိုင်စရာ ဟိရေ၊ “ငါ မုတ်သားစကား ပြောခြင်းကနီရို့ ထာဝရဘုရား ဘုန်းတန်ခိုးကို ခံရရေဆိုကေ ငါ ဇာဖို့ အပြစ်သေအဖြစ် စစ်ဆေးခြင်းကို ခံရနီစာလည်း?” 8ယင်းပိုင်ဆိုကေ၊ “လာလတ်၊ ကောင်းမြတ်စာ အကျိုးကို ရလတ်အောင် ငါရို့ ဆိုးယုတ်စာ အလုပ်ကို လုပ်နီကတ်မည်” ဟို့ ပြောဖို့စာလော? ငါရို့ ယင်းပိုင် ဟောပြောနီရေ ဆိုပြီးကေ တစ်ချိုးလူရို့ ငါရို့ကို ပုတ်ခတ်ရို့ စကား ပြောကတ်တေ။ သူရို့စာ အမှန် အပြစ်ဒါဏ်ကို ခံရကတ်လိမည်။

အပြစ်နကင်းသူ တစ်ယောက်လည်း မဟိ

9ငါရို့ ဒေဂု ဇာ ပြောဖို့လည်း? ငါရို့ ယုဒလူမျိုးရို့စာ ယုဒမဟုတ်သူရို့ထက် ပိုရို့ သာရေလော? တစ်ခါလည်း မသာ၊ အကြောင်းကား ယုဒလူမျိုး ဖြစ်စီ၊ ယုဒမဟုတ်သူရို့ ဖြစ်စီ၊ သူရို့ အားကုံးသူ အပြစ်၏ တန်ခိုးအောက်မာ ဟိကတ်တေဆိုစာကို ငါရို့ အယင်လည်း ပြောလီကတ်ပျာ။ 10ကျမ်းစာမာ ရွီးရို့ ဟိရေ၊
“အပြစ်နကင်းသူဆိုစာ တစ်ယောက်လည်း မဟိကတ်။
11တစ်ယောက်လည်း နားလည်သူ မဟိကတ်၊
အရာ ထာဝရဘုရားကို လိုက်ရို့ ရှာသူ တစ်ယောက်လည်း မဟိကတ်။
12အားကုံးသူ မှားယွင်းစာလမ်းတို့ လားခကတ်ပျာ၊
အားကုံးသူ တစ်ညီတည်း ပျက်လားခကတ်ပျာ။
ကောင်းမှုကုသိုလ် လုပ်နီသူတစ်ယောက်လည်း မဟိဗျာ။
13သူရို့မာ ပစစာ ဖွင့်ထားစာ သင်္ချိုင်းတွင်းနတူရေ။
သူရို့စာ လူကို လျှာန လိမ်ကတ်တေ၊
အရာ သူရို့ နခွမ်းမာ မြိန်အဆိပ် ဟိရေ။
14သူရို့ ပစမာ ကျိန်ဆဲထည့်ခြင်းန တတောက်ခါးစာ စကားတိ ပြည့်စုံနီရေ။
15သူရို့စာ လူကို သတ်ဖို့အတွက် ဗြီးရို့ လိုက်ကတ်တေ၊
16သူရို့ လားရေလမ်းမာ ပျက်စီးခြင်းန ဖီးဒုက္ခ ဟိရေ။
17သူရို့စာ ငြိမ်းချမ်းရာလမ်းကို မသိကတ်၊
18သူရို့စာ ထာဝရဘုရားကို မကြောက်ကတ်။”

19ငါရို့ သိရေ၊ မောရှေ၏ ပညှတ်တရားစာ သက်သက် ပညှတ်တရားကို ရလီသူရို့အတွက် ဖြစ်တေ။ ယင်းအတွက်န တစ်ယောက်လည်း ကိုယ့်အပြစ်အတွက် အကြောင်းပြဖို့ မရဗျာ။ ယုဒလူမျိုး ဖြစ်စီ၊ ယုဒမဟုတ်သူရို့ ဖြစ်စီ၊ အားကုံးသူ ထာဝရဘုရားဘားမာ အပြစ်သင့်ရို့ ဟိကတ်တေ။ 20ပညှတ်တရားကို လိုက်နာကေပင်လည်း ထာဝရဘုရားစာ လူကို သူတော်ကောင်းအဖြစ် လက်ခံစာ မဟုတ်၊ ယေကေလည်း လူရို့စာ ပညှတ်တရားကနီရို့ ကိုယ်ရို့အပြစ်ကို သိရကတ်တေ။

လူကို သူတော်ကောင်းအဖြစ် လက်ခံခြင်း

21ယေကေလည်း ဒေဂု ပညှတ်တရား မပါဘိုင်း ထာဝရဘုရား လူကို ဇာပိုင်ပျင်ရို့ သူတော်ကောင်းအဖြစ် လက်ခံရေလည်းဆိုစာကို ပေါ်ထွန်းဗျာ။ ပညှတ်တရားန ဘုရားသတင်းပို့သူရို့လည်း ထိုအကြောင်းကို သက်သီ ပီးခကတ်လီရေ။ 22ထာဝရဘုရားစာ ကျုံခြင်းတရားကနီရို့ လူရို့ကို သူတော်ကောင်းအဖြစ် လက်ခံရေ။ ယေရှုခရစ်တော်ကို ကျုံသူရို့ အားကုံးသူကို ထာဝရဘုရား ယင်းပိုင် လက်ခံလိမည်။ ယုဒလူမျိုးန ယုဒမဟုတ်သူရို့မာ တစ်ခုပိုင်လည်း ခွဲခြားမှု မဟိ၊ 23အကြောင်းကား အားကုံးသူ အပြစ် လုပ်နီကတ်ပျာ အရာ ထာဝရဘုရား၏ ဘုန်းတန်ခိုးန ဝီးလားခကတ်ပျာ။ 24ယေကေလည်း ထာဝရဘုရားစာ သူရို့ကို ကိုယ့်သနားကြင်နာခြင်း အကြောင်းန ခရစ်တော်ယေရှုကနီရို့ အပြစ်က အခမဲ့ လွတ်မြောင့်ခြင်း ပီးဗျာ အရာ သူရို့ကို သူတော်ကောင်းအဖြစ် လက်ခံဗျာ။ 25ယေရှုခရစ်တော်ကို ကျုံသူရို့စာ သူရို့မာ ကျုံခြင်းတရားကနီရို့ အပြစ်က ခွင့်ရွှတ်ခြင်းကို ရကတ်ပတ်စီအတွက် ထာဝရဘုရားစာ ယေရှုကို ယဇ်ကောင်အဖြစ် ငါရို့ကို ပီးလီရေ။ ကိုယ်အမြဲတိုင်း တရားမျှတခြင်းန အလုပ်လုပ်နီရေဆိုစာကို ထာဝရဘုရားစာ ယေရှုကို ငါရို့အပြစ်အတွက် ယဇ်ပူဇော်ခြင်းကနီရို့ ဖေါ်ပြလီရေ။ ယင်းအတွက်န ထာဝရဘုရားစာ ကိုယ့်စိတ်ရှည်သည်းခံခြင်း အကြောင်းန ခိုက်ဟောင်းက လူရို့ကိုလည်း အပြစ်ဒါဏ် မပီးလီ။ 26ထာဝရဘုရား အယင် စိတ်ရှည်သည်းခံလီစာ အကြောင်းကား သူစာ ကိုယ့်သားတော် ယေရှုကို ယဇ်ပူဇော်ခြင်းကနီရို့ ကိုယ်သူတော်ကောင်း ဖြစ်တေဆိုစာကို ဒေအချိန်မာ ဖေါ်ပြချင်လီရေ။ သူကိုယ်တိုင် သူတော်ကောင်း ဖြစ်တေ အရာ အသူမဆို ယေရှုကို ကျုံရေဆိုကေ သူ့ကိုလည်း သူတော်ကောင်းအဖြစ် လက်ခံရေဆိုစာကို ပြဖို့အတွက် ကိုယ့်သားတော်ကို ယဇ်ပူဇော်လီရေ။

27ယင်းအတွက်န ငါရို့မာ ဘော်ကြော့ကြင်းစရာ တစ်ခုလည်း မဟိဗျာ။ ဇာဖို့ မဟိစာလည်း? ပညှတ်တရားကို လိုက်နာရေအတွက်န ဘော်ကြော့ကြင်းစရာ မဟိ။ အဓိက စကား ဖြစ်တေကား၊ ကျုံခြင်းတရားမာ ဘော်ကြော့ကြင်းစရာ တစ်ခုလည်း မဟိ၊ 28အကြောင်းကား ငါရို့ သိရေ၊ ထာဝရဘုရားစာ ကျုံခြင်းတရား အကြောင်းန လူရို့ကို သူတော်ကောင်းအဖြစ် လက်ခံရေ၊ ယေကေလည်း ပညှတ်တရားကို လိုက်နာရေအတွက်န လက်ခံစာ မဟုတ်။

29ယင်းပိုင်ဆိုကေ ထာဝရဘုရားစာ သက်သက် ယုဒလူမျိုးရို့မာ ဘုရားလော? ယုဒမဟုတ်သူရို့မာ ဘုရား မဟုတ်လော? ဟုတ်တေ၊ ယုဒမဟုတ်သူရို့မာလည်းသောက် ဘုရား ဖြစ်တေ၊ 30အကြောင်းကား ထာဝရဘုရားကား တစ်ပါးတည်းရာ ဟိရေ။ သူစာ ယုဒလူမျိုးရို့ကို ကျုံခြင်းတရားကနီရို့ သူတော်ကောင်းအဖြစ် လက်ခံစာပိုင် ယုဒမဟုတ်သူရို့ကိုလည်း လက်ခံဖို့။ 31ယင်းပိုင်ဆိုကေ ထိုကျုံခြင်းတရား အကြောင်းန ငါရို့စာ ပညှတ်တရားကို ပယ်ဘိုက်လိုက်ဖို့စာလော? တစ်ခါလည်း မပယ်။ ယင်းထက်ပင် ပညှတ်တရား၏ စကား မှန်ရေဆိုစာကို ငါရို့ သက်သီပြနီကတ်တေ။